Коми кыв рочьяслы (4-ӧд класс, 2 юкӧн, 2000)

Е. Н. Вязова, А. В. Сизова

ЮГЫД КОДЗУВ

4 класса челядьлы комиӧн сёрнитны велӧдчан небӧг

2 юкӧн

Л. А. Моторина редакция улын

Велӧдчан небӧгсӧ серпасаліс Т. Г. Шаргородская

Вӧзйис
Коми Республикаса йӧзӧс велӧдан да вылыс тӧдӧмлунъяс министерство

Москва
Московский городской фонд поддержки школьного книгоиздания
Издательско-продюсерский центр «Дизайн. Информация. Картография»
2000

Условнӧй пасъяс:

— сёрнит тадзи
— нюмсер, шмонь, теш
— тӧдмав
— кывчукӧр
— велӧд сьыланкыв
— содтӧд удж
— омоним
— синоним
— антоним

ТӦВСЯ РЫТЫН МОЙДЧӦМ.

1–2

КЫТЧӦ? КӦНІ? КЫТЫСЬ? юалӧмъяс вылӧ вочавидзысь кывъяс.

-ӧ
-ын
-ысь

1 удж. Вочавидз юалӧмъяс вылӧ.

1. Кытчӧ мунӧны челядь?
2. Кӧні сулалӧ коз?
3. Кытысь мунӧны челядь?

2 удж. Содтав чутъяс местаӧ колана кывъяс.

Выльвося каникул дырйи ми ветлім (кытчӧ?) ... . Видзӧдім серамбана мойд (кӧні?) ... . (Кытысь?) ... локтігӧн ворсыштім Вежа Стефан изэрд вылын сулалысь коз пу дорын.

3 удж. Тӧдмав нӧдкывъяссӧ да инды эмакывъясысь суффиксъяссӧ.

1. Керкаӧ пыран — он аддзы,
Ывлаӧ петан — он аддзы. (с...д)
2. Вӧрӧ кайӧ — тупӧсь чӧвталӧ,
Вӧрысь локтӧ — тупӧсь чӧвталӧ. (к.к т.й)
3. Ичӧтик керкаын олӧ, кӧзяинлысь овмӧссӧ видзӧ.

4 удж. Лыддьы. Содтав колана суффиксъяс.

ГӦЛИК.

Вайис пӧльӧ вӧр... рос,
Меным гӧлик вӧчис.
Чышка кильчӧ выв и пос.
Мезда удж... пӧч... .

В. Лодыгин.

Коркӧ важӧн сӧдз ю бердын,
Гажа яг нӧрысса эрд... ,
Ог тӧд ылын али матын,
Гашкӧ-й, Коми му... татӧн,
Аслас ичӧтик гӧль позъяс
Оліс-выліс кыйсьысь гозъя.

Илля Вась.

5 удж. Лыддьы «Пера-багатыр» мойдысь юкӧн.

...Пералы сетіс цар ставсӧ, мый корис:
Вӧр-ваын кыйсьыны грамота сетіс,
Тывъявны-кутавны сьӧла да байдӧг
Шӧлкӧвӧй казь, — гашкӧ, ветымын шайта,
Нинкӧмсӧ сьӧктавны зӧлӧтӧй пыжъян,
Мамыслы козьналіс кашемир чышъян.
Пералы зэв вӧлі нимкодь да рад...
Воис со Москваысь вӧрзьыны кад.
Пераыд босьтіс сэк ассьыс кузь лызь,
Шутёвтіс сэтчаньӧ, корлісны кысь,
Дзирдалан лым вывті тюлӧ
Лямпаӧн ас чужан мулань.

Илля Вась.

Висьтав, мый тэ тӧдан Пера-багатыр йылысь.

6 удж. Юалан кывъяс отсӧгӧн гиж сёрникузяяс.

Пера (кытысь?) ... вайис кашемир чышъян да зӧлӧтӧй пыжъян. Цар сетіс грамота кыйсьыны (кӧні?) ... . Багатыр шутёвтіс лямпаӧн (кытысь?) ... (кытчӧ?) ... .

7 удж. Гиж сёрникузяяс. Петкӧдлы кывъяслысь йитчӧмсӧ юалӧмъяс да стрелка отсӧгӧн.

кодлы? мый?

Вӧч тадзи: Пиыс мамлы вӧчис козин.

1. Челядь уль лымйысь вӧчисны лым мачьяс.
2. Изэрд шӧрын сулалісны лӧз йиысь вӧчӧм чомъяс.
3. Самолёт пырис сук ру пытшкӧ.

Усьӧ кӧ посни, гежӧдик лым — вермас дыр кежлӧ ёна кӧдздӧдны, гырысь лым — шондӧдӧм водзын.

гежӧдик — редкий
нинкӧм — лапоть, лапти
пыжъян — кочедык (инструмент для плетения лаптей)
сьӧктавны — сплести (лапоть или кузов)
тывъявны — ловить неводом

3–4

КЫТІ? МЫЙЛАНЬ? МЫЙСЯНЬ? МЫЙӦДЗ? юалӧмъяс вылӧ вочавидзысь эмакывъяс.

-сянь
-ті, -ӧд
-лань
-ӧдз

8 удж. Серпас серти лӧсьӧд сёрникузяяс.

9 удж. Лыддьы да чутъяс местаӧ содтав кывъяс.

Миша асывнас (кысянь?) ... котӧртіс (кытчӧ?) ... . Сійӧ вуджис Савин улича да мӧдӧдчис (кытчӧ?) ... . (Кытчӧдз?) ... вӧлі верст джын.

* * *

КЫДЗИ МУННЫ КИРОВ ПАРКӦДЗ.

— Бур лун. Висьталӧй, пӧжалуйста, кыдзи мунны Киров паркӧдз?
— Висьтала. А ті кытысь асьныд?
— Ми воим Изьваысь.
— Паркӧдз позьӧ мунны подӧн, но ветлӧны и автобусъяс.
— Ми Сыктывкарын медводдзаысь, нинӧм на ог тӧдӧй. Кутшӧм автобусӧ позьӧ сӧвны?
— Пуксьӧй витӧд номера автобусӧ да мунӧй Сӧветскӧй уличаӧдз. Автобусысь петӧм бӧрын лэччӧй веськыда Сыктыв юлань.
— Ыджыд аттьӧ.

10 удж. Содты колана суффиксъяс да гиж.

1. Пон бергӧдчис кӧзяин... . 2. Шонді бергӧдчӧ тулыс... . 3. Шонді садьмис, кӧдзыд ваӧн мыссис, енэж шӧр... сэсся кыссис. 4. Каникул дырйи челядь ворсӧны ывлаын рыт... . 5. Кыйсьысь вӧр... мунігӧн казяліс йӧра кок туй.

11 удж. Вочавидз юалӧмъяс вылӧ.

1. Кымын чассянь тэ велӧдчан? Кор помалан?
2. Кымын часӧдз тэ котралан рытнас?
3. Кытчӧ ветлывлан урокъяс бӧрын?
4. Кытысь воис велӧдчысь?

12 удж. Помав сёрникузяяссӧ колана эмакывъяс бӧрйӧмӧн.

1. Тӧвнас челядь котралӧны ... .
2. Аски ми паныдасям нималана ... .
3. Уджыд полӧ ... .
4. Он вермы овны ... .
5. Театрын нимкодясим ... .
6. Ывлаын пемыд ... .

гижыськӧд
битӧг
ворсысьясӧн
ватӧг
уджач мортысь
лыжиӧн

13 удж. Велӧдчы лыддьыны кывпесан.

Джуджыд джадйын джуджыд доз,
Джоджсянь джаджйӧдз джуджыд пос.

Журналысь.

14 удж. Лыддьы висьтсӧ.

Выльвося праздник бӧрын пасйылісны Рӧштво. Сы кежлӧ лӧсьӧдчылісны куим лун чӧж. Рӧштвосянь заводитчывліс вежадыр. Йӧз ветлісны керкаысь керкаӧ, чолӧмалісны ӧта-мӧднысӧ, ыдждӧдлісны Христосӧс, сьылісны вичкоса сьыланкывъяс.
Том йӧз войнас лымйӧн тыртавлісны пыран ӧдзӧсъяс, киссьтавлісны пес чипасъяс, гажӧдчылісны Крещенньӧӧдз. Ставӧн гадайтчисны: нывъяс кӧсйисны тӧдмавны жӧниксӧ, а олӧма йӧз — выль урожай воӧм йылысь.

1. Кыдзи пасйӧны Рӧштвосӧ тэнад семьяын?
2. Корсь -сянь, -ысь, -ӧ, -ӧдз, -ӧс суффиксъяса эмакывъяс да сувтӧд юалӧмъяс.

КУТ ТӦД ВЫЛАД.

Василей кӧ сэзь — пув да чӧд лоӧ уна.
Тӧлыс кӧ кӧдзыд да мича, гожӧмыс лоӧ бур.
Лымйыс кӧ ёна усьӧ — гожӧмыс зэра лоӧ.
гажӧдчыны — веселиться
Рӧштво — Рождество
сэзь — безоблачный

5

Эмакывлысь суффиксъяс вынсьӧдӧм.

15 удж. Лыддьы мойдсӧ рольяс серти.

ШЫР ДА ГАДЬ.
(Коми мойд).

Олісны-вылісны Шыр да Гадь. Ӧтчыд найӧ мӧдӧдчисны корсьны нянь. Мунісны-мунісны и воисны шор дорӧ. Поскыс абу, вуджны некыті. Шыр вайис идзас сі да шор вомӧн пуктіс.
— Но, гаддьӧй, вай вудж, — шуӧ Шыр.
— Ме ог лысьт. Тэ медводз вудж, — корӧ Гадь.
Шыр скӧрмис Гадь вылӧ.
— Эк, — шуӧ, — полысь кӧч тэ.
И ачыс мӧдӧдчис вуджны. Воис шӧрӧдзыс да идзас сіыс чеги. Шыр уси ваӧ да вӧйи. А Гадь сераліс, сераліс да поті.

1. Воисны-ӧ сьӧлӧм вылад Шыр да Гадь? Эз кӧ, мыйла?
2. Аслад кывъясӧн серпасав мойдсӧ. Инды сюрӧса да ӧтсяма юкӧдъяссӧ медбӧръя кык сёрникузясьыс.

16 удж. Лыддьы да инды эмакывъясысь суффиксъяссӧ.

1. Ӧтчыд кӧин ваӧ вӧйис,
Петіс васьыс сулик ва.
Весиг кӧин овлӧ йӧйӧн,
Ваад кӧ нин вӧйӧма.

2. Вӧрад ошкыд, гашкӧ, сё,
Оз кӧ унаджык на ло.
Коркӧ джуджыд пусянь
Ставсӧ лыддя гусьӧн!

Г. Юшков.

17 удж. Лыддьы. Чутъяс местаӧ содтав суффиксъяс.

БУР ЁРТ.

(Кодлӧн?) Петя... эм кык ёрт — Вася и Серёжа. Найӧ велӧдчӧны нёльӧд классын.
Урок помын велӧдысь сетіс налы гортса удж: лыддьыны висьт да артавны пример.
(Кӧні?) Горт... Петя лыддис висьтсӧ, а примерсӧ эз артав. Аски асывнас сійӧ локтіс (кытчӧ?) школа... да корис (кодъясӧс?) ёртъяс... отсавны сылы. Вася сетіс (кодлы?) Петя... тетрадьсӧ да шуис:
— На, гиж. Менам ставыс стӧч.
А Серёжа шуис:
— Эн гиж, Петя. Ме тэныд гӧгӧрвоӧда, а тэ сэсся ачыд арталан.

1. Мыйла висьтыслы сетӧма «Бур ёрт» ним?
2. Лӧсьӧд «Менам ёрт» юрним улын дженьыдик висьт.

18 удж. Гиж сёрникузяяссӧ. Чутъяс местаӧ содтав суффиксъяс.

Батьыс пиыслы козьналіс небӧг. Васялы кажитчис небӧг... . Небӧг... эмӧсь мича серпасъяс, мойдъяс, кывбуръяс, кывпесанъяс, висьтъяс.

гадь — пузырь
идзас — солома
сі — сухая травинка
сулик — промокший насквозь

6

19 удж. Лыддьы мойдсӧ.

РУЧ ДА КӦЗА.

Котӧртӧ руч сикт помті. И друг сійӧ юкмӧсӧ уси. А юкмӧсыс вӧлі джуджыд, бӧрсӧ петны оз вермы. Пукалӧ руч юкмӧсын да шогсьӧ.
Туй кузя мунӧ кӧза. Мунӧ и тошнас пыркӧдӧ, сюрнас шенасьӧ. Локтіс юкмӧс дорӧ, видзӧдліс пытшкас, аддзис сэтысь ручӧс да юалӧ:
— Мый тэ сэні, кузь бӧж, вӧчан?
— Шойчча, чукля сюрӧй, — вочавидзис руч. — Сэні выліас жар, а тані лӧсьыд, ыркыд... Горшыд кӧ косьмӧ, тані кӧдзыд ва эм. Ю, мыйта колӧ...
А кӧзалӧн важӧн нин горшыс косьмӧ.
— Чӧскыд ваыс? — юалӧ.
— Зэв чӧскыд, — нюмъялӧ руч, — местаыс кыкнаннымлы тырмас...
Кӧза чеччыштіс юкмӧсӧ, муртса ручсӧ эз лямӧд. Руч сылы шуӧ:
— Эк, тэ, чеччыштнытӧ кыдзи колӧ он куж... Видзӧд, кыдзи менӧ ванас резін, муртса эн лямӧд...
Чеччыштіс руч сэки кӧзалы мыш вылас, сысянь сюр вылас да звирк петіс юкмӧсысь.
Кӧза дыр оліс юкмӧсын, тшыгйысла муртса эз кув. Коньӧрӧс ӧдва аддзисны да сюрӧдыс кыскисны.
Петіс юкмӧсысь да шуис аслыс: «Сідз и колӧ тэд. Мӧдысь кежлӧ быдтор думыштӧмӧн кутан вӧчны!»

С. Раевский.

1. Кутшӧм мойдъяс тэ тӧдан С. Раевскийлысь?
2. Висьтав аслад кывйӧн тайӧ мойдсӧ.
3. Артмӧд да гиж ичӧтик мойд пемӧсъяс йылысь.

Заводит тадзи: Олісны-вылісны ...

20 удж. Велӧд да гиж.

ЧОЙ.

Ывла вылын пемыд вой,
Важӧн шебрас улын чой.
Узь жӧ, ичӧт чойӧй, узь
Да эн крӧвать вывсьыд усь.

Н. Мингалёва.

шебрас, эшкын — одеяло, покрывало

21 удж. Инды эмакывъясысь суффиксъяссӧ. Лӧсьӧд сёрникузяяс.

Понлӧн, чипанлысь, мӧслы, куканьӧс, каньпиӧн, кычикӧд, вӧвтӧг, ыжлысь, кӧзатӧг.

22 удж. Лӧсьӧд да гиж сёрникузяяс.

Вӧч тадзи: Кор? коді? мый вӧчис? кытчӧ? — Асывнас Петя муніс школаӧ.

1. Кӧні? кодъяс? мый вӧчисны? мыйӧн?
2. Кор? кыдзи? мый вӧчӧны? кодъяс?
3. Кутшӧм? мый? мый вӧчӧ? кӧні?
4. Коді? мый вӧчис? кодӧс? кутшӧм? мыйысь?
5. Кор? кытысь? мый вӧчӧны? мыйяс?

лямӧдны — давить, раздавить
ӧдва — едва
резны — брызгать, побрызгать
сюр — рога
тырмыны — хватать

7

23 удж. Лыддьы мойдсӧ сьӧлӧмсяньыд.

КӦЧЛӦН ПРАЗДНИК.

Талун кӧчлӧн чужан лун ӧд.
Воас гӧсьт да гӧсьтя уна.
Кильчӧ вылӧ сувтіс кӧч —
Гӧсьтьяс воасны вот стӧч.
Ма со кыскӧ ош дзонь бӧчка
Колӧ козьнавны ӧд кӧчтӧ!
Сьӧкыд кыскынысӧ — мат...
Кӧчыд лоас вывті рад!
Ичӧт ур со, щӧть кодь уска,
Вайӧ телега тыр сус коль.
Телегаыс дзурлик-дзур...
Кӧчлы лоас гӧснеч бур!
Войбыд вуграсьӧма ручыс
(Сійӧс некытӧн он удзӧд!)
Шедіс сылы уна мык —
Нуӧ кӧчыдлы пуд кык.
Ылі сиктсянь (дас верст, гашкӧ)
Кань со кыскӧ, ружтӧ-кашкӧ
Ыджыд-ыджыд кашник нӧк.
(Моз жӧ вӧрзьы сылӧн гӧг!)
Кӧза нӧбалӧма морков,
Воис кӧч керкаӧ коркӧ.
Рудзалӧма ки и кок...
«Лок жӧ, кӧза сваття, лок!»
Козин эз вай Ваткыль миян,
Но эз тӧждысь зонмыд сійӧ,
Эм кӧ Ваткыль, оз босьт шог:
Гудӧкӧн йӧктӧдас кок.
Веж луд вылын чужан лунӧ
Гажа праздник кӧчлӧн мунӧ,
Гажыс ыджыд, гажыс ён —
Йӧктӧ ош и руч, и пон.

Илля Вась.

1. Вочавидз юалӧмъяс вылӧ.

1) Кодлӧн талун чужан луныс?
2) Кодъяс локтісны гӧсьтитны кӧч ордӧ?
3) Мыйла лоас вывті рад кӧчыд?
4) Кутшӧм гӧснеч вайис ур кӧчлы?
5) Кутшӧм чери нуӧ руч кӧчлы?

2. Кутшӧм воысьясӧс абу серпасалӧма художникыс?

3. Нуӧдӧй мойдчан рыт.

24 удж. Корсь «Кӧчлӧн праздник» мойдысь пемӧс нимъяс да гиж уна лыдын. Содты ачыд вит пемӧс ним.

25 удж. Тӧдмав нӧдкывъяссӧ. Велӧд.

1. Шыльӧдан кӧ — мойда,
Дӧзмӧдан кӧ — дойда,
Лэчыд менам гыж,
Пиньӧй абу ныж.
2. Кӧть кыдз мунӧ, а бӧръя кокыс век панйӧ.
3. Мудер пемӧс ас бӧрсяыс кок туй чышкӧ.
4. Пуысь-пуӧ чеччӧ-лэбӧ,
Пипу горсйӧ асьсӧ дзебӧ.
Киӧн кутны оз на сюр,
Челядь, коді тайӧ? ...

26 удж. Лӧсьӧд пемӧсъяс йылысь небӧг. Пырт сэтчӧ:

1. Гортса да вӧрса пемӧсъяс йылысь висьтъяс.
2. Серпасъяс.
3. Нӧдкывъяс да шусьӧгъяс.

Лӧсьӧд небӧгсӧ кык юкӧнысь: гортса пемӧсъяс, вӧрса пемӧсъяс.

27 удж. Комиӧд да гиж кывтэчасъяс.

лиса
медведь
волк
заяц

кодь тшыг
кодь полысь
кодь мудер
кодь ён

1. Мыйла тадзи шуӧны?
2. Артмӧд сёрникузяяс.

кашник — глиняный горшок
кутны — словить; поймать
панйыны — опередить
пуд — пуд (масса, равная 16 кг)
рудзавны — оттянуть руку
сус — кедр

8

ЧЕЛЯДЬДЫРӦЙ-СЁМАЙБЫРӦЙ...

28 удж. Лыддьы висьтсӧ.

ВУРСЬЫСЬ.

Танялӧн ыджыд чойыс, Маша, кужис вурсьыны. Танялы окота жӧ лои вурсьынысӧ да кутіс Маша дорын зыньгыны:
— Вай ме вурся жӧ, ме ӧд мичаа кута.
— Зэв на ичӧт, быдман да сэки вурсьы, — стрӧга вочавидзис Маша.
Но Таня эз лэдзчысь. Сэки Маша сетіс ичӧт чойыслы ситеч тор. Емӧ пысалісны сунис, и Таня зіля кутчысис удж бердӧ. Недыр вурсьӧм мысти Таня казяліс, мый емыс абу.
— Емӧй кытчӧкӧ воши, — кутіс няргыны Таня.
— Корсь, воштін кӧ.
Таня быдлаысь корсис, но ем эз сюр. Ковмис Машалы эновтны вурсянсӧ да тшӧтш корсьны.
— Быттьӧ ваӧ вӧйи, — джоджті уялігтыр шуаліс Маша. — Эн-ӧ нин ньылышт? Вомад босьтлін?
— Босьтлі.
— Голяыд доймӧ?
— Доймӧ.
— Сідзкӧ, ньылыштін. Ӧні кулан.
Таня заводитіс лимзавны да юаліс:
— Мый нӧ сэсся лоӧ, збыльысь кула али мый? Бӧрдӧм шы вылӧ кухняысь локтіс мамыс.
— Мый лои, мый бӧрдан, Таня?
— Мамӧ, ме кула, ме ньылышті ем. Ма-а-мукӧ-ӧ-ӧй!
Кӧть кыдз мамыс эз такӧд Таняӧс, сійӧ век горзіс:
— Мамӧ-ӧ! Мамук!
Мам и ачыс тшӧтш повзис, но век жӧ эз эскы, мый Таня збыльысь ньылыштіс емсӧ. Бара на быдлаысь корсисны, но весьшӧрӧ.
Мамыс сыркъялысь Таняӧс босьтіс моздорас да топӧдіс морӧс бердас. Друг Таня мыйыськӧ ойӧстіс. Видзӧдлісны, а емыс Таня партук зептысь чурвидзӧ.
— Ок тэ, вурсьысь, вурсьысь, — сӧмын и шуис мамыс.

З. Рогова.

зыньгыны, лимзавны, няргыны — хныкать

1. Кодъяс йылысь гижӧма тайӧ висьтас?
2. Мыйла гижысьыс сетӧма висьтыслы «Вурсьысь» ним. А тэ кутшӧм ним сетан?
3. Мыйӧ велӧдӧ тайӧ висьтыс?

29 удж. Гиж да инды суффиксъяссӧ.

Тасьтіын, мойдын, киын, пӧчысь, мамлӧн, ёртлысь, воклы, совтӧг, няньтӧг, нывъёртла.

30 удж. Висьтав ӧти кывйӧн:

Йӧла рок, чӧдъя кисель — тайӧ ... .
Сарапан, ковта, сыръя чышъян, чуня кепысь, водздӧра — тайӧ ... .
Кыснан, вугыр, гымга, шатин тайӧ ... .
Гут, ном, лӧдз, чирк — тайӧ ... .

31 удж. Корсь да гиж лӧсялана эмакывъяс.

Кыис (мый?) ... , ... , ... .
Кыйис (кодӧс?) ... , ... , ... .
Кайис (кытчӧ?) ... , ... , ... .
Кайис (коді?) ... , ... , ... .

32 удж. Лыддьы. Содты колана суффикс.

Коля кайис садса пу. ,
Чеччыштіс, но эз во му. ,
Ӧти ув сэн чеги — трач!
Мӧдӧ пысасис важ гач.

Г. Юшков.

весьшӧрӧ — напрасно, зря
ньылыштны — проглотить
сыркъялысь — рыдающий
чурвидзны — торчать

9–10

33 удж. Лыддьы висьтсӧ.

ЧУЖАН ЛУН.

Мишук олӧ карын. Сентябр 5-ӧд лунӧ сылы тырӧ сизим арӧс. Чужан лунсӧ пасйыны корисны сиктса бабсӧ.
Таись баб тэчис пестер тыр гӧснеч, босьтіс тшӧтш кык важ коми небӧг: «Висер вожса мойдъяс» да «Сё коми сьыланкыв».
Автобус ӧдйӧ нуӧ карлань. Баб пукалӧ да мӧвпалӧ чолӧмалӧм йылысь.
Со и кар, Мишукъяслӧн патераыс. Керкаын кылӧ гажа шы, ворсӧ музыка. Мишуклӧн ёртъясыс воӧмаӧсь нин. Пырис Таись пӧч, сувтіс порог дорас. Мышку саяс пестер, киас бедь, юрас мича дзоридзьяса чышъян, кокас сера чулки да югыд колоши.
— А кӧні нӧ бабӧн шуысьыс? Оз тай паныдав бабсӧ? Ачыс письмӧӧн корӧма-а.
Мишук тӧдіс Таись бабсӧ, нюммуніс.
— Мый нӧ, Мишук, тешкодь бабыд? Эн тӧд менӧ? Ме ӧд тэнӧ эг жӧ пыр тӧд! Быдмӧмыд да сӧвмӧмыд, со нин сизим арӧс. Чужан лун вылад корӧмыд да тэрмаси. Этайӧ чибӧсӧ пос помысь кватиті. Сӧлі сы вылӧ, швичниті плетьӧн, и мӧдӧдчис рӧдйӧн. Вуджалім нюръяс, посни ёльяс, визув юяс и джуджыд гӧра вомӧн чеччыштім.
— Пӧръясян, бабӧ, пӧръясян! — сералӧ Мишук. — Бедь тайӧ, а абу чибӧ. И гӧраясыс тані абуӧсь. Из гӧра эм, да сійӧ ылын.
— О да тэ, Мишук, збыль нин ыджыд! Из гӧра тӧдан!
— Тӧда, ме быдтор тӧда нин, бабӧ! Лыддьысьны кужа и.
— А ӧні восьтам пестерӧс. Мый сэні эм? Эм и юмовтор, и курыдтор, и солатор. Черинянь, тшака нянь, лукъя нянь, пувъя нянь, пызя шаньга, шыдӧса шаньга, варенньӧ банка, порсь тшӧг, нӧк гырнич.
Козин вылад челядь горшӧсь, кытшалісны бабӧс, видзӧдӧны.
— Медся дона козиныс со тані, ки чышкӧд пытшкас. Ноко, пиян, висьталӧй, мый тані?
— Ме тӧда! Тані торт!
— Кампет кӧрӧбка!
— Печенньӧ пачка!
— Няклялан резинка!
— Эн тӧдӧй, эн тӧдӧй! Со тані мый!
Разис бабӧ гартӧдсӧ, а сэні кык ыджыд небӧг.
Кышӧд доръясыс бонзьӧмаӧсь, серпасъясыс чусмӧмаӧсь, но шыпасъясыс бура на тӧдчӧны.
— Фу, тайӧ важ небӧг да!
— Мый гижӧма, весиг ог гӧгӧрво.
— Английскӧйӧн тайӧ гижӧма?
— Ми огӧ на велӧдӧй английскӧйтӧ.
Пӧч босьтіс внук киысь небӧгсӧ да шуис:
— Ак ті, грамотейяс, коми карын, Сыктывкарын олысьяс. Ме вайи тайӧ небӧгъяссӧ Мишуклы казьтылӧм вылӧ. Велӧд коми кыв да лыддьы найӧс. Коми кывйыс лоас муса и Коми муыс, и пӧч-пӧльыд лоӧны донаджыкӧсь.

Н. Куратова серти.

Вочавидз юалӧмъяс вылӧ.

1. Кодӧс Мишук корис чужан лун кежлас?
2. Корсь да лыддьы Таись баб йылысь юкӧн.
3. Кутшӧм меддона козин вайис баб?
4. Кутшӧм медшӧр мӧвпыс тайӧ висьтыслӧн?

34 удж. Вочавидз татшӧм юалӧмъяс вылӧ.

1. Кутшӧм висьт лыддин бӧръя кадӧ?
2. Коді сійӧс гижис?
3. Коді шӧр геройыс?
4. Мый тэныд медъёна воис сьӧлӧм вылад?
5. Кутшӧм буртор верман босьтны аслыд?
6. Мыйӧ велӧдӧ тайӧ висьтыс?

35 удж. Гиж паныд вежӧртаса кывъяс.

шоналіс — ...
восьтіс — ...
юаліс — ...
някыртіс — ...
дышпырысь — ...
босьтіс — ...
вайис — ...
муса — ...

36 удж. Артмӧд ӧткодь юкӧна кывъяс.

КОВ
РУ
ЙЫВ
ВОЙ
ПЕЛЬ
ТӦВ
БЫД
СЯ

37 удж. Корсь «Коми синонимъяс кывчукӧрысь» матын вежӧртаса кывъяс. Артмӧд 3-4 сёрникузя.

вурсьысь, ...
енэжтас, ...
керӧс, ...
вӧралысь, ...
идӧр, ...
грезд, ...

38 удж. Тӧдмав нӧдкывъяссӧ. Инды эмакывъяс да сувтӧд на дорӧ юалӧмъяс.

1. Китӧм-коктӧм, а мунӧ.
2. Ваын чужис, а ваысь полӧ.
3. Быд керкаын кос сӧчӧн.
4. Коді чужӧ ускӧн?

39 удж. Содтав лӧсялана кывъяс да гиж.

1. Вӧрысь аддзылім уна ... .
2. Коз пу улын узьӧма ... .
3. Мудер руч чышкӧма ассьыс кок туйсӧ ... .
4. Уркай гылӧдӧма пожӧм ... .

кӧч
кок туй
коль
бӧжнас

40 удж. Артмӧд сетӧм кывъясӧн сёрникузяяс да гиж.

1. ветлім, вӧрӧ, ми, тӧвся
2. гажаа, мунім, варовитігтыр
3. шондіа, вӧлі, мича, да, ывлаыс
4. шонді, улас, эзысь, лымйыс, моз, дзирдаліс
5. сы вылӧ, кисьталӧмаӧсь, быттьӧ, изъяс, дона
6. муртса, куш, лымйыс, небыд, пуяссӧ, вевттьыштӧма, ватаӧн
7. мойдын кодь, да, лӧнь, вӧрыс, мича

бонзьыны — обтрепаться, протереться
визув — быстрый
ёль — ручей в лесу; лесная речка
сӧвны — сесть (на лошадь, в сани)
казьтылӧм — воспоминание
ки чишкӧд — полотенце
няклялан резинка — жвачка
пестер — кузов
разьны — развязать; растегнуть ремень
тшӧг — сало, жир
чусмыны — темнеть, тускнеть
швичнитны — хлопнуть, хлестнуть

11

41 удж. Лыддьы висьтсӧ.

Пуксис кӧдзыд тӧв. Еджыд лымйӧн вевттьысис му. Уличаяс пӧлӧн джуджыд толаяс. Дзормис лыска пуяслӧн ус-тошкыс.
Челядь исласьӧны даддьӧн, лыжиӧн да конькиӧн. Вӧчӧны лым морт. Лэбачьяслы лӧсьӧдӧны сёянін. Сэтчӧ пуктӧны шыдӧс, нянь, ид.
Кутшӧм лӧсьыд да гажа тӧлын!

Сет ним да гиж план серти изложение.

1. Пуксис тӧв.
2. Челядьлӧн прӧст кад.
3. Кутшӧм лӧсьыд тӧлын.

42 дж. Артмӧд юалӧмъяс отсӧгӧн сёрникузяяс.

коді
мый вӧчӧ?
кӧні

кутшӧм?
мый?
мый вӧчӧ? да мый вӧчӧ?

коді
мый вӧчӧ?
кысянь?

Тӧдмав нӧдкывъяссӧ.

1. Еджыд эшкын став мусӧ вевттис.
2. Лэбӧ, куйлӧ — чӧв олӧ, мыйӧн кулӧ — шыалӧ.
3. Кӧть оз кыйсьы, вӧр шӧрын лыйсьӧ.

Артмӧд тӧв йылысь нӧдкывъяс.

вевттьысьны — покрыться
дзормыны — поседеть
лыска — хвойный
тола — сугроб
тош — борода

12–13

Нимвежтас.

43 удж. Лыддьы.

ШАШКИ.

Батьӧ менӧ велӧдіс шашкиӧн ворсны. Рытъяснас ми тшӧкыда ворслім сыкӧд. Но мыйлакӧ сійӧ век менӧ вермыліс. Гожӧмнас миян сиктӧ бабыс ордӧ локтіс гӧсьтитны суседкалӧн внукыс. Ми сыкӧд тӧдмасим. Шуӧны сійӧс вӧлі Тимаӧн. Ӧтчыд сійӧ локтіс ме дорӧ да менам пызан вылысь аддзис шашки.
— Тэ шашкиӧн ворсан, Миша? — юаліс Тима.
— Ми батькӧд ворсам да век вермыла сійӧс, — ошйысьышті ме.
— Ме ворса жӧ, но менам вунӧма босьтны шашкиӧс, вай ворсам гоз-мӧдысь.
Ми пуксим ворсны. Ворсім ӧтчыдысь — ме ворсси, мӧдысь ворсси. Тадзи ӧтпырйӧ витысь ворсси.
— Тырмас! — шуи ме, весиг юрӧй висьмис. Ме петі ывлаӧ, Тима ме бӧрся.

С. Раевский серти.

1. Инды нимвежтасъяс да висьтав рочӧн.
2. Лӧсьӧд висьтыслы пом.

44 удж. Содтав чутъяс местаӧ колана нимвежтасъяс. Гиж.

Мишалӧн батьыс бура ворсіс шашкиӧн. ... век вермыліс зонкаӧс. Миша да Тима гожӧмнас тӧдмасисны сиктын. ... рытъяснас ворслісны, гажаа коллялісны кад.

45 удж. Лыддьы.

Асывнас ме дорӧ локтісны зонкаяс, нуӧдісны купайтчыны.
— Энлӧй, ёртъяс, эн тэрмасьӧй, ме пырала Тимала.
Ме пыри сы ордӧ да кори сійӧс мунны ю дорӧ.

Аддзы нимвежтасъяс да висьтав, кыдзи найӧ гижсьӧны кывбӧръяскӧд.

Нимвежтас бӧрын вермӧ сулавны кывбӧр. Кывбӧръяс нимвежтасъяскӧд гижсьӧны торйӧн: ме дорын, сы водзын, на моз.

46 удж. Артмӧд сёрникузяяс да гиж.

Ме дінын, на дорсянь, тэ бӧрын, сы сайын, миян дорӧ, тіян водзын.

47 удж. Комиӧд.

С нами, около тебя, возле меня, за мной, около вас, про тебя, перед ним, у него.

* * *

— Вера, тэ урок бӧрын мунан-ӧ йӧктыны?
— Да. Ме ветла. А тэнад кор секцияыд?
— Выльлунӧ да пекничаӧ.
— А нывъёртыд кытчӧ ветлывлӧ?
— Сійӧ ветлӧдлӧ вартчанінӧ.

48 удж. Корсь пӧвсӧ.

тайӧ
сэтшӧм
найӧс
став
тіянлысь

такой
их
это
все
у вас

* * *

ВИЛЬЫШПОЗ.

Ме пӧ быдма воысь-во,
Квайт арӧс нин меным со.
Мамӧ шуӧ, зэв пӧ дыш ме,
А кор оз ков, сэки ышма.
Уна жӧ нин месянь колӧ.
Кӧть зэв этша на и ола.

А. Мишарина.

Корсь да артмӧд выль вежӧртаса кывъяс.

Вӧч тадзи: ме — ем.

век — всегда
вермыны — победить
ворссьыны — проиграть
вунны — забыть
коллявны — проводить
ошйысьны — хвастаться
ышмыны — шалить, баловаться

14–15

49 удж. Лыддьы кывбурсӧ.

ГОРТ ОЛЫСЬЯС.

Ӧтчыд, тайӧ вӧлі пемыд арӧ,
войков кежлӧ мамӧ муніс карӧ.
И ми гортӧ кыкӧн овны колим:
Ме да ыджыд вокӧй — Толик.
Луннас воккӧд шырӧн-каньӧн ворсім,
Ӧта-мӧдӧс дзебасъясысь корсим.
А кор ывла пемдіс, лои гажтӧм.
Шуа воклы:
— Кӧин локтӧ, гашкӧ?
Со тай кильчӧ вылын кок шы кылӧ,
Мый нӧ эськӧ татысь колӧ сылы?
Толик гигзьӧ:
— Тэ тай вывті полысь.
А ме сылы:
— Збыль ӧд кодкӧ воліс.
Каличалі ӧдзӧс, пукті тас.
Котшкӧдчысьӧс вӧтла:
— Мун вай тась!
Вокӧй увгӧ:
— Некодысь ог пов!
Некод абу, повтӧг гортын ов!
Водім узьны, нянь зыр пукті дінӧ
Ӧдзӧсланьӧ вишка, пемыдінӧ.
Толик шуштӧм мойдъяс мойдны кутіс,
Кыдзи ёма няньлысь шомсӧ шутіс,
Кутшӧм пиньыс, гыжйыс сылӧн ёсьӧсь —
Коми зонкӧд нырччӧ пырны косьӧ.
Лэчтӧ пуртъяс, арся кӧдзыд войнас.
Тайӧ зонсӧ ёма кӧсйӧ сёйны,
Ме жӧ эшкын улӧ дзоньнас пыри,
Эг и тӧдлы, кодыр полӧм быри.
Унмовсьӧма.
Садьми — вӧлі асыв.
Шонді югӧр вачкӧ ӧшинь тасӧ.
Видзӧда, а дінын вокӧ узьӧ.
Нюжӧдчӧма менам крӧвать кузя.
Садьмӧді да юалі ме сылысь:
— Мыйла мунін аслад крӧвать вылысь?
Сійӧ меным:
— Кылан шысӧ ӧні?
Босьті нянь зыр, воклӧн киас палич —
Полігтырйи восьтім ӧдзӧс калич,
Гусьӧн кунь-кань кильчӧ вылӧ петім.
Кыйкъялам, но некод абу сэтӧн.
Сӧмын зібйын Толиклӧн кын гач,
Кильчӧ сюръя бердӧ инмӧ — трач.
Толик збоймис, сувтіс меным паныд.
— Ме жӧ шулі, некод абу тані.

А. Мишарина.

1. Лыддьы кывбурсӧ рольяс серти.
2. Инды кывбурысь нимвежтасъяс.

50 удж. Вуджӧд роч кыв вылӧ шусьӧгъяссӧ.

1. Быдӧнысь кӧ повны, свет вылас не овны.
2. Повтӧм йӧз дінын кӧ быдман, и ачыд повтӧмӧн лоан.
3. Полысь морттӧ кӧч повзьӧдас, а кычаныд пурас.

51 удж. Тӧдчӧдӧм эмакывъяссӧ веж нимвежтасъясӧн.

Талун шойччан лун. Бать-мам гортынӧсь. Бать-мам уджалӧны. Мам вурсьӧ. Мам вурӧ меным гач. Бать вӧчӧ джадж.
— Тэ мыйла нинӧм он вӧч? — юалӧ бать. — Киськав дзоридзьяссӧ.
— Ме киськала, да ваыс тшӧтш джоджӧ киссьӧ.
— Нинӧм, нинӧм, — шуӧ бать. — Уджысь оз ков повны. Быд удж мыйӧкӧ велӧдӧ.

52 удж. Велӧдчы гижны чолӧмалӧм.

Дона бать-мам!
Чолӧмала тіянӧс праздникӧн.
Сиа тіянлы дзоньвидзалун, кузь нэм да бур шуд.
Тіян пи Вова.

Гиж чолӧмалӧм аслад ёртлы, пӧчлы либӧ пӧльлы. Пырт гижӧдад нимвежтасъяс.

1 морт
2 морт
3 морт

Ӧтка лыд
ме
тэ
сійӧ

Уна лыд
ми
ті
найӧ

53 удж. Лыддьы кывбуръяссӧ. Инды нимвежтасъяслысь морт да лыд.

1. Дона шонді, шонтышт менӧ.
Менсьым муса мамӧс шонты.
Дыр нин кӧдзыдсӧ ми венім,
Дыр нин пачнымӧс ми ломтім.

В. Лодыгин.

2. Шонді лунтыр шӧйтӧ, мудзӧ,
Вӧр ді сайын сійӧ узьӧ,
Садьмас, кӧдзыд ваӧн мыссяс,
Енэж шӧрӧдз сэсся кыссяс.

С. Попов.

вачкыны — ударить
войков — сутки
гигзьыны — гоготать (смеяться)
дзебас — потайное место, тайник
зіб — шест
каличавны — запереть
котшкӧдысь — тот, который стучит
кыйкъявны — выглядывать
лэчтыны — точить
палич — палка
тас — поперечина
увгыны — шуметь

16–17

Нимвежтаслӧн суффиксъяс.

менам — у меня
менсьым — у меня
меӧн — мной
мекӧд — со мной
метӧг — без меня
мела — за мной
мелань — ко мне
месянь — от меня

налысь — у них
натӧг — без них
налы — им
накӧд — с ними
наысь — от них
налань — к ним
насянь — от них
наӧдз — до них

54 удж. Вочавидз юалӧмъяс вылӧ.

— Кодлӧн эм мӧлӧт?
— ... ... ... .
— Сылӧн эм кӧрт тув?
— ... ... ... .
— Кодлӧн эм акань?
— ... ... ... .
— Сылӧн эм дурпоп?
— ... ... ... .
— Кодлӧн эм небӧг?
— ... ... ... .
— Сылӧн эм чача?
— ... ... ... .

55 удж. Лыддьы да инды нимвежтасъясысь суффиксъяссӧ.

МАЧ.

Мамӧй меным
Ньӧбис мач,
Мачыс менам
Ветлӧ скач.
Кыдзи кучка,
Мунӧ — тач!
Меысь вылӧ
Чеччас мач.
Сӧмын лоис
Ӧтчыд тадз:
Кӧрт тув вылӧ
Инмис мач.
Кӧрт тув вӧчис
Сылы розь,
Медым чеччавны
Эз позь.
Лоис жугыль
Менам мач,
Куйлӧ джоджын —
Шыч ни рач.

П. Бушенёв.

56 удж. Артмӧд сетӧм кывъясӧн сёрникузяяс.

Менам, тэкӧд, сылысь, миянтӧг, тіянсянь, налы.

жугыль — грустный
инмыны — попасть
кучкыны — ударить
розь — дырка
скач — вскачь; галопом
тадз — так
ши ни рач — тихо

ГАЖА ТУЛЫС ВОАС — ПӦЧ-ПӦЛЬ ОРДӦ ПЫРАС

18

Кывберд.

57 удж. Сувтӧд юалӧмъяс тӧдчӧдӧм кывъяс дорӧ.

Шоныд лола тулысыс
Ловзьӧдас кын му.
Нюдзвиж рӧма платтьӧӧн
Пасьтасяс вӧр-пу.

З. Шиликова.

Кывберд петкӧдлӧ эмакывлысь признак да вочавидзӧ кутшӧм? юалӧм вылӧ: Варов тулыс. Сӧстӧм сынӧд.

58 удж. Думышт да гиж рӧм, ыджда, форма, кӧр петкӧдлысь кывбердъяс.

Вӧч тадзи:
рӧм
кельыдлӧз

ыджда
ичӧт

форма
кузьмӧс

кӧр
курыд

59 удж. Лыддьы В. Кушмановлысь кывбурсӧ.

Пӧль-пӧчьяснымлӧн гажныс
Эз нэмсӧ вӧвлы важ,
Кор прӧстӧй коми шаньга
И налы вайліс гаж.

И, кыдзи вӧвлі важӧн,
Бур мойдын моз жӧ пыр
Пӧсь шаньга вылас сӧвмис
Эз ӧти багатыр.

Комиӧдіс В. Попов.

1. Инды кывбердъяс да сувтӧд юалӧм.
2. Вайӧд паныд вежӧртаса кывъяс.

важ — ...
бур — ...
гажа — ...
пӧсь — ...

60 удж. Лыддьы да лӧсьӧд татшӧм сёян.

ПАРЕНЧА.

Босьт косьтӧм морков либӧ сёркни. Пукты гырничӧ, кисьт ва да сюй пачӧ. Пӧжӧм бӧрти сёян дась.

61 удж. Лыддьы сьӧлӧмсяньыд.

СТАВЫС КОЛАНАТОР.

Вӧр-валы ставыс коланатор:
И ыджыд ю,
И ичӧт шор,
И гулыд яг,
И паськыд видз,
И керкадорса ӧтка кыдз.
Вӧр-валы ставыс колантор:
И мича дзоридз,
И усьӧм кор,
И вына кор,
И кодзувкот,
И помтӧм енэжыслӧн от.
Вӧр-валы ставыс колантор:
И медся ёна,
Дерт жӧ, —
Морт.
Мед сійӧ югзис ӧтчыд,
Кыдз вӧрлӧн, валӧн мич.
Мед сэні гӧгӧрвоис морт,
Мый тайӧ Муыс — сылӧн горт.

П. Бушенёв.
 
1. Гиж кывбурысь кывтэчасъяс: кывберд + эмакыв.

Вӧч тадзи: ыджыд ю, ... .

2. Артмӧм кывтэчасъясӧн лӧсьӧд 2-3 сёрникузя.

кыдз — береза; как

гулыд яг — редкий сосновый бор
колантор — нужное; необходимое
от — ширина

19

Кывберд гижанног.

62 удж. Лыддьы висьтсӧ.

Шонді пыр ёнджыка шонтӧ, дзирдалӧ лӧз енэжын. Сынӧдыс сӧстӧм. Сылӧ-ляпкалӧ, рудӧдӧ лым. Артмӧны гӧпъяс. Няйтчӧны-сьӧдасьӧны туйяс.
Рудов лымйыс кӧтасьӧ и сьӧктаммӧ. Но войясын кынмывлӧ, небыд лым чарӧмалӧ, позьӧ сы вывті котравны-ворсны. Керка вевтъяс вылӧ ӧшйӧны кузь йинёньяс. Луннас найӧ сылӧны, и тёпкӧ-виялӧ войтва.
Войвылӧ воасны сьӧд ракаяс, на бӧрын воасны и мукӧд лэбачьяс.
Ловзяс-потласяс коръя пуяс вылысь гар, сэтысь мыччысясны небыд веж коръяс.
Радлӧ-ловзьӧ коми парма, радлӧ звер-пӧтка. А мыйта нимкодьлуныс челядьлӧн!

Корсь кывбердъяс. Артмӧд мед- приставкаӧн кывъяс.

Вӧч тадзи: лӧз — медлӧз, ...

Мед- приставка кывбердъяскӧд гижсьӧ ӧтлаын: медмича, медсюсь. Медся кыв гижсьӧ торйӧн: медся мича. Медся сюсь.

63 удж. Лӧсьӧд серпас серти ичӧтик висьт. Сет ним.

Пырт висьтад кывтэчасъяс: кельыдлӧз енэж, яръюгыд шонді, ыркыд сынӧд, пемыд вуджӧр, руд лым, кузь йинёнь.

64 удж. Гиж паныд вежӧртаса кывбердъяс.

медмича — ...
медуна — ...
медгажа — ...
медъюгыд — ...
медыджыд — ...
медъён — ...

65 удж. Лыддьы да висьтав тӧдчӧдӧм кывъяслысь артманногсӧ.

— Аддзан, сикӧтшыс турунвиж рӧма. Менам баб шуӧ: тайӧ рӧмыс пӧ шуда. Тэ босьт, новлы да ло шудаӧн.
Сикӧтш збыльысь вӧлі медся мича. Грана мольясыс сылӧн то ӧзйылісны югыдлӧз биӧн, то лӧсталісны сук нюдзвиж рӧмӧн. Домналысь сійӧ ёна петкӧдліс вежсӧ.

Г. Фёдоров серти.

66 удж. Артмӧд кывбердъяс да гиж.

Вӧч тадзи: збой — медзбой — медся збой.

Збой, гырысь, бур, лӧнь, сӧстӧм, курыд, мисьтӧм, мича.

гӧп — лужа
йинёнь — сосулька
кӧтасьны — промокнуть
ловзьыны — ожить
лӧставны — блестеть
моль — бусинка
нюдзвиж — светло-зелёный
сикӧтш — бусы
тёпкыны-виявны — капать
чарӧмавны — покрыться настом

20–21

-ИК, -НИК, -ИНИК (-ІНИК) суффикса кывбердъяс.

67 удж. Инды кывбердъяслысь кыввужсӧ.

рудіник каньпи
косіник нывка
гырысиник вотӧс
шочиник быдмӧг

1. Инды суффиксъяссьыс медводдза шыпассӧ.
2. Кор колӧ гижны і?
3. Лӧсьӧд кывтэчасъяснас сёрникузяяс.

-Ик, -ник, -иник, (-іник) суффиксъяс кыв вежӧртас дорӧ содтӧны ичӧтмӧдан-меліалан рӧм: кос — косіник, том — томиник.

68 удж. Лыддьы кывбурсӧ сьӧлӧмсяньыд.

Мамӧ вурис меным дӧрӧм,
Мамӧ шӧрыштіс нянь шӧрӧм,
Мамӧ мыськис менсьым чужӧм,
Мамӧ пуис чӧскыд ужин,
Мамӧ шебраліс да мойдіс,
Мамӧ орччӧн вӧлі войбыд,
Мамӧ дорын ме ог дур,
Мамӧ менам медся бур.

Ю. Васютов.

Мыйла гижысьыс быд визь заводитӧ мам кывсянь?

69 удж. Артмӧд кывтэчасъяс.

... мам
... зон
... дзоридз
... сьыланкыв
... ныв
... пи

Отсӧг вылӧ кывъяс: мичаник, меліник, сюсиник, мусаник, мыланик, раминик.

70 удж. Лӧсьӧд серпас серти кывбердъясӧн сёрникузяяс да гиж.

Отсӧг вылӧ кывъяс: зумыш, пельк, долыд, визув.

71 удж. Лыддьы висьтсӧ.

ВОДЗДӦРА.

Паськӧм водзын вурлісны сера дӧраысь, нойысь, октӧм сера дӧраысь, китайкаысь. Мичмӧдлісны вурӧмторсӧ пыр ки помысь. Радейтлісны серӧдлыны крестӧн канва серти. Татшӧм серпаснас мичмӧдлісны пельпомсӧ, соссӧ да водзсӧ. Бӧрйылісны гӧрда-сьӧд сунис, но содтывлісны и коймӧд рӧм.
Мичмӧдлісны и прӧшвиӧн. Тіянлы прӧшвисӧ позьӧ ньӧбны либӧ кыны чукля емӧн еджыд сунисысь.
Водздӧрасӧ шӧрав кабала листысь, сэсся вуджӧд дӧра вылӧ. Вӧньсӧ вур ас сертиыд жӧ. Сійӧс позьӧ кӧртавны мышкуад. Водздӧра помсӧ мичмӧд уна рӧма серӧн.

М. Безносикова серти.

1. Висьтав водздӧра кывлысь артманногсӧ.
2. Вур да козьнав водздӧрасӧ мамыдлы.
3. Артмӧд -иник (-іник) суффикс отсӧгӧн кывбердъяс.

Сӧстӧм — ... , гӧрд — ... , сьӧд — ... , мисьтӧм — ... , еджыд — ... .

72 удж. Гиж висьтсӧ. Чутъяс местаӧ содты и либӧ і.

Таво пышкай гозъя поздысисны выль местаӧ. Зіль лэбачьяс ваялісны кос.ник турун сіяс, посньыдик гӧнторъяс. Лӧсьыдіник поз артмис: гӧгрӧс.ник, шонд.ник.
Энь пышкай пуктіс сэтчӧ некымын гӧгрӧс.ник кольк да пуксис пӧжны. Пышкайяслӧн уджыс лои унджык. Пияныс мыччысисны гӧнтӧмӧсь, синтӧмӧсь, а вомныс налӧн пыр вӧлі паськыд, найӧ сёйны корисны.

Л. Палкин серти.

пӧжны — высиживать; парить, морить

1. Сет висьтыслы ним да висьтав аслад кывйӧн.
2. Вайӧд паныд вежӧртаса кывъяс.

Шочиник — ... , кузиник — ... , паськыдіник — ... , косіник — ... , лёкиник — ... , пӧрысиник — ... , тэрыбиник — ... .

водздӧра — передник
вӧнь — пояс
китайка — хлопчатобумажная ткань, изделия из этой ткани
мыланик — мелодичный, музыкальный
ной — сукно (домашнее, фабричное)
прӧшви — кружева
серӧдны — наносить узор
сос — рукав
шочиник — реденький

22–23

-КОДЬ суффикса кывбердъяс.

73 удж. Лыддьы висьтсӧ.

ВАЖ КОМИ ЙӦЗЛӦН ПАСЬТАСЯННОГ.

Комияслӧн паськӧм — тайӧ зарни киа да сюсь войтырсянь миянӧдз воӧм мичлун.
Важӧн кӧм-пась серти позьӧ вӧлі тӧдмавны морт йылысь унатор. Эжва вожын да Луз бердын мич дорысь ыджыдджык дон сетлісны ён, бура вурӧм паськӧмлы. Изьва дорын олысьяс ёнджыка видзӧдісны паськӧмлӧн мичлун да озырлун петкӧдлан югыд рӧмъяс вылӧ.
Озыръяс вурлісны паськӧмнысӧ бокысь вайӧм дона дӧраысь, а гӧльяс — кыӧмысь.
Паськӧм вурлісны уна сикас дӧраысь. Сыктыв вывса аньяслы ёнджыка сьӧлӧм выланыс волісны сера дӧра, сатин да атлас сарапанъяс. Луз бердса тшап аньяслы кажитчис сӧмын бокысь вайӧм уна пӧлӧс ной. Изьваса нывбабаяс новлісны атласысь, штапельысь, бумазеяысь, кашемирысь, шӧвкысь вурӧм сарапанъяс. Удорасалы мусмылісны лӧз дӧраысь, топыд шӧвкысь, парчаысь, вӧсни да югыд шӧвкысь вурӧм кӧлуй.

«Войвыв кодзув» журналысь.

1. Корсь висьтсьыс кывбердъяс.
2. Артмӧд -кодь суффиксӧн кывбердъяс.

Вӧч тадзи: сюсь — сюськодь, ... .

74 удж. Тӧдмав серпас сертиыс нывкаяслысь чужанінсӧ.

Вур аканьыдлы сарапан.

-Кодь суффикс кывбердъяскӧд гижсьӧ ӧтлаын.

75 удж. Думышт да гиж -кодь суффиксӧн кывбердъяс.

рӧм
сьӧдкодь
...

ыджда
ичӧткодь
...

джуджда
ляпкыдкодь
...

форма
кузьмӧскодь
...

мортлӧн качество
пӧрыськодь
...

76 удж. Артмӧд сетӧм сёрникузяясысь висьт. Сет ним да гиж.

Мунісны векньыдик ордымті вӧрса ты дорӧ.
Со и петкӧдчис ыджыдкодь ты.
Сулаліс мичакодь поводдя.
Водз асылын Коля да Валера мӧдӧдчисны вуграсьны.
Тайӧ пыжсяньыс детинкаяс и кутісны вуграсьны.
Регыд мысти Коля лэптіс ыджыдкодь ёкышӧс, а Валералы шеді паськыдкодь ляпа.
Берегас куйліс важиник пыж.
Кыйисны унакодь чери.
Чӧскыд и юква артмас.

77 удж. Артмӧд кывтэчасъяс: кывберд + эмакыв.

Вӧч тадзи: ыджыдкодь бипур.

... бипур
... бобув
... лун
... поводдя
... чышъян
... видз
... керка
... пызан
... му
... вӧр
... кушин
... яг

1. Лӧсьӧд кывтэчасъясыс 3-4 сёрникузя.
2. Гиж паныд вежӧртаса кывъяс.

78 удж. Комиӧд.

Старенький, миленький, большеватый, голубенький, толстоватый, жиденький, холодненький, горьковатый.

79 удж. Содтав чутъяс местаӧ кывбердъяс да гиж.

Медся дона кывйыс му вылас — мам. Сылӧн ... киыс, ... чужӧмыс, ... синмыс, ... юрсиыс. А сьӧлӧмыс ... мамлӧн ... .

лӧсьыдкодь — ...
кызкодь — ...
югыдкодь — ...
гудыркодь — ...
вылькодь — ...
жугылькодь — ...

80 удж. Содты чутъяс местаӧ эмакывъяс.

Кӧр кодь тэрыб ... . Синва кодь югыд ... . Кер кодь кыз ... . Ош кодь ён ... . Вата кодь еджыд ... . Ма кодь юмов ... . Тӧлысь кодь гӧгрӧс ... .

войтыр — люди; народ
гӧль — бедный
дӧра — холст
ляпа — лещ (молодь)
топыд — плотный; прочный
тшап — важный, гордый

24

Сложнӧй кывбердъяс гижанног.

ӦТЛАЫН
яръюгыд
алӧйгӧрд
кольквиж
пемыдлӧз

ВИЗЬ ПЫР
помтӧм-дортӧм
пемыдысь пемыд

81 удж. Артмӧд кывтэчасъяс: кывберд + эмакыв.

... пӧлӧзнича, ... маръямоль, ... вижъюр, ... лежнӧг, ... петшӧр, ... бобӧнянь.

Отсӧг вылӧ кывъяс: пемыдлӧз, алӧйгӧрд, кольквиж, турунвиж, пемыдгӧрд, югыдгӧрд.

82 удж. Комиӧд.

Прекрасный день. Светло-синее небо. Яркое солнце. Темно-синяя вода. Большой луг. Зелёные сосны. Голубые цветы.

83 удж. Помав висьтсӧ серпас сертиыс.

ТУВСОВ Ю.

Мичаысь-мича тувсовъя лунӧ том и пӧрысь лэччисны ю дорӧ. Найӧ сулалісны джуджыдысь-джуджыд кыр йылын да нимкодясисны юӧн.

84 удж. Гиж кывтэчасъяссӧ колана ногӧн.

Алӧй (гӧрд) кыа. Пемыд (гӧрд) ной. Бурысь (бур) йӧз. Мичаысь (мича) поводдя. Помтӧм (дортӧм) вӧр. Яр (югыд) шонді. Лӧзов (еджыд) тшын. Пемыдысь (пемыд) вой. Ыджыдысь (ыджыд) керка. Кузьысь (кузь) туй.

бобӧнянь — клевер
вижъюр — мать-и-мачеха, одуванчик
лежнӧг — шиповник
маръямоль — пион
петшӧр — крапива

25–27

Кывберд вынсьӧдӧм.

85 удж. Висьтав кывберд йылысь.

Тӧдчанлун
...

Юалӧм
...

Суффиксъяс
...

Гижсьӧны ӧтлаын
...

Гижсьӧны визь пыр
...

86 удж. Содты лӧсялана кыв.

1. Гӧгрӧс, кольквиж, курыд — тайӧ ... .
2. Алӧй, юмов, гӧгрӧс — тайӧ ... .
3. Руд, горш, скӧр — тайӧ ... .
4. Мудер, гӧрд, пашкыр бӧжа — тайӧ ... .
5. Ыджыд, мича, сюра — тайӧ ... .
6. Мелі, шань, мича — тайӧ ... .

87 удж. Тӧдмав нӧдкывъяссӧ. Инды кывбердъяссӧ.

1. Пӧрысь пӧч град йӧрын пукалӧ, коді пӧрччӧдас, сійӧ и бӧрддзас. 2. Китӧм-коктӧм, ӧшинь улын шутьлялӧ, ӧдзӧс восьталӧ. 3. Рудовсьӧд понпи, оз курччась, оз увт, а керкаӧ оз лэдз. 4. Тайӧ эшкыныс медъеджыд да медмича, но ставнас розя.

88 удж. Лыддьы кывбурсӧ.

ТУЛЫС.

Зёльгӧ эзысь шыӧн
Визув варов шор.
Ворсӧ сяркъя гыӧн,
Тюргӧ изъяс дор.

Шоныд тӧлӧн шоча
Пӧльыштлӧ пӧсь му.
Тӧвлы корйӧн воча
Серӧктӧ веж пу.

Н. Фролов.

1. Инды кывбердъяс.
2. Артмӧд приставка да суффиксъяс отсӧгӧн кывбердъяс.

Вӧч тадзи: шоныд — медшоныд, шоныдіник, шоныдкодь.

89 удж. Лӧсьӧд кань йылысь висьт. Пырт висьтад кывбердъяс.

МЕНАМ КЫСУК.

1. Каньлӧн нимыс.
2. Кутшӧм каньӧй: ыджда, гӧн, кок, ныр-вом, пель, бӧж.
3. Каньлӧн оласног.
4. Кань бӧрся дӧзьӧр.

90 удж. Лыддьы рольяс серти да сет ним.

Шор пос вывті мунігӧн Геня аддзис детинкаӧс.
— Тэ кытысь? — юаліс Геня.
— Кӧрдорысь.
— Кӧрдорысь? А мыйла тані?
— Велӧдчыны вайисны.
— Велӧдчыны? — Геня пыр жӧ ловзис. — Ме таво велӧдчыны жӧ кута. Тӧдан, кӧні миян школаыс?
— Ме сӧмын на вои...
— Со мыльк йылас кык судта керкаыс... А тэныд кымын ар?
— Дасӧд.
— Дасӧд? А меным вежон мысти дас тырӧ. Кыдзи тэнӧ шуӧны?
— Васьӧ Манзадей.
— Абу Васьӧ, а Василей... Школаад тадзи колӧ шуны.
— Батьӧй тай сідзи шуис-а...
— Ті — яранъяс?
— Да, — юрнас гогнитіс Вася.

Я. Рочев.

Висьтав, кӧні олӧны яранъяс.

91 удж. Гиж юалӧмъяс отсӧгӧн ёрт йывсьыд.

1. Кыдзи шуӧны ёрттӧ?
2. Кӧні сійӧ чужліс?
3. Кымын арӧс сылы?
4. Кутшӧм ёртыд:
а) тушалӧн ыдждаыс;
б) нырыс, синмыслӧн рӧмыс, синкымыс, юрсилӧн рӧмыс да кузьтаыс, пельыс, видзӧдласыс.
5. Кыдзи пасьтасьӧ сійӧ?
6. Кор тэ сыкӧд тӧдмасин?
7. Кодӧн сійӧ кӧсйӧ лоны?
8. Мыйла тэ радейтан ёрттӧ?

бӧрддзыны — заплакать
гогнитны — кивнуть
зёльгыны — звенеть
судта — этаж
мыльк — холм
тюргыны — течь, литься; струиться
яран — ненец

28–29

92 удж. Лыддьы колана ногӧн.

МИ ПӦЖАСЯМ.

Мамӧ талун няньшом вӧчис,
Пуктіс лым кодь еджыд пызь,
Ачыс вӧчӧ вӧсни сӧчӧн
А ме тэча нӧкъя рысь.

Ӧдъя пачыс регыд ваймас,
Локтӧ пӧжасьны нин кад.
Рыська шаньга бура банъяс,
Чӧскыд няньлы быдӧн рад.

С. Куликов.

1. Тӧдмав «Коми кывтэчасъяс» небӧгысь ӧдъя пач кывтэчаслысь вежӧртассӧ.

2. Артмӧд юалӧмъяс отсӧгӧн кывтэчасъяс.

Пызь (кутшӧм?) ... , сӧчӧн (кутшӧм?) ... , рысь (кутшӧм?) ... , пач (кутшӧм?) ... , шаньга (кутшӧм?) ... , нянь (кутшӧм?) ... .

93 удж. Артмӧд эмакывъясысь -а (-я) суффикс отсӧгӧн кывбердъяс.

Вӧч тадзи: пызь — пызя.

Зэр, шонді, картупель, кольк, тшак, нӧк, чери.

Лӧсьӧд кывбердъясӧн 2-3 сёрникузя.

94 удж. Помав мойдсӧ кывбердъяс пыртӧмӧн.

Олісны-вылісны пӧч да пӧль. Налӧн вӧлі ... ныв. Ӧтчыд ... лунӧ ... нывъяс котӧртісны ... вӧрӧ.

95 удж. Лыддьы сьыланкывсӧ.

Ичӧт сиктӧй, олан гажӧй,
Мича тэнад чужӧмбан.
Эжва юӧй, парма вӧрӧй,
Чужанінӧй менам тан.

Джуджыд мыльк и гажа нӧрыс.
Чой йыв, чурк йыв, катыд пом.
Чӧдъя керӧс ягӧ корас,
Вотчӧ сэні дзор и том.

Л. Чувьюрова.

Инды кывбердъяссӧ.

96 удж. Лыддьы да сет висьтыслы ним.

Кодлы абу окота сулалыштны кыр йылын да нимкодясьыштны ойдӧм Сыктыв юӧн! Юыс помтӧм паськыд! Мӧдлапӧвса керкаясыс коскӧдзыс ваынӧсь.
Ю вывті лэбалӧны мотора пыжъяс. Ӧтияс юсь кодь еджыдӧсь, мӧдъяс турунвижӧсь, коймӧдъяс пемыдлӧзӧсь. Быд кӧзяинлӧн аслыссикас рӧма пыж.

В. Ширяев серти.

1. Инды кывбердъяссӧ.
2. Висьтав лыддьӧмторсӧ аслад кывйӧн.

97 удж. Гиж висьтсӧ да визьнит кывбердъяссӧ.

УНА ПӦЛӦС РӦМА ВА.

Ми аддзывлам ватӧ юысь, тыысь, саридзысь.
Ваыс быдлаын аслыспӧлӧс рӧма: лӧз, югыдлӧз, виж...
Ӧшъяс саридз весьтӧ гыма кымӧр, и ва веркӧсыс лоӧ пемыд да гажтӧм. Шонді мыччысяс, и ваыс бара югыдлӧз. Гӧрд рытъя кыа дырйи саридз ваыс гӧрд жӧ. Асъя дырйи саридзыс зарниӧн дзирдалӧ.

Н. Сладков серти.

аслыссикас — своеобразный
банйыны — румяниться
дзор — седой
катыд пом — верхний конец (селения)
няньшом — тесто
ойдӧм — затопленный
ӧшйыны — зацепиться, пристать
саридз — море
чурк йыв — бугор

30

Кадакыв.

98 удж. Лыддьы висьтсӧ. Инды кадакывъяс.

КЫДЗИ АРТМӦ СЕРА ДӦРАЫСЬ ДӦРӦМ.

Дӧра вӧчлісны шабдіысь. Шабді быдтылісны быд овмӧсын, ёнджыкасӧ керкасайса муяс вылын.
Медводз мусӧ гӧрӧны, сэсся кӧдзӧны шабді кӧйдыс. Гожӧмнас шабді дзоридз гыалӧ, быттьӧ лӧз саридз. Арнас, мича шондіа лунӧ, шабдісӧ нетшкӧны вужнас, косьтӧны, мед чулльыны мӧд во кежлӧ кӧйдыссӧ. Сэсся кӧтӧдӧны юын либӧ тыын, мед кокньыдджыка кышыс торъялас няръялігас. Сы бӧрын шабдісӧ ниралӧны, а сэсся зуалӧны.
Весалӧм кудельсӧ печкӧны. Колӧ кӧ кыны сера дӧра, шӧртсӧ мичмӧдӧны пипу кырсьысь вӧчӧм краскаӧн. Колӧ кӧ еджыд дӧра, шӧртсӧ ва дорын быгӧдӧны.
Дӧраысь вурӧны киӧн либӧ машинаӧн дӧрӧм. Но дӧра дӧрӧмыд зэв чорыд, сы вӧсна сійӧс небзьӧдӧны валяйтчанӧн.
Дӧрӧм дась, позьӧ пасьтавны.

Журналысь.

Висьтав серпас серти, кыдзи артмӧ сера дӧрӧм.

Кадакыв петкӧдлӧ предметлысь действие, вочавидзӧ мый керны? мый вӧчны? юалӧмъяс вылӧ.

99 удж. Содты колана кадакывъяс да гиж.

Мусӧ (мый вӧчӧны?) ... .
Кӧйдыссӧ (мый вӧчӧны?) ... .
Шабдісӧ (мый вӧчӧны?) ... , ... , ... .
Кудельсӧ (мый вӧчӧны?) ... , а сэсся ... .

100 удж. Висьтав серпас серти, мый вурӧны шабді дӧраысь.

быгӧдны — отбелить, выбелить
быттьӧ — будто, как будто, словно
валяйтчан — скалка с вальком
гыавны — волноваться
зуавны — чесать
кӧтӧдны — замочить, размочить
кырсь — кора (дерева)
кыш — лузга
мичмӧдны — украшать
нетшкыны — выдергивать
ниравны — трепать
няръявны — мять
овмӧс — хозяйство
печкыны — прясть
саридз — море; тёплые края; тёплое море
шабді — лён
шӧрт — пряжа
чулльыны — отделять головки льна (конопли) от стебля

31–32

Кадакывлӧн кыв вежлалан суффиксъяс.

101 удж. Лыддьы гижӧдсӧ. Тӧдчӧдӧм кывъяссӧ веж мӧд кадакывйӧн.

Ӧтка лыд

1 морт
2 морт
3 морт

Ӧнія кад
Ме муна
Тэ мунан
Сійӧ мунӧ

Локтан кад
муна
мунан
мунас

1 колян кад
муні
мунін
муніс

2 колян кад
—
мунӧмыд
мунӧма

Уна лыд

1 морт
2 морт
3 морт

Ми мунам
Ті мунанныд
Найӧ мунӧны

мунам
мунанныд
мунасны

мунім
мунінныд
муннісны

—
мунӧмныд
мунӧмаӧсь

102 удж. Лӧсьӧд юалӧмъяс отсӧгӧн неыджыд висьт. Инды кадакывъяслысь лыд, морт, кад.

МИЯН ШКОЛА.

1. Кӧні сулалӧ миян школа?
2. Мыйысь сійӧ вӧчӧма?
3. Мый быдмӧ школа дорын?
4. Мый ми вӧчам школаын?
5. Кыдзи ми велӧдчам?

103 удж. Артмӧд суффиксъяс отсӧгӧн кадакывъяс. Инды кад, лыд, морт.

-и, -ин, -іс, -а, -ан, -ӧма, -ӧмаӧсь, -ам, -асны, -анныд

104 удж. Лыддьы шусьӧгъяссӧ. Инды кадакывъясысь суффиксъяссӧ.

1. Тулысын узян — арын шогӧ усян.
2. Гожӧм заптіс — тӧв дзимляліс.
3. Водз чеччан — уна вӧчны эштан.
4. Збыльыд и гӧра бергӧдас.
5. Мутӧ кӧ радейтан, и сійӧ тэнӧ радейтас.
6. Мый кӧдзан, сійӧ и петас.

105 удж. Тӧдмав нӧдкывъяссӧ.

1. Вежӧдӧ видз, дзоридзалӧ сю, кӧдзыд оз овлы. Кор тайӧ овлӧ?
2. Кык вок пышйӧны, ӧта-мӧднысӧ оз кольны.
3. Дас кык вок ӧта-мӧд бӧрсяыс ветлӧны, но ӧта-мӧднысӧ оз пановтны.
4. Кос дырйи менӧ ставӧн виччысьӧны, а кор локта, ставӧн дзебсьӧны.

Инды кадакывъясысь суффиксъяссӧ.

106 удж. Юклы суффиксъяссӧ кык пельӧ.

Вӧч тадзи: Эмакывлӧн суффиксъяс: -ла, ... . Кадакывлӧн суффиксъяс: -а, ... .
-ан
-им
-кӧд
-инныд
-лысь
-ӧд
-ӧны
-ысь
-ам
-лӧн

Артмӧд суффиксъяс отсӧгӧн кывъяс.

107 удж. Артмӧд -ышт суффикс отсӧгӧн кадакывъяс.

Вӧч тадзи: уджавны — уджалыштны.

Велӧдны, пукавны, кисьтны, гижны, мыськавны, мыссьыны, лэбавны, шонтыны.

1. Лӧсьӧд 3-4 сёрникузя артмӧдӧм кадакывъясӧн.
2. Кутшӧм вежӧртасыс -ышт суффикслӧн?

бергӧдны — вернуть, перевернуть
виччысьны — ждать
дзимлявны — прибрать (в значении уплетать, съесть)
дзордзавны — цвести
заптыны — заготовить
збыль — правда
пановтны — обогнать
шог — печаль
эштыны — успеть

33–34

ОГ, ОН, ОЗ, ЭГ, ЭН, ЭЗ соссяна кадакывъяс.

108 удж. Содтав кадакывъяс да гиж. Тӧдмав нӧдкывъяссӧ.

1. Биын ... ... , ваын ... ... . 2. Кык вок туй вомӧн олӧны, а ӧта-мӧднысӧ ... ... . 3. Век вомад, а ... ... . 4. Тшӧкыд-тшӧкыд вӧр, а вӧвлы ньӧр ... ... . 5. Кӧть ... ... , а вӧр шӧрын лыйсьӧ. 6. Сизимдас платтьӧ новлӧ, а кизь ... ... .

Отсӧг вылӧ кывъяс: оз аддзыны, оз сотчы, оз овлы, он босьт, оз вӧй, он ньылышт, оз кыйсьы.

109 удж. Артмӧд сёрникузяяс сетӧм кывъясӧн.

1. некор, лэбач, эн, позъяс, жуглӧй
2. мортӧ, велӧдчытӧг, во, он
3. эн, мун, школаӧ, вӧчтӧг, гортса удж
4. туй, эн, кокньыд, корсь
5. детинкалы, эз, войнас, узьсьы

110 удж. Лыддьы кывбурсӧ.

ЭМ-Ӧ КОМИ КОСТЮМ?

Эм-ӧ комилӧн аслас культура?
Сёйи, помнита, юм.
Тугъя вӧнь новлі, помнита бура.
Йӧла картупель, тэсь,
Чӧдъя кисель пу тасьтіысь ректа.
Мамӧс казьтыла пыр:
«Эн ло гусясьысьӧн да ылӧдчысь вральӧн».
Бать оз вун менам дыр:
«Кӧчсӧ, пиук, эн кый нин февральын».
Эз коль пӧчтӧг вой,
Сылӧн кывъясӧ лыдтӧм мойд ӧшйис.
Кужысь киа чой
Кыис мойдъясысь аддзылӧм прӧшви.

Ю. Васютов.

1. Кутшӧм коми сёян-юан тэ тӧдан?
2. Мыйӧ велӧдлісны бать-мамыс челядьсӧ?
3. Висьтав гижанногсӧ торйӧдӧм кывъяслысь да вуджӧд роч кыв вылӧ.
4. Корсь пӧвсӧ да лӧсьӧд тайӧ кывъясӧн сёрни.

эн ылӧдчы
эн ышмы
эн дӧзмы
эн скӧрав

не злись
не обманывай
не балуйся
не сердись

111 удж. Велӧд да гиж.

Дзоля Толя дзик быд асыв
Волӧ аслас пӧчысъясӧ.
Школаысь кор локтӧ гортас,
Кежӧ ыджыд мамыс ордӧ.
Рытнас, кодыр гажыс бырӧ,
Марья вежань дорас пырӧ.

В. Бабин.

Торйӧдӧм кывъяссӧ висьтав рочӧн.

112 удж. Комиӧд.

ШКОЛЬНАЯ СТОЛОВАЯ.

Сегодня дежурит Серёжа. Он ставит на стол тарелки, кладёт ложки. Серёжа говорит:
— Кто не ест?
— Рома не ест, — говорит Маша.
— У Ромы нет тарелки, — говорит Роза.
— Рома, почему ты не ешь?
— У меня нет супа, — говорит Рома.
— И я не ем. У меня нет ложки, — говорит Оля.
— А у меня нет хлеба, — говорит Вася.
Серёжа принёс суп, потом хлеб и ложку.
Дети едят. Хороший обед в школьной столовой!
— Спасибо, — говорят ребята.

113 удж. Лыддьы потандорса сьыланкывсӧ. Инды соссяна кадакывъяс.

Бай, бай, дитя, узь, узь, узь,
Эн бӧрд, эн бӧрд, сьӧлӧмшӧр,
Эн бӧрд, эн бӧрд, дитяӧй,
Мамыс муніс турунла,
Регыд локтас, эн бӧрд, эн.

Фольклорысь.

лыдтӧм — бесчисленный
ректыны — разгружать, опорожнять (освобождать тарелку от еды)
соссяна — отрицательные
туг — кисть, кисточка
тэсь — толокно
юм — соложёное тесто; солодяная каша

35–36

Кадакыв гижанног.

114 удж. Лыддьы Е. Габовалысь висьтсӧ.

ПАСЬМУНӦМ КОДЗУВ.

Рытнас Митя видзӧдіс ӧшинь пыр дзирдалысь кодзувъяс вылӧ. И друг ӧти ичӧтик кодзув суніс увлань. Вӧлі — и абу! Изтор моз тёпмуніс. Митя шемӧсмис быдӧн. А сэсся и горӧдіс:
— Кодзулыс усис! Кодзулыс усис!
— Тэ тай он на узь, Митя? — жырйӧ пырис мамыс. — Ноко, ӧдйӧджык вод! Кӧмтӧг ӧшинь дорас сулалан!
Митя сунгысис вольпасьӧ.
— Мамӧ, а кытчӧ нӧ кодзулыс усис?
Мамыс топыда шебраліс писӧ да шмонитыштіс:
— Мойдӧ кӧ лэбзис-а.
— А збыльысь кӧ?
— Ог тӧд. Узь нин сэсся, эн чеччы.
Асывнас Митя мӧдӧдчис юкмӧс дорӧ вала. Посводзын войбыд сулалӧм ведраяс гыӧртчӧмаӧсь, тронякылӧны мунігмозыс. Митялы квайт арӧс на, но быд асыв ичӧт ведраясӧн котӧртліс вала. Тайӧ зонкалӧн быд лунъя мог.
Друг зонка джӧмдіс кытчӧкӧ да уси. Ведраясыс гораа клёнмунісны, весиг орчча керкаысь аслас могӧн котӧртысь Шарик скӧракодь гоннитліс зонкалань.
Туй вылын куйлісны йи торъяс. Гырысь и посни. Наӧ и джӧмдӧма Митя. Йи торъясыс вӧліны дзик тӧрытъя усьӧм кодзув рӧмаӧсь — кельыдлӧзӧсь.
И Митя гӧгӧрвоис — тайӧ ӧд кодзулыс татчӧ пасьмунӧма! Сійӧ копыртчис да чукӧртіс кодзувсӧ ведраас.

Комиӧдіс В. Иванова.

пасьмунӧм, жугалӧм — разбитый
шемӧсмис, чуймис — удивился
сунгысис, уськӧдчис — нырнул, кинулся
шмонитыштіс, сералыштіс — пошутила
джӧмдіс, крукасис — споткнулся
гоннитліс, видзӧдліс — посмотрел, приподняв голову
суніс, усис, тёпмуніс — упала

1. Лыддьы рольяс серти эня-пиалысь сёрнисӧ.
2. Мыйла висьтыслӧн нимыс «Пасьмунӧм кодзув»?

115 удж. Гӧгӧрвоӧд тӧдчӧдӧм шыпасъяслысь гижанногсӧ.

Мӧдӧдӧ — мӧдӧдчис, гыӧртӧ — гыӧртчӧмаӧсь, копыртӧ — копыртчӧмаӧсь, чеччы.

Корсь «Пасьмунӧм кодзув» висьтысь тайӧ кадакывъяснас сёрникузяяс да вуджӧд роч кыв вылӧ.

116 удж. Аддзы сэтшӧм паныд вежӧртаса кадакывъяс, кӧні гижсьӧны -дч, -чч, -тч шыпасъяс.

копыртчис — ...
кайис — ...
помасис — ...
матыстчис — ...
пасьтасис — ...
дышӧдчис — ...

117 удж. Инды -тч-а кыв дорӧ отсасьысь кыв.

Вӧч тадзи: матыстчыны, матыста, матыстчӧ.

1. Чукӧр, чукӧртчыны, чукӧртам, чукӧрӧн.
2. Гартчыны, гартны, гартчӧмӧн, гартыштны.
3. Эновтчыны, эновтчысь, эновтчӧмӧн, эновтӧмӧн.

118 удж. Гиж чутъяс местаӧ д, т либӧ ч шыпасъяс.

ВӦРЫН.

Гажа тувсовъя лунӧ ми ёрткӧд мӧдӧ.чим вӧрӧ. Миянкӧд лӧсьӧ.чис мунны Катшыс пон. Воим гажа ягӧ. Сьылісны лэбачьяс.
Матын кодкӧ пӧрӧ.чис. Сынӧдыс вӧлі зэв сӧстӧм. Ми зэв бура шой.чим.

119 удж. Лӧсьӧд кадакывъяс отсӧгӧн тулыс воӧм йылысь сёрникузяяс.

Сывдӧ-сёйӧ. Тёпкӧ-виялӧ. Жургӧны-визувтӧны.
Дзользьӧны-сьылӧны. Садьмӧ-шувгӧ.
Нимкодясьӧны-радлӧны.

120 удж. Лӧсьӧд серпас серти висьт.

Заводит тадзи: Каньпиян дурисны-ворсісны луд вылын. Мыр вылын гоньвидзис-пукаліс пышкай ...

121 удж. Лыддьы висьтсӧ.

ЧАЙ ЮАН — ВЫНАДЖЫК ЛОАН.

Уджач мортӧн нимӧдлісны Ӧльӧксанӧс. Некутшӧм уджысь эз пов: ытшкис и пес кераліс, керка тшупис и ӧшинь рамаяс вӧчаліс. Удж вылӧ мунігӧн пыр корис пузьӧдны самӧвар. Чай юигӧн шуалӧ: «Чайсӧ юа да эбӧсаджык лоа».
Висьталӧны, мый Ӧльӧксан керка дорын туруна додь пӧрӧма. Пырас кыскалысьыс керкаӧ да кӧзяиныслы шуас:
— Отсав доддьӧс лэптыны, бур морт.
— Чай юа да дзик пыр отсала, — вочавидзӧ Ӧльӧксан.
Збыль, буракӧ, шуӧны: чай юан — вынаджык лоан.

М. Турьев серти.

эбӧс, вын — сила

Инды кадакывъяссӧ.

122 удж. Артмӧд -ышт суффиксӧн кадакывъяс.

Вӧч тадзи: керавны — кералыштны.

Пузьӧдны, юны, мунны, шуны, отсавны, висьтавны, корны.

123 удж. Лыддьы кывбурсӧ.

ИМЕННИЧА.

Нимлун кежлӧ Толя
Рисуйтӧма кӧч.
Юр и пель, и голя
Артмӧдӧма стӧч.
Нюмыд быдӧн петас,
Быттьӧ ловъя лов.
Именнича Света
Шуис: «Мем оз ков.
Вася книга вайис,
Коля — лента шӧвк.
А вот кӧчсьыд, таысь
Меным кутшӧм тӧлк?»
Ӧдзӧс сійӧ тупкӧ.
Толяӧс оз кор.
Пыдди Света пуктӧ
Сӧмын ньӧбӧмтор.

А. Мишарин.

1. Мый эськӧ тэ вӧчин Света местаын?
2. Кыдзи тэ чолӧмалан ёрттӧ нимлунӧн?
3. Инды «Именнича» кывбурысь кадакывъяссӧ да гиж.

именнича — именинница
нимлун — именины
ньӧбӧмтор — покупка
пузьӧдны — вскипятить
тшупны — срубить
ытшкыны — косить
эбӧсаджык — сильнее

37

124 удж. Лыддьы висьтсӧ.

ПИСЬМӦ.

Зэрӧ. Пукала да видлала пӧч сундукысь эмбурсӧ. Мыйыс тані абу! Син улӧ уси письмӧ чукӧр. Найӧс вӧлі лӧсьыда тэчӧма да кӧрталӧма кӧвйӧн. Босьті ӧтиӧс да заводиті лыддьыны.
«Видза оланныд, муса гӧтыр Ӧдюк да дона пи Семӧ!
Воис тіянсянь дыр виччысяна письмӧ. Ме зэв рад, мый тіян ставыс бур.
А ми лун и вой нӧйтам вӧрӧгӧс. Выныс сылӧн уна на, но ми ставсӧ вӧчам ассьыным мунымӧс мездӧм да победа лун матыстӧм могысь. Думайта: регыд нин воас, донаясӧй, миян аддзысян кад. Семӧ, тэ гортын мужичӧй пыдди, кывзысь да быдторйӧн отсась мамыдлы.
Коля дзоньвидзаӧн тіян верӧс да бать Иван.
28.11.1944 во.
Елин Иван».
Да, тайӧ письмӧыс менам пӧльлӧн. Уна буртор висьтавліс меным пӧч сы йылысь. Сійӧ вӧлӧма сюсь кыйсьысьӧн да нималана трактористӧн. Но абу усьӧма шуд налы аддзысьны. Пӧль пуктӧма ассьыс юрсӧ Берлин кар босьтігӧн.

1. Кымын юкӧн тайӧ висьтас?
2. Мый тэ тӧдмалін письмӧсьыс?

125 удж. Лыддьы письмӧсӧ да корсь татшӧм юкӧнъяс: шыӧдчӧм, сюрӧслӧн 1 и 2 юкӧнъяс, прӧщайтчӧм, кырымпас, гижан лун.

Дона бать-мам да мелі чой Надя!
Бур лун! Кыдзи оланныд-выланныд? Кутшӧм дзоньвидзалунныд? Кутшӧм выльторъяс эмӧсь сиктын?
Ме ола да велӧдча бура. Тшӧкыда казьтывла тіянӧс да чужан сиктнымӧс. Кутшӧм гажа, кутшӧм долыд ас муад овнытӧ! Ичӧтдырся кадыд дум вылад усьлӧ. Казьтывла, кыдзи ветлывлім гожӧмнад вотчыны вӧрӧ, кыдзи ю дорын вуграсьлім. Но ог кут шогсьыны, регыд помала институт и воа уджавны сиктӧ.
Та вылын помала, аддзысьлытӧдз.
Май 10-ӧд лун. Вася.

Гиж письмӧ.

1. Шыӧдчӧм.
2. Сюрӧс: а) юасьӧм;
б) ас йывсьыд гижӧм.
3. Прӧщайтчӧм.
4. Кырымпас.
5. Гижан лун.

вӧрӧг — враг
кӧртавны — завязать
мездӧм — освобождение
сюрӧс — содержание
эмбур — вещи

38–39

126 удж. Лыддьы висьтсӧ.

АКАНЬ.

Акань кыв тӧдса коми челядьлы, торйӧн нин нывъяслы. Тайӧ чачаыс налӧн медся радейтана ворсантор. Чача нимыс абу зэв важся. Сійӧ паныдасьлӧ сӧмын коми-зыряналӧн да коми-пермякъяслӧн сёрниын. Миян пӧч-пӧльяс лӧсьӧдлӧмаӧсь тайӧ кывсӧ удмуртъяскӧд торъялӧм бӧрын нин, некымын сё во сайын. Важ йӧз вӧчлывлӧмаӧсь асланыс челядьлы сёй аканьяс. Кӧрта кӧлуй лоӧм бӧрын кутӧмаӧсь вӧчавны пу аканьяс. А кор йӧз велалӧмаӧсь кыны дӧра, лоӧмаӧсь и дӧра аканьяс.

А. Ракин серти.

1. Кутшӧм аканьясӧн водзын ворслӧмаӧсь челядь?
2. Кутшӧм аканьясӧн ворсӧны ӧні?
3. Инды тӧдчӧдӧм кадакывъясысь суффиксъяссӧ.

127 удж. Сетӧм кывъясысь -ӧм суффикс отсӧгӧн артмӧд мӧд колян када кадакывъяс.

Вӧч тадзи: ворсны — ворслӧма, ворслӧмыд, ворслӧмныд, ворслӧмаӧсь.

Паныдасьны, велавны, кыны, радейтны, торъявны, тӧдны.

128 удж. Артмӧд вурны да кыйны кадакывъясысь суффиксъяс отсӧгӧн кывъяс.

-сь
-л
-ӧд
-а (-я)
-ав (-яв)
-ышт
-ывл

Лӧсьӧд артмӧм кывъясӧн сёрникузяяс.

129 удж. Лыддьы кывбурсӧ колана ногӧн.

ВУГРАСЬЫСЬЯС.

Батьлы коскӧдзыс ме кӧть и —
Ӧти.
Кыйи-вугралі со мык —
Кык.
Ыджыд пӧртйын чери пуим —
Куим.
Гортӧ нуны нем эз коль —
Нёль.
Мамӧй, гашкӧ, оз жӧ вид? —
Вит.
Чери вайӧм эз и чайт —
Квайт.
Эг нин ӧтчыд волӧй сідзи —
Сизим.
Тӧдса миян кыйсян сямыс —
Кӧкъямыс.
Сӧмын мудзӧм содіс-ӧкмис —
Ӧкмыс.
Гирзим-сералім дзонь час —
Дас.
Мамӧй, аски кыям ком! —
Пом!

А. Ванеев.

1. Инды кадакывъяссӧ.
2. Шу рочӧн: эз коль, оз вид, эз чайт.

130 удж. Корсь кывъяслысь вежӧртассӧ «Коми синонимъяс кывчукӧрысь».

Сёйны, нуръясьны, сувйыны, нямны, жӧритны, тяпкӧдчыны.

Лӧсьӧд 2–3 сёрникузя сетӧм кадакывъясӧн.

131 удж. Комиӧд.

Жарили, варили, солили, пекли.

Артмӧд кадакывъяснас кывтэчасъяс.

132 удж. Тӧдмав нӧдкывъяссӧ.

1. Ваын и пуын ӧти нима. (с.р)
2. Эм борд, а оз лэбав. (ч..и)
3. Абу кок, но он су. (т.в)
4. Оз на овмӧдчы быд тыӧ.
Яйыс чӧскыд, но и лыӧсь.
Нюйтсьыд вӧтлы тэ кӧть кыдз,
Оз и мыччысь — тайӧ ....

Н. Щукин.

Инды соссяна кадакывъяс.

133 удж. Лыддьы кывбурсӧ да велӧд.

Шорысь чери кутіс кань,
Сюйис пачӧ черинянь.
Узьтӧмысла вугырмуні,
Чериняньыд сылӧн вуні.

Г. Юшков.

1. Инды кывбурысь кадакывъяссӧ.
2. Артмӧд наысь -ӧма суффиксӧн кадакывъяс.
3. Лыддьы кывбурсӧ артмӧдӧм кывъяснас.

134 удж. Гиж шусьӧгъяссӧ да босьт тӧд вылад.

1. Бӧжтӧ кӧ кӧтӧдан, и черитӧ сёян.
2. Мортӧс удж вылын тӧдмалӧны.
3. Коктӧ кӧ кӧтӧдан и чуньтӧ нюлыштан.

гирзьыны-серавны — весело смеяться
ком — хариус
коскӧдзыс — до пояса
кӧрт — железо; железный
кӧлуй — вещи
кӧтӧдны — помочить
мык — елец
пӧрт — котелок
нюлыштны — облизнуть
сёй — глина; глиняный
тӧдса — знакомый, известный

40–41

Эмакыв вынсьӧдӧм.

135 удж. Лыддьы кывбурсӧ колана ногӧн.

Кызьӧд нэм пом кадыс каттьӧ.
Бара тулыс вурӧ платтьӧ.
Быттьӧ сарапана ныв
Кыдз пу лоас бӧръявыв.
Льӧм пу дзоридзьясӧн вӧччас,
Тулыс бӧрся гожӧм вӧтчас.
Воас ар, и воас тӧв.
Нӧшта уна-уна пӧв.
И бур олӧмыс оз помась,
Мӧд йӧз лоасны нин томӧсь.
Ов жӧ, Войвыв парма-вӧр,
Коми муӧй, сьӧлӧмшӧр!

А. Мишарина.

1. Кыдзи тэ гӧгӧрвоан медводдза сёрникузясӧ?
2. Кутшӧм паськӧмӧ пасьтасясны тулысын кыдз пу да льӧм пу?
3. Висьтав гижанногсӧ торйӧдӧм кывъясыслысь.

136 удж. Сетӧм кывъясысь артмӧд сёрникузяяс да гиж. Визьнит тш шыа кывъяссӧ.

1. Лида, юркытш, дзоридзьясысь, вӧчис, мича
2. бурдӧдчантор, том, коръясысь, вӧчӧны, петшӧр
3. пуркйис-кайис, трубаысь, еджыд, керка, тшын
4. уна, да, ветлӧдлім, вотім, тшӧкыд, бур, расті, тшак, ми

137 удж. Лыддьы висьтсӧ да сет ним. Чутъяс местаӧ гиж колана шыпасъяс.

Мӧдлапӧвса вӧрсянь с.кт вес.тӧ кыпӧдч.с с.ӧд кымӧр. Тӧв пыр ёнм.с и ёнм.с. Завод.т.с кусн.ӧдлыны сад йӧр.ясысь пелыс. да л.ӧм пуяс.
Друг гундыр-кымӧрсӧ кодкӧ быт.ьӧ бытшкис б.а ньӧвйӧн. Сійӧ здук кежлӧ лӧн.ыштліс, сэсся кыдз тай горӧдас-гымыштас! Муртса мусӧ эз поткӧд.

Висьтав медводдза гым йылысь.

138 удж. Лыддьы шусьӧгъяссӧ да инды сложнӧй эмакывъяс.

1. Быдӧн аслыс кынӧмпӧтсӧ корсьӧ. 2. Нор сьӧлӧмыдлӧн синваыс дорын. 3. Нянь-солӧн сьӧлӧмтӧ он верд. 4. Гожся луныс йӧлӧн-выйӧн исковтӧ.

1. Висьтав гижанногсӧ сложнӧй эмакывъяслысь.
2. Кутшӧм лыдын сулалӧны век тайӧ эмакывъясыс?

Нянь, чери, йӧв, вый, сакар, картупель, ӧмидз, чӧд, сэтӧр, оз.

139 удж. Артмӧд сёрникузяяс да гиж.

чериысь
шыдӧсысь
вотӧсысь
пызьысь
йӧлысь
яйысь
пӧжалӧны
пуӧны
вӧчӧны
жаритӧны
шыд
нянь
рок
нӧк
варенньӧ
черинянь

140 удж. Лыддьы сьыланкыв-мойдсӧ.

Руй, руй,
Кытчӧ жӧ ветлін?
Чипанӧс корсьны.
Кутшӧми жӧ чипаныд?
Кӧнтусь сера.

Руй, руй,
Кытчӧ жӧ ветлін?
Порсьӧс корсьны ветлі
Кутшӧми жӧ порсьыд?
Зарни щӧтя.

Руй, руй,
Кытчӧ жӧ ветлін?
Мӧскӧс корсьны ветлі.
Кутшӧми жӧ мӧскыд?
Чукля сюра.

Руй, руй,
Кытчӧ жӧ ветлін?
Каньӧс корсьны ветлі.
Кутшӧми жӧ каньыд?
Налим сера.

Руй, руй,
Кытчӧ жӧ ветлін?
Ванюшӧс корсьны.
Кутшӧми жӧ Ванюшыс?
Кудриа юрсиа.

Руй, руй,
Кытчӧ жӧ ветлін?
Таняӧс корсьны.
Кутшӧми жӧ Таняыс?
Зэв ыръян.

Фольклорысь.

1. Кутшӧм сёрникузяяс паныдасьлӧны шуанног сертиыс.
2. Корсь эмакывъяс, инды суффиксъяссӧ. Сувтӧд быд кыв дінӧ юалӧм.

141 удж. Лыддьы. Бӧрйы да гиж кывбӧра эмакывъяс.

Эн ветлы туй шӧрӧд, а ветлы туй бокӧд. Туй вылын некор эн ворс. Туй вуджигӧн медводз видзӧдлы шуйгавылӧ, а сэсся веськыдвылӧ. Туй вуджигӧн видзӧдлы светофор рӧм вылӧ.

Висьтав эмакывлысь кывбӧркӧд гижанногсӧ.

142 удж. Лыддьы да босьт тӧд вылад.

Эжва — Коми муын Печора бӧрын мӧд ыджыд ю. Печора босьтӧ васӧ Дзурнюрсянь, а Эжва заводитчӧ Мылва дорса керӧссянь. Сиктъяс да грездъяс, вӧръяс да видзьяс пӧлӧн Эжва нуӧ ассьыс сӧстӧм васӧ Войвыв Двинаӧ. Кузьтаыс сылӧн — 1130 километр, 870 километрыс визувтӧ Коми му вывті. Эжваӧ усьӧны 200 сайӧ ыджыд да ичӧт ю.

Инды кывбурысь эмакывъяс.

Эжва весьтын кыа
Алӧй рӧмъяс кыӧ,
Серамбана гыӧн
Ворсӧдчыштӧ ю.

А. Ванеев.

143 удж. Содтав эмакывъяс да лыддьы.

КОМИ МУ.

Коми ... кузя ме муна,
Гӧгӧр сулалӧ сьӧд ... .
... вывті-вывті уна,
Сыысь унаыс оз тӧр.
Аддза сэні шыльыд ... .
Вылӧ лэптӧ ассьыс ... .
Сылы ӧткодь ... , кӧть ... ,
Сэтшӧм ... тайӧ бур.

М. Лебедев.

Отсӧг вылӧ кывъяс: вӧр, му, пожӧм, вӧрыс, гожӧм, тӧв, пуыс, юр.

бӧръявыв — под конец; напоследок
бытшкыны — колоть; уколоть
вӧтчыны — догонять
вӧччыны — наряжаться
каттьыны — коротать
мӧдлапӧв — противоположная сторона
нор — жалостный; жалобный
ньӧв — стрела
ыръян — упрямый
юркытш — венок

ТУЛЫС БӦРСЯ ГОЖӦМ ВӦТЧАС.

42–43

Нимвежтас вынсьӧдӧм.

144 удж. Лыддьы. Инды нимвежтаса сёрникузя.

Кӧдзыдыскӧд вермасиг,
Гожӧм локтіс, тэрмасис.
Сійӧ югыд войяса,
Садъясын веж коръяса.

В. Ширяев.

Висьтав, кутшӧм эмакыв вежӧ нимвежтасыс.

145 удж. Содтав чутъяс местаӧ нимвежтасъяс да гиж.

1. ... йылысь тэчисны мича сьыланкывъяс.
2. ... кодь ён морттӧ шоча аддзывлам.
3. ... ола Куратов улича вылын.
4. ... мунісны ю дорӧ чери кыйны.

146 удж. Веж тӧдчӧдӧм нимъяссӧ лӧсялана нимвежтасъясӧн да гиж.

1. Вася ӧткодя радейтӧ тӧвсӧ и гожӧмсӧ. Вася моз жӧ Илья радейтӧ ветлывлыны гожӧмнас тшак вотны. 2. Сергей да Коля мунісны ю дорӧ купайтчыны. Сергей да Коля босьтісны тшӧтш Катшыс понписӧ. 3. Надя помаліс нёльӧд класс. Надя каникул дырйи ветлас пӧч ордас шойччыны.

147 удж. Лыддьы висьтсӧ.

ВАРТЧА.

Эм менам Петя нима ичӧт вок. Арнас сылы тырӧ сизим арӧс, сійӧ мунас школаӧ. Ме мӧд гожӧм нин велӧда сійӧс вартчыны Лыаюрын. Пырта Петяӧс ваас кытчӧдз судза, кута коскӧдыс да тшӧкта вачкавны кокнас, сынны кинас. Мӧд гожӧм нин Петя оз велав вартчыны. Весиг яндзим ёртъясысь, мый ичӧт вокӧй татшӧм сямтӧм.
Тӧрыт ме лунтыр вӧлі вӧрын, батьӧй нуӧдліс пес пилитны. Рытнас, кор воим гортӧ, Петя чеччаліс нимкодьысла:
— А ме вартча, а ме вартча...
— Тэ полысь, — шуа ме.
— Котӧртам, колӧкӧ, ю дорад. Ачыд аддзылан.
— Ладнӧ, — шуа, — аски петкӧдлан. Талун ме мудзи. Асывсянь Петя нуӧдіс менӧ ю дорӧ. Зэв ӧдйӧ чужйис гачсӧ, ызі-базі пырис ваӧ.
И збыль — вартчӧ!
— А юртӧ ваас сюйӧмӧн кужан? — юала ме шензьӧмӧн.
— Куза, — шуӧ. «Кужаыс» сылӧн оз на артмы, кӧть и школаӧ нин лӧсьӧдчӧ. И бара пырысь-пыр петкӧдліс, кыдзи кужӧ уйны юрсӧ ваӧ сюйӧмӧн.
Но дивӧ!
— Кыдзи тэ ӧти луннас велалін?
— Тӧрыт, — шуӧ Петя, — куръя вуджигӧн кокӧй пыдӧсас эз судз. Повзи да заводиті бызӧдчыны, кыдзи тэ велӧдлін. И вартчи! А сэсся Мирон Колькӧд лунтыр вартчим.
А ме вӧлі дась сямтӧм Петьӧӧн нимтыштны вокӧс!

А. Петрунёв.

1. Висьтав, кыдзи велӧдчис вартчыны Петя. А тэ кужан он вартчыны?
2. Корсь нимвежтаса сёрникузяяс. Инды нимвежтаслысь морт да лыд.

* * *

Лина куйлӧ гортас диван вылын и шуӧ:
— Ме кӧсъя енэжсьыс кодзув кутны.
— А сійӧ зэв пӧсь, киыд сотчас, — висьталӧ мамыс.
— А ме акань рузумӧн кута.

Артмӧд сёрни да пырт нимвежтасъяс.

бызӧдчыны — двигаться по воде, издавая всплески
вартчыны — плавать
вачкавны — ударять по воде
кужны — уметь
куръя — заводь, залив
мудзны — устать
нимтыштны — обозвать
пыдӧс — дно
сюйны — засунуть
сямтӧм — бестолковый
яндзим — стыдно

44

Кывберд вынсьӧдӧм.

148 удж. Лыддьы.

МУЛӦН МИЧ.

Неыджыд эрд. Татчӧ гожӧмыс чукӧртӧма ассьыс став мичлунсӧ. Кутшӧм сӧмын рӧм сэтысь он аддзы! Синмад шыбитчӧны еджыд да виж рӧм, веж да кельыдлӧз, лӧз и гӧрд. Кутшӧм сӧмын дзоридзьяс тані абуӧсь!
Паськыда синсӧ восьтӧмаӧсь катшасинъяс. Сылӧн синбордыс еджыдысь-еджыд, а дзоридз шӧрас — виж кытш.
Войвылын медводз мыччысьӧ-петӧ вижъюр. Югыдвиж, гӧгрӧс, сійӧс ылісянь аддзан. Сы бӧрти петӧ мӧд вижъюр, паськыдджык, мичаджык. Гожӧмнас югыдвиж рӧмыс сылӧн вошӧ, артмӧ небыдик гӧна шар. Сійӧ — гӧгрӧс, гӧн кодь кокни. Пӧльыштас тӧвру — шарыс лэбас, а заас кольӧ пемыдвиж гӧгрӧс кизь.
Со кузь кок йылын сулалӧ уразнӧй турун. Сійӧ отсалӧ бурдӧдчыны уна висьӧмысь. Артмӧ сыысь и чӧскыд чай. Дзоридзыс чӧскыд кӧра, корйыс кӧть и ичӧт, но мича сера.
Эрд пасьталаыс ыпъялӧ бобӧняньлӧн гӧрд юрыс. А со кузь кок йылас копрасьӧ лӧз понтільгун.
Дзоридзьяс, дзоридзьяс, уна мича дзоридз! Мыйта миян мунымлӧн мичлуныс, шоныдлуныс, бурлуныс.

С. Раевский серти.

вижъюр — мать-и-мачеха, одуванчик

1. Кыдзи тэ гӧгӧрвоан висьтыслысь нимсӧ?
2. Кутшӧм быдмӧг нимъяс паныдасьлӧны висьтас?
3. Кутшӧм бурдӧдчан турун нӧшта тэ тӧдан?
4. Гиж висьтысь кывтэчасъяс: кывберд + эмакыв.
5. Вӧч висьт дорас серпас.

149 удж. Лыддьы колана ногӧн.

ПӦЛӦЗНИЧА.

Воис гожӧм. Шоныд. Лӧнь.
Дженьыд югыд войяс.
Пӧлӧзнича, тэ нӧ кӧн?
Эг нин аддзыв вояс.

Пӧлӧзнича — енэж рӧм,
Лӧз юрсиа дзоридз!
Ваймӧм муяс вылысь скӧнь
Вошин, няньлӧн соридз.

Ичӧт кокӧн, тэрыбӧн
Котравлі сю пӧвстын.
Пӧлӧзнича — саридз рӧм,
Кытчӧ нӧ тэ вошин?

Л. Анисенкова.

1. Инды кывбердъяс.
2. Кывбердъяс дорӧ вайӧд паныд вежӧртаса кывъяс.
3. Комиӧд быдмӧг нимъяс.

одуванчик
кувшинка
василёк
мать-и-мачеха
подоржник
щавель

4. Артмӧд быдмӧг нимъясӧн кывтэчасъяс.

ваймыны — истопиться, протопиться
за — стебель
синборд — лепесток
скӧнь — окончательно
соридз — сорная трава
уразнӧй — зверобой

45–47

150 удж. Лыддьы кывбурсӧ.

ЧУЖАН МУ.

Эм му, кӧн ягын дозмӧр сьылӧ,
Кӧн нюрын ӧшкамӧшка сылӧ,
Тӧдса сійӧ йӧзлы Эжва йылӧн,
Лоӧ мен да тэныд чужан муӧн.

Сійӧ медся гажа, медся мича,
Сійӧ медся дона, медся муса.
Вай жӧ тэа-меа бура видзам
Тайӧ сьӧлӧм шонтысь югыд мусӧ.

В. Лодыгин.

1. Инды кывбердъяс да сувтӧд юалӧмъяс.
2. Висьтав гижанногсӧ торйӧдӧм кывбердъяслысь.

151 удж. Содты кывбердъяс дорӧ эмакывъяс да артмӧд кывтэчасъяс.

Медмуса ... , медчӧскыд ... , медшоныд ... , гырысиник ... , рудіник ... , курыдіник ... , гӧрдоват ... , чорыдоват ... .

Лӧсьӧд артмӧм кывтэчасъясӧн сёрникузяяс.

152 удж. Вайӧд паныд вежӧртаса кывбердъяс.

Мича — ... , гажа — ... , ыджыд — ... , векньыд — ... , сӧстӧм — ... , лӧнь — ... , сола — ... , пӧсь — ... , бур — ... , курыд — ... , джуджыд — ... , кокни — ... .

153 удж. Комиӧд. Инды кывбердъяс.

ВЕЧЕР И НОЧЬ.

Зелёным лугом шёл вечер. За его спиной висел мешок.
— Эге, бриллианты, наверно! — тихо сказала ночь, следовавшая за ним, и прибавила шагу. Распахнула серую шаль, распустила чёрные волосы. Стало темно — глаза выколи.
Подбежала она и вспорола когтём мешок. Не заметил вечер, и посыпались бриллианты. Они закружились и поднялись ввысь. Глядят с высоты на землю, на которой осталась чёрная ночь.

П. Образцов серти.

154 удж. Лыддьы да сет ним.

Тайӧ дзоридзыс паныдасьлӧ вӧраинъясын да васӧд видзьяс вылын. Сійӧ заводитӧ дзоридзавны водзджык пывсян купальнича дорысь, лым сылӧм бӧрын. Дзоридзьясыс кольквижӧсь, но гырысьӧсь да гӧгрӧс тупыль кодьӧсь. Тайӧ аслыспӧлӧслунсӧ тӧдчӧдӧны юра купальнича да горадзуль нимъяс. Важӧн дзоридзнас Сыктыв вожса сиктъясын краситлӧмаӧсь чипан колькъяс, а турунсӧ шулӧмаӧсь кольк турунӧн. Горадзуль кывйыс паськыда бергалӧ коми-пермякъяслӧн сёрниын. Сідзкӧ, купальничалӧн тайӧ — медся важ нимыс. Тайӧ кывсӧ пӧч-пӧльным лӧсьӧдлӧмаӧсь уна нэм сайын, зыряна да пермякъяс вылӧ юксьытӧдз.

А. Ракин серти.

1. Висьтав дзоридз йывсьыс ас нимсяньыд. Сёрниад пырт кывбердъяс.
2. Серпасав ассьыд радейтана дзоридзтӧ.
3. Гиж дзоридз йылысь висьт.
1) Дзоридзлӧн быдман места.
2) Рӧм, мичлун.
3) Дзоридзлӧн коланлун.

155 удж. Лыддьы. Гиж да инды кывбердъяссӧ.

ГОРАДЗУЛЬ.

Водз асывнас садьмисны видз вылын мича дзоридзьяс. Небыдик гожся тӧвру гильӧдыштіс налысь банбокъяссӧ да корис пасйыны горадзульлысь чужан лунсӧ. Воис кельыдлӧз пӧлӧзнича. Сійӧ козьналіс ёртыслы шонді рӧма чышъян. Алӧйгӧрд лежнӧг вайис турунвиж сарапан. А тӧвру радпырысь ворсіс да йӧктіс горадзулькӧд.

Журналысь.

156 удж. Артмӧд слог содтӧмӧн кывбердъяс.

Му... , чӧс... , кок... , шо... , джу... , пос... , гы... , век..., пась... , ки... , вӧс... .

Лӧсьӧд кывберд пыртӧмӧн 3-4 сёрникузя.

157 удж. Корсь пӧвсӧ да гиж.

Гӧгрӧс, дзоридз, тупӧсь, лун, мича, шоныд, гӧрд, сӧдз, оз, ва, вильыш, тӧв, детинка, ыджыд.

Артмӧдӧм кывтэчасъясӧн лӧсьӧд 3-4 сёрникузя.

158 удж. Инды шусьӧгъясысь паныд вежӧртаса кывъяс.

1. Тулыс пӧ гажа да гӧль, ар пӧ гажтӧм да озыр. 2. И кӧдзыд гожӧм шоныд тӧлысь шоныдджык овлӧ. 3. Вылысыс мича, да пытшкӧсыс мисьтӧм. 4. Тулан сьӧд да дона, кӧч еджыд да донтӧм. 5. Сьӧлӧмыд кӧ ыджыд, быд удж ичӧт.

Висьтав, кутшӧм кывсикасӧн лоӧны паныд вежӧртаса кывъясыс.

159 удж. Артмӧд сетӧм кывъясысь сёрникузяяс да гиж.

1. гожся, лун
2. челядь, кыддза, локтісны, раскӧ
3. кутшӧм, еджыд, мичаӧсь, кыдзьясыс, кока
4. шор, быдмӧ, бокас, турун, веж
5. яръюгыд, пӧжӧ, шонді
6. векньыдик, лэччӧдӧ, ордым, дорӧ, шор
7. сэні, варова, дзольгӧ, ва, кӧдзыд, сӧстӧм, да

Инды кывбердъяс да сувтӧд юалӧм.

160 удж. Лыддьы висьтсӧ да инды кывбердъяс.

Варук медводз пызан вылӧ вайис сирысь пӧжалӧм черинянь. Чери бӧрын ыджыд тасьтіӧн яя шыд, сэсся порсь госӧн жаритӧм картупель. Картупель бӧрын шыдӧса рок, йӧла рок, юм ляз, льӧмъя ляз, чӧдъя ляз, сэтӧра ляз. Ляз бӧрын вайис чӧдъя чужва, кӧтӧдӧм паренча, пӧжӧм йӧв, пувъя йӧв, нӧкъя рысь.

И. Сажин серти.

1. Висьтав, кутшӧм кывсикасъясысь артмӧмаӧсь кывбердъясыс.
2. Лӧсьӧд мамыдкӧд ӧтвылысь тайӧ сёян-юансӧ.

аслыспӧлӧслун — своеобразный
вильыш — шаловливый; озорной
гильӧдыштны — пощекотать
ляз — кисель
рас — роща
тулан — куница
чужва — сусло
юм — соложённое тесто, солодяная каша

48–50

Кадакыв вынсьӧдӧм.

161 удж. Лыддьы. Тӧдчӧдӧм кывъяс дорӧ сувтӧд юалӧмъяс.

Быд асыв шондіыс петӧ нӧрыс сайысь, гажӧдӧ ывласӧ. Тайӧ лунӧ енэжыс вӧлі мыськӧм блюд кодь. А вӧрыс — эзысьӧн лӧсталӧ да шувгыштӧ. Шувгӧ зэв небыдика, ылысь кылан лӧсьыд шыӧн. Кӧнкӧ кылӧ чер триньгӧ, кӧнкӧ тувъясьӧны, кер кыскӧны. Дай ваыс татшӧм гажа луннад енэжыс кодь жӧ кельыдлӧз да шыльыд, кӧть кадриль йӧкты веркӧсас.

Г. Фёдоров серти.

лӧставны, дзирдавны, югъявны — блестеть

Вуджӧд кадакывъяссӧ роч кыв вылӧ «Комиа-роча кывчукӧр» вылӧ мыджсьӧмӧн.

162 удж. Артмӧд ӧтка лыда, 3 морта, ӧнія, колян да локтан када кадакывъяс.

Вӧч тадзи: пырны — пырӧ, пырис, пырас.

Пырны, чеччыны, кывны, воны, мездыны, сюрны, кыскыны, радлыны.

163 удж. Содты сёрникузяясас кадакывъяс.

1. Кӧч чеччалӧ, а джыдж ... . 2. Чери уялӧ, а чирк ... . 3. Вӧв гӧрдлӧ, а пон ... . 4. Мӧс баксӧ, а кань ... . 5. Сюзь буксӧ, а колипкай ... .

164 удж. Лыддьы висьтсӧ.

КОДЗУВКОТКАР.

Гожся кадӧ вӧрӧд ветлігӧн тшӧкыда син улӧ усьлӧ лыс емысь чукӧр. Тайӧ кодзув котырлӧн оланін.
Кодзувкотъяс олӧны ыджыд семьяӧн. Муӧ кодйӧм позйӧ кодзувкот-мам лэдзӧ колькъяс, сэтысь чужӧны уджалысь кодзувкотъяс. Тайӧ поз гӧгӧрыс и заводитӧны тэчны карсӧ. Кыскалӧны чукӧрӧ кос лыс емъяс, лӧсьӧдӧны коридоръяс да жыръяс.
Поз тэчысь кодзувкотъяс кындзи эмӧсь и мукӧд уджалысьяс. Ӧтияс дӧзьӧритӧны колькъяс да личинкаяс, мӧдъяс корсьӧны да ваялӧны сёян, коймӧдъяс — видзӧны карсӧ.
Вӧрса гӧрд кодзувкотъяс зэв коланаӧсь. Найӧ бырӧдӧны вӧрысь уна гут-гаг. Ӧти кодзув котыр луннас бырӧдӧ кызь сюрс гаг, тайӧ сизьлӧн тӧлысся, а пысталӧн кык тӧлысся удж.
Кодзувкоткаръяс колӧ видзны. Зурган кӧ карас беддьӧн, розьӧдыс мӧдас веськавны зэр. Кодзувкотъяслӧн торксьӧ олӧмыс. Позйыс кутас сісьмыны, олысьясыс кулӧны, матігӧгӧрса вӧрыс висьмӧ.

З. Молодцова серти.

Вочавидз юалӧмъяс вылӧ да гиж.

1. Кыдзи олӧны кодзувкотъяс?
2. Мыйысь найӧ вӧчӧны позсӧ?
3. Кутшӧм кодзувкотъяс овлӧны?
4. Мыйла кодзувкот позсӧ шуам карӧн?
5. Кутшӧм буртор вайӧны вӧрса кодзувкотъяс?
6. Мыйла колӧ видзны кодзувкоткаръяс?

165 удж. Гиж текстсӧ. Скобкаын сетӧм кадакывъяссӧ сувтӧд ӧнія кадӧ.

Кодзувкотъяс — вӧр бурдӧдысьяс. Ӧти ыджыд кодзувкот поз луннас (бырӧдны) некымын сюрс гаг.
Кодзувкотъяс (небзьӧдны) му, (новлӧдлыны) уна быдмӧглысь кӧйдыссӧ. Кымын унаджык кодзувкоткар, сымын сынӧдыс сӧстӧмджык.

166 удж. Комиӧд.

Сооружение муравьев не просто куча, а настоящий город с улицами и переулками. В городе тепло и поддерживается нужная влажность. Куча непромокаемая, сделана на совесть. Но перебирать палочки, хвоинки надо постоянно, иначе заведётся плесень.

Артмӧд кодзувкот йылысь нӧдкыв.

167 удж. Артмӧд -ыв, -ал, -ав суффиксъясӧн кадакывъяс.

Вӧч тадзи: лӧсьӧдны — лӧсьӧдавны.

Усьны, корсьны, дӧзьӧритны, бырӧдны, волыны, мыччыны, корны.

Лӧсьӧд артмӧм кадакывъясӧн 2–3 сёрникузя.

168 удж. Артмӧд -ышт суффикс отсӧгӧн кадакывъяс.

Висьтавны, радейтны, кольччыны, видзны, отсасьны, кучкыны, шӧйӧвошны, котӧртны.

Лӧсьӧд 2-3 сёрникузя да гиж.

169 удж. Лыддьы кывбурсӧ.

БАРА НИН.

Бара нин лым сылі.
Лым сылі, йи кывтіс.
Косьмис нин лымувса му.
Кымынысь, кымынысь
Нӧрыс бок рас пиын
Ловзьыліс, садьмыліс пу!

Пӧткаяс локтасны,
Пӧткаяс дзользясны,
Пӧткаяс шлывгасны бӧр.
Сьӧд парма ловзьылас,
Сьӧд парма шувгылас,
Бӧр ланьтас сьӧд парма вӧр.

Илля Вась.

Инды кадакывъясысь суффиксъяссӧ да кадсӧ.

170 удж. Лыддьы да висьтав ас кывйӧн.

ӦШКАМӦШКА.

Гымӧн чорыда зэрӧм бӧрын енэжыс кутіс югдыны. Тӧлыс лӧнис. Регыд мыччысис мелі шонді. Му весьтын ӧшйис ӧшкамӧшка. Сьӧкыд шуны, сизим пӧлӧс рӧмысь коді медмичаыс: виж али турунвиж, алӧйгӧрд али кельыдлӧз. Найӧ ӧтмоза дзирдалісны-югъялісны, медым йӧзыс нимкодясисны енэжса мичлунӧн. А быд пӧлӧс мичлун чужтӧ мортлысь бурлун, мелілун. Колӧ сӧмын мичсӧ аддзыны да видзны сьӧлӧмад.

С. Раевский серти.

1. Инды медводдза нёль сёрникузясьыс сюрӧса членъяс.
2. Висьтав, кутшӧм кывсикасӧн лоӧны тӧдчӧдӧм кывъясыс.

171 удж. Артмӧд эмакывъясысь -ав (-яв), -ась (-ясь) суффиксъяс отсӧгӧн кадакывъяс.

Вӧч тадзи: сов — соласьны, солавны.

Кӧм, пань, вӧнь, кизь, платтьӧ, гач.

172 удж. Лыддьы, велӧд да гиж.

Югыд кодзув, петав, петав,
Эзысь кодзув, петав.
Дзирдав, пӧртмась вылісянь,
Дзирдав рытъя кыа бӧрын!

Нёбдінса Виттор.

173 удж. Лыддьы кывбурсӧ колана ногӧн.

КАНИКУЛ.

Урокным бӧрӧ колис.
Пӧсь чолӧм, гожся лун!
Каникулным ӧд воис,
Он вермы дзебны нюм!

Каникул, каникул —
Зэв муса миян кад.
Каникул, каникул.
Ми быдӧн сылы рад.

Со кыскӧ ывла миянӧс.
Ю вылын гажыс тыр.
Сэн вугралам мыкпиянӧс
Да купайтчам вель дыр.

Чӧд вотны мунам унаӧн.
И пыр жӧ шызяс вӧр.
Лӧз вомъясӧн, тыр чуманӧн
Ми гортӧ воам бӧр.

Эм казьтыштны мый миянлы,
Кор воас сентябр лун.
Ӧд пармаса ныв-пиянлӧн
Бур гожӧмыд оз вун.

Каникул, каникул —
Зэв муса, зарни кад.
Каникул, каникул,
Ми быдӧн сылы рад!

А. Мишарин.

бурлун — доброта; великодушие
веркӧс — поверхность
видзны — беречь
матігӧгӧр — окрестности
мелілун — ласка
мичлун — красота
нимкодясьны — радоваться
нӧрыс — холм; бугор
сісьмыны — гнить
сымын — тем
торксьыны — портиться, испортиться
триньгыны — звенеть
тувъясьны — вбивать, вкалачивать

УРОК ВЫЛЫН ТШӦКЫДА ПАНЫДАСЬЛЫСЬ КЫВЪЯС ДА ВЫРАЖЕНИЕЯС

бӧрйы лӧсялана кыв — выбери подходящее слово
велӧдчы юасьны комиӧн — учись задавать вопросы по-коми
вочавидз юалӧм вылӧ — ответь на вопрос
вӧдитчы словарӧн — пользуйся словарём
вуджӧд роч вылӧ — переведи на русский язык
комиӧд — переведи на коми язык
корсь пӧвсӧ — найди пару
кут тӧд вылын — запомни
кывзы бура — слушай внимательно
кывъяс отсӧгӧн лӧсьӧд — с помощью слов составь
сёрникузя помын — в конце предложения
содты колана кывъяс — дополни словами
содты колана шыпасъяс — вставь пропущенные буквы
висьтав — скажи
дась — готов
кыдзи лоӧ — как будет
лыддьы — прочитай
мӧвпышт — подумай
помав — закончи
серпасав — нарисуй
кывтэчас — словосочетание
сёрникузя — предложение
тӧдмав — узнай, отгадай
эн вунӧд — не забудь, запомни
эн сорлав — не делай ошибок
кыв — слово
висьт — рассказ
кывбур — стихотворение
кывпесан — скороговорка
нӧдкыв — загадка
нюмсер — шутка
шусьӧг — пословица
мойд — сказка
сьыланкыв — песня

КОМИА-РОЧА КЫВЧУКӦР.

А

абу, абуӧсь — не, нет
авъя — скромный, вежливый
аддзыны — видеть, увидеть
аддзысьлытӧдз — до свидания
акань — кукла
ань — женщина
анькытш — горох
арся — осенний
ар — осень
арӧс — лет
артмыны — получиться
аски — завтра
аскомысь — послезавтра
аслас — свой
аслыспӧлӧс — своеобразный
асыв — утро
аттьӧ — спасибо
ачым — сам, сама

Б

бадь — ива
байдӧг — куропатка
баля — ягнёнок, овца, овечка
бать — папа
бедь — палка
берд (бердын, бердӧ) — за
би — огонь
биару — газ
бипур — костёр
бобӧнянь — клевер
бобув — бабочка
бок (бокын, бокӧ) — у
бонзьыны — обтрепаться, протереться
борд — крыло
босьтны — взять
бӧб — глупый
бӧж — хвост
бӧр (бӧрын, бӧрӧ) — после
бӧр — обратно
бӧрдны — плакать
бӧрдысь — плаксивый
бузгыны — бурлить
букыш — хмурый
бур — добрый, хороший
бурдӧдны — лечить
бус — пыль
быдмӧг — растение
быдмыны — расти, вырасти
быдтор — всё
быдтыны — растить, вырастить
быттьӧ — как будто

В

ва — вода
важ — древний, старый
важӧн — раньше, давно
вайны — принести
варгыль — косолапый
варыш — сокол, ястреб, коршун
вевт — крыша, крышка
вежавидзана — вежливые
вежалун — воскресенье
вежон — неделя
вежӧр — ум, разум, сознание
вежӧра — умный
вежӧс (жыр) — комната
вежсьыны — измениться; переодеться
векньыд — узкий
велавны — научиться
велӧдчыны — учиться
велӧдчысь — ученик, ученица
велӧдысь — учитель, учительница
вердны — кормить
веркӧс — поверхность
весавны — чистить, убирать
весиг — даже
весь, весьшӧрӧ — зря, напрасно
веськыд — прямой
ветлыны — ходить, сходить, ездить
ветлысь — прохожий
вешйыны — отойти
видз — сенокосный луг
видза олан — здравствуй
видза оланныд — здравствуйте
видзны — хранить, беречь, охранять
видзӧдлас — взгляд
видлыны — попробовать
видны — ругать
вижъюр — мать-и-мачеха
визув — быстрый
визь — линия
визя — полосатый
вильыш — озорной
выльышпоз — шалунишка, озорник
винёв — стойкий, крепкий
висьны — болеть
висьтавны — сказать
вич — отчество
виччысьны — ждать
во — год
водзджык — раньше
водздӧра — передник
водзӧ — дальше
водзын — перед, впереди
водны — ложиться
вой — ночь
войвыв — север
войдӧрлун — позавчера
войков — сутки, часть дня; с ночёвкой
войтва — капель
войтыр — народ
вок — брат
вольпась — постель
вом — рот
вомгорулас — про себя, негромко
вомдор, льӧб — губы
вордкыв — заговор
ворсны — играть
ворссьыны — проиграть
восьтыны — открыть
вотны (вотчыны), ӧктыны, чукӧртны — собирать
вотӧс — ягода
вӧв — лошадь, конь
вӧнь — пояс
вӧркань — рысь
вӧр — лес
вӧралысь — охотник
вӧрса — лесной, дикий
вӧсни — тонкий
вӧчны — делать
вӧччыны — наряжаться, нарядиться
вугравны — дремать
вуграсьны — удить
вугыр шатин — удочка
вуджны — перейти, перебраться
вуж — корень
вузасьны — продавец
вундыны — резать
вунӧдны — забыть
вурд, вурдысь — выдра
вурны — шить, пришивать
вурун — шерсть, шерстяной
вутш — кочка
выв (вылын, вылӧ) — на
вывті — очень
вый — масло
выль — новый
выльлун — понедельник
вын — сила

Г

гадь — пузырь, шарик надувной
гажа — весёлый, радостный
гажтӧм — скучно
гар — берёзовая почка
гартыштны — завернуть
гач — брюки
гашкӧ, буракӧ — может быть, наверно
гид — хлев
гижны — писать
гожӧм — лето
гожся — летний
гильӧдны — щекотать
гораа — громко
горадзуль — купальница
горзыны — кричать
горс — дупло
горт, керка — дом
гортса — домашний
горш — жадный
гӧбӧч — подвал
гӧгӧр — около
гӧгӧрвоны — понимать
гӧгрӧс — круглый
гӧгыль — кружок
гӧлик, рос — метла, веник из прутьев
гӧль — бедный
гӧн — шерсть, пух
гӧрд — красный
гӧрд гоб — подосиновик
гӧрддзасьны — завязаться
град выв пуктас — овощи
грезд — деревня
гудӧк — гармошка
гулю — голубь
гусьӧн — тихо, по секрету
гут — муха
гут кулан тшак — мухомор
гыж — ноготь
гын сапӧг — валенки
гыӧр — иней
гырддза — локоть
гырнич — горшок
гырысь — крупный
гыч — карась
гудравны — размешать
гулыд — чистый, редкий
гусьӧн — тайно

Д

дадь — санки
дар — поварёшка
дасьтыны — заготовить, приготовить
дерт — конечно
детинка, зонка — мальчик
джадж — полка
дженьыд — короткий
джодж — пол
джуджыд — глубокий, высокий, крутой
джыдж — стриж
джын — половина
дзебас — потайное место, тайник
дзебсясьны — прятаться
дзескыд — тесный, тесно
дзирдавны, югъявны — сиять, сверкать, светить, блестеть
дзодзӧг — гусь
дзольгыны — журчать
дзоньвидза — здоровый
дзоньтавны — чинить, восстанавливать
дзор — седой
дзоридз — цветок
дзугны — путать, спутать
додь — сани
дозмӧр — глухарь
дойдны — поранить
долыда, кыпыда — радостно, весело
дом — ошейник
дона — дорогой, ценный
дор (дорын, дорӧ) — к
дорйыны — защищать, оборонять
дӧзмыны — рассердиться
дӧра — холст
дӧрапас — флаг
дӧрӧм — рубашка
дуб — пресный, без соли
дурны, вильшасьны — озорничать
дыр — долго
дыш — лентяй, ленивый

Е

еджыд — белый
еджыд гоб — белый гриб
ен — бог
енгаг — божья коровка
енэж, енвевт — небо
енэжтас — горизонт

Ё

ёкмыль — комочек
ёкыш — окунь
ёль — лесной ручей
ён — крепкий, сильный
ёрт — друг, товарищ
ёсь — острый

Ж

жонь — снегирь
жугавны — разбиться, сломаться
жугыль — грустный

З

заводитны — начать
зарни — золото, золотой
зарава — берёзовый сок
збыльысь — серьёзно
збой — бойкий
зеп — карман
зіля — старательно, быстро
зонпосни — мальчики
зыр — лопата
зэв — очень
зэр — дождь
зэра — дождливый
зэрӧ — идёт дождь

И

идӧртӧм — бесхозяйственный, неаккуратный
из — камень, камешек
Из гӧра — Уральские горы
из шом — каменный уголь
изэрд — площадь
исерга — серьги
исковтны — скатиться
иславны — кататься
истан — кулик прибрежный
истӧг — спички
ичинь — тётка, мачеха
ичӧт, посни, дзоля — маленький, младший

Й

йи — лёд
йизьыны — обледенеть, покрыться льдом
йинёнь — сосулька
йирны — грызть
йитны — соединить
йӧв — молоко
йӧг — шишка
йӧз — люди, народ
йӧй — дурак
йӧктыны — плясать
йӧла турун — одуванчик
йӧр, град йӧр — огород
йӧра — лось
йыв, йылысь — о, об, про

К

кабала — бумага
кага — ребёнок
кажитчыны — нравиться, понравиться
казьтывны — вспоминать
калич — задвижка, крючок
канпас — герб
кань, кысук — кошка
кар — город
катша — сорока
катшасин — ромашка
катшашыдӧс — крупа (снег)
кекенач — ладушки
кельыд — бледный
кень — пенка
кепысь — рукавицы
кер — бревно
керны — делать
керӧс — возвышенность, гора
ки, кырым — руки
кисьтны — лить, вылить, пролить, налить, перелить
ки чышкӧд — полотенце
клянича — осколок стекла
кодзув — звезда
кодзувкот — муравей
коді, кодъяс — кто
кодйыны — копать, рыть
кодла — за кем
кодлӧн — у кого, чей
кодлы — кому
кодӧ — в кого
кодӧн — кем
кодӧс — кого
кодын — в ком
кодысь — из кого
коз — ель, ёлка
козин — подарок
козьнавны — подарить
коймӧд — третий
кок — нога
кокни — лёгкий; легко
коль — шишка
кольквиж, виж — жёлтый
комиӧн — на коми
коньӧр — бедный, бедняга
копыртчыны — поклониться
кор — лист дерева
кор, кодыр — когда
корӧсь — берёзовый веник
корны, кевмысьны — просить
коръя — лиственные
кос — сухой, сухо
котӧрӧн — бегом
котӧртны, котравны — бежать, бегать
кӧвдум — колобок
кӧдздӧдны — похолодать
кӧдзыд — холодный,
морозный; холодно
кӧин — волк
кӧк — кукушка
кӧм — обувь
кӧмавны — обуть
кӧмасьны — обуться
кӧн, кӧні — где
кӧнтусь — конопля
кӧр — олень; запах
кӧрт — железо; железный
кӧрт туй — железная дорога
кӧсйыны — хотеть
кӧтасьны — промокнуть
кӧч, кӧчиль — заяц
кужны — уметь
кузь — длинный
кузьмӧс — продолговатый
куйлыны — лежать
кукань — телёнок
куньса — закрытые
курччыны — укусить
кутны — поймать, словить
кутшӧм — какой, какая, какое, какие, каков
курыд — горький
кушман — редька
кывзысьны — слушаться
кыв — язык
кывны — слышать, услышать
кыдз, кыдзи — как, каким образом
кыдз пу — берёза
кыз — толстый
кыйны — поймать, ловить
кымӧр — облако, туча
кымӧра — облачно
кымӧс, плеш — лоб
кымын — сколько
кын — ледяной, мёрзлый
кынмыны — мёрзнуть, замерзать
кынӧм, рушку — живот
кынӧмпӧт — пропитание
кыны — вязать, ткать
кып — гимн
кыр — высокий берег, гора
кырсь — кора
кырныш — ворон
кырымавны — подписаться
кыті — где
кытысь, кысь — откуда
кытчӧ — куда
кытш — круг, обруч
кытшавны — окружить
кыш — скорлупа, обёртка

Л

лабич — скамья
лавка, вузасянін — магазин
ланьтны — замолчать
ласта — равнинный луг, низина
лежнӧг — шиповник
лёк — плохой; плохо
локны — прийти
лолавны — дышать
лоны — быть
лӧгасьны — поссориться
лӧз — синий
лӧсьыд — хороший
лун — день
лунвыв — юг
льӧм пу — черёмуха
лы — кость
лыддьыны, лыддьысьны — читать
лым — снег
лым мач — комок снега
лым морт — снеговик
лым сылӧ — тает снег
лымъялӧ — идёт снег
лым чир — снежинка
лысва — роса
лыска — хвойный
лышкыд — щедрый; пушистый, шикарный
лэбавны — летать
лэбач — птица
лэбны — лететь
лэдзны — опустить, выпустить
лэптыны — ставить, строить, поднять
лэчтыны — точить, отточить, наточить
лэчыд — острый
люкасьны — бодаться
лючки — хорошо, внимательно
лямӧдны — давить, раздавить

М

мавтны — красить
ма — мёд
мазі — пчела
майӧг — кол
майтӧг — мыло
мам, мамӧ — мама
матын — близко
матыстчыны — подойти
ме — я
мед, медым — пусть, чтобы
медводдза, воддза — первый
меж, мегӧ — баран
мездыны — освободить
мелі — ласковый
менам — у меня; мой, моя, моё, мои
менсьым — у меня; мой
менӧ — меня
меным — мне
ми — мы
мир туй — большая дорога
мича — красивый
мичмӧдны — украшать
миян — у нас, наш
миянӧс — нас
миянлы — нам
миянлысь — у нас
мог — цель
моз — как
мой — бобр
мойдны — рассказывать сказку
морӧс — грудка, грудь
морт — человек
мӧвпавны — думать
мӧд — второй, другой
мӧдӧдны — отправить
мӧдӧдчыны — отправиться
мӧс — корова
му — земля, поле
мудер — хитрый, мудрый
мудзны — устать
мукӧд — другой, иной, некоторый
мунны — идти
муртса, тшук — едва
муса — милый
мусир — нефть
мыж — вина
мый — что
мый вӧчны — что делать
мыйла — почему
мыйлӧн — у чего
мыйлы — чему
мыйӧ — во что
мыйӧн — чем
мыйын — в чём
мыйысь — из чего
мыла — мелодичный, музыкальный
мыльк — холм, бугорок
мыр — пень
мырпом — морошка
мыссьыны — умываться
мыськыны — мыть
мыш — спина

Н

найӧ — они
найӧс — их
налӧн — у них
налы — им
налысь — у них
намыр — костяника
небыд — мягкий
недыр — недолго
некод — никто
нерны — дразнить
нетшкыны — выдёргивать
нидзув — червь дождевой
нималана — известный
ним-вич — имя-отчество
нимкодь — радостно
нимлун — именины
нитш — мох
нин — уже
ной — сукно
ном — комар
ноп — котомка, заплечный мешок
нора — жалобно
нӧк — сметана
нӧшта — ещё
нуны — нести
ныв — дочь, девушка
нывка — девочка
ныр — нос
ныртчыны — стремиться
ньӧбны — купить, покупать
ньӧв — стрела
нэм — век
нэр, ляб — слабый
нюмъявны — улыбаться
нюр — болото
няйт — грязь; грязный
нянь — хлеб

О

овны — жить
ог, он, оз, огӧ, онӧ — не
оз — земляника
озыр — богатый
окыштны — поцеловать
омӧля — плохо
орд (ордын, ордӧ) — у, к
ордым — тропа
орччӧн — рядом
отсавны — помогать
отсӧг — помощь
ош — медведь
ошйысьны — хвастаться
ошйысьысь — хвастливый

Ӧ

ӧбраз — икона
ӧд — ведь
ӧдва — едва, еле
ӧдйӧ — быстро
ӧдзӧс — дверь
ӧзйыны — сверкать, гореть
ӧмидз — малина
ӧні — сейчас
ӧнӧдз — до сих пор
ӧтка — единственный, одинокий
ӧткодь — одинаковый
ӧтпырйӧ — одновременно
ӧтчыд — один раз, однажды
ӧшинь — окно
ӧшйыны — повиснуть
ӧшкамӧшка — радуга
ӧшӧдны — повесить

П

панласьны — соревноваться
пань — ложка
парма — лес
пас — знак
пась — шуба
паськӧм — одежда
паськыд — широкий
пасьтавны — одеть
пасьтасьны — одеться
пасьтӧм — голый
пач — печка
паччӧр — верх русской печи, лежанка
пашкыр — пушистый
пель — уши
пельмень, пельнянь — пельмени
пельк — опрятный
пельпом — плечи
пелысь — рябина
пемӧс — животное, зверь
пемыд — тёмный; темно
пес чипас — поленница
пестер — пестерь, кузов
петкӧдлыны — показывать
петны — выйти, выходить
петшӧр — крапива
печкан — прялка
печкыны — прясть
пи — сын
пидзӧс — колено
пинь — зуб
пипу — осина
повны — бояться
полысь — трусливый
подӧн — пешком
пожӧм — сосна
поз — гнездо
пом — конец, завершение
пон — собака
понпи, кутю, кычи — щенок
понтшак — гриб, поганка
порсь, польӧ — свинья
потан — люлька
потшӧс — изгородь
пӧжавны — печь, испечь
пӧжны — парить, тушить
пӧлӧзнича — василёк
пӧлӧн — вдоль
пӧль, ыджыд бать, ыджыд ай — дед
пӧльтны — дуть
пӧрт — котелок
пӧрысь — старый
пӧрччыны — снять одежду
пӧрччысьны — раздеться
пӧръявны — обмануть
пӧсь, пым — горячий
пӧтка — дичь
пӧттӧдз — досыта
пӧч, ыджыд мам — бабушка
пу — дерево; деревянный
пув — брусника
пуж — иней
пужъявны — покрыться инеем
пукавны — сидеть
пуксьыны — садиться, сесть
пуктыны — положить, ставить
пуны — варить
пурт — нож
пывсян — баня
пыж — лодка
пызан — стол
пызь — мука
пыр — всегда
пырны — зайти, войти
пыста, джиян — синица
пытш (пытшкын, пытшкӧ) — в, внутри
пытшкӧс — внутренность
пышкай — воробей

Р

радейтана — любимый
радейтны — любить
радлыны — радоваться
разьны — развязать, растегнуть, расплести
рака — ворона
рам — смирный, кроткий
рас — роща
регыд — скоро
резны — брызгать
репас — гнездо, лёжка лесной птицы в снегу
рок — каша
роч — русский
рочӧн — по-русски
рӧм — цвет, окраска
рӧмпӧштан — зеркало
ру — туман
руа — туманно
руд — серый
руч, ручиль — лиса
рысь — творог
рыт — вечер

С

садьмыны — проснуться
садьмӧдны — разбудить
сай (сайын, сайӧ) — за
саридз — море
серавны, гигзьыны — смеяться
серам — смех
серпас — картина
серпасавны — рисовать
серти — по
сетны — дать
сёйны — есть, кушать
сён — ложбина
сёркни — репа
сёрнитны — говорить
сёрӧн — поздно
сёшайт — дорогой мой
сизь — дятел
сикт — село
сикӧтш — бусы
син — глаз
сины — желать
сир — щука; смола
сійӧ — он, она, оно
сійӧс — её, его
скӧр — сердитый, злой
со — вот
сола — солёный
сос — рукав
сӧмын — только
сӧстӧм — чистый
сӧчӧн — тонко раскатанная скалкой лепёшка, сочень
став — все, вся
став бурсӧ — всего хорошего
ставнас — весь
стӧч — точно
сулавны — стоять
сы кодь жӧ — как и он
сывны — таять, растаять
сы пыдди — вместо него (неё)
сылӧн — у него, у неё
сылы — ему, ей
сылысь — у него, у неё
сын — язь
сынавны — расчёсывать
сынан — расчёска
сынӧд — воздух
сырчик — трясогузка
сытӧг — без него, без неё
сыысь — его, её
сьӧд — чёрный
сьӧдбӧж — горностай
сьӧд рака — грач
сьӧкыд — тяжёлый
сьӧла — рябчик
сьӧлаоз — поляника (растение)
сьӧкта — вес
сьӧм — деньга; чешуя рыбы
сьӧрысь — с собой
сьывны — петь
сэзь — ясный
сэк, сэки — тогда
сэні — там
сэсся — потом
сэтӧр — смородина
сэтчӧ — туда
сэтшӧм — такой
сэтысь, сэсь — оттуда
сюзь — сова
сюмӧд — береста
сюр — рога
сюсь — умный, хитрый

Т

таво — в этом году
тадз, тадзи — так
тай — же
тайӧ — это, эта, этот
талун — сегодня
тані — здесь, тут
тар — тетерев
тасьті — тарелка, миска
тасьті-пань, дозмук — посуда
татчӧ — сюда
татысь, тась — отсюда
татшӧм — такой
тешкодь — смешной, забавный, потешный
тёпкӧ-виялӧ — капает
ті — вы
тіян — ваш, ваша, ваше, ваши
тіянӧс — вас
тіянлы — вам
тіянлысь — у вас
тола — сугроб
том — молодой
топыда — крепко
торйӧдны — отделить
тошка — бородатый
тӧдса — знакомый
тӧв — зима, ветер
тӧвйысь — зимующий
тӧвся — зимний
тӧдны — знать
тӧдмавны — узнать
тӧдмасьны — познакомиться
тӧла — ветреный, ветрено
тӧлысь — месяц, луна
тӧрыт — вчера
тувсов — весенний
туис — берестяная посуда цилиндрической формы с деревянным дном и крышкой
туй — дорога
тулан — куница
тулыс — весна
тупкысьны — закрыться
тупӧсь — каравай, буханка хлеба
тупыль — клубок
тури — журавль
турипув — клюква
турӧб — вьюга
турун — трава
турунвиж, веж — зелёный
тусь — зёрнышко, ягода
тшак — гриб
тшем — много
тшӧктыны — попросить, приказать
тшӧкыд — густой
тшӧкыда — часто
тшӧтш — вместе
тшупӧд — ступенька
тшыг — голодный
тшын — дым
ты — озеро
тыр — полный; целый
тырмыны — хватать
тэ — ты
тэнад — у тебя; твой, твоя, твоё, твои
тэнӧ — тебя
тэнсьыд — у тебя; твой
тэныд — тебе
тэрмасьны — спешить
тэрыб — проворный, шустрый; быстрый

У

ув — ветка
ув (улын, улӧ) — под
увтны — лаять
удж — работа
уджавны — работать
уджач — трудолюбивый
узьны — спать
улӧс, джек — стул
уль — сырой
ур — белка; копейка
уртшак — сыроежка
ун — сон
уна — много
уськӧдны — уронить
усьны — падать

Ч

чавкан — галка
чань, чибӧ — жеребёнок
чардби — молния
чача, ворсантор — игрушка
челядь — дети
чер — топор
черань — паук
чери — рыба
черинянь — рыбник
чеччавны — прыгать
чеччыны — вставать
чибльӧг — черпачок
чизыр — резкий
чикыш — ласточка
чинны — уменьшаться
чипан, курӧг, сильӧ — курица
чипан кольк — куриное яйцо
чирк — кузнечик
чож — резвый; дядя (по матери)
чой — сестра; горка
чолӧм — привет
чолӧмавны — поздравить, приветствовать
чом — конура, шалаш
чорыд — жёсткий, твёрдый, чёрствый
чӧв — безмолвный, тихий
чӧд — черника
чӧдлач — голубика
чӧв-лӧнь — тишина
чӧж — в течение
чӧсмасьны — лакомиться
чӧскыд — вкусный
чӧсмӧдлыны — угостить
чужан — родной
чужан лун — день рождения
чужӧм, чужӧмбан — лицо
чужъясьны — пинаться
чуймыны — удивиться
чукля — кривой, с горбинкой
чукӧрӧн — стаей, группой
чукӧстны — позвать, окликнуть
чуман — наберушка
чунь — палец
чышкыны — подметать, вытирать
чышъян — платок

Ш

шабді — лён
шайт — рубль
шань — добрый
шаньга — шаньги
шебрас — одеяло; покрывало
шог — печаль; печальный
шога — тоскливо
шогсьыны — печалиться
шойччыны — отдыхать
шома — кислый
шонді — солнце
шондіа — солнечно
шоныд — тёплый; тепло
шор — ручей
шочиник — редкий
шӧвктуг — красавица
шӧпкӧдны — шептать
шӧр — середина
шӧркодь — средний
шӧрт — пряжа
шуда — счастливый
шудлун — счастье
шуны — сказать
шусьыны — называться
шутьлявны — свистеть, выть
шы — звук
шыбитны, чӧвтны — бросить
шыблавны — бросать
шыд — суп
шыдӧс — крупа
шыльыд — гладкий
шыпас — буква
шыр — мышь
шыран, ножнич — ножницы
шыранькытш — мышиный горошек
шырны — стричь

Ы

ывла — двор, улица
ыдждӧдлыны — величать, чествовать
ыджыд — большой, старший
ыж — овца
ылын — далеко
ыргӧн — медь, медный
ыркнитны — похолодать, посвежеть
ыркыд — прохладный, свежий; прохладно, свежо
ырӧш — квас
ытва — половодье

Э

эбӧс, вын — сила
эг, эн, эз, эгӧ, энӧ — не
эжа — дёрн
эзысь — серебро, серебряный
эм, эмӧсь — есть, имеется
эрд — полянка, поле
эскыны — доверять, верить
эськӧ — бы
этша — мало
эшкын — одеяло

Ю

ю — река
юктӧдны — напоить
юавны — спросить
югӧр — луч
югыд — светлый, светло
юква — уха
юмов — сладкий
юны — пить
юр — голова
юркар — столица
юркытш — венок
юрси — волосы
юрсикт — райцентр
юсь — лебедь

Я

яг — бор
яй — мясо
ябыр — скворец
яндзим — стыдно
ясыд — ясный

ЮРИНДАЛЫСЬ

ТӦВСЯ РЫТЫН МОЙДЧӦМ.

1—2. КЫТЧӦ? КӦНІ? КЫТЫСЬ? юалӧмъяс вылӧ вочавидзысь эмакывъяс. 3
3—4. КЫТІ? МЫЙЛАНЬ? МЫЙӦДЗ? юалӧмъяс вылӧ вочавидзысь эмакывъяс. 7
5. Эмакывлысь суффиксъяс вынсьӧдӧм. 11
Шыр да гадь. (Коми мойд). 11
6. Руч да кӧза. (Мойд). С. Раевский. 14
7. Кӧчлӧн праздник. (Мойд). Илля Вась. 16

ЧЕЛЯДЬДЫРӦЙ-СЁМАЙБЫРӦЙ...

8. Вурсьысь. З. Рогова 19
9—10. Чужан лун. Н. Куратова серти 22
11. Тӧв йылысь висьт. 27
12—13. Нимвежтас. 29
Шашки. С. Раевский серти 29
Вильышпоз. А. Мишарина 31
14—15. Горт олысьяс. А. Мишарина 32
16—17. Нимвежтаслӧн суффиксъяс 36
Мач. П. Бушенёв 37

ГАЖА ТУЛЫС ВОАС — ПӦЧ-ПӦЛЬ ОРДӦ ПЫРАС.

18. Кывберд. 38
Ставыс коланатор. П. Бушенёв 40
19. Кывберд гижанног. 42
20—21. -ИК, -НИК, -ИНИК-(-ІНИК) суффикса кывбердъяс. 45
Мамӧ вурис меным дӧрӧм. Ю. Васютов 45
Водздӧра. М. Безносикова серти 46
22—23. -КОДЬ суффикса кывбердъяс. 49
Важ коми йӧзлӧн пасьтасянног. 49
24. Сложнӧй кывбердъяс гижанног. 53
25—27. Кывберд вынсьӧдӧм. 55
Тулыс. Н. Фролов 56
28—29. Ми пӧжасям. С. Куликов 59
30. Кадакыв. 62
Кыдзи артмӧ сера дӧраысь дӧрӧм. 62
31—32. Кадакывлӧн кыв вежлалан суффиксъяс. 65
33—34. ОГ, ОН, ОЗ, ЭГ, ЭН, ЭЗ соссяна кадакывъяс. 68
Эм-ӧ коми костюм? Ю. Васютов 69
35—36. Кадакыв гижанног. 72
Пасьмунӧм кодзув. Е. Габова 72
Именнича. А. Мишарин 76
37. Письмӧ. 78
38—39. Акань. А. Ракин серти 80
Вуграсьысьяс. А. Ванеев 81
40—41. Эмакыв вынсьӧдӧм. 85
«Кызьӧд нэм пом кадыс каттьӧ...» А. Мишарина 85
Руй, руй. (Фольклорысь.) 87

ТУЛЫС БӦРСЯ ГОЖӦМ ВӦТЧАС.

42—43. Нимвежтас вынсьӧдӧм. 91
Вартча. А. Петрунёв 92
44. Кывберд вынсьӧдӧм. 94
Мулӧн мич. С. Раевский серти 94
Пӧлӧзнича. Л. Анисенкова 95
45—47. Чужан му. В. Лодыгин 97
48—50. Кадакыв вынсьӧдӧм 102
Кодзувкоткар. З. Молодцова серти 103
Бара нин. Илля Вась 105
Каникул. А. Мишарин 107
КОМИА-РОЧА КЫВЧУКӦР 110