Коми кыв рочьяслы (3-ӧд класс, 2 юкӧн, 2000)

Л. А. Моторина, З. И. Артеева

ЭЗЫСЬ ТӦЛЫСЬ

3 класса челядьлы комиӧн сёрнитны велӧдчан небӧг

2 юкӧн

Велӧдчан книгасӧ серпасаліс Г. Н. Шарипков

Вынсьӧдіс
Коми Республикаса йӧзӧс велӧдан да вылыс тӧдӧмлунъяс министерство

Москва
Московский городской фонд поддержки школьного книгоиздания
Издательско-продюсерский центр «Дизайн. Информация. Картография»
1999

Условнӧй пасъяс:

— сёрнит тадзи
— нюмсер, шмонь, теш
— тӧдмав
— кывчукӧр
— велӧд сьыланкыв
— содтӧд удж
— омоним
— синоним
— антоним

Коймӧд класса велӧдчысьяс!
Чолӧмала тіянӧс Выль воӧн!
Бура велӧдчӧй.
Тайӧ небӧгыс тіянлы козин.

Содержание

1 ВЫЛЬ ВОӦН, ЧЕЛЯДЬ!
2 ИЛЛЯ ВАСЬЛӦН СЕРАМБАНА ВИСЬТЪЯС.
3 БАРА МУНЫМӦС МИЧМӦДӦ ТУЛЫС.
4 СӦЛӦ БАБ МОЙДӦ.
- 4.1 33.
- 4.2 34
- 4.3 35–36
- 4.4 37–38
- 4.5 39–40
- 4.6 41
- 4.7 42
- 4.8 43–45
- 4.9 46
5 «ГОЖӦМ ЙӦЛӦН-ВЫЙӦН ИСКОВТӦ».
- 5.1 47
- 5.2 48
- 5.3 49–50
- 5.4 51
6 КОМИ КАНПАС ДА КЫП.
- 6.1 52–56
7 УРОК ВЫЛЫН ТШӦКЫДА ПАНЫДАСЬЛЫСЬ КЫВЪЯС ДА ВЫРАЖЕНИЕЯС
8 КОМИА-РОЧА КЫВЧУКӦР
9 ЮРИНДАЛЫСЬ

ВЫЛЬ ВОӦН, ЧЕЛЯДЬ!

1

1 удж. Лыддьӧй рольяс серти.

ВЫЛЬ ВО ДЫРЙИ.

Выль во дырйи миянӧ кежаліс Кӧдзыд пӧль. Ме вӧлі видзӧда телевизор пыр «Бур вой, челядь» передача. Кодкӧ кутіс ӧдзӧсӧ тотшкӧдчыны. Мам-бать восьтісны ӧдзӧс, а сэні, вӧлӧмкӧ, локтӧма Кӧдзыд пӧль. Ми ставӧн чолӧмалім сійӧс.
КӦДЗЫД ПӦЛЬ: Бур рыт! Эм-ӧ тіян шань да авъя
челядь?
БАТЬ-МАМ: Эм. Миян эм Машук да Мишук.
КӦДЗЫД ПӦЛЬ: Кымын арӧс тіянлы, Машук да Мишук?
МИШУК: Меным 5 арӧс.
МАШУК: А меным 10 арӧс.
КӦДЗЫД ПӦЛЬ: Мыйкӧ сьылӧй меным али
кутшӧмкӧ кывбур висьталӧй.
МАШУК: Ми сьылам комиӧн «В лесу родилась ёлочка».

Коз пуыс вӧрын чужӧма,
Да вӧрын быдмис дыр.
Кӧть тӧлын и кӧть гожӧмын
Веж лыска вӧлі пыр.

Ён бушков сылы сьывлывліс:
«Узь, козйӧй, баю-бай!»
Мороз пӧль лымйӧн шебравліс —
Коз пу, эн кынмы вай.

И тшӧкыда сэт котравліс
Зэв полысь сера кӧч.
Скӧр кӧин сідз жӧ волывліс
Коз пуыс улӧ стӧч.

Со песла вӧла ветлӧма,
А додь вылас мужик.
Коз пусӧ сійӧ кераліс
Ён вужйыс дорті дзик.

И со нин козйыс вӧччӧма,
Тан гажтӧмыд оз су.
Ӧд вайис сійӧ челядьлы
И радлун, и бур шуд.

КӦДЗЫД ПӦЛЬ: Аттьӧ, аттьӧ! Сьӧлӧм вылӧ воис сьылӧмныд. Со тіянлы козинъяс.
МАШУК да МИШУК: Аттьӧ, Кӧдзыд пӧль.
КӦДЗЫД ПӦЛЬ: Ме сэсся мӧдӧдча. Тэрмася. Колӧ пыравны мукӧд дорӧ. Видза колянныд!
СТАВӦН: Бур туй!

1. Велӧд «Вӧрын козйыс чужлӧма» сьыланкывсӧ.
2. Висьтав, кыдзи тэнад колис кадыс Выль во дырйи.
3. Висьтав, мый тэ вӧчин каникул дырйиыд.

2 удж. Лыддьы юӧрсӧ.

РӦШТВО.

Комиын тӧвшӧр тӧлысьын пасйӧны Рӧштво. Сы кежлӧ пӧжалӧны рудзӧгысь быдсяма нянь: мӧс, вӧв, ыж, кӧр формаа. Тайӧ пӧжассӧ видзлісны Василей лунӧдз. Сэсся няньсӧ сёйлісны, либӧ разӧдлісны челядьлы чача места.
Рӧштво лунсянь заводитчӧ вежадыр. Йӧз висьтавлӧны, мый тайӧ лунъясӧ му вывті ветлӧны куття войсаяс. Найӧ ёна гажӧдчӧны сэки. Накӧд ӧттшӧтш дурӧны и том йӧз. Найӧ пасьтасьӧны вӧрсаӧ, васаӧ, тунӧ да ветлӧны керкаысь керкаӧ. Сиктса олысьяс найӧс гӧститӧдӧны, сеталӧны шаньгаяс, кӧвдумъяс. Нывъяс гадайтчӧны.

(«Би кинь» журналысь.)

Висьтав, мый нӧшта тэ тӧдан Рӧштво йылысь.

Тӧдан-ӧ тэ?

1. Январь 7-ӧд лунӧ — Рӧштво.
2. Рӧштво лунсянь заводитчӧ вежадыр да кыссьӧ Василей лунӧдз.
3. Январь 14-ӧд лунӧ — Василей лун.

авъя — скромные, вежливые
вежадыр — святки
волывліс — приходил
вӧччӧма — принарядилась
гажтӧмыд — грусть
дорті — около
дурӧны — озорничают
дырйи — во время
кераліс — срубил
куття войса — святочный злой дух
кыссьӧ — продолжается
лыска — с хвоей
мӧдӧдча — направляюсь, отправляюсь
пасйӧны — отмечают
полысь — боязливый, пугливый, трусливый пӧжассӧ — выпечку
разӧдлісны — раздавали
стӧч — точно в указанное время
тотшкӧдчыны — стучать, постукивать, стучаться тун — ведун, знахарь, кудесник, колдун
тшӧкыда — часто
тэрмася — спешу
шебравліс — накрывал, прикрывал

2. Кывсикасъяс. Части речи.

эмакыв — имя существительное
нимвежтас — местоимение
кывбӧр — послелог
кывберд — имя прилагательное
кадакыв — глагол

кадакыв
кывберд
эмакыв

1. Воис кӧдзыд тӧв.
2. Усис небыд лым.
3. Челядь радейтӧны тӧв. Найӧ исласьӧны даддьӧн. (найӧ — нимвежтас)
4. Выль во дырйи челядь дорӧ воліс Кӧдзыд пӧль. (дырйи, дорӧ — кывбӧръяс)

Эмакыв, нимвежтас, кывбӧр, кывберд, кадакыв лоӧны кывсикасъясӧн.

3 удж. Лыддьы мичаа кывбурсӧ.

ЛЫШКЫД ПӦЛЬ.

Кор тай джудждас тола,
Лымйӧн тырас коз,
Челядь дорӧ волас
Лышкыд Дед Мороз.
Тошкыс сылӧн паськыд,
Доналӧма ныр.
Лым чир гӧна пасяс
Кышасьӧма тыр.
Пужъялӧма ёна

Шань пӧльыслӧн юр,
Сӧмын нюмыс шоныд,
Видзӧдласыс бур.
Ыджыд нопсӧ разяс
Мыйыс абу сэн!
Козинъяссӧ ассьыс
Мыччас тэд и мен.

(Е. Козлова.)

Корсь кывбурсьыс
кадакывъяс: джудждас, ..., ..., ... .
эмакывъяс: тола, ..., ..., ... .
кывбердъяс: лышкыд, ..., ..., ... .

4 удж. Корсь лӧсялана кывъяс.

лым, гут-гаг, тола, дадь, сырчик, турун
тӧвся, гажа, кӧдзыд, джуджыд, кын, шоныд
тёпкӧ-виялӧ, югъялӧ, лымъялӧ, кӧдздӧдлӧ, лым сылӧ, ислалӧны, дзордзалӧ, быдмӧ

5 удж. Лыддьы да сет ним.

Сиктыс ставнас вевттьысьӧма еджыд эшкынӧн. Ывла ёна кӧдздӧдіс. Челядь тӧвнас ислалӧны даддьӧн, лыжиӧн да конькиӧн. Вӧчалӧны лым мортъясӧс, лэбачьяслы козьналӧны кормушкаяс. Сэтчӧ пуктӧны шыдӧс, нянь, ид. Меным ёна кажитчӧ тӧлыс.
Сиктын верстьӧ йӧз тӧвнас уджалӧны водз асывсянь сёр рытӧдз. Найӧ ваялӧны турун. Вӧрысь кыскӧны пес, пилитӧны да поткӧдлӧны. Ломтӧны пачьяс, вайӧны ва. Ми отсасям бать-мамлы.

(«Би кинь» журналысь.)

Гиж куим столбикӧ.

эмакыв
сикт
...

кадакыв
вевттьысьӧма
...

кывберд
еджыд
...

вевттьысьӧма — покрылось
видзӧдласыс — взгляд
гӧна — покрытый перьями или шерстью
джудждас — сделается выше
доналӧма — покраснел
лышкыд — щедрый
мыччас — раздаст
паськыд — широкий
пужъялӧма — поседела
тёпкӧ-виялӧ — капает

3–5. Эмакыв.

Коді? да мый? юалӧмъяс вылӧ вочавидзысь кывъяс шусьӧны эмакывъясӧн.

ЛЭБАЧЬЯС ТӦЛЫН.

рака — ворона
сюзь — сова
пышкай — воробей
сизь — дятел
уркай — клёст
пыста — синица
байдӧг — куропатка
тар — тетерев
сьӧла — рябчик
дозмӧр — глухарка
чукчи — глухарь

6 удж. Лыддьы. Сет ним.

Уна звер-пӧтка олӧ миян вӧрын. Ур кӧть и ичӧт, кӧдзыдысь оз пов. Арнас нин заптысис сёянӧн. Пырас аслас позйӧ, тупкысяс пашкыр бӧжнас и виччысьӧ, кор помасясны кӧдзыд лунъяс. Водз садьмӧ и пыста: жбыръялӧ пуысь пуӧ да радлӧ. Кор мунан вӧрті, лолавсьӧ кокниа, лӧсьыда, морӧс тырнад! Лым вывсьыс аддзан уна кок туй — ручлысь, кӧчлысь, сьӧдбӧжлысь да мукӧд зверлысь.
Вӧрын тӧвнас вежсьӧ олӧмыс. Кӧч лои еджыдӧн. Войнас сійӧ чеччалӧма эрд вылын. Пӧрӧм пу дорын котралӧма тулан. Жоньяс сёйӧмаӧсь кынмӧм пелысь. Таръяс пукалӧмаӧсь коз дорын. Байдӧгъяс кӧчьяс кодь еджыдӧсь жӧ.

(«Би кинь» журналысь.)

1. Инды коді? юалӧм вылӧ вочавидзысь кывъяс.
2. Инды мый? юалӧм вылӧ вочавидзысь кывъяс.

7 удж. Содты лӧсялана кывъяс да помав сёрникузяяссӧ.

1. Пелысь пу вылын пукаліс гӧрд морӧса ... .
2. Кӧдзыд дырйи лым пытшкӧ дзебсьӧ еджыд ... .
3. Войнас шыръясӧс куталӧ ыджыд синма ... .
4. Пожӧм пу вылын тотшкӧдчӧ кузь ныра ... .
5. Тӧвнас поз вӧчӧ чукля ныра ... .

байдӧг, сизь, уркай, жонь, сюзь

8 удж. Корсь пӧвсӧ.

катша
жонь
пыста
пышкай
рака
синица
ворона
воробей
снегирь
сорока

9 удж. Лыддьы да содты кывъяс.

ИЧӦТИК ПЫШКАЙ.

Ичӧтик пышкайлӧн ... висьӧ.
— Кӧн вӧлін, кӧн ветлін, ичӧтик пышкай?
Ичӧтик пышкайлӧн ... висьӧ.
— Кӧн вӧлін, кӧн ветлін, ичӧтик пышкай?
Ичӧтик пышкайлӧн ... висьӧ.
— Кӧн вӧлін, кӧн ветлін, ичӧтик пышкай?
. . .

(Фольклорысь.)

Ворс «Пышкайысь».

10 удж. Бӧрйы да гиж медводз пӧтка нимъяс, а сэсся тӧвйысь лэбач нимъяс.

Рака, байдӧг, пышкай, тар, пыста, жонь, сьӧла, катша, сюзь, сизь, дозмӧр.

Гиж эмакывъяссӧ уна лыдын.

11 удж. Висьтав, кутшӧм кыв оз лӧсяв.

катша, пышкай, чикыш, пыста
юсь, сырчик, сизь, сюзь
тар, уркай, кӧк, дозмӧр
дзодзӧг, гулю, байдӧг, жонь

Тӧдмав.

Т-ӧн — дзурс лым пиӧ пырас,
Д-ӧн — шыд чугунӧ сюрас.

12 удж. Лыддьы висьтсӧ.

ПЫШКАЙ.

Ывлаын йиркакылӧ кӧдзыд, гашкӧ, нелямын градус сайӧ. Руа. Сиктын лӧнь, сӧмын машинаяс журкнитасны — мунӧны асланыс могӧн. Ме тэрыба локта лавкаысь. Матыстча нин горт дорӧ. Видзӧда, туй вылын кокасьӧны пышкайяс, корсьӧны сёян. Ме локті на дорӧ, ставӧн жбыр лэбисны, а ӧти коли, куйлӧ туй вылас. Копыртчи. Видзӧда: ловъя на, синмыс жугыля видзӧдӧ. Босьті киӧ. «Мый лои тэкӧд, коньӧрушкаӧй?» Ставыс быттьӧ лючки-ладнӧ, кокыс дзонь, бордыс местаас, абу чегӧма, вомас зӧр тусь.
Пышкай куйлӧ ки пыдӧсын, оз вӧр. Сӧмын синсӧ гӧгрӧдлӧ... Ме пӧльышті сы вылӧ пӧсь лов шыӧн. Сэсся сюйи пась питшӧгӧ да мӧдӧдчи гортӧ, мися, пырта керкаӧ, мед шонтысьыштас. Кильчӧ пос дорын нин кыла: пышкайыд кутіс вӧрны питшӧгын. Пӧрччи кепысьӧс да босьті киӧ, сэсся восьті кабырӧс. Пышкайыд друг вӧрзис да полігтыр, быттьӧ велӧдчӧ на, лэбис. Пуксис куст ув вылӧ, но мыні сэтысь да уси лымъяс. Ме матыстчи сы дорӧ, нюжӧді киӧс, но... Сійӧ лэбис кыдз пу ув вылӧ. Пукалыштіс сэні, чеччалыштіс увйысь увйӧ да горӧдіс чуксасьны:
— Чик-чирик, чик-чирик!
Аддза, менам другӧй бӧр ловзис, — тыдалӧ, кӧдзыдыс чорыда топӧдлӧма сійӧс.
Час джын мысти нарошнӧ петалі видзӧдлыны, эз-ӧ усь кыдз пу вывсьыс. Видзӧда гӧгӧр — некӧн абу, некӧн оз чирзы.
Со ӧд, уна-ӧ колыштӧ ичӧтик лэбачыдлы шоныдыс, медым бӧр ловзьыны да заводитны сьывны:
— Чик-чирик!

(С. Раевский.)

1. Лыддьы текстысь:
1) поводдя йылысь местасӧ;
2) мый казяліс туй кузя мунысьыс;
3) кыдзи ловзьӧдіс морт пышкайӧс.

2. Корсь уна лыда эмакывъяс да гиж.

13 удж. Содты лӧсялана кывъяс.

МЕНАМ ЛЭБАЧЬЯС.

Позъяс гӧнтор бара кыскӧ
Медводз садьмӧм тэрыб ... .
Тшапа юрсӧ лэптіс ... ,
Аслыс сьылӧ: «гу-ли, гу-ли»,
Тырмӧ, майбыр, уджыд ...лы:
Пуысь номыръясӧс сизьдӧ!
...ӧс чим гӧрд сарапаныс
Весиг сад йӧрын оз янӧд.
... бӧжнас кутас жӧдзны, —
Воас кад сэк петны кӧдзны.
Сэк жӧ кӧкиль-...
тшӧтш садьмас,
Лыддяс дедлысь-баблысь арлыд.
Регыд ковмас
...лы
воны:
Сылы колӧ гожся шоныд.
Пуксяс ... ыджыд козйӧ, —
Сэні сылӧн шоныд позйыс!
... важ мозыс пыр сӧрӧ,
Мед кӧть потшӧссӧ оз пӧрӧд!

(С. Попов.)

Отсӧг вылӧ кывъяс: пыста, гулю, сизь, жонь, сырчик, кӧк, джыдж, рака, катша.

14 удж. Лӧсьӧд серпас серти юалӧмъяс отсӧгӧн висьт да гиж. Челядьлы сет нимъяс.

ЛЭБАЧЬЯСӦС ВЕРДАНІН.

1. Коді вӧчис лэбачьяслы верданінсӧ?
2. Кытчӧ сійӧс ӧшӧдіс детинка?
3. Мый сэтчӧ кисьтіс нывка?
4. Кодъяс лэбзисны сёян дорӧ?
5. А тэ кыдзи тӧждысян тӧвйысь лэбачьяс йылысь?

вежсьӧ — изменяется
вӧрзис — пошевелился
виччысьӧ — ждёт, ожидает
дзурс — мгновенно
жбыръялӧ — порхает
жӧдзны — сновать
жугыля — грустно, печально
йиркакылӧ — громко стучит, гремит
кабырӧс — кулак
кокасьӧны — клюют
колыштӧ — надо
лӧсьыда — хорошо
майбыр — небось
мыні — сорвалась
номыр — червь, червяк
оз вӧр — не шевелится
оз пӧрӧд — не свалит
оз чирзы — не пищит
оз янӧд — не стыдит
питшӧгӧ — за пазуху
помасясны — прекратятся
полігтыр — с опаской
пӧльышті — дунул
радлӧ — радуется
садьмӧ — просыпается
сӧрӧ — бредит
сьӧдбӧж — горностай
тулан — куница
тупкысяс — прикроется
тэрыба — быстро
чукля — с горбинкой
эрд — открытое, безлесное место, поляна

ИЛЛЯ ВАСЬЛӦН СЕРАМБАНА ВИСЬТЪЯС.

6–7

Илля Вась (Лыткин Василий Ильич) чужис Сыктывкар бердса Тентюков сиктын 1895 вося декабрь 28-ӧд лунӧ. Сійӧ гижис посни челядьлы мича сӧстӧм кывйӧн кывбуръяс, мойдъяс. Илля Вась вӧлі паськыда нималана учёнӧйӧн, профессорӧн. Оліс сійӧ 86 арӧсӧдз.

15 удж. Лыддьы.

ЯКОВ ДЯДЬ, ЧУЖЪЯ!

Ичӧт дырйи менам оз вӧлі артмы Л шы, сы пыдди артмӧ вӧлі Й шы. Ме кӧсъя шуны: йӧлыд шома, а артмӧ йӧйыд шома. Гырысьджык челядь ме вылын сералӧны: йӧйыд, шуӧны, йӧй и эм — абу шома ни юмов. Кӧсъя шуны: менам лӧг петӧ, а артмӧ: менам йӧг петӧ. Бара ме вылын сералӧны — сьӧмдӧмаӧсь.
Ӧтчыд мамӧ менӧ ыстіс лавкаӧ, чуж ньӧбны. «Мун, — шуас, — котӧртлы, пиук! Со вузасьысьыс, Яков дядьыд, буретш пырис магазинас!» Ме лавкаад ӧтнам ньӧтчыд на эг ветлы, пола муннысӧ, юася мамӧлысь: мый нӧ, мися, ме шуа, лавкаад пыра да? Мамӧ велӧдӧ менӧ, тэ пӧ шу: «Яков дядь, чужла!» Яков дядьыс сьӧкыд пеля вӧлі да, мамӧ тшӧктіс дзик дінас сувтны да ыджыд гӧлӧсӧн шуны: «Яков дядь, чужла!» Ме сідзи и вӧчи. Магазинӧ котӧрӧн пыри, сувті Яков дядь бердӧ да лавка пасьтаыс горӧді: «Яков дядь, чужъя!»
— Ой-ой-ой! Эн чужйы! Дойма ме да бӧрдны кута! — вак-вакӧн серӧктіс Яков дядь.
Ме повзи да пышйи гортӧ. Сідзикӧн чуж эг вай ни некодлы эг чужйы.

(Илля Вась.)

1. Вочавидз юалӧмъяс вылӧ.

1) Код йылысь висьтавсьӧ тайӧ гижӧдас?
2) Кутшӧм шы сылӧн оз вӧлі артмы?
3) Кытчӧ ыстіс зонкаӧс мамыс?
4) Мый кӧсйис зонкаыс шуны лавкаын? Мый артмис?

2. Корсь эмакывъяс. Висьтав кутшӧм лыдын найӧ сулалӧны. Инды суффиксъяссӧ.

3. Тӧдчӧдӧм кывтэчасъяслысь вежӧртассӧ корсь небӧг помысь.

4. Висьтав, мыйӧн торъялӧны кывъясыс: йӧв — йӧй, лӧг — йӧг, чужла — чужъя.

16 удж. Тӧдмав нӧдкывсӧ.

Пуысь пуӧ чеччӧ-лэбӧ,
Пипу горсйӧ асьсӧ дзебӧ,
Киӧн кутны оз на сюр.
Челядь, коді тайӧ? |

(А. Туркин.)

ур — белка;
ур — копейка (денежная единица коми)
оз — земляника; оз — не
сюр — рог, рога; оз сюр — не поймать

17 удж. Артмӧд-ысь суффиксӧн эмакывъяс да гиж.

Вӧч тадзи: велӧдчыны — велӧдчысь.

Вузасьны — ... , ньӧбасьны — ... , бурдӧдны — ... , пӧжасьӧны — ... .

18 удж. Висьтав комиӧн.

Вӧч тадзи: один рубль — ӧти шайт.

Одна копейка — ӧти ур, ... .

* * *

ВУЗАСЬЫСЬ: Мый тэ кӧсъян ньӧбны? НЬӦБАСЬЫСЬ: Ме бӧръя козин. Менам нывъёртлӧн талун чужан лун.
ВУЗАСЬЫСЬ: Со аканьяс, мачьяс. Бӧрйы. НЬӦБАСЬЫСЬ: Дона-ӧ тайӧ мича аканьыс? ВУЗАСЬЫСЬ: Акань — бур козин. Доныс — 5 шайт 17 ур. Сьӧмыд тырмас?
НЬӦБАСЬЫСЬ: Тырмас. Ме ньӧба аканьсӧ. ВУЗАСЬЫСЬ: Козьнав нӧшта дзоридзьяс. Нывкалы лоӧ зэв нимкодь.
НЬӦБАСЬЫСЬ: Аттьӧ.

19 удж. Сёрнитӧй ӧта-мӧдкӧд.

— Дона-ӧ тайӧ ошкыс?
— Сыысь колӧ мынтыны 1 шайт 20 ур.

20 удж. Ачыд инды донсӧ.

— Дона-ӧ тайӧ «Бобувъяс» небӧгыс?
— Ме ог тӧд. Ме чайта, куим шайт ветымын ур.

21 удж. Висьтав комиӧн, мый позьӧ ньӧбны «Сёян-юан» лавкаысь. Гиж.

Хлеб, молоко, масло, сметана, мясо, мука, крупа, овощи, фрукты, печенье, конфеты, сладости, соль, квас.

22 удж. Артасьышт.

Ӧньӧ ветліс вузасянінӧ да ньӧбис йӧв, нянь, вый, кампет. Йӧлыслӧн доныс — 2 шайт 50 ур, няньлӧн — 3 шайт 10 ур, 200 грамм выйлӧн — 5 шайт 20 ур, кампет пачкалӧн — 4 шайт 30 ур.
Ӧньӧлӧн вӧлі 20 шайт. Уна-ӧ колис сылӧн сьӧмыс?

23 удж. Велӧд кывпесансӧ.

Лыддьӧ катша —
Китш-котш:
«Кымын майӧг,
Кымын потш?»

(А. Некрасов (Гамса.)

24 удж. Висьтав, мый оз лӧсяв.

чужла, няньла, сьӧла, йӧвла
ракапиян, кӧинпиян, шырпиян, чышъян
пила, ывла, вокла, чойла
ырӧшла, сьыла, корла, ветла

* * *

МЕДДОНА КЫВ.

Ивӧ кӧсйӧ шуны бать,
Артмӧ ичӧт мортлӧн ать.
Думсьыс шуӧ эськӧ нянь,
Артмӧ сылӧн сӧмын ань.
Тшӧктан шуны сылы рок,

Ышловзяс да шуас: йок.
Сідзсӧ эм нин мортлӧн сям:
Лӧсьыда зэв шуӧ мам.
Шуӧ медся дона кыв,
Таысь йӧкты кӧть да сьыв.

(В. Лодыгин.)

дона-ӧ — дорого ли
думсьыс — мысленно
горс — дупло
ичӧт дырйи — в детстве
йӧг — шишка
йӧй — глупый
йӧлыд — молоко (от слова йӧв)
козьнав — подари
кӧть — хоть
лӧсьыда — хорошо
майӧг — кол
мынтыны — заплатить
нималана — известный
потш — жердь
сы пыдди — вместо него
сьӧмдӧмаӧсь — захлёбывались от смеха
сьӧм — деньги
тшӧктіс — попросила
шома — кислый
ышловзяс — вздохнёт
чуж — солод (продукт из проросших и смолотых зёрен хлебных злаков, употребляющихся для приготовления кваса)
чужъя — пну ногой

8–9

25 удж. Лыддьы.

КОРОШО ЖИВЁШЬ?

Менам мамӧ вӧлі тӧдӧ рочнад кымынкӧ кыв: есь да нет да мый да. Весигтӧ быдса сёрникузяяс вӧлі тӧдӧ: ложимтися спать, нам некого ждать.
Вот эштанджык кадӧ, праздникъясӧ, менӧ мамӧ и велӧдӧ вӧлі рочӧн сёрнитны; кор ме, шуас, юала: «Вася, каково поживаешь?», тэныд колӧ вочавидзны: «Корошо живёшь!»
Локтас мам удж вылысь (ме горт ола, ог на вӧлі велӧдчы), юалӧ:
— Вася, каково поживаешь?
Ме сылы тшапа вочавидза:
— Корошо живёшь!
Со тадзи вӧлі и рочасям мамкӧд! Бура вӧлі гӧгӧрвоам мӧда-мӧднымӧс, кӧть невернӧ шуалам роч кывъяссӧ.
Ӧні со мукӧд мортыскӧд сёрнитан тыр-бур кывйӧн: комиӧн и рочӧн и мукӧд пӧлӧс сёрниӧн, а гӧгӧрвоны он вермы! Юр вемным эськӧ эз жӧ на гудыртчы да!

(Илля Вась.)

1. Вочавидз юалӧмъяс вылӧ.

1) Кужисны эз сёрнитны важӧн рочӧн коми войтыр?
2) Кутшӧм сёрникузя тӧдіс мамыс рочӧн?
3) Кыдзи мамыс пиыскӧд сёрнитіс рочӧн? (вайӧд некымын сёрникузя).
4) Корсь тайӧ висьтсьыс шӧр мӧвп.

2. Висьтав комиӧн: Вася, как живёшь? Хорошо живу.

3. Кыдзи тэ гӧгӧрвоан сёрнитан тыр-бур кывйӧн, юр вемным эз гудыртчы? Корсь вежӧртассӧ небӧг помысь.

4. Содтав лӧсялана кывъяс: комиӧн сёрнитӧны комияс, финн кывйӧн — финнъяс, мари кывйӧн — ... , эст кывйӧн — ... , карел кывйӧн — ... , удмурт кывйӧн — ... .

26 удж. Висьтав комиӧн да гиж.

Здравствуй, привет, до свидания, доброе утро, добрый день, спокойной ночи, счастливого пути, приятного аппетита.

27 удж. Лыддьы.

КОМИ МОРТКӦД СЁРНИ.

Шуа тэныд: «Эн рочась,
Кор мен чургӧдан ки...»
Мыйла сёрнитам шоча
Дона мам кывйӧн ми?
Эска, сьӧлӧмад олӧ
Войвыв Муыслӧн би...
Шу вай комиӧн: «Чолӧм!»
Кор мен чургӧдан ки... .

(В. Уляшёв.)

Инды эмакывъяс, кодъяс сулалӧны век ӧтка лыдын. Кутшӧм ӧтка лыдын сулалысь эмакывъяс тэ нӧшта тӧдан: лым, ... , ... .

* * *

БАКВАЛ.

Бабӧ пӧжалӧма сӧчӧн,
Картупельысь чӧскыд нянь,
Дина чойӧй шуис рочӧн:
Пусть их кушает наш кань!
Рочнас сёрнитны оз куж,
Ачыс горзӧ: «Знаю уж!»
Дина миян бак да вал
Ӧти кывйӧн кӧ — баквал!
Тышкас-мышкас рочалыштас,
Чойӧс гортысь кӧть тодмышкав.
Кӧть ме сылы ыджыд вок,
Ог и жалит, ог и ог!
Мед оз баблысь сӧчӧн кулит,
Мед оз менӧ быд лун жуль-вид,
Мед оз рочась, оз кӧ куж,
Мед оз мыччав ассьыс чуш.

(Н. Куратова.)

28 удж. Лыддьы кывбурсӧ комиӧн да рочӧн.

ФЕВРАЛЬ.

Поводдяыс помся дурӧ:
Талун мича, аски лёк,
Коркӧ кӧдзыд, коркӧ-й турӧб
Лымйӧн тыртас гӧгӧрбок.
Но февральлӧн эм жӧ аслас
Ыджыд мичлун, озырлун:
Тайӧ тӧлысьын ми пасъям
Армиялысь чужан лун.
Капризная погода:
То ветер, то пурга.
Такое время года —
До самых крыш снега.
Февраль — большой проказник,
Шалит перед весной.
Но в феврале есть праздник,
День армии родной.

(С. Куликов.)

29 удж. Корсь пӧвсӧ.

ноябрь
январь
май
июль
февраль
сентябрь
декабрь
март
август
июнь
апрель
октябрь

урасьӧм
кос му
ӧшым
кӧч
вӧльгым
ода-кора
йирым
лӧддза-номъя
рака
моз
сора
тӧв шӧр

весигтӧ, весиг — даже
гӧгӧрбок — со всех сторон
гӧгӧрвоам — понимаем
кымынкӧ — несколько
мӧда-мӧднымӧс — друг друга
мукӧд пӧлӧс — иного рода
оз мыччав чуш — не надувает губы
помся — постоянно
сӧчӧн — тонко раскатанная скалкой лепёшка
тодмышкав — выгони
турӧб — вьюга
тшапа — щеголевато
тышкас-мышкас — шиворот-навыворот
чургӧдан — подашь
эштанаджык — в свободное

10–11

30 удж. Лыддьы.

КЫК САКАР ТОР.

Миянкӧд орчча керкаын оліс Павел нима детинка, сійӧ вӧлі мекӧд тшӧтшъя — кӧкъямыс арӧса. Павел пыр гортас оліс: сы ки вылӧ кольлісны нёль арӧса Ӧньӧ воксӧ да ар джынъя чойсӧ. Павел ордын ми ворсім быдсяма ногыс.
Ми Павелкӧд вермасьны кутім керкаас. Кыдзкӧ сэсся вермасигад кокным пызан кокӧ крукасис, да и пӧри пызаныд.
Пызан вылас вӧлі кока лампа. Лампаыд и уси да гуль-гуль жугалі, торпыригыс джодж пасьта разалі. Миян сьӧлӧмным ёкмуні, повзим — Павеллӧн батьыс вӧлі зэв скӧр. Павел кутіс чукӧртны зэв тэрыба... мед ичӧт вокыс оз аддзыв. Мокасьтыд, Ӧньӧыд, вӧлӧм, видзӧдӧ кӧтшас пельӧссянь, шуӧ:
— Висьтала батьыдлы... Мый вӧчинныд!
Павел бӧрдны кутіс, менӧ видӧ:
— Тэ жугӧдін. Батьыдлы удта.
Ме пиняся:
— Эг жӧ ме, ачыд тай кок пӧвнад крукыштін пызансӧ!
Ми спорӧ воим да, ме сэсся пышйи гортӧ... Вои гортӧ. Зэв гажтӧм ӧтнамлы. Телепит бӧр Павел ордӧ. Но ог лысьт да и лӧг петӧ: ачыс пӧрӧдіс пызансӧ, а ме вылӧ шуӧ.
Тӧд вылӧ уси бабӧлӧн кывъясыс: лёкӧн пӧ нинӧм он вермы вӧчны, а бурӧн быдтор артмас да ладмас. Босьті шкапысь кык сакар тор, муні Павел дінӧ, шуа сылы пель водзас:
— Сетам Ӧньӧыдлы тайӧ сакар торсӧ, мед оз висьтав батьыдлы.
Сетім Ӧньӧлы, шуам сылы:
— Эн висьтав лампа жугӧдӧм йывсьыд батьыдлы! Ӧньӧлы зэв нимкодь лои, шуӧ:
— Ог, ог висьтав!
Коркӧ и рыт воис. Локтісны Ӧньӧлӧн бать-мамыс. Ӧньӧ уськӧдчис паныд, горзӧ:
— Мамӧ!.. Батьӧ! Ми лампатӧ эгӧ жугӧдӧй!
Ме ӧдйӧджык гортӧ пышйи. Менам кык сакар торйыд весь воши. Аслым жӧ колӧма сёйны!

(Илля Вась серти.)

Вочавидз юалӧмъяс вылӧ.

1. Коді сійӧ Павелыс? Мый тэ верман висьтавны сы йылысь?
2. Мый вӧчӧны лунтыр зонкаяс?
3. Мыйӧн помасис налӧн вермасьӧм?
4. Коді найӧс аддзыліс?
5. Кутшӧм кывъяс усисны зонкалы дум вылас?
6. Мыйӧн пӧрйӧдлісны Ӧньӧӧс зонкаяс?
7. Мыйӧн помасис висьтыс?

31 удж. Инды эмакывъясысь суффиксъяс.

Вузасянін, велӧдчанін, варччанін; бурлун, сюсьлун, мичлун; жоньпи, урпи, уркайпи; буртор, йӧвтор, сакартор.

Ин, лун, пи (пиян), тор кывъяс кӧ мунӧны суффиксъяс пыдди, гижсьӧны ӧтлаын: ворсанін, кужанлун, ошпиян, унатор.

сакар тор — кусочек сахара
сакартор — немного сахара
бур лун — добрый день
бурлун — доброта

32 удж. Артмӧд суффиксъясӧн кывъяс.

-ин (-ін): шоныд — ... , кос — ...
-лун: озыр — ... , мич — ...
-пи: кӧр — ... , йӧра — ...
-тор: нянь — ... , ва — ...

ПЕТАМ ИСКОВТАМ.

Ӧшинь улын круткодь чой,
Петам, исковтам сэт, чой.
Оз и ков тай тэрыб вӧв.
Тӧвзям — полӧмным эз вӧв.
— Пӧрам лымйӧ?!
— Чеччам бӧр!
Дадьлӧн крепыд льӧм пу бӧр.

(А. Некрасов (Гамса.)

33 удж. Висьтав комиӧн.

сестра, крутая горка — чой
холод, холодный, холодно — ...
тепло, тёплый — ...
зима, ветер — ...
олень, вкус еды — ...
сухой, поясница — ...

34 удж. Висьтав, кутшӧм эмакывъясысь артмӧмаӧсь действие нима кывъяс.

Лымъявны — лым, козьнавны — ... , дӧрӧмасьны — ... , гачасьны — ... , пасясьны — ... , чышъянасьны — ... , кепысясьны — ... , кӧмасьны — ... , панясьны — ... .

35 удж. Лӧсьӧд эмакывъяс.

Вӧч тадзи: лёк — кок.

* * *

КЫК ДРУЖОК.

Лӧгасисны кык дружок:
Лӧгасьӧмнад овны лёк.
Петя шуӧ: — Чомсьыс пет,
Тэныд нинӧм ме ог сет.
Шурик дзузгыльтӧма ныр:
— Некор миянӧ эн пыр!
Торйӧдчисны кык дружок,
Мед оз тыдав весиг кок.
Сӧмын ӧтнад ворсан дыр-ӧ,
Зэв тай ӧдйӧ гажыд бырӧ.
Петя горзӧ: — Волы, Шурик,
Морта книга меным сюри!
Шурик шуӧ: — Пырав ачыд,
Гӧгылясям ыджыд мачӧн.
Сералӧны, гир да гир,
Другъяс костын лоис мир.

(Ю. Васютов.)

ар джынъя — полугодовалая
вермасигад — при борьбе
весь — зря, напрасно
гӧгылясям — покатаем колесо
дзузгыльтӧма — повесил
ёкмуні — ёкнуло
кӧтшас пельӧс — задний угол избы
крукасис — зацепился
крукыштін — зацепил
круткодь — крутая
ладмас — образуется
лӧгасисны — поссорились
мокасьтыд — чертёнок
ог лысьт — не смею
орчча — соседний
полӧмным — страха
телепит — охота, хочется
торйӧдчисны — расстались
торпыригыс — осколки
тшӧтшъя — одного возраста
удта — скажу

12. Нимвежтас.

36 удж. Лыддьы.

НИНА КУРАТОВА ГИЖӦ ЧЕЛЯДЬЛЫ.

Куратова Нина Никитична чужис 1930 вося февраль 17-ӧд лунӧ Сыктыв районса Куратово сиктын. Сійӧ гижӧ челядьлы висьтъяс, кывбуръяс. Сылӧн петалісны небӧгъяс: «Вайӧ тӧдмасям», «Мишук быдмӧ лунысь лунӧ», «Бобӧяс ті бобӧяс, нывкаяс да зонкаяс».

Кутшӧм висьтъяс да кывбуръяс тэ тӧдан Н. Куратовалысь?

37 удж. Лыддьы.

ВАЙӦ ТӦДМАСЯМ.

Шуйгавылас ме — Юра Пыстин. А мекӧд орччӧн Женя Синицын. Шуӧны, миян пӧ кыкнаннымлӧн ӧткодь овным, кӧть сійӧ Синицын, а ме Пыстин. Вуджӧдны кӧ роч кыв вылӧ Пыстинсӧ — лоӧ Синицын и мӧдарӧ — Синицынсӧ кӧ комиӧдны лоӧ Пыстин.
Женя — менам медбур друг.
Тайӧ небӧгас ме висьтала тіянлы, кыдзи ми сыкӧд ёртасям, ӧта-мӧдлы отсасям. Висьтышта и ас йылысь, медым ті верминныд тӧдмавны, кутшӧмджык ме зонка — бур али лёк, и верманныд-ӧ мекӧд эськӧ Женя моз жӧ ёртасьны? А ме зэв ёна кӧсъя! Ставныдкӧд!
Пӧсь чолӧмӧн Женя Пыстин.

(Н. Куратова серти.)

1. Висьтав, мыйла Юралӧн да Женялӧн овъясыс
ӧткодьӧсь?
2. Лыддьы «Вайӧ тӧдмасям» небӧгсӧ дзоньнас.

38 удж. Вуджӧд овъяссӧ роч кыв вылӧ.

Канев, Рочев, Сизев, Порсьюров, Изъюров, Кызъюров, Кузиванов, Кузьбожев, Кузьпелев, Кушманов, Пуртов, Кынев.

Содты коми овъяс.

39 удж. Инды эмакывъяс.

Женя зэв бур друг. Сійӧ велӧдчӧ коймӧд классын. Женя дорӧ тшӧкыда волывлӧны Ваня да Миша. Найӧ кык вок.

Сійӧ — нимвежтас, вежӧ Женя эмакыв.
Найӧ — нимвежтас, вежӧ Ваня да Миша эмакывъяс.

Ме, ми, тэ, ті, сійӧ, найӧ лоӧны нимвежтасъясӧн.
Сёрникузяын найӧ вежӧны эмакывъяс.

40 удж. Лыддьы да инды нимвежтасъяс.

Мишук ичӧтик.
— Коді нӧ тэ, кыдз тэнӧ шуӧны?
— Ме — Мися Момозев, — збойиника вочавидзӧ сійӧ.
— А-а, Морозов Миша инӧ тэ?
— Да, Мися.
— А кымын арӧс нӧ тэныд?
Миша пыр жӧ петкӧдлӧ веськыд кисьыс кык чунь.

(Н. Куратова.)

41 удж. Юасьӧй ӧта-мӧдныдлысь.

— Коді тэ?
— Мый нимыд? Мый овыд?
— Кытысь тэ ачыд?
— Тэныд кымын арӧс?

КУТ ТӦД ВЫЛАД!

нимвежтасъяс

ачым — сам я
ачыд — сам ты
ачыс — сам он

42 удж. Лыддьы мойдсӧ.

ВЕЖАВИДЗӦМ КУЗЯ УРОК.

Вӧрса автобусын тырыс пемӧс. Автобус матысмӧ остановка дорӧ. Петан ӧдзӧс дорас сулалӧ пӧрысь дзор Сан. Сы дорӧ матыстчис Кӧч да юалӧ:
— Ті, папаша, петанныд?
— Ачым тӧда, — вочавидзис Сан.
— А ме пета...
— Ачыд тӧдан, петан он...
— Но автобусыс оз виччысь, водзӧ мунас...
— Сійӧ ачыс тӧдӧ, мунас али оз...
— Лэдзӧй, пӧжалуйста, ме пета...
— Вот тайӧ дзик мӧд дело, — шуис Сан да сетіс Кӧчлы туй.

(С. Раевский.)

1. Кодъяс мунісны автобусӧн?
2. Мыйла сы дыра эз воны ӧти кывйӧ Кӧч да Сан?
3. Инды нимвежтасъяс.

43 удж. Лыддьы.

МЕДМУСА КОМИ КЫВЪЯС.

Пызан бердад сёйны-юны
тэрмасьны оз ков,
эн, эн вунӧд йӧзлы шуны:
— Нянь да сов!
Ӧлӧмыд кӧ ылӧ нуас,
медым оз босьт жуй,
чужан муыд тэныд шуас:
— Шуда туй!
Уджыд му вылад эм уна,
вӧчны быдтор куж,
мырсьысьлы эн вунӧд шуны:
— Кыпыд удж!
Кодзулӧн кор енэж жуӧ,
вод да синтӧ кунь,
мамыд тэныд, пиук, шуас:
— Чӧскыд ун!
Сылы, коді вӧчӧ бура,
кодлӧн зэв пӧсь сыв,
тэныд пыр мед шуны сюрас
«Аттьӧ» кыв!
Асыв пырас миян расӧ,
Сійӧс вежас рыт.
Воддзаыслы: — Шуда асыв!
Мӧдыслы: — Бур рыт!

(С. Попов.)

Велӧд вежавидзана кывъяссӧ.

бердад — к
вежавидзана — вежливые
воддзаыслы — первому
водзӧ — вперёд
дзик — совсем
дзор — седой
жуй — прозябание
жуӧ — кишит
кодзулӧн — звездами
кӧсъя — хочу
кунь — закрой
кутшӧмджык — какого
лэдзӧй — выпустите
мырсьысьлы — работающему
оз виччысь — не будет ждать
орччӧн — рядом
расӧ — в рощу
сыв — объятия
сюрас — отыщется
тэрмасьны — торопиться

13

44 удж. Лыддьы

УКОНОК.

Анна пӧчлы суседкаыс вайис ичӧтик бальӧпи, тӧвйӧд пӧ, мӧд во ар кежлӧ яй лоӧ. Аттьӧаліс пӧчыд суседкасӧ да бальӧпитӧ лэччӧдіс гидас. А вӧлі кӧдзыд тӧв, да балюкыд гидад кынмӧма дзикӧдз. Ковмис пӧчӧлы ичӧтиктӧ пыртны гортас. Пач бокас чомтор вӧчис да сэтчӧ и йӧршитіс сійӧс, кӧдзыд тӧвсӧ пӧ ӧтув коллялам. Баляпикӧд варовитанінӧ и суисны сійӧс гӧстяяс.
Анна пӧчлӧн пӧдругаыс локтіс карса внучкаыскӧд. Кагаыд аддзис чомсьыд кӧйдӧм бальӧпитӧ, горӧдіс:
— Баба, баб, посмотли, уконок!
— Кутшӧм уконок! Абу, дитя, тайӧ утёнок. Бальӧпи тайӧ, балька, — тӧдчӧдыштіс бабыс. Но нывка век ас ногыс «уконокӧн» нимтіс да лелькуйтіс-малаліс бальӧпилысь небыдик гӧнсӧ.
— Но-о, уконок кӧ и мед уконок лоӧ, — серӧктіс Анна пӧч да та бӧрын Уконокӧн и пондіс ыдждӧдлыны быдтассӧ...

(Н. Куратова.)

1. Коді овмӧдчис Анна пӧч ордӧ?
2. Кӧні Анна пӧч видзис баляписӧ?
3. Мыйла ковмис баляписӧ пыртны гортас?
4. Кӧні аддзысисны гӧстяяс баляпикӧд?
5. Кыдзи нимтіс баляписӧ карса внучкаыс?
6. А кыдзи пондіс ыдждӧдлыны Анна пӧч быдтассӧ?
7. Лӧсьӧд ичӧтик висьт гортса пемӧс йылысь.

45 удж. Комиӧд.

Коснырева Ольга учится в третьем классе. Она красиво пишет. У неё аккуратные тетради. Она хорошая подруга. Я дружу с ней.

46 удж. Содты лӧсялана нимвежтасъяс.

... эмӧсь радейтана небӧгъяс. ... отсалӧны меным велӧдчыны. Энӧ косявлӧй небӧгъяссӧ. ... тіян ёртъяс. ... ставным бура лыддьысям.

47 удж. Тӧдмав нӧдкывъяссӧ да инды нимвежтасъяс.

1. Ме зэв мелі, ме зэв шань, нимӧй менам Васька ... .
2. Оз позь шуны, мый ми шаньӧсь,
вывті ёна полам каньысь.

(Ю. Попова.)

48 удж. Лыддьы Н. Перминовалысь кывбурсӧ.

ТЭ ДА МЕ, ДА СІЙӦ...

Тэ да ме, да сійӧ —
Ворсам дзоридз пиын.
Тэ да ме, да сійӧ —
квайта ки лоас миян.
Тэ да ме, да сійӧ —
купайтчыны мунам.
Тэ да ме, да сійӧ —
абу дзескыд юным.
Тэ да ме, да сійӧ —
быдлаӧ ми тӧрам.
Тэ да ме, да сійӧ —
гажа весиг вӧрын.

(Комиӧдіс С. Попов.)

Инды нимвежтасъяс.

* * *

ӦТИ «ПЯТЬ».

Батьӧй видлалӧ дневник,
Кӧні «дваыс» тырыс дзик.
Ог тӧд, видас али оз:
Йӧжгыльтчи ме шырпи моз.

Но со нюмдіс менам бать:
Аддзис сэтысь ӧти «пять».
Вӧлі музыка урок,
Кӧні сьывлі ме быд ног.

Со и босьті таысь «пять».
Кыла, шуӧ меным бать:
«Тэнад дневник тырыд «два»,
А тэ нӧшта сьылан на?»

(Э. Тимушев.)

бальӧпи — ягнёнок
быдлаӧ — везде, всюду
варовитанінӧ — при разговоре
весиг — даже
видас — отругает
гидас — в хлев
дзескыд — тесная, тесно
дзикӧдз — совсем
йӧжгыльтчи — съёжился
кӧйдӧм — озябший
кыла — слышу
лелькуйтіс-малаліс — ласкала-гладила
нӧшта — ещӧ
нюмдіс — улыбнулся
суисны — застали
тӧрам — поместимся
тырыд — полный
ыдждӧдлыны — величать
чомтор — шалашик

14–15. Кывбӧр.

Дорӧ, вылӧ, вылын лоӧны кывбӧръясӧн. Найӧ сулалӧны эмакыв да нимвежтас бӧрын: рас дорӧ, кыдз вылӧ, ме бокын.

кывбӧр

вылын, улын, дорын, сайын, пытшкын, гӧгӧр, кузя, дорӧ, вылӧ бердӧ, йылысь, пытшкысь, водзын

кежлӧ, дырйи, кодь, бердӧ, пыдди, дінӧ, ордӧ, бӧрын, пиын, пиысь, пиӧ, весьтын, йылын, костын, бокын, дінын, шӧрын, костӧд

вывсьыс, вылас, моз, вылысь, йывсьыд, бердад, бердса, вылад, ногыс, пӧлӧн, вомӧн, чӧж

49 удж. Лыддьы.

«ГӦРД КОРЪЯ» КЫДЗ ПУ.

Тӧлын унджык луныс букыд, гажтӧм. Юля внучкакӧд ми ветлӧдлам тӧвся вӧрті. Лымйыс джуджыд, кӧнсюрӧ лыжиыд вӧйласьӧ. Кор ми кутім матыстчыны кыддза рас дорӧ, друг Юля сувтіс да горӧдіс:
— Дедӧ, дедӧ! Видзӧд: кыдз вылӧ гӧрд коръяс петӧмаӧсь...
— Збыль тай! — чуйми ме.
Быд ув вылын, быд ув вожын тыдалісны гӧрд ёкмыльяс. Мый нӧ тайӧ? Сё мокасьтӧ, да тайӧ жӧ жоньяс! О, мичаысь-мича лэбачьяс! Кӧдзыдысь повтӧм муса лэбачьяс, ывла выв мичмӧдысьяс! Аттьӧ тіянлы!
— У-и... У-и... ить... — гажаа сьылісны найӧ.
Ми Юлякӧд вель дыр сулалім да любӧпырысь видзӧдім на вылӧ, сэсся кежим мӧд туй вылӧ. Мед найӧ ворсӧны да сьылӧны!

(С. Раевский серти.)

Лӧсьӧд висьт.

1. Тӧвся вӧрті ветлӧдлӧм.
2. Кыдз пу вылын гӧрд коръяс.
3. Мичаысь-мича лэбачьяс.

50 удж. Инды кывбӧръяс.

1. Жоньяс пукалісны (кӧні?) ув вылын.
2. Юля дедыскӧд матыстчисны (кытчӧ?) кыддза рас дорӧ.
3. Найӧ сулалісны да видзӧдісны (код вылӧ?) жоньяс вылӧ.

51 удж. Лыддьы. Сувтӧд юалӧмъяс кывбӧра эмакывъяс дорӧ.

Вӧч тадзи: Мунамӧ кӧ, мунамӧ (код ордӧ?)
Вежаньыс ордӧ.

Мунамӧ кӧ, мунамӧ
Вежаньыс ордӧ,
Мунамӧ кӧ, мунамӧ
Педӧсь тьӧтыс ордӧ,
Мунамӧ кӧ, мунамӧ
Степан дядьыс ордӧ,
Ворсамӧ кӧ, ворсамӧ
Асланым ногӧн,
Сьылыштам да йӧктыштам,
Йӧктыштам да сьылыштам.

(Фольклорысь.)

52 удж. Лыддьы. Инды кывбӧра эмакывъяс. Висьтав, кутшӧм мойдысь кывбурыс.

Ме кӧвдум, кӧвдум!
Амбар джоджысь чукӧртӧм,
Йӧртӧдъясысь чышкалӧм,
Нӧк пиӧ гудралӧм
Да вый пиын пражитӧм,
Ӧшинь вылын кӧдзӧдӧм.
Пӧльӧ дінысь ме муні,
Пӧчӧ дінысь ме муні,
Кӧч дінысь ме муні,
Кӧин дінысь ме муні,
Ош дінысь ме муні.
Тэ дінысь, ручӧ, муна жӧ.

(Фольклорысь.)

53 удж. Лӧсьӧд сёрникузяяс. Артмӧд кывбур.

Шор, кӧч, чеччалӧ, дорын
Бадь, байдӧг, дорын, баксӧ
Чуксӧ, дорын, нюр, тури
Тю-тю, рю-рю, !

(Фольклорысь.)

54 удж. Содты шыпасъяс да артмӧд кывбӧръяс.

выл.
выл..
выл...

дор.
дор..
дор...

Лӧсьӧд кывбӧра эмакывъяс.

55 удж. Артмӧд-ӧ,-ын,-ысь суффиксъяс отсӧгӧн кывбӧръяс.

Вӧч тадзи: ув — улӧ, улын, улысь.

Сай — ... , пытш — ... , берд — ... , йыл — ... , бок — ... , бӧр — ... , орд — ... .

Лӧсьӧд кывбӧра эмакывъяс. Гиж наӧн 2-3 сёрникузя.

56 удж. Лыддьы.

Иньӧ да жоньӧ,
Коньӧрӧ жоньӧ,
Сьӧд мышку выла жоньӧ,
Гӧрд морӧса жоньӧ,
Сьӧд юр чута жоньӧ,
Сьӧд бӧж йыла жоньӧ,
Вӧсни кока жоньӧ.
Йӧз вӧлӧгад эн ветлы,
Ас вӧлӧгаӧ лок,
Струк-страк пыльӧмӧ!

(Фольклорысь.)

Висьтав, кутшӧм жонь.

57 удж. Комиӧд. Кывъяссӧ босьт «Иньӧ да жоньӧ» кывбурысь.

В народе говорят: «Снегирь прилетит — о зиме известит». Зимой холодно и птицы живут возле сёл и городов. Под окнами ребята устраивают кормушки. В кормушки сыплют крупы, оставляют сало, хлеб. А птицы сидят на веточках рядом.
За день к кормушкам прилетает много птиц: синицы, снегири, воробьи. Самые красивые из них снегири: с чёрными спинками, с красными грудками, с чёрными хвостиками, с тонкими ножками.

букыд — хмурый
вель дыр — довольно долго
вӧйласьӧ — вязнет, проваливается
ёкмыльяс — комочки
йӧз вӧлӧга — чужой волок
кежим — свернули
коньӧрӧ — бедняжка
кӧнсюрӧ — кое-где
любӧпырысь — с удовольствием
матыстчыны — приближаться
мичмӧдысьяс — украшающие
повтӧм — смелые
пыльӧм — ловушка на зверя, западня
сё мокасьтӧ — сто чертей
ув вожын — на ответвлении

16–17

58 удж. Лӧсьӧдчы гижны изложение.

ТӦВСЯ ВОЙЫН.

Кӧдзыд тӧвся вой. Козъяс да пожӧмъяс вылын еджыд шапка моз куйлӧ лым. Пемыд енэжын дзирдалӧны югыд кодзувъяс.
Гӧгӧр лӧнь. Ставныс дзебсисны кӧдзыдысь. А тайӧ мый?
Тайӧ, кылӧ, омлялӧны тшыг кӧинъяс. Найӧ петісны кыйсьыны. Матысса сиктын заводитісны увтчыны понъяс. Сиктын кыліс лыйӧм шы. Кӧинъяс дугдісны омлявны.
Бара пуксис чӧв-лӧнь.

Гиж изложениесӧ татшӧм план серти:

1. Тӧлын пожӧм да коз пуяс.
2. Войся енэж.
3. Омлялӧны кӧинъяс.
4. Увтчӧны понъяс.
5. Гӧгӧр лӧнь.

дзебсисны — спрятались
дугдісны — перестали
лыйӧм — выстрел
омлялӧны — воют
увтчыны — лаять
чӧв-лӧнь — тишина

18. Кывберд.

59 удж. Лыддьы кывбурсӧ.

КУИМ РӦМА ДӦРАПАС.

Вежа Стефан изэрд весьтын
Куим рӧма дӧрапас.
Татчӧ, кодыр кӧть ог веськав
Паськыд эрдыс менам ас.
Лӧз рӧм — сійӧ миян енэж,
Турунвижыс — парма, вӧр,
Еджыд рӧмыс казьтӧ меным
Лымъя войвыв — сьӧлӧмшӧр.
Кодкӧ, гашкӧ, миян паслы
Ыджыд тӧдчанлун оз сет.
Дивитасны, пиняласны.
Сераласны весиг — мед!
Сыысь огӧ усьӧ улӧ,
Мунны некытчӧ жӧ тась,
Тайӧ пассӧ Коми мулысь
Тӧдӧй, дорйыны ме дась.

(В. Тимин.)

1. Тӧдчӧдӧм кывъяс дорӧ сувтӧд юалӧмъяс.
2. Мый петкӧдлӧны кутшӧм? юалӧм вылӧ вочавидзысь кывъяс?
3. Кутшӧм кывсикаскӧд йитчӧны признак нима кывъяс?

Кутшӧм? юалӧм вылӧ вочавидзысь кывъяс шусьӧны кывбердъясӧн.

весиг — даже
дивитасны — осудят
дорйыны — защищать, оборонять
дӧрапас — флаг
изэрд — площадь
казьтӧ — напоминает
кодыр — когда
некытчӧ — некуда
пиняласны — поругают
сераласны — посмеются
сьӧлӧмшӧр — сердце мое
тӧдчанлун — значение

19

60 удж. Лыддьы.

ВӦРСА ДОКТОР.

Ывлаын рӧмыд на. Усьӧ гӧн кодь небыдик лым, быттьӧ сынӧдас лэбалӧ уна-уна еджыд бобув. Гӧгӧр лӧнь, ставыс узьӧ чӧскыд унмӧн.
Югдіс, и ставыс лоис сэтшӧм еджыд да югыд.
Лӧсьыд татшӧм лунӧ ветлӧдлыны вӧрті. Мунан лыжиӧн векньыдик ордымӧд, кыкнан бокас сулалӧны пуяс, еджыд лымъя ув вожъясыс пашкыртчӧмаӧсь. Корсюрӧ вожъяс вывсьыс лымйыс шливгӧ-исковтӧ да сьӧкыда шнёпкысьӧ муас, лым вылӧ жӧ. Пу вожъясыс дыр на лайкъялӧны, а сынӧдас гартчӧ лым бус. Мунан и любуйтчан ывланас. Ягыс кыпыд, гулыд, сынӧдыс сӧстӧм... Быд шы кылӧ ылӧдз. Кӧнкӧ водзын, кыла, тотшкӧдчӧ сизь. Ордым петкӧдіс менӧ неыджыд эрд вылӧ, кӧні сулалісны шочиник пуяс. Видзӧда: пипуӧ сатшкысьӧма сизь да сьӧлӧмсяньыс зільӧ клёнӧдчӧ.
Мича, тшап лэбач! Юрыс да мышкуыс сьӧдӧсь, юрбӧрас — гӧрд чут, а сьӧд бордъяс вылас — еджыд визьяс. Буракӧ, гаг ли, пучӧй ли корсьӧ, кодъяс тшыкӧдлӧны пуяссӧ. Оз ӧд прӧста сійӧс шуны вӧрса докторӧн.

(С. Раевский серти.)

Корсь висьтсьыс юкӧнъяссӧ да лыддьы.

1. Гӧгӧр лӧнь.
2. Югдіс.
3. Мунан и нимкодясян.
4. Мича лэбач.

61 удж. Инды «Вӧрса доктор» висьтысь кывбердъяс.

62 удж. Лыддьы мичаа. Инды кывбердъяс.

ВӦРСА ДОКТОР.

Юрас ӧмидз рӧма берет,
А халатыс сэтшӧм сера —
Лунтыр сы вылӧ кӧть серав.
Нырыс, нырыс! Кутшӧм кузь!
Висьӧм корсьны, вӧлӧм, сюсь:
Дыр эз кӧсйы, дыр эз судзӧд —
Висьмӧм пуысь перйис пучӧй.
Найӧс ставсӧ ворсігмоз
Бырӧдіс, и бурдіс коз.

(П. Образцов серти.)

бус — пыль
буракӧ — наверно
бырӧдіс — уничтожил
векньыдик — узенькая
ворсігмоз — играя
гулыд — гулкий
клёнӧдчӧ — долбит
корсюрӧ — иногда
лайкъялӧны — качаются
лӧсьыд — хорошо
ордымӧд — по лесной тропе
пашкыртчӧмаӧсь — стали пушистыми
пучӧй — короед
рӧмыд — сумрачно
сатшкысьӧма — удобно устроился
тшыкӧдлӧны — портят
шливгӧ-исковтӧ — сползает
шочиник — редкие
шняпкысьӧ — падает
эз судзӧд — не доставал

БАРА МУНЫМӦС МИЧМӦДӦ ТУЛЫС.

20

63 удж. Лыддьы.

Югдіс ывла. Лунъяс нюжалыштісны, абу нин кӧч бӧж кодь дженьыдӧсь. Кельыдлӧз енэжыс югыд, сӧстӧм, быттьӧ мыськалӧма сійӧс ключ ваӧн. Шонді аслас мелі югӧръяснас пыр ёнджыка нюлӧ ывласӧ, туйяс сьӧдӧдісны. Сьӧд ракаяс воисны нин. Водзын налӧн уджыс уна: колӧ дзоньтавны позъяс, вӧчны выльӧс, — ковмас ӧд быдтысьны!

(С. Раевский серти.)

1. Сет ним.
2. Корсь кывбердъяс.
3. Кутшӧм юалӧмъяс позьӧ сувтӧдны сьӧд, сьӧд рака, сьӧдӧдны кывъяс дорӧ?

64 удж. Корсь пӧвсӧ.

Тулысын узян —
Тулысын ведра ва —
Тулыс мича да тшап,

пань тыр няйт.
а ар зэра да пӧт.
арын шогӧ усян.

65 удж. Лыддьы кывбурсӧ комиӧн да рочӧн.

МАРТ.

Ветлӧ вылітікодь шонді,
Лымйыс ӧзйӧ — синтӧ видз!
Луныс кузьджык лоны пондіс,
Сылӧн помтӧм тувсов мич.
Мамлысь праздник ме эг вунӧд:
Быдті уна пӧлӧс цвет.
Аски, шуда праздник лунӧ,
Мамлы сета дзонь букет.

* * *

День длиннее, солнце выше,
Яркий свет слепит глаза.
Барабанят капли с крыши,
Голубеют небеса.
Я пораньше встану завтра,
Обещаю — не просплю.
Маме в день 8 Марта
Свой букетик подарю.

(С. Куликов.)

1. Корсь кывбердъяс.
2. Кутшӧм кывбуръяс тэ тӧдан тулыс йылысь?

вылітікодь — высоко
дзоньтавны — чинить, восстанавливать
ёнджыка — сильнее
мыськалӧма — вымыли
нюжалыштісны — стали прибавлять
нюлӧ — лижет

21–22

66 удж. Лӧсьӧд серпасъяс серти висьт.

АНЬ ЛУНӦ.

— Батьӧ, а мыйла нӧ кык пирӧг пӧжалам?
— Рытнас талун ветлам ыджыд мамъясӧ.

— Мамӧ, мый эськӧ батьясыд козьналасны миянлы?
— Виччысьыштам да тӧдмалам.

— Чолӧмалам тіянӧс Ань лунӧн! Сиам лоны мичаӧн, дзоньвидзаӧн, шаньӧн, меліӧн.

— Аттьӧ, батьӧ!
— А ме кӧсъя аттьӧавны батьнытӧ, лыддя кывбур.

Еджыд юсьӧн, мусаӧй, сьӧлӧм вылӧ воин.
Сӧдз гӧлӧса колипӧн гажӧдан кузь вой.
Асъя сьылысь ыбкайӧн шондіӧдзыс кайин.
Тувсов тэрыб сырчикӧн вайин сьӧлӧм дой.

Еджыд байдӧг котырын менам вӧтын лэбин.
Рам пыстаӧн матыстчин, меным кыв эн шу.
Джуджыд лымъя репасӧ тарӧн пырин-дзебсин.
Жонь чукӧрын вӧччӧдін ӧшинь улын пу.

Вӧлі юра гордаӧн ме дінті тэ мунан.
Мича еджыд каляӧн петкӧдлан пыр веж.
Эзысь бордъя гулюӧн, коркӧ мый нӧ вунан?
Ло кӧть тӧвся пышкайӧн, некодкӧд ог веж.

(З. Прошева.)

Корсь кывтэчасъяс: кывберд + эмакыв.

Вӧч тадзи: еджыд юсь, ... , ... , ... .

67 удж. Велӧд шусьӧгъяс.

Ас муыд — мам.
Мам сьӧлӧм — мам сьӧлӧм и эм.
Бать-мамтӧ кӧ вунӧдан, нэмыд дженьдаммас.
Бур ай-мамлӧн и челядь бурӧсь.
Кутшӧм бать-мам, сэтшӧм и ныв-пи.
Мам-батьлысь кӧ он кывзы, ва шӧрӧдыс кылалан.

68 удж. Лыддьы кывбурсӧ сьӧлӧмсянь.

МАМЛӦН ЛУН.

Луныс зэв нин югыд лоис,
Тӧлыс лымсӧ оз нин гарт.
Мамлӧн ыджыд праздник воис,
Локтіс Войвылӧ кор март.

Мамлы шуи асывводзын:
«Уна-уна во тэ ов!»
Сеті ассьым вӧчӧм козин —
Магазинсаыд оз ков.

Батьӧ окыштіс жӧ гусьӧн,
Тайӧс аддзывлі ме, дерт.
Сыкӧд пелькӧдчам да пусям,
Талун мамным шойччас мед.

(В. Лодыгин.)

Висьтав, кутшӧм козин тэ дасьтін мамыдлы.

69 удж. Висьтав, мый оз лӧсяв.

том, вом, чом, шом
кепысь, тӧлысь, рысь, пӧрысь

70 удж. Артмӧд-ик,-ник,-иник суффиксъяс отсӧгӧн кывбердъяс.

Вӧч тадзи: муса — мусаник.

Том, мича, ён, кос, дзоля, ичӧт.

71 удж. Бӧрйы кывъяс да висьтав, кутшӧм тэнад мамыд.

Бур, шань, муса, рам, мелі, зарни, коми, дзор, дона, мича, том, роч, пӧрысь.

72 удж. Корсь паныд вежӧртаса кывъяс.

Том — пӧрысь, лёк — ... , омӧль — ... , кыз — ... , ыджыд — ... , мисьтӧм — ... , скӧр — ... .

73 удж. Лыддьы да кут тӧд вылад.

Ичӧт школаын велӧдчысьяслы небӧгъяссӧ гижӧны вежӧра коми аньяс: Сажина Маргарита Ивановна, Прошева Зинаида Александровна, Безносикова Анна Андреевна. А медводдза коми гижысь аньӧн вӧлі Суханова Агния Андреевна.
Посни челядьлы ӧні гижӧны комиӧн висьтъяс, кывбуръяс, сьыланкывъяс, мойдъяс Сӧлӧ баб (Пылаева Соломония Васильевна), Куратова Нина Никитична, Мишарина Александра Петровна, Козлова Елена Васильевна да мукӧд.

74 удж. Лыддьы колана ногӧн.

МАМ ДА ЧЕЛЯДЬ.

Коді челядь вӧсна шогсьӧ,
Челядь гӧгӧр зіля ноксьӧ,
Видзӧ найӧс вой и лун.
Ылӧ на дінысь оз мун?
Налӧн муса мамыс!

Коді на вӧсна и олӧ,
Найӧс кывйӧн дойдны полӧ,
Сетӧ чӧскыд сёянтор,
Аслыс водзӧссӧ оз кор?
Налӧн дона мамыс!

Челядь быдмӧны кӧ бура,
Оз кӧ лоны пемыд юра,
Коді сэки медся рад,
Оз и аддзыв гажтӧм кад?
Налӧн зарни мамыс!

Оз кӧ челядь шаня овны,
Лёксӧ вӧчны оз кӧ повны,
Коді жугыльтчӧма сэк,
Быттьӧ арся лунӧ кӧк?
Налӧн коньӧр мамыс.

(М. Лебедев.)

1. Висьтав, кутшӧм мамыс.
2. Инды кывбердъяс.

аддзывлі — видел
вайин — принёс
вежӧра — умные
вӧччӧдін — украсил, нарядил
гажӧдан — веселишь
дженьдаммас — короче станет
дінті — мимо
дойдны — причинить боль
жугыльтчӧма — пригорюнилась
коньӧр — бедная
кылалан — поплывёшь
на дінысь — от них
некодкӧд — ни с нем
ноксьӧ — возится (с детьми)
нэмыд — жизнь, век
оз гарт — не крутит (снег)
окыштіс — поцеловал
репас — лёжка лесной птицы в снегу, гнездо
сьӧлӧм дой — сердечную боль
чукӧрын — в стае
шогсьӧ — печалится
шойччас — отдохнёт
шӧрӧдыс — по середине (реки)

23–24

КОМИ МУ НИМӦДЫСЬ.

Мишарина Александра Петровна быдмис да велӧдчис Ыджыдвидз сиктын. Сійӧ гижӧ чужан му радейтӧм йылысь, коми вӧр-валӧн мичлун йылысь, шуда челядьдыр йылысь. Сылӧн петавлісны небӧгъяс: «Быдмам войвылын», «Коми муӧй, сьӧлӧмшӧрӧй».

75 удж. Лыддьы кыпыда.

Видза олан, гажа тулыс!
Видза олан, енэж шӧр!
Видза олан, югыд шонді!
Видза олан, ловзьысь вӧр!

Видза олад, помтӧм видзьяс!
Видза олан, кӧдзӧм му!
Видза олад, еджыд кыдзьяс!
Видза олан, визув ю!

Видза олан, чужан муӧй!
Коми войтыр, видза ов!
Мед пыр шудлун тіян туӧ,
Кыпыдмӧ да югзьӧ лов!

(А. Мишарина.)

1. Гиж кывтэчасъяс: кывберд + эмакыв.

Вӧч тадзи: гажа тулыс.

2. Велӧд кывбурсӧ.

Кывбердъяс петкӧдлӧны предметлысь рӧм, кӧр, ыджда, форма.

75 удж. Корсь кывбердъяс.

1. Тулыснас кӧч еджыд на, а гожӧмнас лоӧ руд. 2. Тӧлын и гожӧмын коз век турунвиж. 3. Тӧлын енэжыс руд, а тулысын лӧз. 4. Гӧрд морӧса жонь тулыснас лэбӧ вӧрӧ. 5. Мартын локтӧны лунвылысь сьӧд ракаяс.

Гиж кывбердъяссӧ. Мый найӧ петкӧдлӧны?

76 удж. Корсь пӧвсӧ.

юмов чай
сола тшак
дуб шыд
курыд лук
шома турипув
чӧскыд чери

без соли суп
горький лук
вкусная рыба
сладкий чай
солёные грибы
кислая клюква

Мый петкӧдлӧны кывбердъяс?

кӧр — вкус еды
кӧр — олень

77 удж. Лыддьы.

ЕДЖЫД ДА СЬӦД.

Мыйла еджыдӧсь юсь да каля?
Мыйла рака да чавкан сьӧдӧсь?
Мыйла каля да юсьыс жальӧсь,
Рака-чавканыс — ёрӧм рӧдысь?

Кык рӧм костас век вензьӧм мунӧ
И оз лӧсявны найӧ, чайта.
Юсьыд, няйтчас кӧ, ваӧ сунӧ,
Рака, едждас кӧ, пырӧ няйтӧ.

(В. Бабин.)

Лӧсьӧд тадзи жӧ кывтэчасъяс рака да чавкан эмакывъясӧн.

Еджыд юсь. Еджыд юсьяс.
Еджыд каля. Еджыд каляяс.
Юсь да каля еджыдӧсь.
Юсьяс да каляяс еджыдӧсь.

79 удж. Помав сёрникузяяссӧ.

Вӧч тадзи: Тӧвся лун дженьыд. — Тӧвся лунъяс дженьыдӧсь.

Миян велӧдысь бур. — ... .
Менам бать ён. — ... .
Гожся лун кузь. — ... .

80 удж. Лыддьы сьӧлӧмсяньыд.

ТУВСОВ ШОНДІ.

Тувсов шонді, ыджыд тэнад выныд,
Кӧть и тӧлыс вӧлі вывті кузь.
Парма кӧдзыд чепъяс улысь мынӧ,
Оз нин тӧвся моза чӧла узь.

Ставыс бара тані выльысь ловзьӧ,
Тувсов шонді койӧ мелі нюм.
Бара ставлы кыпыда бӧр овсьӧ,
Видза олан, югыд тувсов лун!

(А. Мишарина.)

1. Корсь кывбердъяс.
2. Кутшӧм рӧма шонді? А кутшӧм сійӧ форма серти?

вензьӧм — спор
войтыр — люди, народ
визув — быстрая, бурная
вывті — очень
выныд — сила, мощь
ёрӧм рӧдысь — из проклятого рода
жальӧсь — жаль
койӧ — разбрасывает
костас — между
кӧдзӧм — засеянное
кыпыда — весело, радостно
кыпыдмӧ — приподнимается
лов — душа, настроение
ловзьысь — оживающий
мынӧ — освобождается
нюм — улыбка
няйтчас — запачкается
помтӧм — бесконечные
сунӧ — нырнёт
тӧвся моза — как зимой
туӧ — прибывает
шудлун — счастье
югзьӧ — озаряется, освещается

25

81 удж. Лыддьы.

ЯБЫР ПОЗ.

Мӧд лун чӧж Серёжа сарайын вундасьӧ да тувъясьӧ. Гортсаяс увгӧны: овны пӧ оз сет. А Серёжа кымӧссьыс пӧсьсӧ чышкыштас да вочавидзас: ябыр поз пӧ вӧча. И нӧшта ӧдйӧджык котшкӧдчӧ. Тэрмасьӧ, ӧд талун лэбачьяслӧн праздник.
Школа дорӧ чукӧртчисны нывкаяс да зонкаяс. Воис сэтчӧ и Серёжа. Ӧти босьтіс сылысь позсӧ, бергӧдліс гӧгӧрбок да шуис:
— Скворечникыд муртса менам кулакысь ыджыдджык. Коді нӧ татчӧ тӧрас?
Мӧд видліс чуньнас розьсӧ, кыті колӧ лэбачыслы пырны, да серӧктіс:
— Ха-ха! Но и розь. Татчӧ ябырыд оз тӧр. А тӧрас кӧ, пыригас желлясяс.
Серёжалы лоис забеднӧ. Ырыштчис пышйыны, шыбитны ябыр позсӧ, мед некод сэсся эз аддзыв. Но буретш сэк матыстчис велӧдысьыс.
— Тэнад, Серёжа, медічӧтик да медлӧсьыдіник скворечникыд, — меліа шыасис сійӧ.
Серёжа эскытӧма видзӧдліс, оз-ӧ и велӧдысьыс серав сы вылын. Но Анна Ивановналӧн стрӧг синъясыс видзӧдісны шоныда и некутшӧм шмонитӧм эз тыдав. Весиг юрӧдыс зонкаӧс малыштіс.
Зонкалы лов вылас лоис шоныдджык. «Мый кӧть ичӧтджык, пышкай вермас овмӧдчыны», — ас кежсьыс мӧвпыштіс сійӧ. Сэсся челядькӧд ӧтвылысь кытшовтіс сиктӧд. Лэбачьяслӧн лунӧ быд во тадзи вӧчлісны. Сиктсаяс аддзыласны, и налы нимкодь.
Серёжа восьлаліс позсӧ юрсьыс вылӧджык лэптӧмӧн. Ӧд ачыс сійӧс вӧчис, некутшӧм отсӧгтӧг. Радлігтыр и воис гортас. Кавшасис ӧшинь улын быдмысь медся мича кыдз пуӧ да кӧрталіс позсӧ сы бердӧ. Сэсся рытывбыд кыйӧдчис, оз-ӧ кодкӧ лок да овмӧдчы. Но и мӧд дай коймӧд луннас зонка виччысис весьшӧрӧ.
Дӧзмис ас вылас. Ертъяс ногыс и лоис. Дзоляджык артмӧма розьыс и позйыс ставнас лёк. Урок бӧрын выльысь вӧчис позсӧ да ӧшӧдіс сійӧ жӧ пуас. Асывнас, кор котӧрӧн петіс ывлаӧ, морӧсыс тырис радлунӧн. Позйын сьыліс ябыр.

(А. Мишарин.)

Лыддьы да корсь -джык суффикса кывбердъяс.

Кывбердъяс артмӧны -джык суффикс отсӧгӧн: мичаджык, бурджык; мед- приставка да медся кыв отсӧгӧн: медмича, медся мича.

82 удж. Артмӧд кывбердъяс -джык суффикс отсӧгӧн.

Вӧч тадзи: джуджыд — джуджыдджык.

Еджыд — ... , дона — ... , бур — ... , шоныд — ... , югыд — ... , важ — ... , небыд — ... .

Артмӧм кывбердъяснас лӧсьӧд сёрникузяяс.

83 удж. Корсь ӧти кыввужъя кывбердъяс да гиж.

Вӧч тадзи: вӧсньыд — вӧсньыдджык, медвӧсньыд.

Важ, мича, кыз, важджык, том, пӧрысь, бур, шань, кызджык, медваж, мичаджык, пӧрысьджык, томджык, медмича, медкыз, медтом, бурджык, медбур, медпӧрысь, медшань.

84 удж. Комиӧд да содты лӧсялана кывъяс.

1. В Республике Коми самый большой город — ... , самая длинная река — ... , самое широкое озеро — ... . 2. Самый тёплый месяц в году — ... , а самый холодный — ... . 3. Самый длинный день в году — ... , а самый короткий — ...

весьшӧрӧ — напрасно
желлясяс — войдёт заноза
кавшасис — забрался
котшкӧдчӧ — стучит молотком
кымӧссьыс — со лба
муртса — чуть
тӧрас — поместится
увгӧны — ругаются
эскытӧма — недоверчиво

26–28

85 удж. Лыддьы да сет ним.

Миян эм Серӧд. Татшӧм нима миян гӧрда-еджыда сера люкасьысь мӧсным. Эз эськӧ некодӧс люкавлыв да, но мыйкӧ кӧ абу сы ног, пыр и крукыштӧ сюрнас. Век лоӧ видзчысьны. Йӧвсӧ сетӧ уна. Мамӧ быд рыт и быд асывводз пыртӧ ведра тыр. И век мамӧ миянӧс юкталӧ мӧс вӧра йӧлӧн. Мамӧ Серӧдсӧ зэв ёна радейтӧ, «вердысьӧн» ыдждӧдлӧ. Ми Ивуккӧд тшӧтш сылы борйысь турун вайлывлам, чӧсмӧдлам, мед миянлы унджык йӧв сетас.

(Е. Козлова.)

1. Лыддьы сёрникузяяс Серӧд йылысь.
2. Корсь кывбердъяс.

86 удж. Кутшӧм кывбердъясысь артмӧмаӧсь тӧдчӧдӧм кывъясыс. Кутшӧм пемӧсӧс тадзи нимтӧны?

Сьӧдук, Гӧрдань, Рудук, Рудань, Серук, Серань, Сюрук, Сюрань.

87 удж. Тӧдмав нӧдкывсӧ.

КОДІ ТАЙӦ?

Мортлы сьӧкыд овмӧс нуны,
Тайӧ пемӧс кӧ эз вӧв.
Гӧрны-кӧдзны, мыйкӧ нуны
Йӧзлы отсалӧ пыр ... .

(З. Шиликова.)

Висьтав вӧвъяслысь нимъяссӧ.

Кывбердъяс артмӧны эмакывъясысь суффиксъяс отсӧгӧн:
-а (-я): мич — мича, гож — гожъя;
-тӧм: турун — турунтӧм;
-са (-ся): горт — гортса, тӧв — тӧвся.

шондіа, гожъя — солнечный
тувсов, тувсовъя — весенний

88 удж. Артмӧд эмакывъясысь -а (-я) суффикс отсӧгӧн кывбердъяс.

Вӧч тадзи: шонді — шондіа.

1. Кымӧр — ... , кодзув — ... , тӧлысь — ... .
2. Дӧрӧм — ... , гач — ... , чышъян — ... .
3. Сер — ... , визь — ... , вӧнь — ... .

1. Артмӧдӧм кывбердъяснас лӧсьӧд кывтэчасъяс.
2. Корсь пӧвсӧ.

картупеля шыд
картупеля рок
картупеля шаньга
картупеля пирӧг
картупеля шлап

картофельный пирог
картофельная шаньга
картофельное пюре
картофельный суп
картофельная лепёшка

89 удж. Лӧсьӧд сетӧм кывъясӧн гортса да вӧрса пемӧсъяс йылысь нӧдкывъяс.

Вӧч тадзи: Кузь пеля, тэрыб кока, ачыс зэв полысь. Коді тайӧ? Тайӧ кӧч.

Бӧжа, сюра, уска, тошка, кока, синма, пеля, гӧна, ныра.

бӧжа — бӧжтӧм
сюра — сюртӧм
уска — устӧм
тошка — тоштӧм
полысь — повтӧм
мича — мисьтӧм
колана — ковтӧм
гажа — гажтӧм

90 удж. Артмӧд эмакывъясысь -тӧм суффикс отсӧгӧн кывбердъяс.

Вӧч тадзи: пель — пельтӧм.

Кӧм — ... , пась — ... , берин — ... , ув — ... , поз — ... , син — ... .

91 удж. Артмӧд эмакывъясысь -ся суффикс отсӧгӧн кывбердъяс.

Тӧв — ... , ар — ... , вой — ... , лун — ... , вежон —
... , во — ... .

Лӧсьӧд кывбердъяснас сёрникузяяс.

92 удж. Лӧсьӧд кывбердъясысь да эмакывъясысь кывтэчасъяс.

кывбердъяс
тувсов (тувсовъя)
гожся
арся
тӧвся

эмакывъяс
поводдя
серпас
вӧр-ва
лун

93 удж. Корсь да гиж ӧти кыввужъя кывъяс. Инды, кутшӧм кывсикасъясӧн найӧ лоӧны.

Тулыс, ар, тӧвся, гожӧм, тувсов, тӧв, гожся, арся, тувсовъя, гожъя, тӧвйысь.

94 удж. Лыддьы.

ИЧӦТИК МОЙД-НЕБЫЛИЧА.

Ӧтарӧ ме видзӧдлі —
Со мый сэтысь аддзылі:
Пирӧг керка
Шаньга вевта,
Преник ӧдзӧса,
Кӧлач томана.
Кӧлач томан курччи —
Преник ӧдзӧс воссис.
Пыраламӧй, колӧкӧ, —
Гортанысӧсь, буракӧ.
Мӧдарӧ ме видзӧдлі —
Тешкодь мортӧс аддзылі:
Вый тупыль юра,
Картупель ныра,
Сьӧд сэтӧр синма,
Сола тшак пеля,
Личкӧм рысь пиня,
Ӧмидз тусь льӧбъя,
Йӧв кень уска,
Юм кень тошка,
Паренча рушкуа,
Сю сӧчӧн мышкуа,
Рудзӧг шӧрӧм кока,
Ид нянь шӧрӧм соя.
Петук сорсӧн сынасьӧ,
Тэкӧд кокнас киасьӧ,
Полігтырйи шуалӧ,
Кынӧмӧй пӧ сюмалӧ.
Тайӧ мойдыс — абу выль.
Висьтав, мый тан абу збыль.

(Ю. Попова.)

1. Вочавидз юалӧмъяс вылӧ.
1) Кутшӧм пирӧг керка?
2) Кутшӧм мортӧс аддзылӧма гижысь?

2. Гиж сёян-юан нимъяс.

3. Серпасав тешкодь мортсӧ.

ӧтарӧ — в одну сторону
мӧдарӧ — в другую сторону

вердысьӧн — кормилицей
видзчысьны — опасаться
кень — пенка
колӧкӧ — может быть
курччи — откусил
крукыштӧ — старается задеть
личкӧм — как выжатый
льӧб — губы
люкасьысь — бодливая
мӧс вӧра — парным
паренча — пареная репа
полігтырйи — боязливо
пыраламӧй — зайдём
рушку — живот
сӧчӧн — тонко раскатанная лепёшка, сочень
сэтысь — там
сю — рожь
тешкодь — забавный, смешной, потешный
тупыль — клубок
чӧсмӧдлам — угощаем
ыдждӧдлӧ — величает

29–30

95 удж. Лыддьы.

БЕРБА ДЗОРИДЗ.

Водз тулыс. Корсюрӧ пӧльыштлӧ небыдик мелі лун тӧв. Ясыд шонді лышкыда койӧ югӧръяссӧ. Мыйта ӧні сылӧн мелілуныс, бурлуныс, бырлытӧм вын-эбӧсыс?! Мыйта радлун сійӧ сетӧ йӧзыслы, став ловъяыслы. Уджалӧ мудз тӧдтӧг, медым му вылас ставыс бӧр вынсяліс.
Заводитіс сывны. Ывлаыс быттьӧ выльысь ловзис, югдіс. Гажаджыка кутісны сьывны посни лэбачьяс, кодъяс коллялісны тӧвсӧ тані, радлісны локтысь тулыс вылӧ. Вежсьӧ ставыс и вӧрын. Пуяс садьмисны. Кыдз пу вылӧ тулысыс ӧшліс исергаяс. Исергаасисны пипуяс, ловпуяс.
Берег дорын ловзисны бадь пуяс. Коли бӧрӧ сійӧ шуштӧм кадыс, кор чизыр вой тӧв куснявліс-чегъявліс найӧс, кыдзи сӧмын вермис. Ӧні найӧ кыпӧдӧмаӧсь юрнысӧ, майбыр вӧччӧмаӧсь, быттьӧ праздник виччысьӧны. Бадь пу ӧні став пуяс пиысь медся мича да тшап. Татшӧм мичанас сэсся оз овлы ни гожӧмын, ни арын, ни тӧлын. Ичӧтик эзысь гаръяс муртса тӧдчыштӧны, а быд ув вожйӧ петӧмаӧсь вижовруд ёкмыльяс, быттьӧ сэтчӧ сатшкысьӧмаӧсь мазіяс. Тайӧ — бербаяс. Уна-уна. Ылысяньджык видзӧдан да кажитчӧ, мый бадь пуяссӧ тупкӧмаӧсь еджыд дӧраӧн. Небыдик лун тӧв лунтыр ворсӧдчӧ накӧд, а оз нетшкы, оз орйӧдлы. Нинӧм он шу, мича. Тулысыд ӧд быдӧнлы праздник кодь.

(С. Раевский серти.)

Корсь висьтсьыс индӧм юкӧнъяссӧ да лыддьы.

1. Водз тулыс.
2. Ывлаыс ловзис.
3. Бадь пу медся мича да тшап.
4. Ичӧтик эзысь гаръяс.

96 удж. Лыддьы да вуджӧд роч кыв вылӧ.

БЕРБА.

Тулыс тешкодя садьмӧдӧ пусӧ —
Гӧна дзоридзьяс петӧны гарсьыс.
Быттьӧ ошпиян узисны арсянь,
А ӧні со — петӧны гусьыс.

(М. Елькин.)

Тӧдан-ӧ тэ?

Ыджыд лун водзвылын коми йӧз пасйылісны Берба лун. Вичкоысь вайлісны вежӧдӧм берба да кокньыдика кучкалісны наӧн челядьӧс. Шуалісны: «Мед берба-баля мозыс быдман да он вись». Удораын бербасӧ шуӧны колябальӧн.

97 удж. Лыддьы мичаа.

Коми муӧй менам дженьыд гожӧмъяса,
Но и сійӧ менам сӧстӧм пожӧмъяса,
Коми муӧй менам веж морозъяса,
Но и сійӧ менам мича козъяса.
Коми муӧй менам зэра аръяса,
Но и сійӧ менам байдӧг-таръяса,
Коми муӧй менам зыбуч нюръяса,
Но и сійӧ менам сьӧла-уръяса,
Коми муӧй менам кӧдзыд вой тӧла,
Шуда да быд уджысь повтӧм войтыра.

(А. Мишарина.)

Инды -а суффиксъяса кывбердъяс.

98 удж. Лӧсьӧд сёрникузяяс. Артмӧм сёрникузяясысь гиж висьт «Тувсов дзоридз».

дзордзалӧ
воис
тулыс
шонтӧ
сылӧ
лым
шонді
берба

бырлытӧм — нескончаемая, неиссякаемая быттьӧ — как будто
вежсьӧ — меняется
виччысьӧны — ожидают
вӧччӧмаӧсь — нарядились
выльысь — вновь
вын-эбӧс — сила
вынсяліс — возродилась
гаръяс — почки
гусьыс — из берлоги
ёкмыльяс — комочки
койӧ — разбрасывает
коллялісны тӧвсӧ — зимовали
корсюрӧ — иногда
куснявліс — гнул
кыпӧдӧмаӧсь — подняли
лышкыда — щедро
мудз тӧдтӧг — не зная устали
мыйта — сколько
накӧд — с ними
оз нетшкы — не дёргает
оз орйӧдлы — не обрывает
ӧшліс — развесила
пӧльыштлӧ — повеет
сатшкысьӧмаӧсь — воткнулись
тӧдчыштӧны — виднеются
тупкӧмаӧсь — закрыли
чегъявліс — ломал
чизыр — пронизывающий
шуштӧм — мрачное
ылысяньджык — издалека

31. Кадакыв.

99 удж. Лыддьы.

ИВАН КУРАТОВ — МЕДВОДДЗА КОМИ ПОЭТ.

Куратов Иван Алексеевич — коми литературалы да гижӧд кывлы подув пуктысь. Сійӧ чужліс 1839 вося июль 19-ӧд лунӧ Кебра сиктын (ӧнія Куратовоын). Сылысь кывбуръяссӧ йӧзӧдӧма уна небӧгын.

100 удж. Лыддьы.

КОМИ КЫВ.

Коми кыв, ме тӧда,
Ыджыдтор оз шу на,
Тӧда ме и сійӧ —
Оз и сӧр на уна.

Тайӧ кыв мем дона,
Небыд, мича, гора
Вунӧдас ен мыжӧс
Кодыр сійӧн кора!

Тайӧ муса кылӧн
Чой-вок сёрнитӧны,
Тайӧ кылӧн меным
Ай-мам бурсиӧны!
Тайӧ кыв ме кывлі
Аслам люлю дінын,
Сійӧ менам вунас
Сӧмын дзебанінын!

Тайӧ кывлысь мичсӧ
Сьӧлӧмӧн ме кылі —
И ме медводз сыӧн
Ньӧжйӧника сьылі...

Тайӧ кылӧн мукӧд
Гораджыка сьылас —
Сё кызь сюрс пель сэки
Уна буртор кылас!

(И. Куратов.)

Велӧд кывбурсӧ.

101 удж. Висьтав, кутшӧм кывсикасъясӧн лоӧны кывъясыс.

1. Кыв, чой-вок, ай-мам, люлю, пель — ... .
2. Ме, сійӧ, тайӧ, сійӧс, сыӧн, меным, менам — ... .
3. Дінын — ... .
4. Коми, дона, гора, небыд, муса — ... .

Мый петкӧдлӧны тайӧ кывъясыс: тӧда, вунӧдас, кора, сёрнитӧны, бурсиӧны, кывлі, вунас, кылі, сьылі, сьылас, кылас?

Мый вӧчны? юалӧм вылӧ вочавидзысь кывъяс шусьӧны кадакывъясӧн.

102 удж. Вочавидз, коді кыдзи горзӧ.

1. Чипан (мый вӧчӧ?) ... .
2. Петук (мый вӧчӧ?) ... .
3. Сюзь (мый вӧчӧ?) ... .
4. Гулю (мый вӧчӧ?) ... .
5. Кӧк (мый вӧчӧ?) ... .
6. Катша (мый вӧчӧ?) ... .
7. Горда (мый вӧчӧ?) ... .

китшкӧ
кургӧ
кӧкӧ
герчкӧ
котсӧ
сьылӧ
буксӧ

Лыддьы тешсӧ.

Кикуруллю
Сьылӧ гулю.
Баксӧ кычан.
Увтӧ меж.
Оз кӧ лӧсяв —
Ачыд веж.

(Г. Юшков.)

Вочавидз, коді сьылӧ кикуруллю.

бурсиӧны — желают добра
вунӧдас — забудет
дзебанінын — в могиле
йӧзӧдӧма — опубликовано
кодыр — когда
кикуруллю — кукареку
люлю дінын — у зыбки
мыжӧс — обиду, вину
ньӧжйӧника — потихонечку
оз сӧр — не болтает
подув пуктысь — основатель
ыджыдтор — что-нибудь большое, значительное

32

104 удж. Лыддьы.

ВОЙВЫЛӦ.

Тулысын пӧткаяс войвылӧ лэбисны,
Лунвылысь, саридзыс чукӧрӧн мунісны...
Пальма пу сулаліс, туганнас довъяліс,
Жальпырысь на йылысь аслыс сідз мӧвпаліс:
«Мый бара кыскӧ сідз найӧс войвылас?
Мыйӧн оз кажитчы зарниа лунвылыс?
Мый понда мунӧны татысь быд гожӧм
Жугылин оланас, мый вылӧ гажйӧн?..»
Зэв вылі енэжті бордаяс лэбисны,
Сьӧлӧмсьыс долыда найӧ сідз горзісны:
«Ылын сэн, войвылас, чужан му миян.
Сэтчӧ ми чукӧрӧн гортаным лэбам!»

(Ф. Плещеев серти.)

Сувтӧд юалӧмъяс тӧдчӧдӧм кывъяс дорӧ.

Кадакывъяс овлӧны ӧтка да уна лыдын.
Ӧтка лыда кадакывъяс петкӧдлӧны ӧти предметлысь действие: Нывка лыддьӧ «Би кинь» журнал.
Уна лыда кадакывъяс петкӧдлӧны кык либӧ некымын предметлысь действие: Нывкаяс лыддьӧны небӧгъяс.

105 удж. Гиж «Войвылӧ» кывбурысь кадакывъяс: шуйгавылас — ӧтка лыда кывъяс, веськыдвылас — уна лыда кывъяс.

Вӧч тадзи:

сулаліс
...

лэбисны
...

106 удж. Сетӧм схемаяс серти лӧсьӧд кывъяс.

107 удж. Содты лӧсялана кывъяс.

— Бобӧ, бобӧ, кытчӧ ... ?
— Чожӧ гуӧ ... .
— Бобӧ, бобӧ, мый нӧ ... ?
— Выя нянь ме ... .
— Бобӧ, бобӧ, кытчӧ ... ?
— Джек пом вылӧ ... .
— Бобӧ, бобӧ, абу тай нӧ.
— Сьӧд пон тай ... .
— Бобӧ, бобӧ, кӧні понйыс?
— Потшӧс костын ... .
— Бобӧ, бобӧ, кӧні потшӧсыс?
— Би тай ... .
— Бобӧ, бобӧ, кӧні биыс?
— Ва тай ... .
— Бобӧ, бобӧ, кӧні ваыс?
— Ӧшкамӧшка ....
— Бобӧ, бобӧ, кӧні ӧшкамӧшкаыс?
— Ыбӧ тай ... .

(Фольклорысь.)

Отсӧг вылӧ кывъяс: ветлін, ветлі, вайин, вайи, пуктін, пукті, сёйӧма, сибдӧма, сотӧма, кусӧдӧма, юӧма, кайӧма.

Висьтав кутшӧм лыдын сулалӧны кадакывъясыс.

довъяліс — качалась
долыда — радостно, весело
жальпырысь — с жалостью
жугылин оланас — в невесёлое место
мӧвпаліс — думала
мый понда — ради чего
сибдӧма — застрявший
сьӧлӧмсьыс — от души, от сердца
туганнас — верхушкой
чукӧрӧн — стаей

СӦЛӦ БАБ МОЙДӦ.

33.

107 удж. Лыддьы.

Сӧлӧ баб (Пылаева Соломония Васильевна) чужис 1930-ӧд воын Сыктывкарын. Ӧні олӧ Сыктывкарсянь неылын Трёхозёрка сиктын. Сійӧ гижӧ челядьлы мойдъяс. Петавлісны «Эзысь пӧрт» да «Нерсьысь баля» небӧгъяс.

108 удж. Лыддьы мойдсӧ.

ПЕТУК ВИСЬӦ.

— Ок-ок-ок! — бӧрдӧ Петук.
Таркӧдчӧ Джыдж.
— Гортад абу Петукыд? — юаліс Кӧк воклысь.
— Гортын, висьӧ.
— Мый нӧ висьӧ, — юаліс Джыдж.
— Кокыс висьӧ, — вочавидзис Кӧк вок.
— Ветлы Керӧсӧ, вай рок, вердышт, бӧр бурдас, — велӧдіс Джыдж.
Кӧк вок лэбис Керӧсӧ, вайис рок. Петукӧс вердіс. А Петук бара гатш куйлӧ.
— Ок-ок-ок, — окайтӧ.
Таркӧдчӧ Гулю, юалӧ:
— Гортын-ӧ Петукыд? Лун сьӧмӧс нин, чуксасьныд пӧра.
— Гортын, висьӧ.
— Мый нӧ висьӧ?
— Голяыс, — вочавидзис Кӧк вок.
— Лэб вӧрӧ, вай кольяс. Коль тусьнас кокӧд, бурдас Петук вокыд.
Кӧк сідз и вӧчис. А Петук век бӧрдӧ:
— Ок-ок-ок! Кула, кула.
— Колӧ юны пакула, — Кӧк вок шуӧ.
— Пакула оз ков. Сыысь тырӧ лов, — ымзӧ Петук.
Таркӧдчӧ Рака.
— Мый нӧ, Петукыд висьмис али мый?
— Висьмис, — шогсьӧ Кӧк вок.
— Мый нӧ висьӧ?
— Вежӧрыс вошӧма.
— Ветлы нюр бокӧ, вай эжӧр турун, пузьӧд да юктӧд. Бӧр вежӧра лоӧ Петук вокыд.
Кӧк сідз и вӧчис. А Петук век:
— Ок-ок-ок! Кула.
— Тар-тар-тар! — таркӧдчӧ Катша. — Гортад абу Петукыд?
— Гортын, висьӧ, нинӧмӧн оз бурд. Со и сорсыс висьмӧма.
Катша шуӧ:
— Ме эськӧ тэ местаын босьті рос ньӧр да мышсӧ росъялышті, пырысь-пыр бурдас.
Сӧмын кӧсйис Кӧк вок босьтны рос ньӧр, кыдзи тай Петук вольпась вылысь чеччыштас, жбыр лэбас потшӧс вылӧ да горӧдас:
— Ки-ку-руллю!

(Сӧлӧ баб.)

Вочавидз юалӧмъяс вылӧ.

1. Мый тшӧктіс вайны Джыдж?
2. Кытчӧ ыстіс Гулю Кӧк воксӧ да мый тшӧктіс вайны?
3. Мый тшӧктіс юны Кӧк?
4. А мыйӧн тшӧктіс бурдӧдчыны Рака?
5. Мыйӧн кӧсйис бурдӧдны Катша Петукӧс? Бурдіс-ӧ Петук?

109 удж. Вуджӧд роч кыв вылӧ.

Ветлыны, ветлы, ветлӧй; вайны, вай, вайӧй; вердыштны, вердышт, вердыштӧй; лэбны, лэб, лэбӧй; пузьӧдны, пузьӧд, пузьӧдӧй; юктӧдны, юктӧд, юктӧдӧй.

110 удж. Гиж кывъяссӧ.

Вӧч тадзи: вочавидзны — вочавидз, вочавидзӧй.

Велӧдны, вердны, бурдны, вӧчны, шуны, босьтны, кӧсйыны, чеччыштны, горӧдны.

111 удж. Висьтав, мый оз лӧсяв.

Му, гу, пу, шу.
Лок, вок, кок, рок.
Лун, ун, мун, тун.
Ныр, пыр, шыр, мыр.

112 удж. Корсь пӧвсӧ.

потан, лайкан
шебрас
эшкын
юрлӧс
вольпась

покрывало
колыбель, люлька, зыбка
подушка
постель
одеяло

113 удж. Лыддьы да инды кадакывъяс.

ВОЙЫН.

Тӧлысьлӧн лайканын кодзувпи узис,
Кымӧрлӧн шебрасын аддзис ун...
Тӧвруыс эшкынсӧ кыскис гусьӧн,
Лоис сэк ывлаын быттьӧ лун.

(В. Бабин.)

114 удж. Артмӧд -ась суффикс отсӧгӧн кадакывъяс.

Вӧч тадзи: дӧрӧм — дорӧмась.

Кӧм, гач, чуня кепысь, вӧнь, кизь, гын сапӧг, чышъян, пась.

115 удж. Лыддьы.

Асыв вольпасьын эн нюжмась,
Садьман мыйӧн, чеччы пыр,
Лючки, дуртӧг пасьтась, кӧмась,
Тшӧктыны мед оз ков дыр.

Майтӧг босьт да бура мыссьы,
Весав пинь да пожъяв вом.
Сӧмын пелька олӧм помысь
Лоан гӧгӧрбок тэ ён.

Эн жӧ бара некор вунӧд:
Асьтӧ лёзь юрӧн эн видз,
Быд лун весав паськӧм, кӧмкот —
Прамӧй мортӧн лоан сідз.

(Ю. Попова.)

Инды кадакывъяс.

вежӧра — умный, толковый
вежӧрыс — ум, рассудок
гатш — навзничь, лицом вверх
гусьӧн — украдкой, тайно
дуртӧг — не балуясь
жбыр лэбас — вспорхнёт
кодзувпи — звёздочка
лайканын — в зыбке
лёзь — растрёпанный
лун сьӧмӧс нин — середина дня
лючки — хорошо
олӧм помысь — живя
пакула — берёзовый трутник (древесный гриб)
пожъяв — прополосни
рос ньӧр — вида, прутик
росъялышті — постегал
садьман — проснёшься
сорсыс — гребешок
таркӧдчӧ — стучится
тшӧктыны — упрашивать
чуксасьныд — кукарекать
шогсьӧ — грустит
ымзӧ — стонет
эжӧр — осока
эн нюжмась — не медли

34

116 удж. Лыддьы мойдсӧ.

НЕМАС УДЖ.

Ӧшинь водзын пӧчӧ печкӧ. Паччӧр вылын пӧльӧ куйлӧ. Тӧлын войыд кузь, кӧть лун и вой узь.
Пӧльӧ паччӧрысь лэччылас, сёяс-юас да бара каяс.
Пӧчӧ став кудельсӧ печкис.
— Пӧльӧ, мый нӧ кута вӧчны? Кудельӧй помасис. Ставсӧ печки, ставсӧ путшки.
Пӧльӧ лэччис паччӧрысь, видзӧдліс шӧрт вылӧ.
— Кутшӧм нӧ тайӧ тэнад шӧрт? Омӧль, путшкы выльысь.
Ачыс бара кайис. Ружтӧ, ус-тошсӧ гыжнас вуштӧ. А сэсся горӧдіс радпырысь:
— Пӧчӧ, пӧчӧ, эм тэныд удж! Пуксьы пидзӧс вылӧ, печкы менсьым паськыд тошкӧс. Шӧрт сэсь бурӧс печкы. Петля-сияс ме вӧча. Вӧрӧ лэчьяс пуктала. Гашкӧ, пӧтка шедас, гашкӧ, ур.
— Бур, — шуӧ пӧчӧ.
Кайис пӧчӧ паччӧрӧ. Пуксис пӧльлы пидзӧс вылас. Пӧль тошсӧ нетшкӧ да печкӧ. Сэсся путшкис. Лои вӧсни ён шӧрт. Пӧльӧ паччӧрысь лэччис. Тош местасӧ малалӧ. Вӧчис лэчьяс. Пасьтасис да вӧрӧ муніс. Коз пу улӧ лӧсьӧдаліс лэчьяс. Мӧд асывнас найӧс видлыны муніс. Аддзӧ — руч шедӧма.
— Но и дивӧ! Кӧть и тошкыд дона, руч шедӧма. — Муртса разьны вермис. — Ӧні ме ог йӧрмы. Рынок вылын кусӧ вузала. Ньӧба мича дӧрӧм. Пӧчӧлы выль кӧмкот, платтьӧ вылӧ дӧра, аслыс платтьӧ вурас.
Вайис гортас ручӧс. Баблы зэв любӧ. Дедӧ шуӧ:
— Бабӧ, руч кусӧ рынокын вузала. Аслым ньӧба дӧрӧм, тэныд кӧмкот, платтьӧ вылӧ дӧра.
— Мый нӧ, дедӧ, сӧран? Тэнад эм на дӧрӧм. Менам кӧті, сӧмын на кыклаті поті. Ӧти пӧлыс розя. Новлыны на позяс. А мыйла меным платтьӧ? Некытчӧ ог ветлыв. Кильчӧ помӧ петны сарапанӧй туяс.
— Мый нӧ эськӧ ньӧбам?
— Ньӧбам еджыд ыж. Лоӧ вурун. Тӧвбыд бара печка. Тэ гожӧмнас турун ытшкан. Кыкнаннымлы удж лоӧ.

(Сӧлӧ баб.)

1. Кодъяс йылысь висьтавсьӧ тайӧ мойдын?
2. Велӧдчы лыддьыны рольяс серти.
3. Корсь кадакывъяс.

Кадакыв вежласьӧ кад серти. Сійӧ овлӧ ӧнія, колян да локтан када:
1) сёрнитӧ — ӧнія кад,
2) сёрнитас — локтан кад,
3) сёрнитіс — колян кад.

117 удж. Инды кадакывъяслысь суффиксъяссӧ.

Ӧнія кад: печкӧ, куйлӧ, ружтӧ, вуштӧ, шуӧ, нетшкӧ, малалӧ, сӧран, лоӧ.

Локтан кад: лэччылас, сёяс, юас, каяс, вӧча, пуктала, шедас, вузала, ньӧба, вурас, ньӧбам, печка, ытшкан.

Колян када: печкис, помасис, печки, путшки,
лэччис, видзӧдліс, кайис, горӧдіс, пуксис, путшкис, вои, вӧчис, пасьтасис, муніс, лӧсьӧдаліс, вермис.

* * *

Дуда, дуда, тоштӧ
Коса вылӧ вежан-ӧ?
Ог веж!
Косанас мый керан?
Турунтор ытшкан.
Турунторнас мый керан?
Мӧстор вердан.
Мӧсторнас мый керан?
Йӧвтор лысьтан.
Йӧвторнас мый керан?
Челядьтор вердан.
Челядьторнас мый керан?
Пес-чагтор ӧктасны.
Пес-чагторнас мый керан?
Выя кӧднянь пӧжалан.
Выя кӧдняньнас мый керан?
Джек пом вылӧ пуктан.

(Фольклорысь.)

Инды кадакывъяс.

вежан-ӧ — обменяешь ли
вурун — шерсть
кӧднянь — хлеб с примесью борщевика
лысьтан — надоишь
лэч — силок, ловушка
немас — и то, всё-таки, всё же
пес-чагтор — щепки
пидзӧс — колено
тош — борода
ытшкан — скосишь

35–36

118 удж. Лыддьы.

ТУЛЫС ВОӦМ.

Улльӧв кодь небыд тӧв лунвывсянь пӧльтӧ, вайӧдӧ чӧскыд кӧр, лӧсьыда чужӧмад ӧвтӧ... Енэжын шондіыс вылі нин ветлӧ, дзирдалӧ югыда — синтӧ ёрӧ. Сывны нин вӧрзьӧма лым — мутшкысьӧ-топалӧ, кок улын сыв. Гож водзын лӧзӧдӧ, сӧнікӧ пӧрӧ. Толаыс ляпкалӧ, чинӧ. Гӧгӧр дзик прӧстмӧ.
Ӧдзӧсыс тулыслӧн паськыда воссьӧ...
Ывлаыс гораммӧ, быттьӧкӧ выль мыськӧм, пелькӧдӧм керка, гудырыс-няйтыс идрасьӧм сэсь. Гажа сэн, гора и кыпыд, кокньыда ветлӧдлӧ лолыд. Ывлавывторъяс ылыстчӧны кытчӧкӧ ылӧ... Енэжыс кыптӧ зэв вылӧ. Кымӧръяс качӧны.
Воссьӧма вӧр пу йыв — мездмӧма лымйысь. Гылалӧ-шупкысьӧ ув вылысь тукта... Лым ваӧн мыссьӧмаӧсь лысъяс: быттьӧкӧ долыда асывводз чеччӧм, сӧстӧм зэв чужӧмаӧсь сулалӧны пуяс.
Тёпкӧ-виялӧ вевт вылысь войтва... Со, тонӧ, гож водзӧ петӧма курӧг, лажъялӧ-ветлӧдлӧ ньӧжйӧник, тшапа. Петуклӧн чуксасьӧм кылӧ, юръялӧ йӧлаыс, сикт кузя ветлӧ... Долыдджык кажитчӧ ракалӧн кравзӧм.
Ыліӧдз ывлаын сёрнияс кылӧны... Зіль йӧзлӧн керасьӧм (тшупсьӧм да поткӧдчӧм), чер шыяс камгӧм тэрмӧдлӧ, удж вылӧ ыстӧ. Шко-о-ов, — кылӧ ва дорысь нӧшасьӧм шы... Керкаясын дугдывтӧг швачкӧны-кыӧны дӧра. Шаргысьӧ дзавъян шы, быдмасян гымгӧ...
Со, тонӧ, детинка керкаысь ывлаӧ петіс (мынӧма кагаысь), керкаын тулысын гажтӧм. Видзӧдліс ӧтарӧ, мӧдарӧ... Сьӧлӧмсьыс нимкодя мый вомас тӧрис горӧдіс: «Э-э-эй!» Сэсся тай садьтӧгыс котӧртіс кытчӧкӧ водзӧ...
Бузгӧны сёнъясӧд ӧдӧбӧн, письтӧмаӧсь шоръяс... Гӧгӧр дзик ловзьӧма, нюмъялӧ-сьылӧ...

(Тима Вень.)

бузгӧны — бурлят
быдмасян — прибор для перематывания пряжи
вӧрзьӧма — начал
гораммӧ — становится более гулкой
гудырыс — муть
гымгӧ — стучит
дзавъян — прибор для наматывания пряжи
долыдджык — радостнее
дугдывтӧг — не переставая, не останавливаясь
ёрӧ — ослепляет
камгӧм — стук
качӧны — поднимаются
керасьӧм, тшупсьӧм и поткӧдчӧм — из лесу доносится стук топора
кӧр — запах
кыӧны — вяжут
кыптӧ — поднимается
лажъялӧ — приседает
лолыд — душа
мездмӧма — освободилась
мутшкысьӧ-топалӧ — уплотняется
нимкодя — радостно, любо
нӧшасьӧм — битьё валиком при полоскании
нюмъялӧ — улыбается
ӧвтӧ — вевт
ӧдӧбӧн — набрав скорость
пелькӧдӧм — убранная
письтӧмаӧсь — пробились
пӧльтӧ — дует
прӧстмӧ — освобождается
садьтӧгыс — (бежать) сломя голову, опрометью
сёнъясӧд — по ложбинам
сӧнікӧ пӧрӧ — превращается в талый снег
сыв — сырӧ
сэсь — оттуда, из тех мест
тёпкӧ-виялӧ — капает
тукта — ком снега
тшапа — щеголевато, гордо
тэрмӧдлӧ — торопит
чинӧ — уменьшается
шаргысьӧ — вертится с шумом, шуршит
швачкӧны-кыӧны — вяжут
шупкысьӧ — падает с шумом
ыстӧ — отправляет
ылыстчӧны — отдаляются
юръялӧ — звучит, разносится далеко, слышится

Вочавидз юалӧмъяс вылӧ.

1. Кутшӧм сёрникузяясын автор гижӧ тӧв йылысь?
2. Аддзы сёрникузя шонді йылысь.
3. Кутшӧм лои лым?
4. Кутшӧм ывла вылыс тулысын?
5. Мый вӧчӧны йӧзыс керкаясын?

119 удж. «Тулыс воӧм» висьтысь корсь кывтэчасъяс: кывберд + эмакыв.

Вӧч тадзи: небыд тӧв.

Ӧнія када кадакывъяс индӧны, мый действиеыс мунӧ ӧні: Небыд тӧв пӧльтӧ. Енэжын шондіыс дзирдалӧ.

120 удж. Инды ӧнія када кадакывъяслысь суффиксъяссӧ.

Ме пета.
Тэ петан.
Сійӧ петӧ.
Ми петам.
Ті петанныд.
Найӧ петӧны.

Тадзи жӧ вежлав кадакывъяс: быдмыны, бӧрдны, аддзыны, видзӧдны.

121 удж. Лӧсьӧд висьт «Менам лун». Пырт сэтчӧ ӧнія када кадакывъяс.

Вӧч тадзи: чеччыны — чечча. Асывнас ме чечча 7 часын.

Чеччыны, мыссьыны, весавны, сынасьны, пасьтасьны, сёйны, юны, кӧмасьны, петны, мунны, велӧдчыны, лыддьысьны, гижны, вӧчны, отсасьны, видзӧдны, кывзыны, узьны.

122 удж. Лыддьы.

ПАЧЧӦР ВЫЛЫН ПӦЧӦ.

Паччӧр вылын пӧрысь пӧчӧ ружтӧ.
— Мый нӧ, пӧчӧ, висьӧ? — юалӧны внучкаясыс.
— Ой, кочӧг бытшкӧ,
Ой, гӧгйӧс нетшкӧ.
Ой, кокӧ юкалӧ,
Ой, коскӧй висьӧ,
Ой, кок чунь ёнтӧ,
Ой, юрӧй жувгӧ,
Ой, кырым турдӧ,
Ой, кынӧм дундӧ.
Внучка-внукъяс локталісны, паччӧрӧ водалісны:
— Пӧчӧ, эн вись, мыйкӧ мойдышт.
Пӧчӧ мойдӧ, висьӧм вунӧ.

(Сӧлӧ баб.)

1. Инды ӧнія када кадакывъяс.
2. Ворсӧй рольяс серти.
3. Содты пӧчӧлӧн норасьӧмӧ ӧнія када кадакывъясӧн сёрникузяяс.

Вӧч тадзи: Ой, кынӧм дундӧ,
Ой, пельӧй ... ,
. . .

Ме ог мун.
Тэ он мун.
Сійӧ оз мун.
Ми огӧ мунӧй.
Ті онӧ мунӧй.
Найӧ оз мунны.

Ог, он, оз, огӧ, онӧ рочӧн — не.

123 удж. Сӧлӧ баб ногӧн лӧсьӧд выль сьыланкыв.

Внучка-внукъяс пукалӧны паччӧрын. Пӧчӧ сьылӧ выль сьыланкыв:
— Ме ог нин вись,
Кочӧг оз бытшкы,
Гӧгйӧй оз ... ,
. . .

Тӧдмав нӧдкывъяссӧ.

Биын оз сотчы, ваын оз вӧй.

Век вомын, а он ньылышт.

дундӧ — вздулся
ёнтӧ — ноет, дёргает
жувгӧ — шумит
кочӧг бытшкӧ — колет в боку
кырым турдӧ — руки коченеют
нетшкӧ — дёргает
юкалӧ — ноют

37–38

124 удж. Лыддьы мойдсӧ.

ШЫР ДА ТШЕГЫР.

Тшегыр да катша овмӧдчӧмаӧсь. Катша ветлас турунла. Турун ваяс да чукӧстас: «Тшегырӧй чойӧй, пет турун ректыны!» Ректасны да ужнайтны пуксясны. Катша ошкыштас: «Зэв тай чӧскыд!» «А ме ӧд, — тшегырыд шуӧ, — бӧжӧс сюйлі дай шыдыд госасъӧма».
Катша пондас шуны тшегырлы: «Аски бара тэ ветлы турунысла, а ме кольчча пусьыны». Вот катша аскинас кольччас гортӧ, а тшегыр мунас турунла. Пусигӧн катша бӧж помсӧ сюйлас чугунӧ, видлас да шыдыд абу чӧскыд. Пыдӧджык сюяс дай ачыс чугунас усяс да пусяс.
Тшегыр воас турунлаысь да пондас чуксасьны: «Катша чойӧ, пет турун ректыны!» Горзас, горзас, а катша оз пет. Тшегыр пырас гортӧ — некод оз тыдав. Шы ни ру. Кыскас шыд чугун, а сэні катша. Сёяс яйсӧ да кӧясӧ залавка улас пуктас.
Шыр волас да кӧясӧ гусьӧн пышйӧдас. Сэсся вильӧдас, лэччӧдас ва дорӧ, катша кӧвсьыс пыж вӧчас. Пуксяс пыжӧ да горӧдас сьывны:
Шыр кывтӧ-катӧ
Катша кӧя пыжӧн,
Ур бӧж зібйӧн.
Мой лопта пелысӧн.
Видзӧдлас кӧч берег дорын дзибрасьӧ. Вӧзйысьӧ: «Шырӧ чойӧ, босьт менӧ тшӧтш. Лӧсьыда сьылан, да кывзышта». «Лок, пуксьы». Кӧч сӧлас. Шыр водзӧ мӧдӧдчас. Сьылӧ. Казялас-а, кӧч вугралӧ. Шырыс зырӧдіс да ӧти пеляс пырис-йирис, йирис, мӧд пеляс пырис-йирис, йирис. Кӧч кулі. Ӧдйӧ босьтіс пуртсӧ, зудъяліс. Кусӧ кулис, бӧжсӧ ас улас пуктіс, ордлысьыс мегыр вӧчис, яйсӧ бадь вуж улӧ сюйис. Водзӧ мӧдӧдчис.
Шыр кывтӧ-катӧ
Катша кӧя пыжӧн,
Ордлы мегырӧн,
Кӧч бӧж пуклӧсӧн.
Руч гоннялӧ берег дорын. Шырлы вӧзйысьӧ: «Ёна жӧ тэ мичаа сьылан, лэдз менӧ пыжад». «Лок!» Руч сӧлас пыж нырас. Шыр бара сьывны горӧдас. Руч вугыртас. Шыр зырӧдас да ӧти пеляс пыравлас, мӧдас пыравлас, йирыштас — руч кулӧ. Кусӧ куляс шапка вылӧ. Шапка на ковмӧма шырлы, рӧзбойниклы, руч ку шапка! Кулис. Эштіс. Яй берегӧ катіс. Тӧв кежлӧ чӧжӧ. Ачыс бара водзӧ.
Шыр кывтӧ-катӧ
Катша кӧя пыжӧн,
Ордлы мегырӧн,
Кӧч бӧж пуклӧсӧн.
Руч ку шапкаӧн.
Кӧин кылӧма да локтӧ. Вӧзйысьӧ. «Но босьта, мыйла ог босьт, менам босьттӧм абу». Кӧин грымкерас-сӧлас пыжӧ. А шыр век сьылӧ. Унзіль босьтас кӧинӧс. Пукалӧ, вугралӧ. Шыр бара зырӧдас да ӧтар пеляс пыравліс-йирис, мӧдар пеляс пыравліс. Кӧин эштіс. Шырыд кусӧ кулис пась вылӧ, сювсӧ перйис бечева вылӧ. Пыж вылӧ чеччис, водзӧ голькйӧдлӧ.
Шыр кывтӧ-катӧ
Катша кӧя пыжӧн,
Ордлы мегырӧн...
Ош вӧзйысьӧ берег дорсянь. Шыр пуксьӧдас. А ачыс пыр сьылӧ.
... Кӧч бӧж пуклӧсӧн.
Кӧин сюв бечеваӧн,
Ур бӧж зібйӧн.
Мой лопта пелысӧн,
Лыа дорсӧ зібйыштӧ,
Кыркӧтш дорсӧ сыныштӧ.
Ош унмовсяс чорыда. Юрыс морӧс вылас усьӧ. Шыр бара пельяссӧ сылысь розьӧдлас-йирас да виас оштӧ. Вольпась вӧчас кусьыс. Сэсся тшегыр дорӧ локтас дай овны-вывны кутасны.

(Фольклорысь.)

вильӧдас — обглодает
вӧзйысьӧ — просится
вугыртас — задремлет
голькйӧдлӧ — поёт
гоннялӧ — озирается
госасьӧма — стал жирным
грымкерас — с шумом
дзибрасьӧ — вертится
залавка — залавка, кухонный поставец
зібйӧн — с шестом
зудъяліс — наточил
зырӧдас — бросится
йирыштас — погрызёт
кӧя — грудная кость птицы
лопта пелысӧн — весло с одной лопастью
мегыр — дуга
ордлысьыс — из ребра
пуклӧс — сиденье
пыдӧджык — поглубже
пышйӧдас — утащит
розьӧдас — сделает дырку
сӧлас — сядет
сювсӧ — кишку
сюйлі — опускала
унзіль — сонливость
чукӧстас — позовёт, окликнет
эштіс — умер

Вочавидз юалӧмъяс вылӧ:

1. Мыйла тшегырлӧн шыдыс вӧлі зэв чӧскыд?
2. Мый лои катшакӧд шыд пуигӧн?
3. Мый казяліс тшегыр турунлаыд воӧм бӧрын?
4. Мый вӧчис шыр? Кутшӧм сьыланкыв сійӧ сьыліс?
5. Мый вӧчис шыр кӧчкӧд? ручкӧд? кӧинкӧд? ошкӧд?
6. Кутшӧм сьыланкыв лӧсьӧдіс шыр?
7. Мыйӧн помасьӧ мойдыс?

Локтан када кадакывъяс петкӧдлӧны, мый действиеыс кутас на мунны: Тулыснас лэбачьяс воасны лунвылысь.

125 удж. Инды локтан када кадакывъяслысь суффиксъяссӧ.

Ме ветла.
Тэ ветлан.
Сійӧ ветлас.
Ми ветлам.
Ті ветланныд.
Найӧ ветласны.

Вежлав тадзи жӧ кадакывъяс: вайны, чукӧстны, пуксьыны, ошкыштны, усьны, пусьыны.

126 удж. Инды «Шыр да тшегыр» мойдысь локтан када кадакывъяс.

кайны (кытчӧ?) — подниматься вверх, забираться (куда?)
лэччыны (кытысь?) — спускаться вниз, слезать (откуда?)

1. Лӧсьӧд кывтэчасъяс.

кайны

паччӧрӧ
вӧрӧ
пывсянысь
ю дорысь

лэччыны

паччӧрысь
вӧрысь
пывсянӧ
ю дорӧ

2. Лӧсьӧд кывтэчасъяснас сёрникузяяс, медым кадакывъясыс вӧліны локтан кадын.

кайны ю паныд, катны — плыть против течения реки
лэччыны ю ньыльыд, кывтны — плыть по течению реки

127 удж. Лӧсьӧд висьт «Мый ме вӧча шойччан лунӧ». Пырт локтан када кадакывъяс.

Заводит тадзи: Вежалунӧ ме ...

Отсӧг вылӧ кывъяс: кайны, лэччыны, отсасьны, ветлыны пӧль-пӧч ордӧ, пес да ва пыртны, ломтыны пач, ветлыны пывсянӧ, корӧсясьны, сёйны картупеля шаньга, юны йӧв.

128 удж. Инды локтан када кадакывъяс.

1. Тулыснас Висер ю кузя кывтас йи.
2. Сыктывкарсянь Одыб сиктӧ каяс «Заря» теплоход, а Айкатылаӧдз лэччасны катеръяс.
3. Эжва ю паныд Шойнатыӧдз катас мотора пыжӧн чери кыйысь.

Корсь пӧвсӧ.

Айкатыла
Шойнаты
Одыб
Эжва
Висер

Нившера
Вычегда
Айкино
Вишера
Сторожевск

корӧсясьны — париться веником
пывсян — баня

39–40

129 удж. Лыддьы.

ВЕДРА ТЫР ЯБЛӦГ.

Визинсянь Ыб пыр Сыктывкарлань муніс грузовӧй машина. Ыбса тьӧтка кисӧ лэптіс, сувтӧдіс машинасӧ, шуӧ: «Нуышт менӧ Сыктывкарӧдз, менам со нуанторйыс даддьын — сӧмын ӧти мешӧк да тыртӧм ведра!» Шопер пыксьӧ: «Ог, ог!» Тьӧтка кевмысьӧ: «Ну, ен могысьӧн! Ведра яблӧг сета!» Шоперыд ыштіс яблӧг вылад! Кыдз нӧ он ышты? Тӧв шӧр тӧлын ведра яблӧг кӧсйысьӧны да! Тӧвнад ӧд Коми республикасьыд яблӧгтӧ он аддзы!
— Но, пуксьы инӧсь! Нуа пӧрысь мортӧс! — ачыс думайтӧ: вот гӧститӧда невестаӧс рытнас яблӧгӧн!
Воисны карӧ базар дорӧ. Тьӧтка чеччис машинаысь, разис мешӧксӧ да ведраӧ кисьтіс ... картупель! Сетӧ шоперлы да сё пасибӧ висьталӧ. Шопер чуймӧма, скӧрмӧма, шуӧ: «Тэ яблӧг кӧсйысин, а сетан картупель! Ак тэ, сэтӧм-татшӧм, омӧль ань!»
— Миян ногӧн кӧ, тайӧ яблӧг, а тіян ногӧн, гашкӧ, карта пель ли, карко пель ли... Ог тӧд, бур мортӧй, кутшӧм пель сэсся... Пасибӧ нуӧм вылад!
Шопер скӧрмис да сьӧвзис картупель ведра вылӧ, шуӧ:
«Пасьмунас мед тэнад пасибӧыд картупельнад и ставнад!» Эз и босьт картупельтӧ. Муса нывтӧ, ассьыд невестатӧ, кыдзкӧ яндзим жӧ кын картупельӧн гӧститӧднытӧ! Слабог, ӧні абу война кад: быдсяма сёянторйыс юр выв тырыд! А вот яблӧгыд эз вӧв сэк: ыбса тьӧткаыд кӧсйысис, но эз чӧсмӧдышт шоперыдлысь невестатӧ! Мый сэсся керан!?
Ыбад ӧд збыльысь картупельтӧ яблӧгӧн шуӧны.

(Илля Вась.)

ен могысьӧн — пожалуйста
кевмысьӧ — просит, умоляет
нуанторйыс — поклажа
пасьмунас — пропадёт пусть пропадом
пыксьӧ — отказывается
сёянторйыс — пища
слабог — слава богу
сьӧвзис — плюнул
чуймӧма — удивлён
ыштіс — позарился
эз чӧсмӧдышт — не угостила

Вочавидз юалӧмъяс вылӧ.

1. Кысянь муніс грузӧвӧй машина?
2. Коді сувтӧдіс машинасӧ?
3. Мый сійӧ кӧсйысис сетны шоперлы?
4. Мый вочавидзис шопер ыбса аньлы?
5. Мый лои базар дорын?
6. Мыйла шопер эз босьт яблӧг?

Колян када кадакывъяс петкӧдлӧны, мый действиеыс вӧлі нин: Тӧв помасис. Воис тулыс.

130 удж. Инды колян када кадакывъяслысь суффиксъяссӧ.

Ме муні.
Тэ мунін.
Сійӧ муніс.
Ми мунім.
Ті мунінныд.
Найӧ мунісны.

Вежлав тадзи жӧ лэптыны, сувтӧдны, шуны, аддзыны, чеччыны кадакывъяс.

131 удж. Лыддьы да содтав колян када кадакывъяслысь суффиксъяссӧ.

Рӧдт...-гӧнит... ,
Тшынмун... да бусмун... ,
Дедыс-бабыс ордӧ во... :
— Дедӧ-бабӧ, звӧзсӧ восьт!
Дедыс-бабыс пет... ,
Звӧзсӧ дзум-дзам восьт... ,
Грым-грам кай... ,
Пос тшупӧдыс чег... ,
Емва гуӧ тюп-тёп.
Дедыс-бабыс лэчч... ,
Сойбордйӧдыс кут... да
Керкаас пыртӧд... ,
Пызан сайӧ пуксьӧд... да
Чӧскыд кӧлачӧн верд... ,
Юмов чайӧн юктӧд... ,
Виж крӧватьӧ водтӧд... ,
Гӧрд шебрасӧн шебрал... : —
Узь жӧ, узь тэ, муса пи,
Дедтӧ-бабтӧ эн вунӧд.

(Фольклорысь.)

КУТ ТӦД ВЫЛАД.

йи — лёд
йинёнь — сосулька
йи пласт — льдинка
йи кылалӧм — ледоход

132 удж. Лыддьы. Инды колян када кадакывъяс.

ЙИНЁНЬ.

Рака кокаліс йинёнь —
Тринь да тронь, тринь да тронь!
Кыліс мича-мича звӧн.
Код оз овлы некытӧн.

Толя эз тай мӧвпав дыр,
Гортас пыртіс йисӧ пыр.
«Часлы, — шуис, — вӧча звӧн,
Кывза бура ӧтнамӧн».

Но эз мича звӧныс кыв.
Йиыс воддза моз эз сьыв.
Сыысь регыд лоис ва —
Окма!

(В. Лодыгин.)

Лӧсьӧд кывтэчасъяс да гиж.

лӧз
ён
еджыд
вӧсньыд
важмӧм

йи

Ме эг мун.
Тэ эн мун.
Сійӧ эз мун.
Ми эгӧ мунӧй.
Ті энӧ мунӧй.
Найӧ эз мунны.

Эг, эн, эз, эгӧ, энӧ рочӧн — не.

133 удж. Висьтав рочӧн.

1. Тулыс эз на во.
2. Ми эгӧ аддзылӧй йи кылалӧм.
3. Ті энӧ котралӧй йи вывті.
4. Тэ эн нюв йинёнь.
5. Ме эг гӧгӧрво тэнӧ.
6. Йи пластъяс эз на сывны.

Содты кольӧм кывъяс.

1. Ме эг велӧдчы выльлунӧ.
2. Тэ ... ... ... .
3. Сійӧ ... ... ... .
4. Ми ... ... ... .
5. Ті ... ... ... .
6. Найӧ ... ... ... .

воторникӧ
середаӧ
пекничаӧ
субӧтаӧ
вежалунӧ

звӧз — помост для въезда на сеновал
некытӧн — нигде
ӧтнамӧн — один
сойбордйӧдыс — взять под руки
эз мӧвпав дыр — не долго думал

41

134 удж. Лыддьы кывбурсӧ.

КОДІ КЫДЗИ ГОРЗӦ.

Юрсӧ лэптас вылӧ,
«Кикуруллю» сьылӧ.
«Кот-кот, кот-кот-кот,
Кольк тэд вайи вот!»
«Тив-тив-тив»-тӧ тэ эн тивӧст:
Сэн кыйӧдчӧ уска дивӧ,
Уськӧдчис со «Няв!»
Сильӧяс — сюв-сяв.
Дзиръя дорын «Ув!
Шышлысь лэдза сюв!»
«Му-му! — горзӧ оз ов чӧв:
— Кодлы колӧ чӧскыд йӧв?»
«Ба! Туруныс веж» —
Люкыштас ӧд ... кеж!
Майӧг йылын «Крав!»
Вот сэсся и став.

(Илля Вась.)

Кутшӧм гортса пемӧсъяс кывбурын сёрнитӧны? Мый серти тэ тӧдмалін?

Кадакывъяс артмӧны-г,-к,-з,-т суффиксъяс отсӧгӧн шыяс кылӧм серти.
«Кра-ав! Кра-ав!» — кравзӧ рака.

135 удж. Артмӧд шыясысь кадакывъяс.

Вӧч тадзи: «Кот-кот!» — котсӧ чипан.
«Ув-ув!» — ... .
«Няв-няв!» — ... .
«Китш-китш!» — ... .
«Ба-а-а!» — ....

136 удж. Корсь пӧвсӧ.

вӧв
мӧс
кӧин
ош

мурзӧ
омлялӧ
баксӧ
гӧрдлӧ

137 удж. Лыддьы.

ТУВСОВ ШЫЯС.

«Кра-ав!.. Кра-ав!..» — асывъясын рака горзӧм шыӧ долыда садьман. Улялӧ: лым топалӧ, туйыс сьӧдӧдӧ, войтва вевт вылысь тёпкӧ.
«Туррр... куррр...» — шонді петан вежӧсын ылісянь кылӧ таръяслӧн койтӧм... Асывъясын мозъя чарӧма.
«Чи-чи, чи, чи... — чи-чи-чи-и-и...» — матіник пуясын кылӧны медводдза локтысь сьылысь кайяс. Зэв сэтшӧм небыда, нора, жугыльпырысь сьылӧны кыдзкӧ, быттьӧ шогсьӧны: гӧгӧр на пӧ лым да... Лунсянь шоныд тӧв пушкӧ, лымсӧ някалӧ-сёйӧ. Ылӧ тыдалӧ, — сынӧдыс лӧз!
«Чик-чилик... чик-чилик!..» — сырчик воӧма.
Пукалӧ йи вылын, муркӧдӧ тушанас — чегъялӧ йи. Ва воссьӧ. Дзодзӧгъяс енэжын горзӧны: «Гок-гок... гог-го-гог!..» Быдсяма пӧткаыс саридзысь локтӧ. Бузгӧны шоръяс. Видзьяс гӧгӧр ойдӧмаӧсь.

(Тима Вень.)

Вочавидз юалӧмъяс вылӧ.

1. Кыдзи горзӧ рака?
2. Кысянь кылӧ таръяслӧн койтӧм? Кыдзи найӧ койтӧны?
3. Кӧні да кыдзи сьылӧны медводдза локтысь кайяс?
4. Кыдзи сьылӧ сырчик?
5. Мый горзӧны дзодзӧгъяс?

койтӧм — токование, ток
люкыштас — забодает
мозъя — с ледяной корочкой на снежном покрове
муркӧдӧ — надавливает
някалӧ — сосёт
ойдӧмаӧсь — затоплены разлившейся рекой
пушкӧ — дует
сильӧ — курица
чарӧм — наст
чегъялӧ — ломает
шышлысь — у вора

42

137 удж. Лыддьы колана ногӧн. Велӧд кывбурсӧ.

РУД ИЗЙЫСЬ ЛОВЗЬӦДӦМ САЛДАТ.

Клуб ӧшинь улын,
киас автоматыс,
руд изйысь кыптіс
ловзьӧдӧм салдат.

Зэв тӧдтӧм быттьӧ,
быттьӧ и зэв матыс:
ӧд татчӧс йӧзлы —
верӧс, вок и бать.

И быдӧн аддзӧ
сыын ассьыс писӧ,
и быдӧн ас ног
сетӧ сылы ним.

И быдӧн мыччӧ
дзоридзьяса кисӧ:
— Тэн тайӧ, Ванюк,
Педюк, Питирим...

А сійӧ муртса
восьтыштӧма вомсӧ,
оз лапнит синнас,
йӧзлань дзоргӧ пыр.

Тась мунліс сійӧ
ӧнія кодь томӧн —
ас йӧзсӧ тӧдны
сьӧкыд пырысь-пыр.

Ас сиктлысь сійӧ
чужӧмбансӧ аддзӧ,
и вермис кӧ, дерт,
шуис эськӧ тадз:

— Мед сэсся нэмъяс
оз нин сувтлы татчӧ
гранитысь сизьдӧм
ме кодь жӧ салдат!

(В. Напалков.)

Вочавидз юалӧмъяс вылӧ.

1. Кодлы сувтӧдӧма клуб ӧшинь улӧ памятниксӧ?
2. Мыйла сэтчӧ йӧзыс вайӧны дзоридзьяс?
3. Кыдзи тэ гӧгӧрвоан «быдӧн ас ног сетӧ сылы ним»?
4. Мый йылысь ӧні мӧвпалӧны йӧз?
5. Мый тэ тӧдан серпасвывса памятник йылысь?

139 удж. «Руд изйысь ловзьӧдӧм салдат» кывбурысь корсь кадакывъяс. Инды налысь кадсӧ.

Тӧдан-ӧ тэ?

Великӧй Отечественнӧй война вылӧ Комиысь ветліс 38 сюрс морт. На пиысь ловъяӧн ӧні колины сӧмын 6 сюрс гӧгӧр морт.
Челядь, пыдди пуктӧй войнавывса ветеранъясӧс. Отсасьӧй налы. Тшӧкыдджыка аддзысьлӧй накӧд.

восьтыштӧма — приоткрыл
дзоргӧ — смотрит
ловзьӧдӧм — воскресший
муртса — чуть
оз лапнит — не моргнёт
сизьдӧм — высеченный
чужӧмбансӧ — лицо

43–45

140 удж. Лыддьы мойдсӧ.

КЫДЗ ПУ.

Ӧти пӧчлӧн внучкаыс висьмис. Пӧчлӧн суседкаыс шуӧ:
— Ветлы джуджыд чой вылӧ, кор кыдз пулысь заравасӧ. Зараваыс абу прӧстӧй, кор нывкаыд сійӧс юас, пыр и бурдас. Пӧчӧ кайис чой вылӧ. Шоръяс дзольгӧны.
— Кыддзӧй, кыддзӧй, мича пуӧй, сет мем ассьыд зараватӧ. Ме сійӧн юктӧда ичӧт внучкаӧс, висьӧ, нинӧм оз сёй.
Кыддзыд, коръястӧм на, шуӧ:
— Сюмӧд улісӧ муртса восьтышт, ёна эн дойдав менӧ, сьӧлӧм шӧрысь тэныд дозъяд сета югыд, юмов ма кодь веж зарава. Сӧмын тэ менам вуж дінысь шыбит изсӧ нюр бокас.
Бур пӧчӧ сідзи и вӧчис, кыдзи пуыс корис. А пуыс сылы туис тыр зарава вийӧдіс.
— Аттьӧ ыджыдӧс, — копыртчыліс пулы бердӧдзыс пӧчӧ.
Гортӧ воис, внучкалы заравасӧ сетіс. Внучка чӧскыд васӧ юис — быттьӧ висьӧмыс эз и вӧвлы.
Гожӧмбыд сьыліс да йӧктіс, ассьыс пӧчӧсӧ гажӧдіс. Арнас бать-мам ордас карӧ муніс. Мӧд гожӧмнас бара бур пӧчӧ ордас воис.
Чӧдла, ӧмидзла вӧрӧ ветлӧны. Сэсся и бара внучкаыд висьмис. Шуӧ баблы суседкаыс:
— Ветлы бара чой вылӧ. Кор тэ кыдз пуыдлысь корӧсь. Жар пывсянын внучкатӧ пывсьӧд.
Пӧчӧ кайис чой вылӧ, гӧгӧр дзоридз быдмӧ, шоръяс косьмӧмаӧсь. Кыдз пу шогӧ усьӧма, юны колӧ. Чой вылӧ ва оз кыпты.
Пӧчӧ копыртчыліс кыдз пулы:
— Мича кыддзӧй, еджыд кокӧй, вай меным ӧти корӧсь. Менам внучка бара висьӧ.
— Горшӧй косьмӧ, — шуӧ кыдз пу, — юктӧд кок улысь вужъясӧс, сэсся и босьт менсьым корӧсьӧс.
Ветліс пӧчӧ, туисӧн ва вайис, вужъяссӧ ёна юктӧдіс. Гажмис кыдз пу, улӧ копыртчис. Бабӧ корӧсь чегъяліс:
— Аттьӧ, кыддзӧй! Медым шонді тэнӧ шонтӧ, медым лысваыс мыськалӧ тэнсьыд мича коръястӧ да исергаястӧ.
Сэсся гортас муніс. Внучкасӧ жар пывсянын мыссьӧдіс, гӧгӧрбок небыд корӧсьнас корӧсяліс. Нылыд пыр и бурдіс, гажа лои. Внучкаыд и шуӧ:
— Пӧчӧ, пӧчӧ, вай ми чой вылӧ ветлам. Кыдз пу йылысь сьыланкыв сьылам. Медым сылы долыд лоӧ.
— Дона, мича кыдз пу,
Гажӧд менсьым чужан му.
Шонді улын кышакыв,
Дыр на ов и дыр на сьыв.

(Сӧлӧ баб.)

бердӧдзыс — до (чего-либо)
вуж — корень
дзольгӧны — журчат
долыд — весело
исерга — серьги
копыртчыліс — поклонился
кышакыв — шелести листьями
сюмӧд — береста
туис — туес (берестяная посуда)
юктӧда — напою

Вочавидз юалӧмъяс вылӧ:

1. Мыйӧн отсаліс кыдз пу нывкалы?
2. Кыдзи пӧчӧ да внучка отсалісны кыдз пулы?

1. Тӧдмав ребуссӧ.

2. Висьтав серпас серти, мый вӧчӧны кыдз пуысь.

3. Тӧдмав, кутшӧм кыв татчӧ дзебсьӧма.

4. Корсь пӧвсӧ. Висьтав, мый вӧчӧны сюмӧдысь.

сикӧтш
чибльӧг
туис
чипсан
чуман
туесок
наберушка
чипсан
бусы
черпачок

5. Тӧдмав, мый кыдз пулӧн эм.

4 1 5 3 6 2
р и г е а с

6. Корсь пӧвсӧ. Висьтав кутшӧм овлӧ кыдз пу.

еджыд кока
кузь
пасьтӧм
винёв
чӧв
эзысь
вӧсньыд

серебряная
безмолвная
тонкая
длинная
стойкая, крепкая
белоствольная
голая

7. Висьтав, мый сетӧ кыдз пу.

Коми кывйын эм мӧд колян кад.
Тэ мунӧмыд.
Сійӧ — мунӧма.
Ті мунӧмныд.
Найӧ мунӧмаӧсь.

141 удж. Вежлав кадакывъяссӧ. Гиж да инды мӧд колян када кадакывъяслысь суффиксъяссӧ.

Вӧч тадзи: Тэ шуӧмыд.
Сійӧ шуӧма.
Ті шуӧмныд
Найӧ шуӧмаӧсь.

Висьмыны, бурдны, юктӧдны, сетны.

142 удж. Нималана роч поэт гижис кыдз пу йылысь кывбур. А Илля Вась комиӧдіс тайӧ кывбурсӧ. Лыддьы кывбурсӧ комиӧн, а сэсся висьтав рочӧн. Тӧдан-ӧ тэ тайӧ роч поэтсӧ?

КЫДЗ ПУ.

Ӧшинь улын кыдз пу
Сулалӧ зэв лӧнь,
Вевттьысьӧма лымйӧн
Эзысьӧн моз скӧнь.

Паськыд увъяс вылас
Уна эзысь туг
Баситӧма пулысь
Дзик быдлаті тшук.

Ойбыртӧма кыдз пу,
Сылӧн паськӧм дзирд:
Зарни биӧн ломзьӧ
Вылас быд лым чир.

Асъя кыа содтӧ
Сылысь дзирыдлун:
Кисьтӧ вылас зарни,
Торкӧ сылысь ун.

Инды мӧд колян када кадакывъяс.

143 удж. Лыддьы сьӧлӧмсяньыд.

КЫДЗ ПУ.

Мича кыдз пу серпасалім тан.
А вот мыйла? Гӧгӧрвоӧдам.

Чужлас морт, кыдз тувсов пулӧн кор,
Кельдӧдас да сэсся лоас дзор.
Корйыд ӧктӧ гожся лунлысь пым.
Мортлы вояс чӧжӧн локтӧ вын.

Мед кӧть дзоля, корйыд вывті чож.
Ичӧт выннас быдтӧ пулысь вож.
Сылӧн уджысь содӧ пулӧн кок —
А быд мортлӧн тані аслас мог.

Шуад, позис босьтны и мӧд пу,
Да ӧд кыдзтӧ чардби пӧ оз ну.
Сӧмын сылӧн петӧ сӧстӧм ва,
Шусьӧ сійӧ чӧскыд зарава.

Шонді арлань — муланьӧ важ кор
Чӧла усьӧ, кадыс воас кор.
Пуыд быдмӧ, эм кӧ крепыд вуж.
Вунӧд рӧдтӧ — нинӧмсӧ он чужт!

Коми кывйын уна пу ним эм.
Он тэ аддзы мӧдысь дз шы сэн.
Тайӧ шылӧн аслыспӧлӧс мич.
Вежа пуӧй, коми рӧдсӧ видз!

(Л. Анисенкова.)

1. Корсь омонимъяс, синонимъяс, антонимъяс.

2. Артмӧд мед-приставкаӧн кывбердъяс.

Вӧч тадзи: ичӧт — медічӧт.

Сюсь, пӧрысь, мича, дзор, пӧсь, дзоля, сӧстӧм, чӧскыд, важ, крепыд.

3. Серпасав кыдз пусӧ да лӧсьӧд неыджыд висьт «Мича кыдз пу».

аслыспӧлӧс — своеобразная
баситӧма — украсили
быдлаті — везде
вевттьысьӧма — принакрылась
дзирд — блестящая, сверкающая
дзирыдлун — блеск, сияние
кисьтӧ — сыплет
кыа — заря
ломзьӧ — сверкает
ӧктӧ — собирает
ойбыртӧма — задремала
пым — тепло
скӧнь — совсем (как)
содтӧ — усиливает
торкӧ — нарушает
туг — кисть, кисточка
тшук — точно
ун — сон
чардби — молния
чож — резвый
чӧжӧн — в течение

46

144 удж. Лыддьы.

ВОРДКЫВ.

Ыргӧн тазйӧ пӧчным ва лӧсьӧдіс. Босьтіс пидзӧс вылас ичӧт чойнымӧс, мыссьӧдіс, пернапасаліс да сэсся ачыс сійӧ жӧ ванас кутіс мыссьыны. Ми юалім сылысь:
— Пӧчӧ, мыйла кага мыськӧм ванас мыссян?
— Медым ог пӧрысьмы.
Медым дыр синмӧй аддзас.
Медым пельӧй кылас.
Медым пиньӧй оз гылав.
Внукӧй менам пывсьӧ,
Шоныд ваӧн резсьӧ,
Небыд ваыс кажитчӧ,
Вот и мыссис-пожъясис.
Тайӧ ванас пӧрысь чужӧм мыськышта,
Медым чужӧмӧй оз пӧрысьмы,
Медым внукӧс ен видзас,
Медым внукӧй сюсь лоӧ,
Медым внукӧй дыр олӧ,
Медым шонді сылы дыр шонтӧ,
Медым внукӧй бать-мамсӧ эз шогӧд.
Медым тіянӧс удита на быдтыны.
Медым тіянӧс тӧлкӧ-вежӧрӧ велӧдны.

(Сӧлӧ баб.)

1. Гижӧд вылӧ мыджсьӧмӧн висьтав, мыйла пӧчӧ мыссис кагаӧс мыськӧм ваӧн?
2. Лыддьы сёрникузяяс медым кывйӧн.

мед, медым — чтобы, чтоб
мед, медым — пусть, пускай

3. Гиж кывсикасъяс.

Вӧч тадзи:
Эмакывъяс: вордкыв, ... , ... .
Нимвежтасъяс: сійӧ, ... , ... .
Кывбердъяс: ыргӧн, ... , ... .
Кадакывъяс: лӧсьӧдіс, ... , ... .
Кывбӧръяс: вылас, ... , ... .

145 удж. Инды эмакывъяс да кывбердъяс.

Пу — пу пызан, кӧрт — кӧрт зыр, эзысь — эзысь тӧлысь, зарни — зарни чунькытш, ыргӧн — ыргӧн самӧвар.

Лӧсьӧд сетӧм кывъясӧн 3 сёрникузя.

146 удж. Вочавидз юалӧмъяс вылӧ.

1. Кутшӧм мойдъяс Сӧлӧ баблысь тэ лыддин урокъяс вылын?
2. Кутшӧм мойдъяс Сӧлӧ баблысь нӧшта тэ тӧдан?
3. Кутшӧм мойд Сӧлӧ баблӧн медся ёна воис сьӧлӧм вылад?

147 удж. Лыддьы.

МЕД ДЗИРДАЛАС ШОНДІ.

Мед дзирдалас шонді!
Мед югъялас луныс!
Мед дзоридзӧн тырас
Да нюмъялас му!
Мед шонділань быдӧн
Пыр восьлалас, мунас!
Мед шондіа туйсӧ
Оз вевттьыв сьӧд ру!

(М. Лебедев.)

1. Кутшӧм вежӧртасыс мед кывлӧн?
2. Инды кадсӧ кадакывъяслысь.
3. Инды кыввужсӧ: шонді, шонділань, шондіа.
4. Кутшӧм кывъясӧн лоӧны:
дзирдалас, югъялас — ... , восьлалас, мунас — ... .

вордкыв — заговор
кажитчӧ — нравится
мыджсьӧмӧн — опираясь
нюмъялас — улыбается
пернапасаліс — перекрестила
пожъясис — сполоснулся
резсьӧ — брызгается
ыргӧн — медный

«ГОЖӦМ ЙӦЛӦН-ВЫЙӦН ИСКОВТӦ».

47

148 удж. Лыддьы.

ГОЖСЯ ЛУНЪЯС.

Комиын гожӧм заводитчӧ кӧка войяссянь. Рочӧн шуӧны тайӧ кадсӧ «белые ночи». Позтӧм кӧкъяс кӧкӧны вӧрын: «Ку-ку! Ку-ку!» Челядь ёна радейтӧны гожӧм: ворсӧны, котралӧны, варччӧны, отсасьӧны видз вылын верстьӧ йӧзлы.
Лӧддза-номъя тӧлысь заводитчигӧн йӧзыс быдлаын ветлӧны шойнаяс вылӧ. Сэні казьтылӧны кулӧм рӧдвужсӧ. Трӧйча лунӧ вежӧдӧны вичкоын кыдз увъяс, вайӧны найӧс гортаныс, медым лоны дзоньвидзаӧн, сӧстӧммӧдны оланін.
Комиын гожӧм пуксьӧ июнь 9-ӧд лунӧ, кор заводитӧ дзордзавны лежнӧг. 18-ӧд лунӧ жовпу мичмӧдчӧ дзоридзъясӧн. Йӧз шуӧны, мый 20-ӧд лунӧ шондіыс бергӧдчӧ тӧвлань, а гожӧмыс — жарлань.
Сора тӧлысь 6-ӧд лунӧ — Купальнича лун. Ставӧн пывсьӧны выль корӧсьӧн, кодӧс тэчӧны кыдз, пелысь увъясысь да купальничаысь. Шуалӧны: «Вежа кыдз, вежа пелысь, сетӧй дзоньвидзалун».
12 час войын чукӧртӧны бурдӧдчан дзоридзьяс. Асывнас мыссьӧны лысваӧн. Том йӧз чеччалӧны бипур вомӧн.
7-ӧд лунӧ сиктса йӧз гажаа пасйывлӧны Иван лун. Тайӧ лунсяньыс заводитӧны перйыны корӧсь тӧв кежлӧ. Иван лун бӧрти ставӧн петӧны видзьяс вылӧ, воӧ турун пуктан кад.
11-ӧд лунӧ мыччысьӧны еджыд да гӧрд гобъяс. 14-ӧд лун кежлӧ кисьмӧны оз, мырпом, гӧрд сэтӧр. А 25-ӧд лунӧ воӧ чӧд да чӧдлач.
Моз тӧлысьӧ кисьмӧны сьӧд сэтӧр, ыжнёнь, ӧмидз, пув. Петӧ быдсяма солалан да косьтан тшак.
Майбыр, гожӧмын!

(«Ӧшкамӧшка» газетысь.)

верстьӧ — взрослый
дзоньвидзаӧн — здоровым
майбыр — так здорово
шойна — кладбище
ыжнёнь — жимолость

Вочавидз юалӧмъяс вылӧ.

1. Мый овлӧ лӧддза-номъя тӧлысьӧ? Мыйла тадзи шусьӧ комиӧн июнь?
2. Мый овлӧ сора тӧлысьӧ?
3. Мый овлӧ моз тӧлысьӧ?

149 удж. Лӧсьӧд серпас серти сёрни.

— Кӧні тэ олан?
— Ме ола Юхнин улич вылын.
— Кӧні аптека?
— Аптека Ленин улич вылын.
— А кӧні тайӧ уличыс?
— Мунӧй водзӧ да кежӧй веськыдвылӧ.

150 удж. Лӧсьӧд сёрникузяяс мусерпас серти.

Вӧч тадзи:
— Коді? олӧ кӧні?
— Таня олӧ Воркутаын.

КУТ ТӦД ВЫЛАД!

шуйгавыв — левая сторона
веськыдвыв — правая сторона

* * *

СЬӦД ДА ЕДЖЫД.

Ичӧт воклӧн кучик кӧмыс
кыкнан пӧлыс ӧткодь рӧма,
кыдз нӧ тӧдас ичӧт вок,
кодыс сылӧн веськыд кок!

Кӧмсӧ кӧмаліс, но бӧрӧн,
дыр эз казяв, кодсӧ дзугис,
мыйла кыкнан кӧмлӧн ныр
бокӧ видзӧдӧны пыр.

Ичӧт вокӧй бӧрдӧм сорӧн
сэтшӧм краска менсьым корӧ,
медым сылӧн ӧти кӧм
вежис ассьыс пемыд рӧм.

Ӧні кӧмасьны кор пуксяс,
ичӧт вокӧй оз нин дзугсьы:
ӧти кӧм пӧлыс кӧ сьӧд,
мӧдыс — еджыд ... Со и тӧд!

(С. Попов.)

керка вевт

витӧд судта
нёльӧд судта
коймӧд судта
мӧд судта
медводдза судта

Уна судтаа керка.
Ӧти судтаа керка.

Джуджыд керка.
Ляпкыд керка.

151 удж. Гиж ассьыд оланінпас (адрес).

Вӧч тадзи:

152 удж. Лыддьы лыдпасъяссӧ комиӧн.

1. Ме ола (6) судтаын.
2. Менам ыджыд мамӧй олӧ (7) судтаын.
3. Тэнад пӧльыд да пӧчыд олӧны (2) судтаын.
4. Сылӧн чойыс олӧ (9) судтаын.

Лӧсьӧд сёрникузяяс нимвежтасъясӧн.

Менам, миян, тэнад, тіян, сылӧн, налӧн.

153 удж. Вочавидз, мый тайӧ.

— Тайӧ вартчанін?
— Да, тайӧ вартчанін.

— Тайӧ сёянін?
— Абу, тайӧ детсад.

— Тайӧ аптека?
— Да, тайӧ аптека.

— Тайӧ опера да балет театр?
— Абу, тайӧ музей.

154 удж. Лӧсьӧд сёрни.

Вӧч тадзи: — Тіян керкаыд 31-ӧд?
— Абу, миян 33-ӧд керка.

155 удж. Лыддьы лыдпасъяссӧ комиӧн.

1. 1997-ӧд воын став страна пасйис 850 во Москвалы.
2. 1980-ӧд воын Сыктывкарын вӧлі праздник. Карлы тырис 200 во.

Вочавидз юалӧмъяс вылӧ.

1. Кутшӧм воын артмис тэнад сиктыд (грездыд, карыд)?
2. Кымын во тыри сылы таво?

дзугис — перепутал
кучик — кожаная
оз дзугсьы — не путает
эз казяв — не заметил

48

156 удж. Лыддьы.

ГОЖСЯ ШЫЯС.

«Кук-ку-у-у!.. Кук-ку-у-у!..» — рытъясын ольясысь кӧклӧн нораа горзӧмыс кылӧ. Кыв бӧрсьыс вӧтлысьӧны-нерӧны нывпосни сійӧс да нюркйӧдлӧны-юасьӧны: «Кӧкӧ-ӧ-ӧ — чо-йӧ!.. Кӧ-кӧ — чо-йӧ!.. Узь да вӧтась да кы-мын во на ме ве-рӧс са-йӧ ог мун?» Ва усьӧма нин кырйысь. Гӧгӧр няйт. Ва ямас вылын вежӧдӧ турун. Вадор баддьын оз лӧньлы кайяслӧн дзользьӧм.
«И-ис... и-ис ис-ис — и-и-ис...» — йӧжгылясьӧ-кынмӧ нин ва дорын истан. (Зэв ӧд сійӧ ляб ачыс кылӧ.) Асывъясын ыркнитлӧ, ваысь ру кыптӧ.
«Джив-дзив... джив-джив-джив!..» — Ок, джиянъяс нин кыпӧдчӧмаӧсь: чукӧрӧн-чукӧрӧн лэбалӧны, быдлаӧ пуксьӧны... Сёмайбырӧй тэ, гожӧмӧй, кольны тай, тыдалӧ, кутін!

(Тима Вень.)

вӧтлысьӧны — гоняются
дзользьӧм — пение, щебетание
джиян — синица
йӧжгылясьӧ — ёжится
ляб — слабый
оль — смешанный берёзово-еловый лес на заболоченных кочковатых низинах

Вочавидз юалӧмъяс вылӧ.

1. Кыдзи горзӧ кӧк ольясын?
2. Кутшӧм шыяс лэдзалӧ ва дорын истан?
3. Чукӧрӧн-чукӧрӧн лэбӧны джиянъяс. А кутшӧм шыяс найӧ сетӧны?

157 удж. Лыддьы.

КӦНІ КОДІ ОЛӦ?

— Коді олӧ пемыд вӧрын?
— Йӧра!
— Коді ветлӧ васӧд нюрын?
— Тури!
— Коді юяс дорын никсӧ?
— Истан!
— Коді сӧрӧ: «Китша-катша?»
— Катша!
— Коді войясын оз узь?
— Сюзь!

(С. Попов.)

Юасьӧй ӧта-мӧдныдлысь, коді кӧні олӧ.

158 удж. Корсь пӧвсӧ.

Сьӧд рака, трясогузка, кӧк, лебедь, кутш, гусь, ябыр, ласточка, варыш, стриж, колипкай, грач, чайка, каля, сокол, тури, скворец, сюзь, кукушка, юсь, орёл, сырчик, жаворонок, дзодзӧг, журавль, джыдж, сова, чикыш.

Висьтав, кӧні тӧвйӧны тайӧ лэбачьясыс.

159 удж. Артмӧд кывъяс.

тури
сьӧла
ур
колип
катша
сьӧд

кай
пув
рака
син
оз
кай

Кык кыввужйысь артмӧм эмакывъяс шусьӧны сложнӧйясӧн: вижъюр, катшасин.

160 удж. Висьтав ӧти кывйӧн.

1. Турипув, мырпом, сьӧлаоз — тайӧ ... .
2. Бобӧнянь, маръямоль, вижъюр — ... .
3. Пипу, тупу, оржыпу — ... .
4. Сьӧдбӧж, визяорда, вӧркань — ... .
5. Понтшак, уртшак, кӧчгоб — ... .

161 удж. Артмӧд кывъяс.

кыв

бур
песан
бӧр
вуж
тэчас

када
нӧд
мойд
сьылан
ворд

кыв

162 удж. Корсь пӧвсӧ.

эмакыв
нимвежтас
кывбӧр
кывберд
кадакыв

глагол
имя прилагательное
местоимение
имя существительное
послелог

Висьтав ӧти кывйӧн, мый тайӧ.

163 удж. Висьтав, мый ӧткодьыс кывъясас. Инды, кутшӧм кывсикасъясӧн лоӧны сетӧм кывъясыс.

1. Юрсигусь, вижъюр, юрси, юр, куш юра, юралысь, юркытш, юрлӧс.
2. Синтӧм, синва, катшасин, син, синлыс, синкым.
3. Бӧж, сьӧдбӧж, балябӧж.
4. Синва, лысва, зарава, ва, войтва, вӧр-ва.
5. Дӧра, дӧрапас, водздӧра, пызандӧра, дӧрӧм, дӧрӧмасьны.
6. Коляоз, оз, сьӧлаоз.
7. Анькытш, ань, шыранькытш, вежань.

Инды сложнӧй эмакывъяс.

164 удж. Лыддьы. Гиж сложнӧй эмакывъяс.

Киссьӧ-шливгӧ сьӧд синваӧн зэр...
Тёпкӧ войтва, лыддьӧ кад.
Бӧрдӧ лысваӧн льӧм сад.
Кысь и киссьӧ-шӧтӧ помасьлытӧм зэр?

(Н. Фролов.)

киссьӧ-шливгӧ, киссьӧ-шӧтӧ, зэрӧ — идёт дождь

КУТ ТӦД ВЫЛАД!

Киссьӧ-шливгӧ, киссьӧ-шӧтӧ лоӧны сложнӧй кадакывъясӧн.

165 удж. Артмӧд сложнӧй эмакывъяс.

чунь
юр
ань

КЫТШ

166 удж. Лыддьы сьыланкывсӧ.

Разсьӧ да разсьӧ менам юркытш,
Ой-ёй алӧй чветъяс.
Разсьӧ да разсьӧ менам юркытш,
Ой-ёй еджыд чветъяс.
Разсьӧ да разсьӧ менам юркытш,
Ой-ёй лӧза-гӧрда.
Разсьӧ да разсьӧ менам юркытш,
Ой-ёй турунвижыс.
Разсьӧ да разсьӧ менам юркытш,
Ой-ёй пӧлӧзнича.
Разсьӧ да разсьӧ менам юркытш,
Ой-ёй купальнича.
Разсьӧ да разсьӧ менам юркытш,
Ой-ёй катшасинъяс.
Дзикӧдз разьсис менам юркытш.

(Журналысь.)

1. Инды сложнӧй эмакывъяс.
2. Инды кывбердъяс.
3. Инды нимвежтасъяс.

49–50

167 удж. Лыддьы.

ЁРТЪЯС.

Енэж лӧз да мича — кымӧртор оз тыдав. Жар гожӧмыс!
Вит арӧса Коля да квайт арӧса Миша лунтыръясӧн ворсӧны ю дорын лыа вылын. Колялы зэв окота пыравны ва пиас, медым пӧттӧдз уялыштны-суналыштны, но оз тай артмы: Миша оз лэдз. Сійӧ шуӧ: «Мамыд да батьыд эз тшӧктыны, оз позь, ме тэысь арӧсӧн ыджыдджык, и тэныд менсьым колӧ кывзысьны. Вежон мысти меным сизим арӧс тырӧ».
Коля лэдзтӧгыд мырдӧн ваӧ эз и пырлы. Збыльысь, ыджыдджык ёртыдлысь колӧ кывзысьны. Но нинӧм — и сідзи гажа. Детинкаяс ворсісны лыа вылын машинаясӧн — магазинысь ньӧбӧм кӧрт чача-автомобильясӧн. Коля новлӧдліс «фермасянь вый вӧчан заводӧ йӧв», а «Миша вӧр кыскаліс».
Тадзи и колины лунъясыс. А сэсся вежон мысти кымын Миша пырис Коля ордӧ гортас да шуис:
— Ме тэкӧд ва дорын ворсны ог кут сэсся. Вот.
— Мыйла? — чуймис Коля.
— А ме ыджыд нин, сизим арӧс талун тыри, чачаасьнытӧ абу нин мича. Арнас ме школаӧ муна, а тэ он. Вот! — вочавидзис Миша да тшапа бӧр петіс.
Лунтыр бӧрдіс Коля. Рытнас весиг мам-батьыс эз вермыны бурӧдны.
— Ме Миша кодь кӧсъя лоны — ыджыдӧн, кыдзи нӧ ме ӧтнам кута ворсны, — ырзіс лёк горшӧн Коля . — Ме ӧтн-а-ам коли, га-а-ажтӧм Мишатӧг.
...Мӧд луннас Коля жугыля гӧгльӧдліс бедьторйӧн горт гӧгӧрыс бӧчка асык. Ва дорӧ мам-бать ӧтнассӧ эз лэдзны. Окота, дерт, эськӧ ветлыны да. Кадыс муніс дыша, шондіыс весиг кутшӧмкӧ мустӧм лоӧма.
Но друг...
— Эй, шыбит сімӧм асыктӧ, — кыліс тӧдса гӧлӧс. Потшӧс вылын пукаліс ыджыдджык Миша ёртыс да збодера нюмъяліс.
— Мунам ва дорӧ, — корис Миша. — Ми ӧд тэкӧд ёртъяс.
И найӧ гигзигтырйи котӧртісны ва дорӧ.

(А. Тарабукин.)

Лӧсьӧд висьт.

1. Гожӧмын.
2. Коля да Миша шойччӧны.
3. Налӧн ворсӧм.
4. Коля кольӧ ёрттӧг.
5. Бурджык ёртасьны!

бедьторйӧн — палкой
гигзигтырйи — от души смеясь
гӧгльӧдліс — катал
сімӧм — ржавый
пӧттӧдз уялыштны-суналыштны — досыта, вдоволь купаться
ырзіс лёк горшӧн — ревел

Сложнӧй эмакывъяс гижсьӧны
ӧтлаын: юрсигусь,
торйӧн: гӧрд гоб,
визь пыр: вӧр-ва.

168 удж. Кут тӧд вылад гижанногсӧ.

чардби, мазі, шомкор, лапкор, паськӧм, черинянь, бипур, чушканзі, рӧдвуж, серпас

гут кулан тшак, град выв пуктас, град йӧр, пес чипас, би кинь

бать-мам, ныв-пи, нянь-сов, керка-карта, вӧр-ва, видз-му, сёян-юан, чай-сакар

169 удж. Артмӧд гут-гаг нимъяс.

чер
гусь
зі
юр
кот
кодзув
ен
ань
зі
си
гаг
ма
чушкан

170 удж. Корсь пӧвсӧ.

Бобув, муха, ном, овод, чирк, лӧдз, гут, кузнечик, комар, бабочка.

171 удж. Лӧсьӧд серпас серти висьт «Сиктса олӧм-вылӧм». Пырт сёрниад сложнӧй эмакывъяс.

Заводит тадзи: Гожӧмнас каникул дырйи сиктын овны зэв лӧсьыд ...

Отсӧг вылӧ кывъяс:
шойна — кладбище
пос — мост
рас — роща
ёль — лесной ручей
мир туй — большая дорога
мӧдлапӧв — тот берег (другой берег)
тыла — подсека (вырубка)
вичко — церковь
ты — озеро
лыа — песок
вӧр — лес

172 удж. Лыддьы. Велӧд сьыланкывсӧ.

СИКӦТШ.

Юим шорысь, юим ёльысь,
вӧчим сикӧтш маръямольысь.
Мича жӧ и сикӧтш,
Сьӧлӧм вӧрзис дзикӧдз.

Вотчим вӧрысь, вотчим нюрысь,
пелысь вылысь сикӧтш сюрис.
Мича жӧ и сикӧтш,
Сьӧлӧм югдіс дзикӧдз.

Ветлім матӧ, ветлім ылӧ,
Корсим лежнӧг сикӧтш вылӧ.
Мича жӧ и сикӧтш,
Сьӧлӧм бурмис дзикӧдз.

Сикӧтш уна пӧлӧс овлӧ,
Ӧні сюмӧд сикӧтш новла.
Мича жӧ и сикӧтш,
Сьӧлӧм сыліс дзикӧдз.

(В. Лодыгин.)

1. Мый позьӧ вӧчны гожӧмнас?
2. Кутшӧм пу вылын овлӧ сюмӧд?

173 удж. Артмӧд-ась суффикс отсӧгӧн кадакывъяс.

Чунькытш, сикӧтш, исерга, вӧнь.

174 удж. Артмӧд кывъяс. Гижанногсӧ видзӧдлы «Коми орфографическӧй кывчукӧрысь».

син
лыс
войт
зара

ВА

юк
тшак
пув

ВА

Эж
Изь
Ем
Ус

ВА

1. Лӧсьӧд артмӧдӧм кывъясӧн кывтэчасъяс: кывберд + эмакыв.
2. Думышт кывъяснас сёрникузяяс да гиж.
3. Инды юяссӧ мусерпас вылысь.

175 удж. Вуджӧд роч кыв вылӧ.

сьӧд бӧж
баля бӧж
ур бӧж
роч акань

Корсь вежӧртассӧ «Комиа-роча кывчукӧрысь».

сьӧдбӧж
балябӧж
урбӧж
рочакань

176 удж. Висьтав, мый оз лӧсяв.

Турун юр, куран юр, ді юр, вижъюр.
Сьӧдбӧж, син бӧж, лыа бӧж, пыж бӧж.
Картупель син, катша син, ботан син, катшасин.

177 удж. Артмӧд сложнӧй эмакывъяс.

Места нимъяс: Сьӧд, дін, Ді, кар, Ем, Сыктыв, юр, дін, Кулӧм, кыркӧтш, чой, Абъя.

178 удж. Лӧсьӧд серпас серти висьт. Сет ним. Пырт кывбӧръяс.

Отсӧг вылӧ кывъяс:
пес чипас — поленница
картупель му — картофельное поле
потшӧс — изгородь
зорӧд — стог сена
пывсян — баня
гид — хлев
ӧшинь ув, йӧр, град йӧр — огород
керка, горт — дом
чом — маленький домик для игр детей

51

179 удж. Лыддьы.

СИЗЬ ПОЗ.

Ми водз велалім вӧравны. Кыйлім и чери — сьӧд мышка мыкъясӧс, сиръясӧс, ёкышъясӧс, йӧршъясӧс. Пыжтӧг, вугыртӧг — ботйӧн. Венякӧд вӧралігӧн сэтшӧм мича вадъяс аддзывлім, но он на сэні ботъясь. Джуджыд. Колӧ пыж. А сійӧ эз вӧв. Веня шыӧдчис Опонь дедыс дорӧ:
— Колӧ пыж.
— Пыж колӧ?.. Ыджыд уджыс. Кыз пипу колӧ бӧрйыны. Корсьлӧй сывтыръя пу. Ме петкӧдла, кыдзи пыжтӧ вӧчны пипуысь, — кӧсйысис Опонь дед.
Дыр корсим Венякӧд туяна пипусӧ. Коли тӧв. Воис тулыс. Гожӧм помын нин аддзим пипутӧ.
— Доб-ра-а! Сё саяс во, гашкӧ, туӧма-быдмӧма. Лун джынсӧ ковмас кокавны-пӧрӧдны, — шуис Опонь дед.
Черӧ босьтчис Веня.
Но мый тайӧ? Юр весьтын кутісны лёкысь тічкыны сизьяс. Кыкӧн. Ӧтиыс гӧрд юра-сорса, мӧдыс — рудджык. Пыралісны пипу горсйӧ, лэбалӧны миян гӧгӧр, шызьӧдісны став матігӧгӧр вӧрсӧ.
— Вайлы, Веня пиӧй, чертӧ, — чукӧстіс Опонь дед внуксӧ.
Веня сетіс дедыслы черсӧ:
— Мый нӧ, дедӧ, сизьясыс тадзи шызисны?
— Шызьӧдім тай, — вочавидзис Опонь дед да дзебис черсӧ нопъяс. — Сёрмим. Сизь поз тані.
Сійӧ висьталіс, мый сизьяс бурдӧдӧны пуяс, сёйӧны висьысь пуяслӧн кырсь улысь пучӧйясӧс. Пӧрысь морт ёна стрӧжитіс, медым ми, челядь, некор эг лэптӧй сизьяс, кӧкъяс да мукӧд посни лэбачьяс вылӧ кинымӧс. Ставыс найӧ пӧльза вайысь бордъя ловъяс.
Арнас нин ми вӧчим аддзӧм пипуысь пыж, кор позтырыс лэбис горссьыс. Уна и гыч кыйлім борд кодь кокни пыжӧн.

(А. Одинцов серти.)

Вочавидз юалӧмъяс вылӧ.

1. Мыйла ковмис пыж?
2. Дыр-ӧ корсисны пусӧ? Сюри эз сійӧ?
3. Мыйла юр весьтын кутісны тічкыны сизьяс?
4. Мый челядьлы висьталіс пӧрысь морт?
5. Мыйӧн помасис висьтыс?

бот — ботало (шест, которым ударяют по воде, пугая шумом рыбу)
вад — лесное озеро
матігӧгӧр — окрестности леса
позтырыс — выводок
пучӧйясӧс — короедов
сывтыръя — в обхват
туяна — подходящий
шызьӧдісны — всполошили

180 удж. Корсь пӧвсӧ.

Йӧрш, сир, ёкыш, ёді, язь, кельчи, гыч, щука, окунь, сын, плотва, ком, елец, лещ, хариус, мык, карась, ёрш.

181 удж. Инды сложнӧй эмакывъяс.

Истӧг, вугыр шатин, пӧрт, пыж, бипур, вугыр, нидзув, чери кыйысь, матка.

182 удж. Тӧдмав, мый тайӧ.

1. Чериысь пуӧм шыд — ... .
2. Чериӧн пӧжалӧм пирӧг — ... .

183 удж. Висьтав, мый оз лӧсяв.

Бипур, би кинь, бисер, биасьны, чардби, би, биа.

* * *

— Ваньӧ, ветлам талун войколӧн чери кыйны?
— Ветлам.
— А кытчӧ? Гашкӧ, мӧдлапӧлӧ?
— Позьӧ. Менам эм кык вугыр шатин.
— А ме босьта нидзувъяс, пӧрт. Чери кӧ шедас, пуам юква.
— А ме нӧшта босьта матка. Гортӧ локтігӧн кежавлам вӧрӧ тшакла.
— Босьт, менам маткаыд абу.

184 удж. Висьтав, кутшӧм кывъясысь артмӧмаӧсь сложнӧй эмакывъяс.

войвыв — север
рытыввыв — запад
асыввыв — восток
лунвыв — юг

Тӧдмав кроссвордсӧ.

ПАЧЧӦРВЫВ

Гиж сложнӧй эмакывъяс да инды кыввужъяссӧ.

185 удж. Содты лӧсялана кыв.

Финнъяс олӧны ... .
Удмуртъяс олӧны ... .
Венгръяс олӧны ... .
Коми-пермякъяс олӧны ... .

асыввылын
войвылын
лунвылын
рытыввылын

186 удж. Висьтав стӧча, тадзи абу.

1. Коми Республикалӧн юркар — Емва. 2. Печора — тайӧ ю. 3. Воркута — лунвылын. 4. Сыктывкар — саридз. 5. Эжва — ты. 6. Куратово — кар. 7. Ухта — грезд. 8. Нёбдін — сикт.

КОМИ КАНПАС ДА КЫП.

52–56

187 удж. Тӧдмав кроссвордсӧ да висьтав, кутшӧм лэбач серпасалӧма коми канпас вылын.

1. Кымын шыпас лэбач кывйын?
2. «Крав! Крав!» — горзӧ ... .
3. Крукыля ныра лэбач, поздысьӧ тӧлын.
4. Ичӧтик, кольквиж морӧса лэбач, радейтӧ шыдӧс да гос.
5. «Миян гажа сад йӧрӧ локтіс ...».

Тӧдан-ӧ тэ?

Коми канпас вылын серпасалӧма варыш. Тайӧ лэбачыс петкӧдлӧ вын, повтӧмлун, эбӧс. Коми муын эм уна пӧлӧс варыш:

варыш — ястреб, коршун
джыдж варыш — дербник (сокол)
дозмӧр варыш, курӧг варыш, чипан варыш — ястреб-тетеревятник
кай варыш — чеглок (сокол)
кеня варыш, тӧв юысь варыш — канюк малый
тупъюр варыш — каменная неясыть
чери варыш — орлан-белохвост, скопа
шыр варыш — кобчик

Мый нӧшта серпасалӧма канпас вылын?

188 удж. Лыддьы коми кып комиӧн да рочӧн.

ВАРЫШ ПОЗ.

Ылын-ылын, войвылын
Джуджыд парма сулалӧ.
Парма пасьта шувгӧ вӧр,
Кӧдзыд вой тӧв шутьлялӧ.

Парма пӧвстын пемыд йӧз —
Коми войтыр олӧны;
Югыдінӧ петан туй
Нэм чӧж найӧ корсьӧны.

Парма пӧвстын олӧмысь
Жугыльтчӧма сьӧлӧмъяс:
Жугыль коми войтырлӧн
Эз вӧв гажа сьылӧмъяс.
Парма шӧрын варыш поз,
Варыш котыр быдмӧны,
Йӧзлысь шуштӧм сьылӧмсӧ
Парма пӧвстысь кылӧны.

Лэбзьӧй, повтӧм варышъяс.
Вына бордъяс шеныштлӧй,
Джуджыд парма садьмӧдӧй,
Гажа гажсӧ петкӧдлӧй!

Коми йӧзӧс, лэбачьяс,
Веськыд туйӧд нуӧдӧй,
Жугыль олӧм пальӧдӧй,
Коми мусӧ югдӧдӧй!..

(Нёбдінса Виттор.)

СОКОЛИНОЕ ГНЕЗДО.

Далеко на Севере,
Где тайга дремучая,
Где ветра свирепствуют
Буйные, могучие,
Где едва заметные
Тропки извиваются, —
Обитает
Мой народ,
Коми называется.
Ищет много, много лет
Он дорогу торную,
К счастью выводящую,
Светлую, просторную.
Нам без той дороженьки
Тропки были узкими,
Думы были тёмными,
Песни были грустными.
Мы нашли дорогу ту,
Нынче вольно дышится,
Песни те печальные
Лишь в преданьях слышатся!
Тан летите ж, соколы,
Смелые, могучие,
Над любимым Севером,
Над тайгой дремучею.
Разбудите крыльями
Дебри непролазные,
Покажите счастье нам,
Наше солнце ясное!

(Вуджӧдіс И. Рыжиков.)

189 удж. Лыддьы К. Жаковлӧн «Биармия» небӧгысь юкӧн.

Енвевт бердын
Кытшӧн-кытшӧн уна варыш
Лэбалісны, енвевт бердсянь
Найӧ кыйӧдісны сюся
Прӧмыс: тар-ӧ, чож-ӧ, ур-ӧ
Вӧрзяс му вылас — сэк изйӧн
Варыш вувзьысяс да сатшкӧ
Лэчыд гыжъяссӧ!..

(Комиӧдіс М. Елькин.)

Кутшӧмӧн петкӧдлӧма варышсӧ гижысьыс?

190 удж. Лыддьы.

ВӦВЛӦМТОРЪЯС.

1. Ӧти сиктын лоис татшӧмтор. Вӧлі шоныд гожся лун. Кильчӧ ӧдзӧс и керка ӧдзӧс гурйыв восьса вӧлі. А ӧшиньтіыс, дзонь ӧшиньті, пырас варыш. Жугӧдас ӧшиньтӧ. Паччӧртіыс шур-шар лэбас да бӧр жугалӧм ӧшиньтіыс петас. Оз ӧдзӧсӧдыс пет.
Керкаын олысьяс шуасны: «Тайӧ абу бур водзын. Мыйла нӧ варышыс дзонь ӧшиньтіыс пырис? Мыйкӧ лёк лоӧ».
Сідзи и лоис. Посни челядь пестӧмаӧсь бипур керка сараяс, ыпъялысь бисӧ кусӧдны пондӧмаӧсь кос турунӧн. Биыд тадзи паськалӧма да сотӧма сизим керка.
2. Варыш кыйсьыны петӧ водз асывсянь. То сиктысь чипанӧс нуас, то петукӧс. А ӧтчыд лоис татшӧмтор. Пӧчӧ вӧтасьӧ: верӧсыслы шуӧ «Емель, чеччы. Сьӧд гӧна перинатӧ гусялісны».
Садьмисны гозъя, петісны ывлаӧ да аддзисны: ыджыд варыш лэчыд гыжнас кватитӧма Жучка нима сьӧд понныссӧ да лэбӧ нин ю вомӧн вӧрлань.

Висьтав, мый нӧшта тэ тӧдан варыш йылысь.

Тӧдан-ӧ тэ?

Луза да Изьва районъясын эм Варыш нима грездъяс.

вувзьысяс — бросится
енвевт — небо
гурйыв — настежь
кватитӧма — схватил
кып — гимн
пестӧмаӧсь — разожгли
прӧмыс — добыча
сатшкӧ — вонзает
татшӧмтор — такое
ыпъялысь — пылающий, ярко горящий

УРОК ВЫЛЫН ТШӦКЫДА ПАНЫДАСЬЛЫСЬ КЫВЪЯС ДА ВЫРАЖЕНИЕЯС

бӧрйы лӧсялана кыв — выбери подходящее слово
велӧдчы юасьны комиӧн — учись задавать вопросы на коми языке
висьтав — скажи
вочавидз юалӧм вылӧ — ответь на вопрос
вӧдитчы словарӧн — пользуйся словарём
вуджӧд роч кыв вылӧ — переведи на русский язык
дась — готов
комиӧд — переведи на коми язык
корсь пӧвсӧ — найди пару
кут тӧд вылад — запомни
кыв — слово
кывзы бура — слушай внимательно
кывъяс отсӧгӧн лӧсьӧд — с помощью слов составь
кывтэчас — словосочетание
сёрникузя — предложение
кыдзи лоӧ — как будет
лыддьы — прочитай
висьт — рассказ
кывбур — стихотворение
кывпесан — скороговорка
нӧдкыв — загадка
нюмсер — шутка
шусьӧг — пословица
мойд — сказка
сьыланкыв — песня
мӧвпышт — подумай
помав — закончи
серпасав — нарисуй
сёрникузя помын — в конце предложения
содты колана кывъяс — дополни словами
содты колана шыпасъяс — вставь пропущенные буквы
тӧдмав — узнай, отгадай
эн вунӧд — не забудь, запомни
эн сорлав — не делай ошибок
юав — спроси
юалӧм — вопрос

КОМИА-РОЧА КЫВЧУКӦР

А

абу, абуӧсь — не, нет
авъя — скромный, вежливый
аддзыны — видеть, увидеть
аддзысьлытӧдз — до свидания
акань — кукла
ань — женщина
анькытш — горох
арся — осенний
ар — осень
арнас — осенью
арӧс — лет
артмыны — получиться
аски — завтра
аскомысь — послезавтра
аслас — свой, его
аслыспӧлӧс — своеобразный
асыв — утро
асывнас — утром
аттьӧ — спасибо
ачым — сам, сама

Б

бадь — ива
байдӧг — куропатка
баля — ягнёнок, овца, овечка
бать — папа
бедь — палка
берд- (бердын, бердӧ) — возле, около
би — огонь
биару — газ
бипур — костёр
бобӧнянь — клевер
бобув — бабочка
бок- (бокын, бокӧ) — у
борд — крыло
босьтны — взять
бӧж — хвост
бӧр- (бӧрын, бӧрӧ) — после
бӧр — обратно
бӧрдны — плакать
бӧрдысь — плаксивый
бузгыны — бурлить
букыш — хмурый
бур — добрый, хороший
бурдӧдны — лечить
бус — пыль
быдмӧг — растение
быдмыны — расти, вырасти
быдтор — всё
быдтыны — растить, вырастить
быттьӧ — как будто

В

ва — вода
важ — древний, старый
важӧн — раньше, давно
вайны — принести
варгыль — косолапый
варыш — сокол, ястреб, коршун
вевт — крыша, крышка
вежавидзана — вежливые
вежалун — воскресенье
вежон — неделя
вежӧра — умный
вежӧс (жыр) — комната
вежсьыны — измениться, переодеться
век — всегда
векньыд — узкий
велавны — научиться
велӧдчыны — учиться
велӧдчысь — ученик, ученица
велӧдысь — учитель, учительница
вердны — кормить
весавны — чистить, убирать
весиг — даже
весь, весьшӧрӧ — зря, напрасно
веськыд — прямой
ветлыны — ходить, сходить, ездить
вешйыны — отойти
видз — сенокосный луг
видза олан — здравствуй
видза оланныд — здравствуйте
видзны — хранить, беречь, охранять
видзӧдны — смотреть
видлыны — попробовать
видны — ругать
вижъюр — мать-и-мачеха, одуванчик
визув — быстрый
визь — линия
визя — полосатый
вильыш — озорной
вильышпоз — шалунишка, озорник
винёв — стойкий, крепкий
висьны — болеть
висьтавны — сказать
вич — отчество
во — год
водзӧ — дальше
водзын — перед, впереди
водны — ложиться
вой — ночь
войнас — ночью
войвыв — север
войдӧрлун — позавчера
войтва — капель
войтыр — народ
вок — брат
вольпась — постель
вом — рот
вом дор, льӧб — губы
ворсны — играть
восьтыны — открыть
вотны (вотчыны), чукӧртны — собирать
вотӧс — ягода
вӧв — лошадь, конь
вӧр — лес
вӧралысь — охотник
вӧркань — рысь
вӧрса — лесной, дикий
вӧсни — тонкий
вӧчны — делать
вӧччыны — наряжаться
вугыр шатин — удочка
вуджны — перейти, перебраться
вуж — корень
вузасьысь — продавец
вундыны — резать
вунӧдны — забыть
вурд — выдра
вурны — шить, пришивать
вурун — шерсть, шерстяной
вутш — кочка
выв (вылын, вылӧ) — на
вывті — очень
вый — масло
выль — новый
выльлун — понедельник
вын — сила

Г

гажа — веселый, радостный
гач — брюки
гашкӧ, буракӧ — может быть, наверно
гид — хлев
гижны — писать
гораа — громко
гожӧм — лето
гожӧмнас — летом
гожся — летний
горзыны — кричать
горс — дупло
горт, керка — дом
гортса — домашний
горш — жадный
гӧбӧч — подвал
гӧгӧр — около
гӧгӧрвоны — понимать
гӧгрӧс — круглый
гӧгыль — кружок
гӧлик, рос — метла
гӧль — бедный
гӧн — шерсть, пух, перо
гӧрд — красный
гӧрд гоб — подосиновик
град выв пуктас — овощи
грезд — деревня
гудӧк — гармошка
гулю — голубь
гусьӧн — тихо, по секрету
гут — муха
гут кулан тшак — мухомор
гыж — ноготь, ногти
гын сапӧг — валенки
гырысь — крупный
гыч — карась

Д

дадь — санки
дар — поварёшка
дасьтыны — заготовить, приготовить
дерт — конечно
детинка, зонка — мальчик
джадж — полка
дженьыд — короткий
джодж — пол
джуджыд — глубокий, высокий, крутой
джыдж — стриж
джын — половина
дзебсясьны — прятаться
дзескыд — тесный, тесно
дзирдавны, югъявны — сверкать, сиять, блестеть
дзодзӧг — гусь
дзольгыны — журчать
дзоньвидза — здоровый
дзоньтавны — чинить, восстанавливать
дзор — седой
дзоридз — цветок
додь — сани
дозмӧр — глухарка
дойдны — поранить
долыда, кыпыда — радостно, весело
дона — дорогой, ценный
дор (дорын, дорӧ) — к
дорйыны — защищать, оборонять
дӧзмыны — рассердиться
дӧра — холст
дӧрапас — флаг
дӧрӧм — рубашка
дуб — пресный, без соли
дурны, вильшасьны — озорничать
дыр — долго
дыш — лентяй, ленивый

Е

еджыд — белый
еджыд гоб — белый гриб
ен — бог
енгаг — божья коровка
енэж, енвевт — небо
енэжтас — горизонт

Ё

ёкмыль — комочек
ёкыш — окунь
ёль — лесной ручей
ён — крепкий, сильный
ёрт — друг, товарищ
ёсь — острый

Ж

жонь — снегирь
жугавны — разбиться, сломаться
жугыль — грустный

З

заводитны — начать
зарни — золото, золотой
зарава — берёзовый сок
збыльысь — серьёзно
збой — бойкий
зеп — карман
зіля — старательно, быстро
зонпосни — мальчики
зыр — лопата
зэв — очень
зэр — дождь
зэра — дождливый
зэрӧ — идёт дождь

И

из — камень, камешек
из шом — каменный уголь
изэрд — площадь
исерга — серьги
исковтны — скатиться
иславны — кататься
истӧг — спички
ичинь — тётка, мачеха
ичӧт, посни, дзоля — маленький, младший

Й

йи — лёд
йинёнь — сосулька
йирны — грызть
йитны — соединить
йӧв — молоко
йӧг — шишка
йӧз — люди, народ
йӧй — дурак
йӧктыны — плясать
йӧла турун — одуванчик
йӧр, град йӧр — огород
йӧра — лось
йыв (йылысь) — о, об, про

К

кабала — бумага
кага — ребёнок
кажитчыны — нравиться, понравиться
канпас — герб
кань, кысук — кошка
кар — город
катша — сорока
катшасин — ромашка
катшашыдӧс — крупа (снег)
кекенач — ладушки
кельыд — бледный
кепысь — рукавицы
кер — бревно
керны — делать
керӧс — возвышенность, гора
ки, кырым — рука
кисьтны — лить, вылить, налить, пролить, перелить
клянича — стекло, осколок стекла
кодзув — звезда
кодзувкот — муравей
кодйыны — копать, рыть
коді, кодъяс — кто
кодла — за кем
кодлӧн — у кого; чей
кодлы — кому
кодӧ — в кого
кодӧн — кем
кодӧс — кого
кодын — в ком
кодысь — из кого
коз — ель, ёлка
козин — подарок
козьнавны — подарить
коймӧд — третий
кок — нога
кокни — лёгкий; легко
коль — шишка
кольквиж, виж — жёлтый
комиӧн — на коми
коньӧр — бедный, бедняга
копыртчыны — поклониться
кор — лист дерева; когда
корӧсь — берёзовый веник
корны, кевмысьны — просить
коръя — лиственные
кос — сухой, сухо
котӧрӧн — бегом
котӧртны, котравны — бежать, бегать
кӧвдум — колобок
кӧдздӧдны — похолодать
кӧдзыд — холодный, морозный; холодно
кӧин — волк
кӧк — кукушка
кӧм — обувь
кӧмавны — обуть
кӧмасьны — обуться
кӧн, кӧні — где
кӧр — олень; запах
кӧрт — железо; железный
кӧрт туй — железная дорога
кӧсйыны — хотеть
кӧтасьны — промокнуть
кӧч, кӧчиль — заяц
кужны — уметь
кузь — длинный
кузьмӧс — продолговатый
куйлыны — лежать
кукань — телёнок
куньса — закрытые
курччыны — укусить
кутны — поймать
кутшӧм — какой, какая, какое, какие, каков
курыд — горький
кушман — редька
кывзысьны — слушаться
кыв — язык
кывны — слушать, услышать
кыдз, кыдзи — как, каким образом
кыдз лу — берёза
кыз — толстый
кыйны — поймать, ловить
кымӧр — облако, туча
кымӧра — облачно
кымӧс, плеш — лоб
кымын — сколько
кын — ледяной, мёрзлый
кынмыны — мёрзнуть, замерзать
кынӧм, рушку — живот
кыны — вязать, ткать
кып — гимн
кыр — высокий берег, гора
кырныш — ворон
кыті — куда
кытысь, кысь — откуда
кытчӧ — куда
кытшавны — окружить

Л

лабич — скамья
лавка, вузасянін — магазин
ланьтны — замолчать
лежнӧг — шиповник
лёк — плохой; плохо
локны — прийти
лоны — быть
лӧгасьны — поссориться
лӧз — синий
лӧсьыд — хороший
лун — день
луннас — днём
лунвыв — юг
льӧм пу — черёмуха
лы — кость
лыддьыны, лыддьысьны — читать
лым — снег
лым мач — комок снега
лым морт — снеговик
лым сылӧ — тает снег
лымъялӧ — идёт снег
лым чир — снежинка
лысва — роса
лыска — хвойный
лышкыд — щедрый; пушистый, шикарный
лэбач — птица
лэбны — лететь
лэбавны — летать
лэдзны — опустить, отпустить
лэптыны — ставить, строить, поднять
лэчыд — острый
лючки — хорошо, внимательно

М

мавтны — красить
ма — мёд
мазі — пчела
майӧг — кол
майтӧг — мыло
мам, мамӧ — мама
матын — близко
матыстчыны — подойти
ме — я
мед, медым — пусть, чтобы
медводдза, воддза — первый
меж, мегӧ — баран
мелі — ласковый
менам — у меня; мой, моя, моё, мои
менсьым — у меня; мой
менӧ — меня
меным — мне
ми — мы
мир туй — большая дорога
мича — красивый
миян — у нас, наш
миянӧс — нас
миянлы — нам
миянлысь — у нас
моз — как
мой — бобр
мойдны — рассказывать сказку
морӧс — грудка, грудь
морт — человек
мӧвпавны — думать
мӧд — второй, другой
мӧдӧдны — отправить
мӧдӧдчыны — отправиться
мӧс — корова
му — земля, поле
мудер — хитрый, мудрый
мукӧд — другой, некоторый
мунны, восьлавны — идти
муртса, тшук — едва
муса — милый
мусир — нефть
мый — что
мый вӧчны — что делать
мыйла — почему
мыйлӧн — у чего
мыйлы — чему
мыйӧ — во что
мыйӧн — чем
мыйын — в чём
мыйысь — из чего
мыльк — холм, бугорок
мыр — пень
мырпом — морошка
мыссьыны — умываться
мыськыны — мыть
мыш — спина

Н

найӧ — они
найӧс — их
налӧн — у них
налы — им
налысь — у них
намыр — костяника
небыд — мягкий
недыр — недолго
некод — никто
нидзув — червь дождевой
нималана — известный
ним-вич — имя-отчество
нимкодь — радостно
нимлун — именины
нитш — мох
нин — уже
ном — комар
ноп — мешок
нора — жалобно
нӧк — сметана
нӧшта — ещё
нуны — нести
ныв — дочь, девушка
нывка — девочка
ныр — нос
ньӧбны — купить, покупать
ньӧв — стрела
нэр, ляб — слабый
нюмъявны — улыбаться
нюр — болото
няйт — грязь; грязный
нянь — хлеб

О

овны — жить
ог, он, оз, огӧ, онӧ — не
оз — земляника
озыр — богатый
окыштны — поцеловать
омӧля — плохо
орд (ордын, ордӧ) — у, к
ордым — тропа
орччӧн — рядом
отсавны — помогать
отсӧг — помощь
ош — медведь
ошйысьны — хвастаться
ошйысьысь — хвастливый

Ӧ

ӧд — ведь
ӧдйӧ — быстро
ӧдзӧс — дверь
ӧзйыны — сверкать, гореть
ӧмидз — малина
ӧні — сейчас
ӧтка — единственный, одинокий
ӧткодь — одинаковый
ӧтчыд — один раз, однажды
ӧшинь — окно
ӧшйыны — повиснуть
ӧшкамӧшка — радуга
ӧшӧдны — повесить

П

пань — ложка
парма — лес
пас — знак
пась — шуба
паськӧм — одежда
паськыд — широкий
пасьтавны — одеть
пасьтасьны — одеться
пасьтӧм — голый
пач — печка
паччӧр — верх русской печи, лежанка
пашкыр — пушистый
пель — уши
пельмень, пельнянь — пельмени
пельк — опрятный
пельпом — плечи
пелысь пу — рябина
пемӧс — животное, зверь
пемыд — тёмный; темно
пес чипас — поленница
пестер — пестерь
петкӧдлыны — показывать
петшӧр — крапива
печкан — прялка
пи — сын
пидзӧс — колено
пинь — зуб
пипу — осина
повны — бояться
полысь — трусливый
подӧн — пешком
пожӧм — сосна
поз — гнездо
пом — конец, завершение
пон — собака
понпи, кутю, кычи — щенок
понтшак — гриб, поганка
порсь, польӧ — свинья
потан — люлька
потшӧс — изгородь
пӧжавны — печь, испечь
пӧлӧзнича — василёк
пӧлӧн — вдоль
пӧль, ыджыд бать, ыджыд ай — дед
пӧрт — котелок
пӧрысь — старый
пӧрччыны, пӧрччысьны — снять одежду
пӧсь, пым — горячий
пӧтка — дичь
пӧч, ыджыд мам — бабушка
пу — дерево; деревянный
пув — брусника
пужъявны — покрыться инеем
пукавны — сидеть
пуксьыны — садиться, сесть
пуктыны — положить, ставить
пуны — варить
пурт — нож
пывсян — баня
пыж — лодка
пызан — стол
пызь — мука
пыр — всегда
пырны — зайти, войти
пыста — синица
пытш (пытшкын, пытшкӧ) — в, внутри
пышкай — воробей

Р

радейтана — любимый
радейтны — любить
радлыны — радоваться
разьны — развязать
рака — ворона
рам — смирный, кроткий
рас — роща
регыд — скоро
репас — гнездо, лёжка лесной птицы в снегу
рок — каша
роч — русский
рочӧн — по-русски
рӧм — цвет, окраска
рӧмпӧштан — зеркало
ру — туман
руа — туманно
руд — серый
руч, ручиль — лиса
рысь — творог
рыт — вечер
рытнас — вечером

С

садьмыны — проснуться
садьмӧдны — разбудить
сай (сайын, сайӧ) — за
саридз — море
серавны — смеяться
серам — смех
серпас — картина
серпасавны — рисовать
серти — по
сетны — дать
сёйны — есть, кушать
сёркни — репа
сёрнитны — говорить
сёшайт — дорогой мой
сизь — дятел
сикӧтш — бусы
сикт — село
син — глаз
сины — желать
сир — щука; смола
сійӧ — он, она, оно
сійӧс — её, его
скӧр — сердитый, злой
со — вот
сола — солёный
сӧмын — только
сӧстӧм — чистый
сӧчӧн — тонко раскатанная скалкой лепёшка, сочень
став — все, вся
ставнас — весь
став бурсӧ — всего хорошего
стӧч — точно
сулавны — стоять
сы кодь жӧ — как и он
сывны — таять, растаять
сы пыдди — вместо него, вместо неё
сылӧн — у него, у неё
сылы — ему, ей
сылысь — у него, у неё
сын — язь
сынавны — расчёсывать
сынан — расчёска
сынӧд — воздух
сырчик — трясогузка
сытӧг — без него, без неё
сыысь — его, её (из него)
сьӧд — чёрный
сьӧдбӧж — горностай
сьӧд рака — грач
сьӧкыд — тяжёлый
сьӧла — рябчик
сьӧлаоз — княженика, поленика (растение)
сьӧм — деньги
сьывны — петь
сэзь — ясный
сэк, сэки — тогда
сэні — там
сэсся — потом
сэтӧр — смородина
сэтчӧ — туда
сэтшӧм — такой
сэтысь, сэсь — оттуда
сюзь — сова
сюмӧд — береста
сюр — рога
сюсь — умный, хитрый

Т

таво — в этом году
тадз, тадзи — так
тай — же
тайӧ — это, эта, этот
талун — сегодня
тані — здесь, тут
тар — тетерев
тасьті — тарелка, миска
тасьті-пань, дозмук — посуда
татчӧ — сюда
татысь, тась — отсюда
татшӧм — такой
тешкодь — смешной, забавный, потешный
тёпкӧ-виялӧ — капает
ті — вы
тіян — ваш, ваша, ваши
тіянӧс — вас
тіянлы — вам
тіянлысь — у вас
тола — сугроб
том — молодой
топыда — крепко
тупкысьны — закрыться
тошка — бородатый
тӧв — зима, ветер
тӧвнас — зимой
тӧвйысь — зимующий
тӧвся — зимний
тӧдны — знать
тӧдмавны — узнать
тӧдмасьны — познакомиться
тӧла — ветреный, ветрено
тӧлысь — месяц, луна
тӧрыт — вчера
тувсов — весенний
туис — берестяная посуда цилиндрической формы с деревянным дном и крышкой
туй — дорога
тулан — куница
тулыс — весна
тулыснас — весной
тупӧсь — каравай, буханка хлеба
тупыль — клубок
тури — журавль
турипув — клюква
турӧб — вьюга
турун — трава
турунвиж, веж — зелёный
тусь — зёрнышко, ягода
тшак — гриб
тшем — много
тшӧктыны — попросить, приказать
тшӧкыд — густой
тшӧкыда — часто
тшӧтш — вместе
тшупӧд — ступенька
тшыг — голодный
тшын — дым
ты — озеро
тыр — полный, целый
тэ — ты
тэнад — у тебя; твой, твоя, твоё, твои
тэнӧ — тебя
тэнсьыд — у тебя; твой
тэныд — тебе
тэрмасьны — спешить
тэрыб — проворный, шустрый; быстрый

У

ув — ветка
ув (улын, улӧ) — под
увтны — лаять
удж — работа
уджавны — работать
уджач — трудолюбивый
узьны — спать
улӧс, джек — стул
уль — сырой
ур — белка
уртшак — сыроежка
ун — сон
уна — много
уськӧдны — уронить
усьны — падать

Ч

чавкан — галка
чань, чибӧ — жеребёнок
чардби — молния
чача, ворсантор — игрушка
челядь — дети
чер — топор
черань — паук
чери — рыба
черинянь — рыбник
чеччавны — прыгать
чеччыны — встать, вставать
чибльӧг — черпачок
чизыр — резкий
чикыш — ласточка
чинны — уменьшиться
чипан, курӧг, курица — курица
чипан кольк — куриное яйцо
чирк — кузнечик
чож — резвый; дядя по матери
чой — сестра; горка
чолӧм — привет
чолӧмавны — поздравить, приветствовать
чом — конура, шалаш
чорыд — жёсткий, твёрдый, чёрствый
чӧв — безмолвный, тихий
чӧд — черника
чӧдлач — голубика
чӧв-лӧнь — тишина
чӧж — в течение
чӧскыд — вкусный
чӧсмӧдлыны — угостить
чужан — родной
чужан лун — день рождения
чужӧм, чужӧмбан — лицо
чуймыны — удивляться
чукля — кривой, с горбинкой
чукӧрӧн — стаей, группой
чукӧстны — позвать, окликнуть
чуман — наберушка
чунь — палец
чышкыны — подметать, вытирать
чышъян — платок

Ш

шабді — лён
шань — добрый
шаньга — шаньги
шебрас — одеяло, покрывало
шога — тоскливо
шогсьыны — печалиться
шойччыны — отдыхать
шома — кислый
шонді — солнце
шондіа — солнечно
шоныд — тёплый; тепло
шор — ручей
шочиник — редкий
шӧвктуг — красавица
шӧр — середина
шуда — счастливый
шудлун — счастье
шуны — сказать
шусьыны — называться
шутьлявны — свистеть, выть
шы — звук
шыбитны, чӧвтны — бросить
шыблавны — бросать
шыд — суп
шыдӧс — крупа
шыльыд — гладкий
шыпас — буква
шыр — мышь
шыранькытш — мышиный горошек
шыран, ножич — ножницы

Ы

ывла — двор, улица
ыджыд — большой, старший
ыж — овца
ылын — далеко
ыргӧн — медь, медный
ыркыд — прохладный, свежий; прохладно, свежо
ырӧш — квас

Э

эг, эн, эгӧ, энӧ — не
эжа — дёрн
эзысь — серебро, серебряный
эм, эмӧсь — есть, имеется
эрд — открытое безлесное место, полянка
эскыны — доверять
эськӧ — бы
этша — мало
эшкын — одеяло

Ю

ю — река
юктӧдны — напоить
юавны — спросить
югӧр — луч
югыд — светлый, светло
юква — уха
юмов — сладкий
юны — пить
юр — голова
юркар — столица
юркытш — венок
юрси — волосы
юрсикт — райцентр
юсь — лебедь

Я

яг — бор
яй — мясо
ябыр — скворец
ясыд — ясный

ЮРИНДАЛЫСЬ

ВЫЛЬ ВОӦН, ЧЕЛЯДЬ!
1. Выль во дырйи. 4
«Вӧрын козйыс чужлӧма». (Сьыланкыв.)
2. Кывсикасъяс. 8
Лышкыд пӧль. Е. Козлова. 9
3–5. Эмакыв. 12
Пышкай. С. Раевский. 15
Менам лэбачьяс. С. Попов. 16

ИЛЛЯ ВАСЬЛӦН СЕРАМБАНА ВИСЬТЪЯС.
6–7. Яков дядь, чужъя. Илля Вась. 20
Меддона кыв. В. Лодыгин. 25
8–9. Корошо живёшь. Илля Вась. 27
Коми морткӧд сёрни. В. Уляшёв. 28
Баквал. Н. Куратова. 29
Февраль. С. Куликов. 29
10–11. Кык сакар тор. Илля Вась серти. 31
Петам исковтам. А. Некрасов. 33
Кык дружок. Ю. Васютов. 34
12. Нимвежтас. 36
Вайӧ тӧдмасям. Н. Куратова серти. 36
Вежавидзӧм кузя урок. С. Раевский. 38
Медмуса коми кывъяс. С. Попов. 39
13. Уконок. Н. Куратова. 41
Тэ да ме, да сійӧ... Н. Перминова. 42
Ӧти «пять». Э. Тимушев. 43
14–15. Кывбӧр. 45
«Гӧрд коръя» кыдз пу. С. Раевский серти. 46
16–17. Тӧвся войын. (Изложение.) 51
18. Кывберд. 53
Куим рӧма дӧрапас. В. Тимин. 53
19. Вӧрса доктор. С. Раевский серти. 55

БАРА МУНЫМӦС МИЧМӦДӦ ТУЛЫС.
20. Март. С. Куликов. 57
21–22. Ань лунӧ. 59
«Еджыд юсьӧн...» З. Прошева. 60
Мамлӧн лун. В. Лодыгин. 61
Мам да челядь. М. Лебедев. 63
23–24. Коми му нимӧдысь. 65
«Видза олан, гажа тулыс!» А. Мишарина. 65
Еджыд да сьӧд. В. Бабин. 66
Тувсов шонді. А. Мишарина. 67
25. Ябыр поз. А. Мишарин. 69
26–28. Ичӧтик мойд-небылича. Ю. Попова. 75
29–30. Берба дзоридз. С. Раевский серти. 77
«Коми муӧй...» А. Мишарина. 78
31. Кадакыв. 81
Иван Куратов — медводдза коми поэт. 81
Коми кыв. И. Куратов. 81
32. Войвылӧ. Ф. Плещеев серти. 84

СӦЛӦ БАБ МОЙДӦ.
33. Петук висьӧ. Сӧлӧ баб. 87
34. Немас удж. Сӧлӧ баб. 92
35–36. Тулыс воӧм. Тима Вень. 95
Паччӧр вылын пӧчӧ. Сӧлӧ баб. 98
37–38. Шыр да тшегыр. (Мойд.) 101
39–40. Ведра тыр яблӧг. Илля Вась. 107
Йинёнь. В. Лодыгин. 109
41. Коді кыдзи горзӧ. Илля Вась. 112
Тувсов шыяс. Тима Вень. 113
42. Руд изйысь ловзьӧдӧм салдат. В. Напалко. 115
43–45. Кыдз пу. Сӧлӧ баб. 118
Кыдз пу. Комиӧдіс Илля Вась. 122
Кыдз пу. Л. Анисенкова.123
46. Вордкыв. Сӧлӧ баб. 125
Мед дзирдалас шонді. М. Лебедев. 126

«ГОЖӦМ ЙӦЛӦН-ВЫЙӦН ИСКОВТӦ»
47. Гожся лунъяс. 128
Сьӧд да еджыд. С. Попов. 131
48. Гожся шыяс. Тима Вень. 135
Кӧні коді олӧ? С. Попов. 136
Разсьӧ да разсьӧ менам юркытш. (Сьыланкыв.). 139
49–50. Ёртъяс. А. Тарабукин. 140
Сикӧтш. В. Лодыгин. 144
51. Сизь поз. А. Одинцов серти. 148
52–56. Коми канпас да кып. 152
Варыш поз. Нёбдінса Виттор. 153
Соколиное гнездо. Вуджӧдіс И. Рыжиков. 154
Вӧвлӧмторъяс. 155

КОМИА-РОЧА КЫВЧУКӦР 158

Коми кыв рочьяслы (3-ӧд класс, 2 юкӧн, 2000)

Содержание

ВЫЛЬ ВОӦН, ЧЕЛЯДЬ!

1

2. Кывсикасъяс. Части речи.

3–5. Эмакыв.

ИЛЛЯ ВАСЬЛӦН СЕРАМБАНА ВИСЬТЪЯС.

6–7

8–9

10–11

12. Нимвежтас.

13

14–15. Кывбӧр.

16–17

18. Кывберд.

19

БАРА МУНЫМӦС МИЧМӦДӦ ТУЛЫС.

20

21–22

23–24

25

26–28

29–30

31. Кадакыв.

32

СӦЛӦ БАБ МОЙДӦ.

33.

34

35–36

37–38

39–40

41

42

43–45

46

«ГОЖӦМ ЙӦЛӦН-ВЫЙӦН ИСКОВТӦ».

47

48

49–50

51

КОМИ КАНПАС ДА КЫП.

52–56

УРОК ВЫЛЫН ТШӦКЫДА ПАНЫДАСЬЛЫСЬ КЫВЪЯС ДА ВЫРАЖЕНИЕЯС

КОМИА-РОЧА КЫВЧУКӦР

ЮРИНДАЛЫСЬ

Навигация

Корсьысьӧм