Коми кыв рочьяслы (4-ӧд класс, 2013)

Е. Н. ВЯЗОВА, А. В. СИЗОВА

4 класса челядьлы комиӧн сёрнитны
велӧдчан небӧг

Вынсьӧдіс
Коми Республикаса йӧзӧс велӧдан
министерство

Мӧд петас

Сыктывкар
2013

ББК 81.2 Коми
В 99

Велӧдчан небӧгсӧ дасьтӧма Коми Республикаса велӧдчӧм сӧвмӧдан институтын
Велӧдчан небӧгсӧ серпасаліс М.Ф. Беллон

© Вязова Е.Н., Сизова А.В., 2012
© ООО «Анбур», 2012
© Вязова Е.Н., Сизова А.В., 2013
© ООО «Анбур», 2013

ОТСАСЯН ПАСЪЯС:

— кывкуд — словарь
— сёрни — диалог
— вӧч содтӧд удж — дополнительное упражнение
— тӧдмав — отгадай
— велӧд — выучи
— босьт тӧд вылад — запомни
— видлы вӧчны — трудное задание
— творческӧй удж-проект
— паныд вежӧртаса кыв — антоним
— ӧткодя юргысь кыв — омоним
— матын вежӧртаса кыв — синоним
— ворсам — поиграем
— слова, отвечающие на вопросы кто? Что? (коді? мый?)
— слова, отвечающие на вопрос что делать? (мый вӧчны?)
— слова, отвечающие на вопросы какой? Какая? какое? какие? (кутшӧм?)
— слова, отвечающие на вопросы где? Куда? (кӧні? кытчӧ? кытысь?)
— слова, отвечающие на вопрос когда? (кор?)
— утвердительные слова, да (да) — отрицательные слова, нет (абу, ог, оз)

ТӦДМАСЯМ ДА ЁРТАСЯМ.

визув — быстрый
вич — отчество
войвылын — на севере
гажӧй бырис — соскучился
лунвылын — на юге
мусерпас — карта
ов — фамилия
олысь — житель
ӧта-мӧдсӧ — друг-друга
саридз — море
тӧдмавны — узнать

— Чолӧм!
— Бур лун!
— Вай тӧдмасям. Менам нимӧй Ӧльӧксан.
— А ме — Настук.
— Кутшӧм классын велӧдчан?
— Ме велӧдча нёльӧд классын. А тэ?
— А ме витӧд классын.
— Кӧні тэ олан?
— Ме ола Сосногорск карын.
— А ме ола Кӧрткерӧс сиктын.
— ...

1ʼ удж. Лыддьы «Вайӧ тӧдмасям» висьтысь юкӧн. Тӧдмав ӧткодь овъяс.

ВАЙӦ ТӦДМАСЯМ.

Ме — Юра Пыстин. А мекӧд орччӧн Женя Синицын. Шуӧны, миян пӧ ӧткодь овным. Ёртӧй Синицын, а ме Пыстин. Рочӧн Пыстиныс лоӧ Синицын, а Синицыныс комиӧн — Пыстин.
Женя — менам медбур ёрт.

Н. Куратова серти

2ʼ удж. Тӧдмав, кыдзи артмӧмаӧсь овъясыс.

Панюков, Кочев, Попов, Кузнецов, Изъюров, Рочев.

— Менам нимӧй ... . А кыдзи тэнӧ шуӧны?
— Менӧ шуӧны ...ӧн, а овӧй — ... .
— А менам овӧй ... .
— Мый тэ вӧчин гожӧмнас?
— Ме купайтчи, ветлі сиктӧ (карӧ), вотчи. А тэ?
— Ме шойччи саридздорса лагерын.

3ʼ удж. Лыддьы да висьтав, мый йылысь сёрнитӧны челядь.

— Видза олан, зонка! Кытысь тэ воин саридз дорӧ?
— Видза олан! Ме вои Коми муысь.
— Тэ коми?
— Да. Ме Изьва районса Краснобор сиктысь. А тэ кытысь воин саридз дорас?
— Ме бать-мамкӧд локті Кулӧмдін районса Воч сиктысь.

Имя существительное — эмакыв.
Имена существительные — это слова, которые отвечают на вопросы кто? что?
Имена существительные бывают собственные и нарицательные.
Эмакывъяс — тайӧ кывъяс, кодъяс вочавидзӧны коді? да мый? юалӧмъяс вылӧ: бать-мам, ов, сикт.
Эмакыв овлӧ аснима да абу аснима.


4ʼ удж. Лыддьы. Мый йылысь тэ тӧдмалін тайӧ текстсьыс?

Миян Краснобор сикт Изьва районын. Тайӧ районыс Сыктывкарсянь войвылын. Тані олӧны уджач йӧз. Найӧ видзӧны кӧръясӧс. Изьва районса олысьясӧс позьӧ тӧдмавны овъяс сертиыс. Со найӧ: Рочев, Сметанин, Артеев, Филиппов, Истомин, Терентьев, Чупров, Бабиков, Хозяинов, Вокуев, Дуркин, Канев, Ануфриев, Хатанзейский.

Гиж овъяссӧ анбур серти. Тайӧ аснима эмакывъяс?

5ʼ удж. Вочавидз юалӧмъяс вылӧ 4-ӧд удж серти.

1. Кутшӧм районын Краснобор сиктыс?
2. Войвылын али лунвылын тайӧ районыс?
3. Кодъяс олӧны Изьва районын?
4. Мый серти позьӧ тӧдмавны Изьва районса олысьясӧс?

1. Тӧдмав, кыдзи шусьӧ рочӧн Изьва район.
2. Аддзы Изьва район, районлысь юрсикт да Краснобор сикт мусерпас вылысь.

6ʼ удж. Лыддьы ёрта сёрнисӧ.

НЫВКА. Кыдзи тэнад ним-овыд да вичыд?
ЗОНКА. Менам овӧй Артеев, нимӧй Ӧльӧксан, вичӧй Петрович.
НЫВКА. Ӧльӧксан? А кыдзи нӧ мӧд ногыс?
ЗОНКА. Роч ногӧн кӧ, Саша, а быдма да лоа Александр.
НЫВКА. Ме Настя, Анастасия.
ЗОНКА. Настятӧ нӧшта шуӧны Настаӧн, а ичӧт нывкаӧс Настукӧн. А тэнад овыд?
НЫВКА. Миян Кулӧмдін районын уна ӧткодь ов. Тайӧ Морохин, Касев, Кочанов, Лютоев, Гичев, Тарабукин, Гилев, Тимушев, Ракин, Кузнецов, Напалков, Логинов, Лодыгин, Игнатов, Шахов, Мартюшев, Уляшев.
А ме Морохина Анастасия Васильевна. Ола Кулӧмдін районса Керчомъя сиктын. А тэ олан карын али сиктын?
ЗОНКА. Ме ола Печора карын.

1. Сёрнит ёртыдкӧд.
2. Гиж овъяссӧ анбур серти.
3. Инды мусерпас вылысь Кулӧмдін районлысь юрсиктсӧ.

«Тӧдмав нимсӧ» ворсӧм. Ӧти морт висьталӧ нимсӧ комиӧн, а мӧд — рочӧн.

— Ӧльӧш.
— Ме чайта, Алексей.
— Сідз и эм. Ичӧтдырйиыс Алёша, а быдмас да лоас Алексей.
— Ӧньӧ, Ӧндрей.
— Андрей.
— Митрук, Митрей.
— Тайӧ гӧгӧрвоны абу сьӧкыд. Митя, а сэсся Дмитрий.

А кыдзи лоӧ комиӧн тэнад нимыд?

Тӧдмав кывъяслысь вежӧртассӧ «Словарь омонимов коми языка» кывкуд отсӧгӧн.

ов ?
?
ар ?
?
пу ?
?

7ʼ удж. Босьт интервью аслад ёртъяслысь. Сет татшӧм юалӧмъяс.

1. Кыдзи тэнад овыд, нимыд, вичыд?
2. Кӧні тэ олан?
3. Кутшӧм классын велӧдчан?
4. Эм-ӧ тэнад радейтана предмет?
5. Висьтав овсӧ, нимсӧ да вичсӧ ёртыдлысь.
6. Мыйысь ті радейтанныд ворсны?

В коми языке есть уменьшительно-ласкательный суффикс -ук (-юк):
мамук (мамочка), дитюк (дитятко), кысук (кисонька), Настук (Настенька).

8ʼ удж. Содты эмакывъяс дорӧ -ук (-юк) суффикс да гиж. Висьтав рочӧн артмӧдӧм кывъяссӧ.

Пи, мам, кань, Маша, Коля, Митя.

1. Кутшӧм суффикс отсӧгӧн артмисны роч кывъясыс?
2. Артмӧд 2 — 3 сёрникузя схема серти.

-ук
-юк
.

Вӧч проекта удж ёртыд йылысь.

План.
1. Бӧрйы удж ним.
а) Менам ёрт.
б) Кыдзи ми тӧдмасим.
в) Ёрткӧд шойччӧм.
2. Висьт гижӧм.
а) Ёртлӧн ним, арлыд.
б) Велӧдчанін.
в) Шойччан кад.
3. Ме ёрткӧд.
(Фотографияяс, серпасъяс.)

ёртасьны — дружить

ЗАРНИ ПАСЬКӦМӦН ПАСЬТАСИС ВӦР.

аддзыны — увидеть
арся — осенний
водз — ранний
вой тӧв — северный ветер
вотны — собирать (ягоды)
вӧзйыны — предлагать, предложить
зарни — золотой
кӧлысь — стая
лун тӧв — южный ветер
лышкыд — щедрый
мӧдӧдчыны — направиться
нюжӧдчыны — протянуться
няйт — грязь
пестер — пестерь, кузов
пос — лестница
пуан — то, что надо сварить
пуны — варить
сер — узор, орнамент
сёр — поздний
солалан — то, что можно засолить
туг — кисть
тшак — гриб

9ʼ удж. Корсь арся тӧлысь нимъяс.

Кӧч бӧж кузя гожӧм коли,
Шонді абу нин пӧсь жар.
Кӧч тӧлысьлӧн мышку вылын
Рӧдтіс-локтіс зарни ар.

Бука плешка йирым тӧлысь
Мича лунъяс вылад скуп.
Шлячкӧ-койӧ кӧдзыд зэрӧн,
Няйтсӧ лойӧ шлёп да шлюп.

Вӧльгым тӧлысь, мича, кос,
Клёнгис-дорис йиа пос.
Оз нин кӧдзыд зэрӧн кой,
Еджыд эшкын да кузь вой.

Г. Попов серти

1. Лыддьы кывбурсӧ.
2. Вӧчӧй небӧг «Ар» тема вылӧ.

10ʼ удж. Лыддьы Серафим Поповлысь кывбурсӧ.

Зарни паськӧмӧн пасьтасис вӧр.
Мича тугъясӧн гӧрддзасис пелысь.
Дзодзӧг мӧдӧдчис лунвывлань бӧр.
Аддзан: енэжсянь нюжӧдчис кӧлысь.

1. Кутшӧм вогӧгӧрся кад йылысь гижӧма?
2. Аддзы кутшӧм? юалӧм вылӧ вочавидзысь кывъяс.
3. Аддзы [с’] шыа кывъяс да бура шуав.

11ʼ удж. Лыддьы кывпесансӧ да велӧд.

Сьылысь сьылӧ гӧра йылын,
Мыла сьылӧм ылӧ кылӧ.

В. Лыткин

— Чолӧм! Кутшӧм мича арыс!
— Бур лун! И меным зэв ёна кажитчӧ зарни арыд.
— Вай ветлам вӧрӧ.
— Ветлам. Вотам тшак да вотӧс.
— А ог кӧ аддзӧй тшаксӧ да вотӧссӧ, чукӧртам мича коръяс.

Имя прилагательное — кывберд.
Имена прилагательные отвечают на вопросы какой? какая? какое? какие?
Кывберд вочавидзӧ кутшӧм? юалӧм вылӧ:
гажа лун, виж кор, юмов сёркни.

Скажи, почему в русском языке у имени прилагательного четыре вопроса, а в коми языке — один.

Зэра кадыд сылы бур,
Пыр и мыччас мусьыс юр.
Олӧ лун да олӧ мӧд,
Быдмӧ вывлань, шог оз тӧд.
Гӧрд шляпаа, вывті тшап,
Ӧти кока, тайӧ — ... .

Аддзы нӧдкывсьыс кывбердъяс.

тшап — важный

12ʼ удж. Артмӧд кывтэчасъяс.

арся ...
гожся ...
шоныд ...
кӧдзыд ...
небыд ...
лӧз ...
ыджыд ...
югыд ...
виж ...

13ʼ удж. Артмӧд кывтэчасъяс пасъяс сертиыс.

+ лун, + паськӧм, + сёян, + рыт, + ывла, + улӧс, + небӧг, + серпас, + вой.

14ʼ удж. Лыддьы да вочавидз юалӧм вылӧ.

Арын поводдяыс ыркыд. Шонді омӧля нин шонтӧ. Виж да гӧрд коръяс гылалӧны му вылӧ. Коръяс пиын дзебсясьӧны уна тшак да вотӧс. Ме радейта вотчыны. А тэ?

15ʼ удж. Лыддьы кывбурсӧ мичаа.

ЯГЫН ПЕТІС ДОНА ГОБ.

Усис лышкыд шоныд зэр,
Мыссьӧм вӧрлӧн вежсис сер.
Зэрӧй, зэрышт, сэсся коб.
Ягын петіс дона гоб.
Вӧрӧ мунны пестер дась,
Ельдӧг-рыжик аддзам тась.
Вӧзъяс миян яла яг
Солалан и пуан тшак.
Зэрӧй, зэрышт, сэсся коб.
Ягын петіс дона гоб.

А. Ванеев

1. Помав сёрникузяяссӧ.

Дона гоб, виж гоб, гӧрд гоб, ва гоб, масленик — тайӧ ... .
Ельдӧг, уртшак, ягсер, рыжик — тайӧ ... .

2. Аддзы небӧгъясысь либӧ артмӧд тшак йылысь нӧдкыв.

Тӧдмав ребусъяс.

Артмӧд ребус «Ар» тема вылӧ.

жалобно — нора

16ʼ удж. Комиӧд висьтсӧ.

ОСЕНЬ.

Осень. На деревьях жёлтые, красные листья. Подует ветер, и начнётся листопад. Под ногами будут шуршать сухие листья.
Гуси, утки, лебеди улетают на юг. Они жалобно кричат:
— До свиданья, друзья, до новых встреч!
Скоро земля укроется белым снегом, а реки покроются льдом.

17ʼ удж. Висьтав, кыдзи лэбӧны чикышъяс, турияс да дзодзӧгъяс.

Ласточки летят ... .
Чикышъяс лэбӧны ... .
Журавли летят ... .
Турияс лэбӧны ... .
Гуси летят ... .
Дзодзӧгъяс лэбӧны ... .

Отсӧг: чукӧрӧн, пельӧсӧн, сьӧрсьӧн-бӧрсьӧн.

Бӧрйы, коді да мый лэбалӧ.

Самолёт, мазі, тӧлысь, лым чир, машина, пыста, кор.

18ʼ удж. Лыддьы мичаа да велӧд.

рас — роща
яг — бор

Лэбӧ катша, лэбӧ рака.
Таво ар пӧ лоӧ тшака.
Тыр пӧ тшакӧн рас и яг.
Коді ветлас вотны тшак?

Г. Юшков

Тайӧ кывпесан али лыддьысянкыв?

19ʼ удж. Лыддьы висьтсӧ.

КӦЧ БӦЖ КУЗЯ ЛУНЪЯС.

Кӧч тӧлыськӧд Коми муӧ воӧ ар. Быттьӧ тыра караб кывтӧ вӧрті, паськыд видз вывті, град йӧрті.
Арся лунӧ батьӧ ветліс вӧрӧ да вайис меным кӧч гӧснеч. Ок, кутшӧм чӧскыд! А ме вӧрӧ ӧтнам мунны пола, кӧть и абу кӧч сьӧлӧма. Быдма да вӧр-ваыс меным лоӧ гортӧн.

Вочавидз юалӧмъяс вылӧ.

1. Кыдзи гӧгӧрвоан «быттьӧ тыра караб» кывтэчас?
2. Кутшӧм тӧлыссянь заводитчӧ ар?
3. Кутшӧм кӧч гӧснеч вайис батьыс вӧрысь?
4. Кӧч сьӧлӧма морт — тайӧ ... .

20ʼ удж. Висьтав, кор тайӧ овлӧ.

овлӧ — бывает

1. Керка дорын туруна видз,
Чужан муӧс пыр тэ видз.

2. Саридз моз паськӧдчис ичӧтик ю,
Гудыртчӧм ватӧ сэтысь эн ю.

3. Пу вылын зарниӧн ворсӧдчӧ кор,
Челядьӧс школаӧ, звӧнокӧй, кор.

4. Кыптіс войвывсяньыс тӧв,
Коми муын кӧдзыд тӧв.

Ӧткодя шусян да гижсян кывъяс — тайӧ ... .

видз ?
?
ю ?
?
тӧв ?
?
кос ?
?
кор ?
?
удж ?
?

21ʼ удж. Содты юалӧмъяс серти кывъяс да гиж.

Ывлаын (кутшӧм?) ... ар. Пуяс вылын (кутшӧм?) ..., ... да ... коръяс. Лэбачьяс (мый вӧчӧны?) ... лунвылӧ.
Тшӧкыда зэрӧ. Йӧз пасьталӧны (мый?) ... да кӧмалӧны (мый?) ...
(Кор?) ... ми дасьтысям тӧв кежлӧ. Вӧрысь вотім (мый?) ... да ... . Пуим вотӧсысь (кутшӧм?) ... варенньӧ да солалім (мый?) ... .

дасьтысям — готовимся

Артмӧд кывъяс.

Чӧк, мырйи, гымльӧв.

ТАЙӦ МЕНАМ КЕРКА, ТАЙӦ МЕНАМ ӦШИНЬ УВ.

гожся керка — летний дом
горс — дупло
вежӧс — комната
джадж — полка
джодж — пол
керка весьтын — над домом
кильчӧ — крыльцо
ӧшинь ув — двор
пач — печь
пельӧс — угол
посводз — сени
тӧвся керка — зимний дом

Тӧдмав ребусъяс.

— Чолӧм, дона ёрт!
— Бур лун!
— Урокъяс бӧрын волы ме ордӧ гӧститны.
— А кӧні тэнад керкаыд?
— Ме ола Куратов нима улича вылын.
— А ыджыд али ичӧт керкаыд?
— Менам керкаӧй ыджыд.
— ... ... .

22ʼ удж. Лыддьы кывбурсӧ.

Тундра кузя керка ветлӧ,
Паровоз моз пушкӧ пыр.
Енэжлань кык труба лэптӧ,
Ӧшинь пырыс аддзан ныр.

Чумсянь ӧвтӧ чӧскыд дукӧн,
Блинъяс пӧжалӧ сэн мам.
Корасны кӧ сёйны, здукӧн
Зонка шуас:
— Тэ тшӧтш ням...

В. Демидов (комиӧдіс Н. Щукин)

1. Кутшӧм керка ветлӧ тундраӧд?
2. Комиӧд: по тундре, как паровоз, через окно, от чума, приятным запахом, позовут.

горс — дупло
поз — гнездо

23ʼ удж. Аддзы пӧвсӧ.

чум
керка
горт
чом
поз
горс
вежӧс
патера

дом
конура
чум
гнездо
дупло
свой дом
квартира
комната

Артмӧд кывтэчасъяс.

Послелог — кывбӧр. Послелог стоит после имени существительного и пишется раздельно.
Кывбӧр сулалӧ эмакыв бӧрын да гижсьӧ торйӧн: керка весьтын — над домом.

24ʼ удж. Корсь пӧвсӧ.

на улын
под сайын
над дорын
за вылын
около весьтын

Артмӧд сёрникузяяс «Керка» тема вылӧ.

25ʼ удж. Серпас серти гиж кывъяс (эмакыв + кывбӧр).

Отсӧг вылӧ кывъяс:
пӧлать улын
пач водзын
гӧбӧч дорын
лабич улын
пызан вылын

«Шыр да кань» ворсӧм.

Ӧти лоӧ «каньӧн», мукӧдыс — «шыръясӧн».
Шыръяс сувталӧны жыр пельӧсъясӧ. Кань ветлӧдлӧ джодж шӧрӧд да сьылӧ:
— Шырӧ, шырӧ, вай мен пельӧс. Шырӧ, шырӧ, вай мен пельӧс.
Шыръяс котралӧны. Коді кольӧ пельӧстӧг, лоӧ каньӧн.

26ʼ удж. Лыддьы мичаа. Кыдзи шусьӧ Ваньӧлӧн оланіныс?

Кӧр видзысь Ваньӧлӧн оланіныс ӧшиньтӧм, но чомйын абу пемыд. Детинкалӧн юр весьтас ыджыд розь. Ӧшиньыс Ваньӧлӧн оланін пӧтӧлӧкас.

Е. Рочев серти

1. Нёль кока, а мунны оз вермы.

2. Уджала ме лун и вой,
Кӧть ог юлы ни ог сёй.
Кор тэд ковмас тӧдны кад,
Висьтавны ме сэки рад.

оланін — жильё, жилище

Серпасав стӧча.

Пӧлатьын мойдчӧ кӧч,
Гӧбӧчын чеччалӧ пӧч.

Ставсӧ тэ лӧсьыда вӧч.

27ʼ удж. Аддзы колана кывъяс.

Вӧч тадзи: горт — вежӧс, джодж, джадж, ӧдзӧс, ӧшинь, крӧвать.

Ёрт — ..., вӧр — ..., ар — ... .

28ʼ удж. Аддзы лишнӧй кыв.

1. Джадж, джодж, джыдж.
2. Крӧвать, улӧс, пызан.
3. Пач, рач, самӧвар.
4. Телевизор, рӧмпӧштан, компьютер.

29ʼ удж. Серпасав сёрникузяяссӧ.

1. Сикт весьтті лэбӧ самолёт.
2. Зонка сулалӧ керка дорын.
3. Кыдз пу сайӧ дзебсьӧма нывка.
4. Пӧч пукалӧ кильчӧ вылын.
5. Лабич улын куйлӧ кань.
6. Пызан сайын пукалӧ пӧль.

Вӧч проекта удж аслад вежӧс йылысь.

1. Тайӧ вежӧсыс тэнад?
2. Мый эм вежӧсад?
3. Кӧні тэ вӧчан гортса удж?
4. Эмӧсь-ӧ ӧшинь вылад дзоридзьяс?
5. Коді пелькӧдӧ вежӧстӧ?

МИЯН КОТЫРЛӦН ШОЙЧЧАН ЛУН.

вежласьны — 1) меняться; 2) спрягаться
видзӧдны — смотреть
визула, ӧдйӧ — быстро
вуграсьны — рыбачить
гажӧдчыны — веселиться
джодждӧра — половик
кывзыны — слушать
пӧжавны — печь, испечь
пувъя пирӧг — брусничный пирог
серамбана — улыбчивый
шойччан лун — день отдыха, выходной день
шойччыны — отдыхать
шылад — музыка

30ʼ удж. Уськӧд тӧд вылад да гиж.

родители — 
брат с сестрой —
бабушка по матери —
дедушка по матери —
бабушка по отцу —
дедушка по отцу —

Пасъяс серти лӧсьӧд сёрникузя.

31ʼ удж. Лыддьы да висьтав рочӧн.

Тайӧ миян котыр. Батьлы комын кӧкъямыс арӧс, мамлы — комын квайт. Ыджыд батьлы квайтымын арӧс, а ыджыд мамлы ветымын квайт. Тані жӧ менам чой да вок. Ыджыд воклы дас вит арӧс, ичӧт чойлы — сизим. А ме 3 арӧсӧн ичӧтджык вокысь.

1. Тӧдмав, кымын арӧс ичӧтджык воклы.
2. Кымын арӧсӧн сійӧ ыджыдджык чойысь?
3. Серпас да висьт отсӧгӧн тӧдмав котыр йылысь.

32ʼ удж. Уджалӧй параӧн. Сетӧй юалӧмъяс серпас серти да вочавидзӧй.

Вӧчӧй тадзи:
— Кымын арӧс батьлы?
— Батьлы комын кӧкъямыс арӧс.
— Кымын арӧс чойлы?
— ...

Глагол — кадакыв. Глагол отвечает на вопросы что делать? что сделать?
Кадакыв вочавидзӧ мый вӧчны? юалӧм вылӧ.

Глагол в коми языке, как и в русском языке, имеет три времени.
Настоящее время — ӧнія кад (мый вӧчӧ? — что делает? мый вӧчӧны? — что делают?)
Прошедшее время — колян кад (мый вӧчис? — что сделал? мый вӧчисны — что сделали?)
Будущее время — локтан кад (мый вӧчас? — что сделает? мый вӧчасны? — что сделают?)

33ʼ удж. Аддзы пӧвсӧ да содты.

Чоя-вока видзӧдісны ... .
Бать да мам лыддьӧны ... .
Ыджыд мам пӧжалас ... .

Отец с матерью ... .
Брат с сестрой ... .
Бабушка ... .

Настоящее время глагола показывает действие, которое совершается в момент речи.
Ӧнія кадын кадакыв петкӧдлӧ, мый действиеыс мунӧ сёрнитігас.

34ʼ удж. Сувтӧд кадакывъяссӧ ӧнія кадын, 1 мортын, уна лыдын.

Шойччыны, гажӧдчыны, гуляйтны, исласьны, ворсны, видзӧдны.

тапикасьӧ — ходит

рӧдтӧ — скачет

Артмӧд 2 — 3 сёрникузя.

35ʼ удж. Висьтав, коді мый вӧчӧ.

чеччалӧ, а ... .
увтӧ, а ... .
тапикасьӧ, а ... .
ветлӧ, а ... .

Отсӧг вылӧ кывъяс: нявзӧ, лэбалӧ, котралӧ, рӧдтӧ.

Кутшӧм кадын мунӧны действиеясыс?

Будущее время глагола показывает действие, которое ещё будет совершаться.
Локтан кадын кадакыв петкӧдлӧ, мый действиеыс лоас на.

Уна лыда суффиксъяс.
Суффиксы множественного числа.

1 морт ми -ам (-ям) Ми гиж-ам. Ми пус-ям. Мы пишем. Мы варим.
2 морт ті -анныд (-янныд) Ті гиж-анныд. Ті пус-янныд. Вы пишете. Вы варите.
3 морт найӧ -ӧны Найӧ гиж-ӧны. Найӧ пусь-ӧны. Они пишут. Они варят.

36ʼ удж. Лыддьы текстсӧ. Кадакывъяссӧ сувтӧд колана кадын.

Шойччан лун. Ми чойкӧд да ёртъяскӧд аски (мунны) лыддьысянінӧ. Сэні эм лыддьысян вежӧс. Ми (босьтны) комиксъяс. Ме да чой (радейтны) лыддьыны серамбана висьтъяс. Ёртъяс (босьтны) Елена Козловалысь висьтъяс. Лыддьысян урок вылын ми велӧдыськӧд (сёрнитны) радейтана небӧг йылысь.

А ті мый (радейтны) лыддьыны?

сьӧлӧм вылын — на сердце
киподтуй — мастерство

37ʼ удж. Лыддьы да велӧд ӧти юкӧн.

МЕ БАТЬЛӦН ПИ.

Кор сьӧлӧм вылын долыд,
Сюрӧ лӧсялана кыв,
Сэки менам юрӧ волӧ
Батьӧ йылысь сьыланкыв.

Ме батьлӧн пи,
Менам лолын сылӧн би.
Казялӧны, мый ог вӧч:
Батьлӧн киподтуйыс стӧч.

Быдтор кужӧ, быдтор вӧчӧ,
Сыкӧд нинӧмысь ог пов.
Тӧдӧ мамӧ, тӧдӧ пӧчӧ —
Батькӧд лоӧ нянь и сов.

В. Тимин

Кутшӧм зонкалӧн батьыс?

38ʼ удж. Инды висьтысь кадакывъяс.

ВОТЧИСНЫ.

Валя Ваня вокыскӧд ворсӧны волейболысь.
— Вай ветлам вуграсьны, — вӧзйис Ваня.
— Ветлам-ветлам, вотчигмоз, вокӧй, — вочавидзис Валя.
Ваня вуграсис, Валя вотіс ведраӧ вотӧс. Вотчис вывті визула.
Водз воисны вӧрысь. Вотӧссӧ весалісны, вӧчисны варенньӧ.

«Би кинь» журналысь

Артмӧд ӧти шыпассянь заводитчысь кывъясӧн текст.

39ʼ удж. Лыддьы да помав текстсӧ.

ШОЙЧЧАН ЛУН МИЯН КОТЫРЫН.

Аски вежалун. Ми батькӧд пыркӧдам джодждӧра, чышкам бус, мыськам джодж. Мам да чой пӧжаласны пувъя пирӧг да картупеля шаньга. Котырӧн юам юмов чай чӧскыд пирӧгӧн да шаньгаӧн.
Сэсся мунам ...

40ʼ удж. Тайӧ шойччан либӧ велӧдчан лун? Тӧдмав.

1. Гажлун дырйи бать-мамкӧд ветлім пӧч-пӧль ордӧ.
2. Медводз вӧчи коми кывйысь гортса удж.
3. Миян класса зонкаяс ворсісны футболысь витӧд урок бӧрын.
4. Урокъяс бӧрын муна роч кывйысь олимпиада вылӧ.
5. Вежалунӧ ветлім В. Савин нима драма театрӧ.
6. Артасян урок вылын дасьтысим контрольнӧй удж кежлӧ.
7. Ме ёртъяскӧд каникул дырйи ветлі вӧрӧ.
8. Каникул дырйи исласим кыр йывсянь.
9. Перемена дырйи ветлім лыддьысянінӧ.

Соссяна кадакывъяс.
Отрицательные глаголы.

Я не иду. Ме ог мун.
Ты не идёшь. Тэ он мун.
Он (она) не идёт. Сійӧ оз мун.

Мы не идём. Ми огӧ мунӧй.
Вы не идёте. Ті онӧ мунӧй.
Они не идут. Найӧ оз мунны.

Висьтав, кыдзи артмӧны роч да коми кывъясын соссяна кадакывъяс.

41ʼ удж. Сувтӧд сёрникузяясӧ соссяна кадакывъяс.

1. Велӧдчан лунӧ ті ... мунӧй походӧ.
2. Коми урок вылын ... артасьӧй.
3. Нёльӧд класса челядь ... мунны театрӧ.
4. Бать-мам рытнас ... видзӧдны телевизор.
5. Челядь, мыйла ... лыддьӧй «Би кинь» журнал?
6. Ми аски ... велӧдчӧй.

42ʼ удж. Мӧвпышт.

-тӧг — без

1. Шондіа лунӧ аддзам кодзув?
2. Резина чачаяс вӧйӧны юӧ?
3. Рок пуанныд битӧг?
4. Ми тшак вотам тӧвнас?
5. Телевизор да компьютер мичмӧдӧны патера?

43ʼ удж. Лыддьы висьтсӧ да мӧвпав.

ЗЭВ СЮСЬ КАТЯ.

Анна баблӧн эм внук да внучка — Петя да Катя. Баб ветліс лавкаӧ, ньӧбис кампет. Локтіс гортас да кутіс гӧститӧдны чоя-вокаӧс.
— Вай юкамӧй кампетсӧ куим пельӧ, медым быдӧнлы лои ӧтмында.
Медводз сетіс Катялы куим кампет, сэсся Петялы сы мында жӧ. Мукӧдсӧ колис аслыс.
Катя видзӧдліс кулёкас да шуис:
— Бабӧ, тэнад ӧти лишнӧй.

Н. Куратова серти

Кыдзи юкисны ӧти кампетсӧ Анна баб, Катя да Петя?

44ʼ удж. Комиӧд. Висьтав, кутшӧм кадын да лыдын кадакывъясыс.

1. Отдыхаем.
2. Играем.
3. Рассказываем сказки.
4. Прыгаем.
5. Собираем ягоды.
6. Веселимся.
7. Улыбаемся.
8. Бегаем.
9. Спим.
10. Причёсываемся.

ВОРСЫШТАМ.

важӧн — давно
водзджык — раньше
ворсӧм — игра
дзебсясьны — прятаться
дзебсясьӧмысь — в прятки
карнан — коромысло
кутасьӧмысь — в салки, в догонялки
ӧні — сейчас
пев — большой палец
пельклун — ловкость
печик — щелчок
пудъясьны — посчитаться
пышйыны — убегать
сикас — вид
шмонь — юмор

Прошедшее время глагола показывает действие, которое совершилось до момента речи.
Колян кадын кадакыв петкӧдлӧ, мый действиеыс вӧлӧма нин.

Уна лыда суффиксъяс.
Суффиксы множественного числа.

1 морт ми -им (-ім) Ми гиж-им. Ми пус-им. Мы писали. Мы варили.
2 морт ті -инныд (-інныд) Ті гиж-инныд. Ті пус-инныд. Вы писали. Вы варили.
3 морт найӧ -исны (-існы) Найӧ гиж-исны. Найӧ пус-исны. Они писали. Они варили.

45ʼ удж. Инды да сувтӧд кывкудйысь кадакывъяссӧ колян кадын, 1 мортын, уна лыдын.

— Ваня, кутшӧм ворсӧмъяс тэ тӧдан?
— Ме уна ворсӧм тӧда. Гожӧмнас ывлаын ворсам дзебсясьӧмысь да кутасьӧмысь.
— Тайӧ ворсӧмнас важӧн ворслісны пӧльяс да пӧчьяс.
— Но и мый? Кутасьӧмысь ворсӧм сӧвмӧдӧ пельклун, а дзебсясигӧн колӧ на и мӧвпавны.
— Збыль и эм, а нӧшта кыкнан ворсӧмыс сетӧ дзоньвидзалун.
— Вай, сідзкӧ, корам ёртъяснымӧс да ворсыштам.

46ʼ удж. Лыддьы текстсӧ. Содты кадакывъясӧ суффиксъяс.

Важӧн челядь гожӧмнас ворсл... дзебсясьӧмысь, кутасьӧмысь да мачасьӧмысь. Тӧвнас ислалісны лызьӧн да даддьӧн. Кӧдзыд лунъясӧ кайл... паччӧрӧ да ворсі..., мойдч..., тӧдмал... нӧдкывъяс, шмонит... .

Висьтав, мыйысь тэ радейтан ворсны.

47ʼ удж. Лыддьы Геннадий Юшковлысь серамбана кывбуръяссӧ.

1. Мӧс да кукань, ыж да мегӧ,
Мегӧ сайын чошӧ легӧ.
Забор вывсянь лыддьӧ кысӧ,
Кымынӧн нӧ йирсьӧнысӧ.

Отсав кысӧлы лыддьыны пемӧсъяссӧ.

2. Олӧ-вылӧ бӧрдысь Пома,
Радио кодь паськыд мудзтӧм вома.
Бӧрдӧ час и бӧрдӧ мӧд,
Кыдзи дугӧдны, ог тӧд.

А тэ тӧдан, кыдзи дугӧдны Помаӧс бӧрдӧмысь?

48ʼ удж. Лыддьы. Велӧд да ворс физминутка дырйи.

Кӧч-кӧч тала-ла
Ветліс вала-ла.
Вылӧ чеччаліс,
Ставсӧ кисьталіс.
Коді нӧ вала-ла
Ветлӧ тала-ла?

Рӧдтім-гӧнитім
Ӧшинь увті,
Карта сайті,
Паськыд туйті.
Нюрӧ веськалім,
Ёма гуӧ тюп-тёп!

Г. Юшков

Инды да висьтав, мый серти тӧдмалін кадакывъяслысь кадсӧ.

— Ивӧ, а вот челядьыд висьтавлӧны быдсяма вӧвлытӧмторсӧ (небылицасӧ).
— Пӧрйӧдлӧны ӧта-мӧдсӧ. Ме тӧда.
— Вай видлам думыштны вӧвлытӧмторсӧ.
— Ӧтчыд ме ветлі вӧрӧ и друг аддза ... ... .

Мӧвпышт ёртыдкӧд вӧвлытӧмтор йылысь.

49ʼ удж. Лыддьы вӧвлытӧмторсӧ.

Паныдасисны кык ёрт. Заводитісны ӧта-мӧдыслы быдсямасӧ висьтавлыны.
— Ӧтчыд ме кыйи чери, — заводитіс ӧтиыс, — ыджыдысь-ыджыдӧс. Быдса час мерайті кузьтасӧ. Вот кутшӧм ыджыд чери меным шеді.
А мӧдыс висьталӧ:
— Тӧрыт тэнад мамыд вузасянінысь ньӧбис ыджыдысь-ыджыд рач, и ми кыкӧн нуим рачтӧ тіянӧ.
— Пӧръясян тэ! Мыйла мамлы ыджыдысь-ыджыд рачыс?
— Черитӧ тэнсьыд пражитны.
— Челядь кӧдзыд лунъясӧ пӧлатьын ышмылісны, да ковмыліс найӧс лӧньӧдны.
— А кыдзи найӧс лӧньӧдлісны?
— Миянӧс пӧчӧ велӧдіс «Коді серӧктас?» ворсӧмӧ.
— Кыдзи сійӧн ворсӧны?
— Ворсысьяс кутчысьӧны ӧта-мӧдыскӧд певнаныс, бергӧдлӧны да шуалӧны:

Ас ки карнан, ки карнан,
код шыасяс медводз,
сылы дас печик.

— Ме тӧда тайӧ ворсӧмтӧ. Кор классын шума, велӧдысь заводитӧ ворсны миянкӧд тайӧ ворсӧмнас. Классын пыр и лӧнь лоӧ.
— Вай ми тшӧтш ворсыштам.

ВЕЛӦДЧАНІНЫН.

виччысьны — ждать
ворсанін — место для игры
вочакыв — ответ
выльтор — новость
гӧгӧр — вокруг
кабала — бумага
киськавны — поливать
кӧвдум — колобок
котраланін — место для бега, спортивный зал
неылын — недалеко
пӧрччысянін — раздевалка
сёянін — столовая
судта — этаж
сьылан-йӧктанін — актовый зал

50ʼ удж. Аддзы кывкудйысь серпасъяс дорӧ эмакывъяс.

От глаголов с помощью суффикса -ин (-ін) образуются имена существительные, обозначающие место действия:
ворсны — ворсанін, велӧдчыны — велӧдчанін.

Кадакывйысь -ин (-ін) суффикс отсӧгӧн артмӧ места петкӧдлысь эмакыв.

51ʼ удж. Артмӧд серпасъяс да схемаяс серти сёрникузяяс.

1. + + -ын.
2. + + + ын.
3. + + -ӧ.
4. + + ӧ.
5. + + +

52ʼ удж. Содты сёрникузяяс. Мый лоӧ водзӧ?

1. Асыв. Нывка мунӧ велӧдчанінӧ. ...
2. Физкультура. Челядь локтісны котраланінӧ. ...
3. Перемена. Челядь велӧдыськӧд сёянінын. ...
4. Помасисны урокъяс. Нывка воис пӧрччысянінӧ. ...
5. Челядь котралӧны ворсанінын. ...

53ʼ удж. Аддзы лишнӧй кыв.

-ин (ін)

1. Сёянін, ворсанін, мунін.
2. Котыр, котраланін, котравны.
3. Велӧдысь, велӧдчанін, велӧдчысь.

54ʼ удж. Лыддьы Ӧньӧлысь висьталӧмсӧ.

Ме ола Шойнатыын, велӧдча нёльӧд классын. Миян велӧдчанін кык судтаа. Тані уна вежӧс, ыджыд котраланін. Физкультура урок вылын ми сэні котралам, чеччалам, ворсам. Эм сёянін. Сэні уджалӧны шань аньяс.
Велӧдчанін гӧгӧр быдмӧ уна пу да дзоридз. Неылын эм челядьлы ворсанін.

1. Мый висьталіс Ӧньӧ аслас велӧдчанін йылысь.
2. Висьтав аслад велӧдчанін йылысь.

55ʼ удж. Уджалӧй параӧн. Сетӧй ёрта-ёртыдлы юалӧмъяс 45-ӧд удж серти да вочавидзӧй.

Вӧчӧй тадзи: Кӧні олӧ Ӧньӧ? Ӧньӧ олӧ Шойнатыын.

56ʼ удж. Гижӧй велӧдан диктант.

Велӧдчанін, сёянін, котраланін, пӧрччысянін, ворсанін, уджаланін, бурдӧдчанін, вузасянін.

57ʼ удж. Лыддьы Нина Куратовалысь висьтсӧ. Вочавидз юалӧм вылӧ.

МИШУК РИСУЙТЧӦ.

Мишук босьтіс карандаш да кабала лист, кутіс рисуйтчыны. Медводз зэв кузь визь гижтіс. Тайӧ туй.
Сэсся босьтіс турунвиж карандаш да вӧчис посни визьяс.
— Мамӧ, ме нӧшта рисуйта коз пу да кӧчильӧс!
— Рисуйт, пиук, рисуйт. Сэсся петкӧдлы мамыслы, мый артмас.
Козйысь да кӧчильысь кындзи, Мишук рисуйтіс нӧшта туй вылас ичӧтик гӧгыль, а сэсся сетіс мамыслы.
— На, мамӧ, видзӧдлы! Артмис менам?
— Артмӧма, пиук. Кутшӧм нӧ эськӧ мойд серпасалін?

1. Лыддьӧй висьтсӧ рольяс серти.
2. Серпасав: пызан вылын кабала лист, туй дорын коз, коз улын кӧч, туй вылын кӧвдум.
мырсьӧ — трудится

Сійӧ мича. Сійӧ кузь.
Лун-лун мырсьӧ, оз тай узь.
Лун-лун киӧ сійӧс босьта.
Сылысь нырсӧ лун-лун ёсьта.

А. Журавлёв (комиӧдіс А. Лужиков)

58ʼ удж. Аддзы сёрникузя помсӧ да гиж.

Менам класс ... .
Сійӧ ... .
Класс водзын ... .
Стен пӧлӧн ... .
Шкап пытшкын ... .
Ӧшинь вылын ... .

небӧгъяс да тетрадьяс
ӧшалӧ мугӧм пӧв
ыджыд да сӧстӧм
уна мича дзоридз
сулалӧны шкапъяс
медводдза судтаын

1. Мый йылысь тайӧ сёрникузяясыс?
2. Тайӧ текст али абу? Сет текстыслы ним.

59ʼ удж. Лыддьы Иралысь письмӧсӧ.

Чолӧм, Катя!
Вот и помасисны гожся каникулъяс. Ми бара аддзысим ёртъяскӧд. Таво ми кутам велӧдчыны медводдза судтаын. Классным ыджыд, югыд, шоныд да сӧстӧм. Зэв жӧ нин гажа! Гожӧмнас краситӧмаӧсь, да гӧгӧр дзирдалӧ. Ми ёртъяскӧд шуим бура видзны класснымӧс. Кутам чышкыны бус, идравны ёг да киськавны дзоридзьяс.
А кыдзи тіян заводитчис выль велӧдчан во? Кутшӧм выльторъяс тіян эмӧсь? Гиж вочакыв, виччыся.
Аддзысьлытӧдз!
Ыджыдвидз сикт. Кӧч тӧлысь 24-ӧд лун.
Тэнад Ира нывъёртыд.

Висьталӧй, кыдзи ті видзанныд класснытӧ.

60ʼ удж. Лыддьы висьтсӧ.

КОМИ МУЫН МЕДВОДДЗА ШКОЛА.

— Пӧль, а пӧль, висьтав, кор Коми муын воссис медводдза школаыс?
— Он тӧд? Сідзкӧ, кывзы.
Тайӧ вӧлі 7 нэм сайын. Локтіс сэки Комиӧ Роч муысь Степан. Сійӧ вӧлі Устюг карысь. Дыр манакаліс Ростовса манастырын. Тані сійӧ лӧсьӧдіс медводдза коми анбур.
Степан копыртчыліс Москваса князьлы, Дмитрий Донскойлы. Князь кырымаліс грамота Степанӧс Коми муӧ мӧдӧдӧм йылысь.
Тадзи Степан воис Коми муӧ. Кутісны шуны сійӧс Перымса Степанӧн.
Емва ю бокын Перымса Степан кыпӧдіс медводдза школа. Тані кутісны велӧдны чужан кыв.

1. Висьт серти артмӧд юалӧмъяс.
2. Тӧдмась Перымса Степан анбурӧн.
3. Гиж анбур отсӧгӧн кывъяс: небӧг, школа, азбука.

61ʼ удж. Помав сёрникузяяссӧ да гиж.

Велӧдысьлӧн пызан сулалӧ ... .
Шкап сулалӧ ... .
Велӧдчысь вочавидзӧ юалӧм вылӧ ... .
Мусерпас ӧшалӧ ... .
Мусерпас ӧшалӧ ... .
Велӧдысь пукалӧ ... .
Велӧдчысь пукалӧ ... .
Лампочка ӧшалӧ ... .
Дзоридзьяс сулалӧны ... .

пызан сайын
парта сайын
ӧшинь дорын
класс водзын
ӧшинь вылын
стен пӧлӧн
пызан весьтын
дӧска дорын

— Ыджыд-ӧ тэнад велӧдчаніныд?
— Менам велӧдчанінӧй абу ыджыд, ӧти судтаа. А тэнад?
— Ме велӧдча куим судтаа школаын. Тані зэв уна вежӧс, котраланін, сёянін, бурдӧдысьлӧн вежӧс, лыддьысянін, пӧрччысянін, сьылан-йӧктанін.
— Миян эмӧсь жӧ татшӧм вежӧсъясыс. Абу сӧмын бурдӧдысьлӧн вежӧс.
— А классныд ыджыд?
— Да, миян классным ыджыд, югыд да шоныд.

Сёрнитӧй ӧта-мӧдныдкӧд асланыд велӧдчанін йылысь.

62ʼ удж. Помав сёрникузяяссӧ.

Велӧдчысьяс школаын нуръясьӧны (кӧні?) ... . Физкультура урок мунӧ (кӧні?) ... . Урокъяс мунӧны (кӧні?)... Челядь велӧдчӧны (кӧні?) ... . Пальто да куртка ӧшӧдӧны (кытчӧ?) ... . Челядь гажӧдчӧны (кӧні?) ... .

Вӧч проекта удж «Школа» тема вылӧ план серти.

План.
1. Кӧні сулалӧ тіян велӧдчанінныд?
2. Кутшӧм сійӧ?
3. Мый эм велӧдчанінад?
4. Мый эм велӧдчанін гӧгӧрын?
5. Артмӧд велӧдчанін йылысь нӧдкыв, юржугӧдан.
6. Серпасав велӧдчанінтӧ.

гӧгӧрын — вокруг

63ʼ удж. Лыддьы текстсӧ. Торйӧд юкӧнъяс вылӧ. Сет ним.

Пуксис тӧв. Юяс да тыяс вевттьысисны йиӧн. Ӧтчыд Витя муніс ты дорӧ. Ты вылын исласисны нывкаяс. Зина исковтіс ты мӧдар берегас. Витя горӧдіс нывкалы: «Бергӧдчы! Йиыс жугалас!» Зина быттьӧ эз и кывлы, исковтіс водзӧ. Друг йиыс потіс. Зина усис кӧдзыд ваӧ. Нывка лёкысь горӧдіс. Витя шыбитіс паськӧмсӧ да уськӧдчис Зина дінӧ. Зонка кыскис Зинаӧс ваысь. Витяӧс пӧся аттьӧалісны велӧдчанінын.

И. Изъюров серти

ЕДЖЫД БОБУВ БӦРСЯ БОБУВ ПАСЬКӦМ ВЫЛӦ ПУКСЬӦ.

асъя кыа — утренняя заря
вашмунны — улыбнуться
дадь бӧр — задняя часть санок
кельдӧдны — бледнеть
крепыд — крепкий, прочный
кумач морӧса — красногрудый
кыны — вязать
кыр — горка
орччӧдны — сравнивать
паччӧр — верх русской печи, лежанка
потшӧс дорын — около изгороди, забора
тасма — ремень
тӧвзьыны — мчаться, нестись
тӧвся — зимний
турдӧм — застывший
унзіль — сонный
эзысь — серебряный

64ʼ удж. Корсь тӧвся тӧлысь нимъяс.

Ӧшым тӧлысь — Кӧдзыд Пӧльыс —
Волӧн медся ыджыд пи.
Ыджыд ноп тыр козин кыскис,
Ӧзтіс коз пу вылын би.

Тӧвшӧр тӧлысь — тӧвлӧн шӧрыс —
Волӧн медся ичӧт пи.
Пашлякъясӧн шковгӧ-лыйсьӧ,
Питшӧгъясас кӧдзыд би.

Урасьӧм тӧлысь
Кык бана киа —
Ӧтарыс шоныд,
Мӧдарыс — йиа.

Г. Попов серти

1. Лыддьы кывбурсӧ.
2. Вӧчӧй небӧг «Тӧв» тема вылӧ.

65ʼ удж. Вочавидз юалӧмъяс вылӧ.

1. Кутшӧм вогӧгӧрся кад ывлаын?
2. Мыйӧн позьӧ иславны каток вылын?
3. Мыйӧн ислалӧны кыр йывсянь?
4. Мый вӧчӧны челядь лымйысь?
5. Мыйӧн тэ радейтан исласьны?

позьӧ — можно

66ʼ удж. Лыддьы кывбурсӧ мичаа.

ТӦВ.

Асъя кыа югыд кыӧ.
Турдӧм тӧлысь кельдӧ. Чӧв.
Кӧнкӧ ар на.
Коми парма важӧн лымъя,
Важӧн тӧв.
Кырыс дась нин, быттьӧ праздник.
Вашмунӧма ичӧт зон.
Потшӧс дорын мича дзоридз —
Кумач морӧса лӧнь жонь.

А. Мишарина

кыа
заря
вяжу

чой
горка
сестра

Аддзы сёрникузяяс пасъяс серти.

...

67ʼ удж. Корсь лӧсялана кывъяс «Тӧв» тема вылӧ.

Ворс ёртыдкӧд «Тӧв» тема вылӧ.

68ʼ удж. Лыддьы висьтсӧ.

ВЫЛЬ ЛЫЖИ.

И школаын, и гортын Генялӧн ӧти дум: лызь колӧ. Дышӧдіс нин дадьнас иславны. Абу ӧд дзоля кага. Ыджыдджык вокыслы неважӧн выль лызь ньӧбисны, ёсь ныра, югыдлӧз рӧма. Мича! Шурик вокыс лыжиасис да котӧртіс кыр йылӧ:
— Эй, менам выль лызь!
Зонпосни кытшалісны Шурикӧс. Ставӧн лыжиаӧсь, ставӧн радлӧны. А Геня вылӧ эз и видзӧдлыны.
Забеднӧ Генялы, бать-мамыслысь быд лун лызь корӧ. Но мый вӧчан, лавкаас кӧ абу.
Ӧтчыд батьыс вайис кыдз пу, паччӧрас лэптіс сійӧс.
— Мый вылӧ тайӧ, бать? — юаліс Геня.
— Косьтам да видзӧдлам, мый артмас, — шуис батьыс.
Ӧти асылӧ Геня кайис паччӧрӧ да чуймис:
— О-о, лыжи!
Да, тайӧ вӧлі лыжи. Батьыс вӧчӧма. Лым кодь еджыд, ёна мича.
Регыд лыжиыс лои дась: ёсь ныра, турунвиж рӧма, тасмаысь вӧчӧм кӧвъя.
Геня котӧрӧн кайис кыр йылӧ да Шурик мозыс жӧ горӧдіс:
— Эй, менам выль лызь!
И тӧвзис чой горув.

Е. Козлов серти

1. Висьтав, мыйла висьтыслӧн нимыс «Выль лыжи».
2. Лыддьӧй висьтсӧ рольяс серти.
Висьтав «Выль лыжи» висьт ас нимсянь.

69ʼ удж. Аддзы висьтысь паныд вежӧртаса кывъяс.

важ — ...
сьӧд — ...
ичӧтджык — ...
пемыдлӧз -...
мисьтӧм — ...
ыджыд — ...

70ʼ удж. Аддзы висьтысь матын вежӧртаса кывъяс.

чой — ...
лэбзис — ...
ичӧт — ...
детинкаяс — ...

горка
чой
кыр
гӧра
нӧрыс

тишина
чӧв
шы ни тӧв

71ʼ удж. Лыддьы кывбурсӧ мичаа.

Тэрыб — быстрый
увланьӧ — вниз

Ӧшинь улын круткодь чой.
— Петам, исковтам сэт, чой!
Оз и ков тай тэрыб вӧв,
Тӧвзям — полӧмным эз вӧв.
Пӧрам лымйӧ, вӧв — ?
Чеччам бӧр!
Дадьлӧн крепыд льӧм пу бӧр.

А. Некрасов (Гамса)

1. Мыйысь важӧн вӧчлісны дадь да лызь?
2. Кутшӧм тэнад даддьыд да лызьыд?

— Вася, тэ радейтан тӧвсӧ?
— Радейта, дерт! Тӧвбыд ислася лызьӧн да конькиӧн.
— А ме сӧмын кужа исласьны даддьӧн.
— Эн шогсьы. Ме тэнӧ велӧда.
— Миша, тэ медбур ёрт!

Серпасав, мыйӧн тэ радейтан исласьны, да гиж.

Кык Шура, кык Саша, кык Саньӧ
Тӧвзьӧны даддьӧн увланьӧ.
Кыр йылын кык мам зэв радӧсь,
Мый Александръяс вывті нин збойӧсь.

А. Журавлёв серти

Кымын зон исласьӧ тані?

72ʼ удж. Лыддьы да орччӧд Александр Лужиковлысь кывбуръяссӧ.

ШОНДІ.

Кӧть и мича,
оз тай шонты.
Оз тай шонты
тӧвся шонді.
Зэв дыр узьӧ,
сёрӧн чеччӧ. 
Сёрӧн чеччӧ,
зэв водз лэччӧ.
Помся унзіль.
Оз пет нюмыс.
Нюмъялӧмсьыс,
гашкӧ, умис?

Артмӧд неыджыд висьт тӧвся шонді йылысь.

ТӦЛЫСЬ.

Тӧлысь — абу полысь.
Узьны кутас луннас.
Тӧлысь — войся олысь.
Эштас тӧвся войыс, —
Войнас оз лок унмыс.
Чеччас Шонді чойыс.

1. Кутшӧм лэбачлӧн войнас оз лок унмыс?
2. Вӧч серпасъяс кывбуръяс серти.

1. Воздух.
2. Горка.

1. Горка. 2. Октябрь. 3. Мысль. 4. Печка.

1. Ветер.
2. Брат.
3. Горка.
4. Туман.
5. Белка.
6. Любить.
7. Поле.

ТӦВСЯ ГАЖЛУНЪЯС.

бӧрйыны — выбирать
вежадыр — святки
вежӧдӧм — освящение
водзын — впереди
кольк — яйцо
Крещенньӧ — Крещение
ӧзтыны — зажечь
ӧтчыд — один раз, однажды
пасьтасьны — одеться
пӧжас — выпечка
Рӧштво — Рождество
сись — свеча
тӧрыт — вчера
тунасьны — заниматься гаданием
юрбитны — молиться

73ʼ удж. Лыддьы кывбурсӧ мичаа.

ВЫЛЬ ВО.

Быттьӧ мойдкыв гортӧ пырис,
Гажа шыӧн гӧгӧр тырис.
Коз пу дзирдалӧ джодж шӧрын,
Вӧрысь сійӧ локтіс тӧрыт.
Ӧтчыд вонас овлӧ тайӧ,
Ставлы шудсӧ Выль во вайӧ.

И. Тарабукин

74ʼ удж. Велӧдӧй да йӧктӧй выльвося коз дорын.

Полька йӧктам,
Оз ков тшӧктӧм,
Коклябӧрӧн тук да тук.
Гажа полька
Йӧктам толькӧ,
Ньӧти миян оз мудз кок.
Сувт вай кытшӧ,
Ичӧт другӧй!
Йӧктам миянкӧд тшӧтш лок!
Гажа полька
Йӧктам толькӧ,
Ньӧти оз мудз миян кок.

Илля Вась

75ʼ удж. Комиӧд. Висьтав, кутшӧм карын чужис Исус Кристос?

1. Звезда.
2. Родился.
3. Отца Иисуса звали ... .
4. Новый год.
5. Святой.
6. Бог.
7. Мать Иисуса звали ... .

Висьтав, кӧні тайӧ карыс. Инды мусерпас вылысь.

76ʼ удж. Гӧгӧрвоӧд приметаяссӧ.

1. Лымйыс кӧ тӧлын ёна усьӧ — гожӧмыс зэра лоӧ.
2. Тӧлын кӧ зэрас — йӧзлы сьӧкыд во лоӧ.
3. Тӧлын кӧ дыр кӧдзыд — гожся поводдяыс лоӧ бур.
4. Лымйыс кӧ уна — бур во лоӧ.

— Сеня, тэ мыйкӧ тӧдан Рӧштво гажлун йылысь?
— Маша, тайӧ лунӧ чужӧма Исус Кристос.
— А коді сылӧн бать-мамыс?
— Мамыс Мария, а батьыс Иосиф.
— Кӧні чужӧма Исус?
— Сійӧ чужӧма Иерусалимса Вифлеем карын.
— Кор сійӧ чужӧма?
— Тӧвшӧр тӧлысь 7-ӧд лунӧ.
— Тэ тай, Сеня, уна тӧдан. Аттьӧ висьталӧмсьыд.

Кыдзи тэ чайтан, мый Маша нӧшта вермис юавны Сенялысь?

77ʼ удж. Лыддьы текстсӧ.

Рӧштво пасйӧны Выль во бӧрын. Тайӧ лунӧ вичкоын ыдждӧдлӧны Исус Кристосӧс. Том йӧз ветлӧны керкаысь керкаӧ, сьылӧны вичко сьыланкывъяс.
Рӧштвосянь заводитчӧ Вежадыр. Том йӧз гажӧдчӧны Крещенньӧӧдз. Ставӧн тунасьӧны: нывъяс кӧсйӧны тӧдмавны ассьыныс жӧниксӧ, а олӧма йӧз — кутшӧм лоӧ выль урожай.

1. Кыдзи пасйӧны Рӧштво тіян котырын?

2. Инды схемаяслы лӧсялана сёрникузяяс.

...

3. Сувтӧд сёрникузяяс дорӧ юалӧмъяс.

Вӧч тадзи: Рӧштво пасйӧны Выль во бӧрын.
Мый пасйӧны Выль во бӧрын? Кор пасйӧны Рӧштво? Мый вӧчӧны Выль во бӧрын?

4. Помав сёрникузясӧ.
Рӧштво дырйи том йӧз (мый вӧчӧны?) ..., ..., ... .

78ʼ удж. Корсь стӧч вочакыв.
Выль во пасйӧны ... .
а) Рӧштво бӧрын
б) Рӧштво водзын
Вежадыр заводитчӧ ... .
а) Выль во водзын
б) Рӧштво бӧрын
Том йӧз гажӧдчӧны ... .
а) Крещенньӧӧдз
б) Рӧштво водзын
Нывъяс тунасьӧны ... .
а) Выль во дырйи
б) Рӧштво дырйи

79ʼ удж. Артмӧд кывъясысь сёрникузяяс да гиж.

Рӧштво, тӧвшӧр, 7-ӧд, лунӧ, тӧлысь. Тайӧ, чужис, лунӧ, Исус Кристос. Йӧз, пасйӧны, тайӧ, гажаа, лунсӧ. Верстьӧ, ветлӧны, да, том, вичкоӧ, йӧз. Гортын, ӧзтӧны, сись, вежӧдӧм.

80ʼ удж. Аддзы лишнӧй кыв.

1. Тӧв, гожӧм, кодзув, ар, тулыс.
2. Мойд, висьт, лым, кывбур, шусьӧг.
3. Пышкай, жонь, ябыр, катша, пыста.
4. Выль во, Рӧштво, чужан лун, Крещенньӧ.

Важӧн комияс юрбитӧмаӧсь пуысь вӧчӧм енъяслы. «Войпель» вӧлӧма бур енмӧн, а «Ёма» — лёкӧн.
Ёма — пӧрысь, пинясьысь. Ӧні на кылан челядь ворсігӧн:
— Ёма баба, вӧтӧд!

Пудъясьӧй да ворсӧй «Ёма баба, вӧтӧд!» ворсӧмысь.

Акӧтӧ, пакӧтӧ
Жугӧдӧма,
Абель, фабель,
Руменӧ,
Ики, Брики,
Драматики,
Фронька.

Челядь бӧрйӧны ас пиысь «Ёма бабаӧс», быд ногыс сійӧс дӧзмӧдӧны, а сэсся пышйӧны сыысь, а «Ёма» найӧс куталӧ.

1. Кутшӧм ворсӧмъяс тэ тӧдан?
2. Мыйӧн радейтан ворсны?

СЁЯН-ЮАН.

ва пельса — деревянная кадка для воды
гыр — ступа
брунакывны — издавать гулкий звук
дозмук — посуда
кӧш — ковш
кырсь — кора
ляз — кисель из черники, черёмухи
нӧш — колотушка
пельнянь — пельмени
пестер — берестяной кузов
пож — сито
ризйыны — мчаться
ружтыны — кряхтеть
сёян-юан — пища, еда
сола тшак — солёные грибы
укват — ухват
ульӧн — в сыром виде, сырым
черинянь — рыбник
чошкӧдны пель — насторожить уши
чуман — берестяная коробка, корзинка, берестяное лукошко
чурскыны — сосать с чмоканьем, с удовольствием
шенасьны — махать
ыргӧн — медный

81ʼ удж. Корсь кывъяс.

Т
А
С
І
Т
Ь
П
С
Т
А
К
Ӧ
Н
А
Н
Ь
К
Ӧ
П
Т
Ш
У
Р
Т
П
Ӧ
Р

82ʼ удж. Лыддьы мойдсӧ.

Брунгысь-брангысь выя рач
Вӧрлань ризйӧ кӧм ни гач.

Укват шенасьӧ да горзӧ,
Чукля кокыс сідзи-й ворсӧ.

Ружтӧ-мунӧ ва пельса,
Вылас таркакылӧ кӧш.

Чуман чошкӧдӧма пельсӧ,
Пышйӧ-тэрмасьӧ кыз нӧш.

Би кодь гӧрд
Ыргӧн пӧрт.

Петіс мир туй вылӧ —
Пышйӧ-брунакылӧ.

Пызан лэбис ӧшинь пыр,
А сы бӧрся пож да гыр.

Илля Вась серти

1. Тӧдмав, мый вӧчӧны тайӧ дозмукнас.
2. Кутшӧм роч мойд серти Василий Ильич Лыткин (Илля Вась) гижӧма тайӧ мойдсӧ?
3. Корсь кывкудйысь кывъяслысь вежӧртассӧ: ризйыны, шенасьны, ружтыны, чошкӧдны.
4. Ворсӧй мойдсӧ.

83ʼ удж. Содтав кадакывъяссӧ В.Лыткин кывбурысь.

Выя рач (мый вӧчӧ?) ... . Укват (мый вӧчӧ?) ... . Ва пельса (мый вӧчӧ?) ... . (Мый вӧчӧ?) ... кӧш. Чуман (мый вӧчӧма?) пельсӧ ... . Кыз нӧш (мый вӧчӧ?) ... . (Мый вӧчӧ?) ... ыргӧн пӧрт. (Мый вӧчисны?) ... пызан, пож да гыр.

Инды кадакывъяслысь кад, морт да лыдсӧ.

— Ӧні уна важ кӧлуй позьӧ аддзыны сӧмын музейысь.
— Важӧн коми морт уна кӧлуй вӧчлӧма пуысь да сюмӧдысь.
— А тэ тӧдан, мый важӧн сёйліс коми морт?
— Аслыс сёян коми морт босьтліс вӧрысь да ваысь.
— Град выв пуктасыс, ме чайта, вӧлі жӧ?
— Дерт. Кыдзи чайтан, мый медводз пуктылісны пызан вылӧ?
— Град выв пуктасысь сорас либӧ картупеля сола тшак.
— А вот и эн тӧд. Вай кывзы ӧти висьт, а сэсся ачыд гӧгӧрвоан, мый медводз вайӧны пызан вылӧ.

84ʼ удж. Лыддьы да вочавидз юалӧм вылӧ.

ЫДЖЫД ШЫПАССЯНЬ.

Володяӧс корисны велӧдысьлӧн вежӧсӧ. Велӧдысь шуис:
— Зэв бура гижӧмыд ас гижӧдтӧ, но сӧмын ӧти ӧшыбка эм. Нянь кывсӧ гижӧмыд ыджыд шыпассянь. Ме чайта, тэ торксин.
Володя вочавидзис:
— Эг.
Директор шыасис:
— Тайӧ кывсӧ пыр колӧ гижны ыджыд шыпассянь.
Батьяс да пӧльяс пыр ыдждӧдлісны няньтӧ, пызан вылӧ медводз пуктылісны.

В. Торопов серти

1. Кутшӧм выльтор тӧдмалін нянь йылысь?
2. Лыддьӧй висьтсӧ рольяс серти.

Мый тэ ачыд верман висьтавны нянь йылысь?

Нянь — важ иран кыв. Миян прапрапрапӧльяс коркӧ овлӧмаӧсь лунвылынджык да вузасьӧмаӧсь иранса йӧзкӧд. Сэсся коми йӧз босьтӧмаӧсь налысь нянь кывсӧ.

85ʼ удж. Лыддьы да велӧд кывбурсӧ.

Пызан сайын сёйны-юны
Тэрмасьны оз ков,
Эн, эн вунӧд йӧзлы шуны:
«Нянь да сов!»

С. Попов

Мыйла йӧзлы шуӧны сёйӧм водзын «Нянь да сов»?

86ʼ удж. Висьтав, коді мый сёйӧ.

яй
ма
турун
пипу кырсь
гагъяс
йӧв

87ʼ удж. Лыддьы шусьӧгъяссӧ да гӧгӧрвоӧд.

Коді няня, сійӧ тышын вермас.
Ваыд — матушка, няньыд — батюшка.
Няньыд пызан мичмӧдӧ.
Аслад няньыд юмовджык йӧз кӧлачысь.

Вӧч серпаса небӧг нянь йылысь.

Артмӧд кывъяс.

Гӧгӧрвоӧд кывъяслысь артманногсӧ.

88ʼ удж. Лыддьы кывбурсӧ мичаа.

КАНЬ ДА ЧЕРИНЯНЬ.

Шорысь чери кутіс кань,
Сюйис пачӧ черинянь.
Садьмис,чӧвтіс пачӧ син,
А сэн нинӧм абу нин.
Исыштіс да гӧгӧрвоис,
Чериняньыс кытчӧ лоис.
— Ӧтчыд йӧйталі и шань! —
Шуис аслыс сэки кань.
Бара кыйсьӧ дзик быд войӧ,
Но, мый шедлас, ульӧн сёйӧ.

Г. Юшков

Висьтав, кытчӧ каньлӧн воши чериняньыс.

89ʼ удж. Лыддьы зонкалысь висьтсӧ.

Мыйта вотӧсыс миян вӧрын! Кутшӧм рӧм сӧмын оз тыдав! Со аддза и алӧй, и гӧрд, и лӧз, и сьӧд рӧмъяс.
Со сулалӧ льӧм пу. А вотӧсыс мыйта! Чукӧрта, да мамӧ вӧчас льӧмъя ляз. Ёна и чӧскыд юмов лязйыд!
Аски ёрткӧд ветла ягӧ чӧдла. Пӧчӧлы тшӧкта пӧжавны чӧдъя пирӧг. Неуна вота юмов оз. Ми чойкӧд радейтам сёйны йӧла оз.

1. Кутшӧм вотӧс тэ вотін гожӧмнас?
2. Кутшӧм вотӧсысь позьӧ вӧчны ляз?

Кутшӧм вотӧс вотіс Войт?

Лӧз рӧма вотӧс — тайӧ ... .
Алӧй рӧма вотӧс — тайӧ ... .
Сьӧд рӧма вотӧс — тайӧ ... .
Гӧрд рӧма вотӧс — тайӧ ... .

90ʼ удж. Лыддьы кывбурсӧ мичаа.

Кокӧй, кокӧй,
Пышйы жӧ, пышйы
Чӧдъя-пувъя ягӧ,
Мырпома нюрӧ,
Тшака раскӧ.
Кокыльӧй да табыльӧй,
Пышйы жӧ, пышйы
Сьӧла-тара раскӧ,
Дозмӧра ягӧ.
Кокӧй, табӧй,
Пышйы жӧ, пышйы.

Фольклорысь

1. Мыйла корӧма коксӧ пышйыны ягӧ, нюрӧ, раскӧ?
2. Висьтав ӧти кывйӧн:
Чӧд, пув, мырпом — тайӧ ... . Сьӧла, тар, дозмӧр — тайӧ ... .
3. Помав сёрникузяяссӧ.
Чӧд да пув быдмӧны (кӧні?)... . Мырпом да турипув быдмӧны (кӧні?)... . Сьӧла-тарсӧ вӧралысь кыйӧ (кытысь?) ... . Дозмӧрсӧ вӧралысь кыйӧ (кытысь?) ... .

91ʼ удж. Лыддьы кывбурсӧ мичаа.

РАКА ДА САКАР.

Коркӧ ӧтчыд аддзӧ рака —
Туй вылын туплясьӧ сакар.
Прамӧй сакар, рафинад.
Рака лоис ок и рад:
— Талун юа юмов тшай
Куим стӧкан, кружка да-й.
Ӧдйӧ пета кильчӧ вылӧ,
Чурскӧмӧй мед кылас ылӧ.
Кырныш-суседлӧн, кор аддзас,
Завидьысла потас гачыс.
Катша локтас юигкості,
Ме пӧ сакар торсӧ вошті.
Мый он аддзы, ставыс сылӧн,
Быттьӧ ӧтнас олӧ-вылӧ.
Тадзи рака сакар дорын
Ачыс аслыс кравзіс гора.
Горзігад эз и казяв,
Кыдзи муыс гӧгӧр вазис.
Кымӧр локтіс, зэрӧн койис.
Рака дорын гуран лоис.
Гашкӧ, ӧнӧдз ассьыс сакар
Корсьӧ гуран пиысь рака.

А. Елфимова

1. Тэ думысь, кытчӧ вошис сакарыс?
2. Кыдзи тэ гӧгӧрвоин кывбурсӧ?

— Тэ радейтан льӧмъя ляз али кос чӧдъя ляз?
— Ме ог радейт льӧмъя ляз, меным кажитчӧ кос чӧдъя ляз.
— Картупеля али рыська шаньга радейтан?
— ...
— Тэ радейтан йӧлӧн пражитӧм чери либӧ черинянь?
— ...
— Тэныд кажитчӧ кос моркова да кос сёркниа компот?
— ...

92ʼ удж. Вуджӧд роч кыв вылӧ да тӧдмав.

1. Варёная капуста. 2. Одна из коми выпечек. 3. Молоко с морошкой. 4. Рыбник. 5. Солёные грибы. 6. Уха из карася. 7. Кисель из черёмухи. 8. Кислые щи.

93ʼ удж. Вуджӧд кывъяссӧ да лыддьы шусьӧгъяссӧ.

Летний день йӧлӧн-выйӧн катится.
Зима долгая, ставыс сёйсяс.
Лето запасает, зима дзимлялӧ.

94ʼ удж. Велӧд да сьыв сьыланкывсӧ гажлун дырйи.

УНА БЛИН МЕ ПӦЖАЛА.

Уна блин ме пӧжала,
Гӧсьтъясӧс ме корала.
Волӧй, гӧсьтъяс, миянӧ,
Дзожгана пӧсь блин дорӧ.
Ӧшинь улӧс чышкала,
Гӧрд ковёрӧс вольсала.
Волӧй, гӧсьтъяс, миянӧ,
Дзожгана пӧсь блин дорӧ.
Пызан вылӧ вая ырӧш.
Юӧй ырӧш кӧть тыр кӧш.
Волӧй, гӧсьтъяс, миянӧ,
Дзожгана пӧсь блин дорӧ.
Пызан вылын самӧвар.
Гӧсьтъясыдлӧн сёрни-гар.
Волӧй, гӧсьтъяс, миянӧ,
Дзожгана пӧсь блин дорӧ.
Миян праздник гажа тан,
Хороводӧн йӧктыштам.
Волӧй, гӧсьтъяс, миянӧ,
Дзожгана пӧсь блин дорӧ.

95ʼ удж. Корсьӧй лишнӧй кыв.

Шаньга, рок, кӧвдум.
Тшай, йӧв, пирӧг.
Шыд, зарава, юква.
Черинянь, ырӧш, пув ва.

МЕНАМ ЛУН.

веськӧдлыны — управлять
видчыны — ругаться
висьтавны — рассказать,
рассказывать водз — рано
воны сьӧлӧм вылӧ — понравиться
вӧнь — пояс
вугыр шатин — удочка
кодь — как
коланлун — необходимость
кӧті — коты (лёгкая летняя кожаная обувь)
кышӧд — обложка
лист бок — страница
няйт — грязь, грязный
муракывны-ветлыны — ходить с большим шумом
радейтана небӧг — любимая книга
серпас — картина
серпасавны — нарисовать
сёр — поздно
сы моз — как он
чери кыйны — рыбачить
шӧр герой — главный герой
югӧр — луч

96ʼ удж. Гиж «Менам лун» тема вылӧ кывъяс.

1. Войдӧрлун и тӧрыт вӧлі,
Талун эм, и аски лоӧ.
Лоас гожӧмын и тӧлын, —
Шондікӧд тшӧтш сійӧ волӧ.

2. Мый оз позь томнавны ящикӧ?

войдӧрлун — позавчера

97ʼ удж. Лыддьы кывбуръяссӧ да велӧд.
Шондіӧй, шондіӧй,
Югӧръястӧ кой.
Шондіӧй, шондіӧй,
Вӧтлы пемыд вой.

В. Тимин

Тіч-точ, тіч-точ —
Мунӧ часі.
Сёр-ӧ-водз?
Мамӧ шуӧ:
— Вай эн сёрнит,
Вод вай, пиук,
Зэв ӧд сёр нин.

Ю. Васютов

Кутшӧм кад петкӧдлӧма кывбуръясын да серпасын?

98ʼ удж. Комиӧд сёрникузяяссӧ.

Миша встал в семь часов утра. Он быстро сделал зарядку, убрал постель, умылся. Мама на завтрак подала гречневую кашу и молоко. Миша поел и побежал в школу. Он очень любит школу. Там его друзья и любимая учительница.
Миша после уроков помогает родителям и ходит в бассейн. Вечером он готовит уроки.

99ʼ удж. Лыддьы да корсь серпас дорӧ висьт.

1. Рыт. Лёня пуксис вӧчны гортса удж. Сійӧ ӧзтіс би да восьтіс дневник. Зонкалы медводз колӧ вӧчны гижан урокъяс, а сэсся лыддьысьны.

2. Мамыс шуис Лёнялы:
— Пиук, ветлы вузасянінӧ, ньӧб нянь, йӧв да рысь.
Лёня босьтіс пакет да мӧдӧдчис вузасянінӧ.

3. Лёня чеччис, пасьтасис да муніс мыссьыны.
Сёйӧм бӧрас мамыс юаліс:
— Лёня, тэ нинӧм эн вунӧд?
— Эг.

1. А тэ кыдзи чайтан, мый вунӧдіс Лёня?
2. Комиӧд: включил свет, сходи в магазин, ничего не забыл.

100ʼ удж. Лыддьы. Висьтав, кутшӧм выльтор тӧдмалін.

Велӧдысь урок вылын челядьлысь юаліс:
— Челядь, кымын тӧлысь ӧти воас?
— Дас кык! — вочавидзисны челядь.
Велӧдысь висьталіс водзӧ:
— Важӧн коми йӧзлӧн вӧлӧма во чӧжнас ӧкмыс кадколаст. Быд кадколаст йитчывлӧма кутшӧмкӧ пемӧс олӧмкӧд. Календарсӧ вӧчлӧмаӧсь бронзаысь. Сэтчӧ серпасалӧма ӧкмыс пемӧс: ош, кӧр, сьӧдбӧж, сан, йӧра, вурд, руч, ур да тулан. Воыс заводитчылӧма рака тӧлыссянь. Тайӧ кадӧ пиянасьӧ ош да петӧ гуысь.

101ʼ удж. Артмӧд пасъяс серти сёрникузяяс.

1.

...

2.

...

102ʼ удж. Параӧн удж. Сет ёртыдлы юалӧмъяс.

1. Мый тэ радейтан вӧчны урокъяс бӧрын?
2. Кыдзи отсасян бать-мамыдлы?
3. Кор пуксян вӧчны гортса удж?
4. Кутшӧм предметысь медводз вӧчан гортса удж?

103ʼ удж. Гиж, мый тэ вӧчан урокъяс бӧрын.

Отсӧг вылӧ: воны, отсасьны, ветлыны, ворсны, гуляйтны, лыддьысьны, видзӧдны, вӧчны, сёрнитны.

104ʼ удж. Артмӧд сёрникузяяс серпасъяс серти.

Отсав Войтлы юклыны кывъяссӧ стӧча.

эмакыв кывберд кадакыв

иславны
уджач
серпасасьысь
ён
тэрыб
ворсны
лыддьысьысь
ворсысь сулавны
йӧктысь
авъя
серпасавны

105ʼ удж. Лыддьы висьтсӧ.

СӦСТӦМ ДӦРӦМ.

Тӧрыт Вася лунтыр уджаліс Ёгор дядькӧд трактор вылын. Дядьыс весиг сетліс зонкалы кутыштны рычагсӧ. Гортас Вася воис няйт дӧрӧмӧн. Мамыс ёна и видіс писӧ, а сэсся эз нин тшӧкты мунны трактор дорас.
Талун мамыс Васялы сетіс сӧстӧм дӧрӧм да юаліс:
— Трактор дінад сэсся он нин мун?
— Ог, — гусьӧник шуис Вася да петіс ывлаӧ.
Ывлаын кыліс трактор шы. Вася видзӧдліс тракторлань да мӧвпыштіс:
— Дӧрӧмӧс ог сьӧдӧд дай.
Ёгор дядь пуксьӧдіс зонкаӧс трактор кабинаӧ. Трактор муракыліс-ветліс ыб кузя. Тракторист бара сетліс Васялы рычагсӧ веськӧдлыштны тракторӧн.
Удж бӧрын найӧ мӧдӧдчисны гортаныс. Мамыс аддзис пиыслысь няйт дӧрӧмсӧ да заводитіс видчыны. Ёгор дядь шуис:
— Эн вид питӧ. Сійӧ уджавны босьтчис. Бур механизаторӧн лоӧ.

Г. Юшков

Геннадий Анатольевич Юшков

Гӧгӧрвоӧд висьтыслысь нимсӧ.

1. Тӧдмав да висьтав Г. А. Юшков йылысь.
2. Висьтав ас нимсянь «Сӧстӧм дӧрӧм» висьтсӧ.

106ʼ удж. Лыддьы шусьӧгъяссӧ да гӧгӧрвоӧд.

Бура уджалан — ылӧдз нималан.
Ачыд он вермы — ёртъяс отсаласны.
Уджавтӧг кынӧмыд оз пӧт.
Мортлӧн олӧмыс артавсьӧ оз лунъясӧн, а сылӧн уджӧн.

107ʼ удж. Содты лӧсялана эмакывъяс.

Из кодь сьӧкыд ... . Енэж кодь лӧз ... . Ур кодь пельк ... . Дивӧ кодь мича ... . Ош кодь ён ... . Лым кодь еджыд ... . Сизь кодь уджач ... . Шонді кодь мелі ... . Руч кодь мудер ... .

Вӧч тадзи: Из кодь сьӧкыд рюкзак.

— Тэ радейтан лыддьысьны?
— Ог. Ме радейта корсьны важ кӧлуй да тӧдмавны налысь коланлунсӧ.
— Важ кӧлуй йылысь позьӧ лыддьыны уна небӧг.
— Ме юася пӧч-пӧльлысь.
— Позьӧ, дерт, юасьны пӧч-пӧльлысь, но позьӧ унатор тӧдмавны и небӧгъясысь. Ме лыдди Елена Габова да Наталья Макаровалысь «Дети древней земли» небӧг да унатор тӧдмалі коми йӧзлӧн олӧм йылысь.
— Ме ветла лыддьысянінӧ да тшӧтш лыддя тайӧ небӧгсӧ.

108ʼ удж. Лыддьы текстсӧ.

Женя ветліс лыддьысянінӧ да босьтіс интереснӧй небӧг. Кышӧд вылас серпасалӧма нывкаӧс да зонкаӧс. Найӧ вадорын. Нывкаыс лӧз сарапана, еджыд ковтаа да серӧн мичмӧдӧм водздӧраа. Кӧса помас сылӧн лӧз ленточка. Зонка вышивайтӧм дӧрӧма, вӧня, мугӧм гача, сера чулкиа да кокни кӧтіа.
Библиотекар шуис:
— Тайӧ небӧгас шӧр геройясыс — Настук да Митрук. Найӧ тӧдмасьӧны коми йӧзлӧн оланінӧн, паськӧмӧн, ворсӧмъясӧн.

1. Висьтав, кутшӧм небӧгъяс тэ радейтан лыддьыны.
2. Серпасав нывкалысь да зонкалысь паськӧмсӧ.

109ʼ удж. Лыддьӧй рольяс серти.

Настук аддзис Митрукӧс да юаліс:
— Митрук, кытчӧ тэ мунан?
— Ю дорӧ.
— Купайтчыны?
— Чери кыйны. Он аддзы али мый, киын вугыр шатин.
— А меным позьӧ тэкӧд мунны ю дорӧ?
— Позьӧ. Сӧмын эн шумит. Чери оз радейт, кор йӧз сёрнитӧны гораа.

Е. Габова серти

Радейтан-ӧ тэ вуграсьны?
Лыддьы Елена Габова да Наталья Макаровалысь «Дети древней земли» небӧг.

110ʼ удж. Лыддьы сёрнисӧ.

— Мый тэ тӧдмалін «Дети древней земли» небӧгысь?
— Ме 51-ӧд лист бокысь лыдди, кутшӧм вӧлӧма коми мортлӧн керкаыс.
— А мый, абу ӧнія кодь?
— Керкаыс вӧлӧма кык юкӧнысь: ӧтиыс — тӧвся, а мӧдыс — гожся. Тӧвсяыс ичӧтджык. Сэні сулаліс ыджыд пач, а сы весьтын — пӧлать. Челядь кӧдзыд дырйи пӧлатяс ворслісны да узьлісны.
— Ме чайта, «Дети древней земли» лои тэнад радейтана небӧгӧн.
— Да, сійӧ меным воис сьӧлӧм вылӧ. Ме унатор тӧдмалі коми йӧз да налӧн олӧм йылысь.

Мӧвпышт да висьтав, мыйла тӧвся керкаыс вӧлӧма ичӧтджык гожся сертиыс.

111ʼ удж. Лыддьы да висьтав ас кывйӧн лыддьысянін йылысь.

ас кывйӧн — своими словами

Сыктывкарын Сӧветскӧй улича вылын сулалӧ мича важ керка. Тайӧ Челядьлӧн Самуил Маршак нима лыддьысянін. Сійӧ кык судтаа, шоныд да сӧстӧм. Джаджъяс вылын сулалӧны коми да роч гижысьяслӧн небӧгъяс.
Лыддьысянінӧ быд лун волӧны гырысь да посни класса велӧдчысьяс. Найӧ босьтӧны лыддьыны гортас радейтана небӧгъяс.
Лыддьысян вежӧсын челядь тӧдмасьӧны выль журналъясӧн, газетъясӧн. Энциклопедияяс да кывкудъяс отсӧгӧн найӧ вӧчӧны гортса удж.

1. Висьтав, кутшӧм коми гижысьясӧс тэ тӧдан.
2. Кыдзи важӧн шусис Сӧветскӧй улича?

112ʼ удж. Висьтав аслад лыддьысянін йылысь план серти.

План:
1. Кӧні сулалӧ лыддьысяніныд?
2. Кутшӧм сійӧ?
3. Коді уджалӧ лыддьысянінын?
4. Кутшӧм небӧгъяс эмӧсь лыддьысянінын?
5. Кутшӧм коми гижысьясӧс тэ тӧдан?
6. Мый йылысь тэ радейтан лыддьыны?

113ʼ удж. Комиӧд кывъяссӧ да тӧдмав медводдза коми кывбур гижысьӧс.

1. Страница.
2. Школа.
3. Карта.
4. Книга.
5. Слушать.
6. Работа.
7. Любимая.
8. Рисовать.
9. Рассказать.
10. Бегать.
11. Первый.

Висьтав, мый тэ тӧдан тайӧ кывбур гижысь йывсьыс.

Вочавидз юалӧмъяс вылӧ да гиж неыджыд висьт.

1. Кутшӧм небӧг тэ лыддин?
2. Коді сійӧс гижис?
3. Коді шӧр геройыс?
4. Мый тэныд медся ёна воис сьӧлӧм вылад?
5. Мыйӧ велӧдӧ тайӧ небӧгыс?

ПАСЬТАСЯМ ДА КӦМАСЯМ.

водздӧра — передник, фартук
вӧнь — пояс
вӧравны — охотиться, заниматься охотой
вӧраланін — место охоты, охотничьи угодья
вӧралысь — охотник
дӧра — полотно (из льна, конопли)
исерга — серьги
картуз — фуражка
китайка — тонкая хлопчатобумажная ткань, изделие из этой ткани
кӧлуй — вещи
кумач — красная ткань
кучик — кожа
лаз — накидка из холста и кожи для защиты от дождя
мусмыны — полюбиться, понравиться
ной — сукно
пас — знак
подув пуктысь — основоположник
сер — узор
сикӧтш — бусы
сос — рукав
сунис — нитка
тугъя вӧнь — пояс с кистями
чорыд — грубый
чунькытш — кольцо
чуня кепысь — перчатки

114ʼ удж. Вочавидз юалӧмъяс вылӧ серпас отсӧгӧн.

1. Мый пасьталӧма нывка?
2. Мый пасьталӧма зонка?
3. Мыйӧн мичмӧдчӧма нывка?

Мичмӧдчыны — нарядиться

115ʼ удж. Корсь пӧвсӧ.

Морт серти и паськӧм.
Кутшӧм поводдя, сэтшӧм и паськӧм.
Удж серти и паськӧм пасьталан.

По работе и одежду надеваешь.
По человеку и одежда.
Какова погода, такова и одежда.

116ʼ удж. Лыддьы да висьтав небӧгӧ видзӧдтӧг.

Лымйыс сапкӧ, тӧлыс тшапкӧ.
Киӧ — кепысь, юрӧ — шапка.
Кокӧ — гынкӧм, вылӧ — пась,
Ывлаӧ ме петны дась.

Г. Юшков

— Мый тэ тӧдан Виктор Савин йылысь?
— Сыктывкарын эм Виктор Савин нима драма театр.
— А мыйла тайӧ театрыс Виктор
Савин нима?
— Тайӧс ме ог тӧд.
— Виктор Савин, а коми ногӧн Нёбдінса Виттор, вӧлӧма Коми муын медводдза драматургӧн. Сійӧ гижӧма пьесаяс да пуктӧма найӧс сцена вылын, ачыс тшӧтш и ворсӧма.
— Зэв интереснӧй морт тай вӧлӧма. Сідзкӧ, Нёбдінса Виттор — Коми муын драматургиялы подув пуктысь.
Вот мыйла театрыс Виктор Савин нима.
— Сійӧ гижӧма и кывбуръяс.
— Ме велӧді татшӧм кывбур. Кывзы:

Чужи-быдми сьӧд вӧр шӧрын,
Деревняысь петі,
Новлі чорыд сера дӧрӧм,
Визя гач да кӧті.

Муртса сувті ас кок йылӧ,
Удж пыр меным вичмис:
Зыбка дорын ӧввӧ сьывны,
Ичӧт кага видзны.

Мый йылысь Виктор Савин гижӧ кывбурас?

Виктор Алексеевич Савин

117ʼ удж. Лыддьы висьтсӧ.

Важӧн коми йӧз паськӧмсӧ вурлісны сера дӧраысь, нойысь да китайкаысь. Вурӧмторсӧ мичмӧдлісны крестӧн канва вывті. Татшӧм сернас вышивайтлісны ковта пельпомсӧ, соссӧ да водзсӧ. Мичмӧдлісны гӧрда-сьӧда сунисӧн, но содтывлісны и коймӧд рӧм.
Кӧм-пась серти позьӧ вӧлі тӧдмавны, кытысь тайӧ мортыс. Сыктыв вожын олысьяс радейтісны паськӧм сера дӧраысь, сатинысь да атласысь. Луздорсаяслы кажитчис ной паськӧм. Изьвасаяс новлісны атласысь, штапельысь, кашемирысь да шӧвкысь вурӧм паськӧм. Удорасаяслы мусмылісны лӧз дӧраысь, шӧвкысь да парчаысь кӧлуй.

«Войвыв кодзув» журналысь

118ʼ удж. Лыддьы Петялысь письмӧсӧ.

Чолӧм, Ваня!

Вот ме и пӧч-пӧль ордын. Сиктыс сулалӧ джуджыд кыр йылын, а уліас визувтӧ паськыд Эжва ю. Ваня, а кутшӧм тані чӧскыд да сӧстӧм сынӧдыс!
Аски ми пӧлькӧд мунам вӧрӧ. Сійӧ миян бур вӧралысь. Вӧравны оз на позь, но пӧль кӧсйӧ петкӧдлыны меным вӧраланінсӧ.
Пӧльлӧн эм вӧралан кӧм-паськӧм. Тайӧ кӧлуйсӧ сылы сетлӧма батьыс, менам прапӧль. Пӧль кӧмалас кучик кӧті. Кӧтіыс зэв кокни. Эм нӧшта кучик лаз. Сійӧ состӧм ковта кодь, а мышкуас петля. Лазйыс зэр дырйи видзӧ кӧтасьӧмысь.
Тӧлысь мысти локта гортӧ да ставсӧ висьтала.

Аддзысьлытӧдз. Тэнад Петя ёрт.

1. Висьтав, мый тӧдмалін письмӧысь.
2. Гӧгӧрвоӧд кывкуд отсӧгӧн татшӧм кывъяс: вӧр, вӧралысь, вӧравны, вӧраланін.
3. Аддзы да гиж письмӧысь кывтэчасъяс: кывберд+эмакыв.

Вӧч тадзи: Эжва (кутшӧм?) паськыд.

«Кутшӧм сійӧ?» «Мый вермас лоны татшӧмӧн?» ворсӧм.

Ворс тадзи:
Вӧнь — мича, кузь, сера, векни.
Лӧз — енэж, ю, дӧрӧм.

Чунькытш — ... , ..., ... .
Кӧса — ..., ..., ... .
Сера — ..., ... .
Векни — ..., ... .

векни — узкий

119ʼ удж. Лыддьы висьтысь юкӧн.

ЫДЖЫД ЛУН АСЫЛӦ.

Кутшӧм мича рӧма шондіыс Ыджыд лун асылӧ!
Кӧсьта мыссис да кутіс пасьтасьны-вӧччыны. Пасьталіс кумач дӧрӧмсӧ, вӧнясис мича тугъя вӧньӧн, кӧмаліс ной гачсӧ, пинжакасис, кучик сапӧгасис. Рӧмпӧштан водзын картузасис. Лэптіс вылӧ пельпомъяссӧ да бара видзӧдліс рӧмпӧштанӧ. Коли дӧвӧль аснас.

Б. Шахов

1. Висьтав, мый тэ пасьталан гажлун дырйи.
2. Содты висьтысь кывбердъяс.
Шонді (кутшӧм?) ... , дӧрӧм (кутшӧм?) ... , вӧнь (кутшӧм?) ... , гач (кутшӧм?) ... , сапӧг (кутшӧм?) ... .
3. Серпасав Кӧсьталысь паськӧмсӧ.

120ʼ удж. Уськӧд тӧд вылад «Дети древней земли» небӧгса геройяслысь паськӧмсӧ.

1. Нывъяслӧн мичмӧдчантор.
2. Дӧрӧм кӧртӧд.
3. Пасьтавлісны сарапан вылӧ.
4. Кыдз пулӧн да нывъяслӧн мичмӧдчантор.
5. Кыӧны кӧсаӧ.
6. Ныв паськӧм.
7. Важся кӧмкот.
8. Чунь гӧгӧр кытш.

Вӧч проекта удж «Паськӧм» тема вылӧ.

1. Мӧвпышт да серпасав ӧнія паськӧм коми сер отсӧгӧн.
2. Вӧчӧй классаныд выставка.

МЕ ДА МЕНАМ ЁРТЪЯС.

арлыд — возраст
вежӧра — умный, смышлёный
вензьыны — спорить
вильыш — озорной, шаловливый
вына, ён — сильный
жугыль — скучный
лелькуйтчанкыв — потешка
полысь — трусливый, боязливый
рам — спокойный, тихий, кроткий
сьӧм — деньги
сюрӧмтор — находка

121ʼ удж. Юклы кывкудйысь кывъяссӧ кык чукӧрӧ.

— Кымын арӧс ёртыдлы?
— Ёртлы тырис дас арӧс.
— Кымынӧд классын сійӧ велӧдчӧ?
— Ёрт велӧдчӧ нёльӧд классын.
— Ті велӧдчанныд ӧти классын?
— Да, ми велӧдчам ӧтлаын.
— Ті важӧн нин ёртасянныд?
— Ми ёртасям детсадсянь.
— Кутшӧм тэнад ёртыд?
— Сійӧ вына, ветлӧ каратэ секцияӧ. Менам ёрт вежӧра, велӧдчӧ сӧмын «4» да «5» вылӧ. Сійӧ батьыс моз жӧ кӧсйӧ лоны программистӧн.

Артмӧдӧй сёрни.

Порядковые числительные.
Пӧрадок петкӧдлысь лыдакывъяс.

Они образуются при помощи суффикса -ӧд.
Найӧ артмӧны -ӧд суффиксӧн:
Который? Кымынӧд?

ӧти — один
ӧти+ӧд — первый, медводдза
кык — два
кык+ӧд — второй
куим — три
койм+ӧд — третий
нёль — четыре
нёль+ӧд — четвёртый
вит — пять
вит+ӧд — пятый

122ʼ удж. Уджалӧй параӧн. Сетӧй ӧта-мӧдлы юалӧмъяс комиӧн.

1. Сейчас которая неделя месяца?
2. Который час теперь?
3. В каком классе учишься?
4. В котором часу заканчиваются уроки?

123ʼ удж. Лыддьы висьтсӧ.

сюрӧмтор — находка

СЮРӦМТОР.

Серёжа да Саша туй вылысь аддзисны 50 шайт. Сулалӧны да вензьӧны, кыдзи юкны сьӧмсӧ. Матыстчис на дорӧ вит арӧса Паша Попов. Воштӧма сьӧмсӧ да гораа бӧрдӧ.
Саша шуис зонкаяслы:
— Аддзӧм сьӧмсӧ юкам ставлы ӧткодя.
Пашалы ньӧбисны нянь, а кольӧм сьӧм вылас — аслыныс шоколад кампет.
Но Паша век на бӧрдіс, да ковмис сылы тшӧтш сетны ӧти кампет. Паша кампетсӧ босьтіс, но гортас муніс бӧрдігтыр.

1. Мыйла бӧрдіс Паша?
2. Бура-ӧ, тэ думысь, вӧчисны кык ёрт?
3. Мыйла кампет босьтӧм бӧрын Паша эз дугды бӧрдны?
3???. А кыдзи эськӧ тэ вӧчин Серёжа да Саша местаын?

124ʼ удж. Лыддьы висьтсӧ.

ШАШКИ.

Батьӧ менӧ велӧдіс ворсны шашкиӧн. Ми тшӧкыда рытъяснас ворслім сыкӧд. Но бать менӧ вермыліс.
Гожӧмнас миян сиктӧ воис суседкалӧн внукыс. Сійӧс шуисны Тимаӧн. Зонка пызан вылысь аддзис шашки да юаліс:
— Тэ шашкиӧн ворсан, Миша?
— Ми батькӧд ворсам, да ме век верма сійӧс.
— Вай ворсам, — корис Тима.
Ми пуксим ворсны. Ворсім ӧтчыдысь, мӧдысь, коймӧдысь. Тадзи ме ворсси витысь.
— Тырмас! — шуи ме. ...

С. Раевский серти

1. Помав висьтсӧ. Лыддьӧй рольяс серти.
2. Мыйӧ велӧдӧ висьтыс?
3. Инды висьтысь лыдакывъяс.

«Вежӧра морт» ворсӧм. (Позьӧ ворсны чукӧрӧн.)
Велӧдчысь сетӧ ёртыслы 3 юалӧм. Вочавидзас кӧ
ёртыс, сійӧ сетӧ юалӧмъяс мӧд велӧдчысьлы.

125ʼ удж. Лыддьы зонкалысь висьталӧмсӧ.

Ме вӧлі вильыш да сюсь зонкаӧн. Менам ёрт — рамӧн да уджачӧн. Урокъяс бӧрын медводз сійӧ отсасис мамыслы, а сэсся пуксьыліс вӧчны гортса удж.
Ӧтчыд ёртӧс аддзи жугыльӧн. Сійӧ висьталіс, мый висьмӧма мамыс. Ме отсалі сылы вӧчны гортса удж. Ми кыкӧн пелькӧдім вежӧс, ветлім аптекаӧ мамыслы лекарствола.
Ёртлӧн мамыс нимкодя шуис:
— Ті — бур ёртъяс. Тадзи пыр отсасьӧй ӧта-мӧдныдлы.

Вочавидз юалӧмъяс вылӧ.

1. Тэнад эм ёрт?
2. Мый радейтанныд вӧчны ёртыдкӧд прӧст кадӧ?
3. Кутшӧм вогӧгӧрся кад медся ёна радейтӧ ёртыд?
4. Кутшӧм небӧгъяс радейтӧ сійӧ лыддьыны?
5. Кутшӧм шылад воӧ ёртыдлы сьӧлӧм вылас?
6. Ёртыдлӧн эм радейтана пемӧс?

Гиж неыджыд висьт аслад ёрт йылысь юалӧмъяс серти.

126ʼ удж. Лыддьы колана ногӧн лелькуйтчанкывсӧ.

Катша рок пуис, пуис, пуис, пуис.
Медводдзаыс видліс,
Мӧд солаліс,
Коймӧд гудраліс,
Нёльӧд паньыштіс,
Витӧдыслы эз тырмы.
Зэрмис, да
Кобулӧ тюр пышйис!

Фольклорысь

Велӧд да вӧч физминутка.

127ʼ удж. Артмӧд сёрникузяясысь висьт да гиж.

ВОТЧӦМ.

Шор дорысь аддзисны ӧмидз кустъяс. Челядь мунісны вотчыны. Найӧ сувтісны куст гӧгӧр да заводитісны вотчыны. Ӧмидзыс вӧлі уна. Муніганыс сьылісны, сёрнитісны. Воисны найӧ ичӧтик шор дорӧ. Дозныс тыри ӧдйӧ. Вотчӧм бӧрын чӧсмасисны ӧмидзӧн.

128ʼ удж. Паськӧд сёрникузяяссӧ.

Зонкаяс мунісны ю дорӧ ... . Медводдза зонкаыс ... . Недыр мысти мӧд ёртыс ... . Коймӧдыс да нёльӧдыс ... . Челядь гожйӧдчисны да купайтчисны лунтыр. Налы вӧлі зэв гажа ... .

ГАЖА ТУЛЫС ВОИС.

бедь — палка
вап — краска
вежӧдны — святить, освятить
весавны — чистить
вичко — церковь
ёг — мусор
идравны — убрать
кыш — скорлупа, шелуха
мичмӧдны — украшать, украсить, красить
тотшкысьны — стукнуться
тувсовъя — весенний
Ыджыд лун — Пасха

129ʼ удж. Корсь тувсов тӧлысь нимъяс.

му
ка
ода
ва
ра
кора
войт
кос
ыт

Тӧвнас шонтӧ, тулыснас сылӧ, гожӧмнас кулӧ, арнас бӧр ловзьӧ.
— Ӧльӧксан, тэ тӧдмалін нӧдкывсӧ?
— Ме чайта, пась. Сійӧ тӧвнас шонтӧ, а тулыснас мамӧ идралӧ пасьсӧ шкапӧ тӧлӧдз.
— Эк тэ, видзӧдлы кадакывъяс вылас.
— Но! Шонтӧ, сылӧ, кулӧ, ловзьӧ.
— Абу, Ӧльӧксан, тайӧ абу пась. Мӧвпыштлы.

А тэ кыдзи чайтан, мый тайӧ?

Рака тӧлысь — коймӧд пилы
Зэв лӧсялӧ «Рака» нимыс.
Ӧбичаыс тешкодь овлӧ —
Тулысыс и тӧлыс волӧ.

Нёльӧд пиыс — Косму тӧлысь —
Югыд зарни дзирдӧн тыр.
Пышйӧ лымйыс, садьмӧ муыс,
Гут-гаг мыччӧдлӧ нин ныр.

Ода-кора — витӧд пиыс —
Аттӧй уджач, аттӧй чож.
Гӧрас, кӧдзас, быдтор пуктас,
Вӧчас лэбачьяслы поз.

Г. Попов серти

1. Лыддьы кывбурсӧ.
2. Вӧчӧй небӧг «Тулыс» тема вылӧ.

130ʼ удж. Юклы кывъяссӧ чукӧръяс вылӧ.

Гожӧм, шонді, кӧдзыд, иславны, визувтны, дзоридзавны, дадь, пӧлӧзнича, купайтчыны.
Ӧшкамӧшка, шор, лым чир, шоныд, тӧв, тулыс, мича, югыд, зэрны, дзирдавны, гажа, визув.

МАША. Ме зэв ёна радейта Ыджыд лун гаж.
СЕНЯ. Меным кажитчӧ жӧ Ыджыд луныд. А мый тэ вӧчан тайӧ гажлунас?
МАША. О-о-о!
СЕНЯ. Мый тэ шыясӧн сёрнитан?
МАША. А кыдзи тэ чайтан, мый тайӧ шынас кӧсйи висьтавны?
СЕНЯ. Дерт жӧ, ме чайта, унатор. А медводз мыйкӧ гажатор, интереснӧйтор.

1. Кыдзи ті чайтанныд, мый вермас висьтавны Маша Ыджыд лун йылысь?
2. Кыдзи ті лӧсьӧдчанныд Ыджыд лун кежлӧ?

131ʼ удж. Лыддьы Машалысь висьталӧмсӧ.

Ыджыд лун — тувсовъя ыджыд гажлун. Тайӧ лунӧ ловзьӧма Исус Кристос. Ми бать-мамкӧд Ыджыд лун кежлӧ лӧсьӧдчам водзвыв. Батькӧд пелькӧдам керка пытшкӧс, вӧчам качай. Мам пӧжалӧ чӧскыд кулич. Нянь пытшкас пуктӧ изюм, а вывсӧ мичмӧдӧ да гижӧ «Кристос ловзис!» Нӧшта ми пуам чипан кольк, мичмӧдам лук кышӧн либӧ вузасянінысь ньӧбӧм вапӧн.
Асывнас котырӧн ветлам вичкоӧ, вежӧдам кулич да чипан кольк.
Бать-мам ветлӧны гӧститны рӧдвуж ордӧ, а ми, челядь котыр, лунтыр ворсам да качайтчам.

Мый тэ тӧдмалін Машалӧн висьталӧмысь?

132ʼ удж. Помав сёрникузяяссӧ.

Мам пӧжаліс (мый?) ... . Ыджыд чой гижис (мый?) ... . Ми кольк мичмӧдім (мыйӧн?) ... . Вежӧдім кольк (кӧні?) ... . Чипан колькйӧн (мый вӧчим?) ... .

133ʼ удж. Висьтав, кутшӧм кадын, мортын да лыдын кадакывъясыс.

Лӧсьӧдчам, пелькӧдам, пӧжалам, пуктам, мичмӧдам, пуам, вежӧдам, тотшкӧдчам, чӧсмасям.

Сувтӧд тайӧ кадакывъяссӧ ӧнія кадын, 1 мортын, ӧтка лыдын да гиж.

134ʼ удж. Помав сёрникузяяссӧ.

Рӧштво — тайӧ ... . Исус Кристос чужис ... ... . Нывъяс Рӧштво дырйи ... . Ыджыд лун — тувсовъя ... . Тайӧ лунӧ ловзис ... . Ыджыд лунӧ йӧз ... ... .

135ʼ удж. Лыддьы Борис Шахов висьтысь юкӧн.

ЫДЖЫД ЛУН.

Ыджыд лун. Тайӧ гажлуныс быдӧнлӧн: и пӧрысьяслӧн, и томъяслӧн, и челядьлӧн. Быд керкаын пелькӧдчӧма, рытсяньыс пусьӧма-пӧжасьӧма. Став олысьлӧн пызан вылас быдтор лоӧ: и яя шыд, и чӧскыд чериняньяс, и нӧкъя рысь, и пирӧг-шаньгаяс. Йӧз ставсӧ видзӧмаӧсь Кристос ловзян лун кежлӧ.

Висьтав ас кывйӧн Ыджыд лун йылысь.

Тӧдмав, мый коми йӧз сёйлісны гажлун дырйи.

136ʼ удж. Лыддьы мичаа кывбурсӧ.

ыб — поле
пым — горячий
скӧнь — совсем

ТУВСОВ ШОРЪЯС.

Ыбын тыдалӧ на лым.
Гӧгӧр бузгӧ тувсов шор.
Шонді югӧр лои пым.
Став му пасьта кылӧ гор:
«Тулыс локтӧ — мелі, лӧнь!
Тулыс локтӧ — мича, том!
Юргӧ-сьылӧ гӧгӧр скӧнь...
Кӧдзыд тӧвлы воис пом!»
Садьмӧ гӧгӧр, воштӧ ун:
Локтӧ тулыс — варов, збой!
Регыд воас ода-кора лун,
Еджыд-югыд тувсов вой.

Ф. Тютчев (комиӧдіс В. Лыткин)

Аддзы кывбурысь кывсикасъяс: эмакывъяс, кадакывъяс, кывбердъяс.

137ʼ удж. Лыддьӧй висьтсӧ рольяс серти да серпасалӧй.

ОЛЯЛӦН ВИЖ Ю.

Садйысь локтӧны мам да нёль арӧса Оля. Мам юалӧ нылыслысь:
— Оля, тэныд кымын арӧс ӧні?
— Неуна нёль, — вочавидзӧ Оля.
— Мыйла неуна? — оз гӧгӧрво мамыс.
— Куим арӧсыс вӧлі зэв дыр, а нёльыс сӧмын на неуна.
— Мыйӧн талун вердісны садикад?
— Зэв чӧскыдторйӧн, ме ставсӧ сёйи, — зэв ӧдйӧ шуис Оля.
Оля копыртчис да кутіс любуйтчыны визув шорӧн.
— Тэ, мамӧ, бурджык юав, мый ме серпасалі талун.
— Мый нӧ?
— Ме серпасалі виж ю, — висьталіс Оля.
— Мыйла нӧ тэнад юыс виж рӧма? — нюмъялӧ мамыс.
— Кывтіс виж карандашъяса пыж, лэптысис тӧв, и карандашъясыс усисны ваӧ. Сійӧн и юыс лоис виж, — шуис Оля.
Мамыс велӧдӧ:
— Мӧдысь пыжас лӧз карандашъяс тэч. Найӧ кӧ усясны ваӧ, сэк юыс лоӧ лӧз.

М. Лызлова

138ʼ удж. Лыддьӧй висьтсӧ рольяс серти.

АГНИЯ БАБ — ВОЛШЕБНИК.

— Мам, мыйла Агния бабтӧ шуӧны се-лек-ци-о-не-рӧн?
— Кодлысь нӧ кывлін?
— Тӧрыт на бать шуис. Код нӧ сійӧ лоӧ?
— Селекционерыс — сійӧ став быдмӧг вылас волшебник.
— Волшебник?
Анна кватитіс ковтасӧ, пасьталіс да котӧрӧн петіс ывлаӧ.
Керкаыс Агния баблӧн сулаліс шор сайын. А керка гӧгӧрыс мый сӧмын эз быдмы: льӧм пуыд и пелысьыд, сус пуыд и ниаыд, сэтӧрыд и ӧмидзыд.
Анна вуджис шорсӧ, пырис Агния баб йӧрас да горӧдіс:
— Агния баб, Агния баб, тэ — селекционер.
— Коді, коді? — шыасис Агния баб.
— Волшебник став быдмӧг вылас.
— Да, ме волшебник и эм, — нюммуніс пӧч.
— Волшебник? Мыйла нӧ либӧ нинӧм эн висьтавлы?
— А эн юавлы да.
Вот тайӧ да. Тайӧс Аннуш некыдз эз вермы гӧгӧрвоны. Волшебникъяс йылысь Анналы мамыс лыддьывліс мойдъяс, телевизор пыр кино видзӧдліс. Но Агния баб — волшебник? Но и но!
— Лок, ме тэныд мыйкӧ петкӧдла, — шуис Агния баб.
Пывсян дорас вӧлі град йӧр. Сэні быдмисны сус пу да куим коръя пу. А ӧти пу вылын дзирдалісны ичӧтик еджыд дзоридзьяс. Ӧтик, мӧд, коймӧд ... . А кутшӧм чӧскыд дукаӧсь тайӧ дзоридзьясыс!
— Агния баб, мый тайӧ? — юаліс Аннуш.
— Яблоня.
— И яблӧгъяс быдмасны? — чуймис нывка.
— Оз кӧ кынмы, быдмасны. Колӧ дӧзьӧритны.
— Агния баб, тэ збыль волшебник? А тэнад волшебнӧй беддьыд эм?
— Эм, быдса дас.
— Дас? А меным ӧтикӧс сетан?
— Ог. Тэнад аслад эм.
— Менам? Кӧні?
— Чуньясыд.
— Да, бара ме вылын шмонитан.
— Ог, ог шмонит, нылук. Киясыд и керка лэптӧны, нянь быдтӧны. Сӧмын колӧ найӧс уджӧдны.
Аннуш топӧдчис пӧчыс дінӧ:
— Ме мӧда тэныд отсасьны.

Е. Козлова серти

1. Висьтав, мый тэ кужан вӧчны.

Отсӧг вылӧ: пуны картупель, пӧжавны блин, гладитны дӧрӧм, песласьны, нетшкыны ёг, пелькӧдчыны гортын.

2. Эм-ӧ тіян град йӧр? Мый сэні быдмӧ?

ТАНІ СТАВЫС МЕНЫМ МУСА.

бадь — ива
быдмӧг — растение
быдмыны — расти
гут — муха
енгаг — божья коровка
йӧла турун — одуванчик
кобув — укрытие от дождя
кодзувкот — муравей
коръя пу — лиственное дерево
лӧдз — овод, слепень
лыска пу — хвойное дерево
лэбавны — летать
ниа — лиственница
ньыв пу — пихта
пузьыны — вскипеть, закипеть
рӧмпӧштан — зеркало
сикӧтш — бусы
сур — пиво
чирк — кузнечик
юрсигусь — стрекоза

139ʼ удж. Юклы кывъяссӧ чукӧръяс вылӧ.

пожӧм
кыдз
коз
маръямоль
бадь
ниа
лежнӧг
пелысь
кодзувкот
ном
гут
енгаг
бобув
юрсигусь
петшӧр
катшасин
пӧлӧзнича
йӧла турун
мазі
льӧм

140ʼ удж. Содты колана кывъяс.

Маръямоль, катшасин, ..., ..., ... — тайӧ ... .
Ном, гут, ..., ..., ... — тайӧ ... .
Коз, пожӧм, ..., ..., ... — тайӧ ... .

141ʼ удж. Вочавидз юалӧмъяс вылӧ.

1. Кутшӧм дзоридзлӧн син шӧрыс виж, а дорыс еджыд?

2. Кутшӧм быдмӧгысь тэ полан?
3. Кутшӧм дзоридз шуӧны войвывса розаӧн?
4. Кутшӧм рӧма йӧла турунлӧн дзоридзыс тулыснас?
5. Кутшӧм дзоридзьяс йылысь лӧсьӧдӧма сьыланкывъяс?

142ʼ удж. Лыддьы текстсӧ.

Машалӧн мамыс мӧдӧдчис мырпомла. Мудер Маша мӧвпаліс, мунны-ӧ мамыскӧд.
Майшасьыштӧм мысти Маша мездысис мисьтӧм мӧвпъясысь. Меліасьыштіс мамыскӧд, муртса мачасьыштіс Мишакӧд.
Маша муніс мамыскӧд мырпомла.

1. Тэ радейтан вотчыны?
2. Кӧні быдмӧ мырпом?

— Пӧч, гожӧмнас ветлам вотчыны?
— Ветлам, мед сӧмын лоӧ вотӧсыс.
— Пӧч, а кутшӧм вотӧс тэ радейтан вотны?
— Ме радейта вотны чӧд.
— А ме радейта вотны ӧмидз.

143ʼ удж. Корсь пӧвсӧ.

смородина
черника
малина
морошка
брусника
клюква
земляника
черёмуха

оз
турипув
льӧм
сэтӧр
мырпом
пув
ӧмидз
чӧд

Артмӧд юржугӧдан вотӧс нимъясӧн.

144ʼ удж. Лыддьы мойдсӧ да ворс.

ПАРМА — ГОРТ.

Быд мортлӧн эм горт. А Настуклӧн гортыс пармавӧр. Узьлӧ ныв коз пу улын. Сэтчӧ вольсалӧма ньыв пу лапъяс, небыд коръяс. Ок, кутшӧм лӧсьыд! Кор кынӧмыс кутас сюмавны, Настук кинас вачкыштас пуӧ, и сы дорӧ пу вылысь чеччыштасны уръяс. А вомас быд урлӧн коль. Нылук сёяс, аттьӧалас уръясӧс да котӧртас вӧрса ты дорӧ. Юас сӧстӧм ва, купайтчас да аттьӧалас вӧр-васӧ. Сэсся окота лоас сылы котралыштны-ворсыштны. Чукӧстас кӧинпиӧс, и тӧвзясны сыкӧд пуяс костті, видз вывті горзігтырйи:
— Эге-гей, суӧд менӧ!
Со ӧд кутшӧм Настуклӧн гортыс!

145ʼ удж. Лыддьы Илля Вась мойдысь юкӧн.

ДЗИЗГЫСЬ-ДЗАЗГЫСЬ ГУТ.

Дзизгысь-дзазгысь гут,
Госыс сизим пуд,
Талун чеччис
Шонді петтӧдз.
Мошкоритчис асывбыд,
Пуис чӧскыд яя шыд.
Пирӧг-шаньга артмис бур.
Пызан вылын тшай да сур.

Пасьталіс шӧвк сарапан.
Водзас пуктіс рӧмпӧштан.
Вылас ӧшліс уна сикас
Исерга да югыд сикӧтш.
Кокнас топ, кинас тап —
Талун гутыд миян тшап.
Сарапаныс сылӧн мича:
Талун гутыд именнича!

Брун да бран да шур да шар:
Пузис ыджыд самӧвар.
Самӧварын ваыс пӧсь.
Локтӧ гӧстя, локтӧ гӧсьт.
Гӧсьтъяс пытшкын медбур тан
Веж мундира тӧрӧкан.

Ӧшинь пырыс чирк
Пызан сайӧ — звирк!
Ызгис-пырис лӧдз —
Сук пармаса пӧч.
Вӧсни коска кодзувкот
Нэмсӧ тэрмасьӧ, оз чот.
Корсьӧ бобув аслыс кобув:
Аддзис гутлысь жыр,
Пырис пырысь-пыр.

Ичӧтик да жеб
Воис кыськӧ геб.
Лэбзис шомгаг — жбыр...
Гӧстя керка тыр.

Именнича, кылӧ, дзуртӧ:
«Сёйӧй-юӧй сьӧлӧм нуртӧ!
Видлӧй чӧскыд черинянь!
Энӧ пуктӧй кисьыд пань!
Бобув, муса чой,
Льӧмъя лязсӧ сёй».

Гижӧма К. И. Чуковский серти

Нуӧдӧй В. И. Лыткин (Илля Вась) мойдъяслы сиӧм рыт.

КОМИ МУӦЙ, СЬӦЛӦМШӦРӦЙ.

биару — газ
вож — приток
Войвыв Двина — Северная Двина
вӧр-ва — природа
дӧрапас — флаг
жов пу — калина
зарни — золото
из шом — каменный уголь
канму — государство
канпас — герб
кып — гимн
мусир — нефть
ном — комар
озырлун — богатство
перйӧны — добывают
сёй — глина
сю — рожь
тусяпу — можжевельник
ыб — поле, (Ыб — сикт ним)
юргыны — звучать
Эжва — Вычегда

146ʼ удж. Лыддьы кывбурсӧ мичаа.

АС ЧУЖАН МУ.

Олан жӧ вылан тэ,
Ас чужан му, —
Веж еджыд яг нӧрыс,
Дзирдалан ю!

Олад жӧ вылад,
Енэжлӧн лӧз,
Кыпыда сьылысь
Уджалысь йӧз!

Илля Вась

Гӧгӧрвоӧд кывбур нимсӧ.

чужан му — ас му — чужанін

— Россияын эм уна республика, и быдӧнлӧн аслас пасъяс. Кутшӧм пасъяс эмӧсь Коми Республикалӧн?
— Флаг, герб, гимн.
— Флаг, герб да гимн — тайӧ рочӧн. А комиӧн кыдзи?
— Флаг — дӧрапас, герб — канпас, гимн — кып.
— Мый ӧткодьыс тайӧ кывъясас?
— Дӧрапас да канпас кывъясын эм пас кыв.

147ʼ удж. Лыддьы текстсӧ.

Дима локтіс велӧдчанінысь да висьталіс мамыслы:
— Мам, тэ пыр шуан флаг, герб, гимн. Вӧлӧмкӧ, комиӧн дзик мӧд ног шусьӧ.
Флаг — тайӧ дӧрапас. Артмӧма кык кывйысь: дӧра — полотно, пас — знак.
Канпас — тайӧ герб. Сійӧ артмӧма кан — государство да пас — знак кывъясысь. Рочӧн кӧ — знак государства.
Кып — тайӧ гимн, сійӧ юргӧ гажлунъяс дырйи.

1. Висьтав, кутшӧм пасъяс овлӧны.
2. Кутшӧм гажлунъяс дырйи юргӧ кып?

Тӧд вылӧ!

Коми Республикалӧн канпас кык рӧма: зарни да гӧрд. Гӧрд рӧм вылын зарни рӧма варыш. Сійӧ петкӧдлӧ вын. Лэбач морӧсас аньлӧн чужӧмыс петкӧдлӧ «Зарни Аньӧс» — став бурсӧ видзысьӧс. Чужӧм гӧгӧрыс квайт йӧра юр. Йӧра — мичлун петкӧдлысь пас.

Орччӧд Россияса да Коми Республикаса канпасъяс.

Коми Республикалӧн дӧрапасыс куим рӧма: лӧз, турунвиж, еджыд.
Лӧз рӧм петкӧдлӧ войвывса сӧстӧм енэж, турунвиж рӧм — помтӧм-дортӧм парма, еджыд рӧм — лымъя войвыв.

Кутшӧм рӧмъяса Россиялӧн дӧрапасыс?

Коми мулӧн кыплысь кывъяссӧ да шыладсӧ гижис Виктор Савин.

Лыддьы Россиялысь да Коми мулысь кыпъяссӧ.

Сложные имена существительные состоят из двух или нескольких корней.
Сложнӧй эмакывъяс артмӧны кык да унджык кыввужйысь: канпас, дӧрапас, мусерпас.

148ʼ удж. Лыддьы нывкалысь письмӧ.

Видза олан, Таня!
Меным тэсянь воис письмӧ. Зэв ыджыд аттьӧ. Ми письмӧтӧ лыддим ыджыд чойкӧд. Миянлы лои зэв нимкодь, мый тэ юасян Коми му йылысь.
Миян Коми му ыджыд да зэв озыр. Войвылын перйӧны из шом, мусир да биару. Эм и зарни, сёй, лыа. Тайӧ ставыс мупытшса озырлун. Из шом перйӧны Воркутаын да Интаын. Биару эм Вуктылын да Усинскын, мусир — Ухтаын да Усинскын. Тайӧ каръясас олӧны уджач да кӧдзыдысь повтӧм йӧз.
Аддзысьлытӧдз. Тэнад нывъёрт Тоня.

Кутшӧм выльтор тӧдмалін нывка письмӧысь?

149ʼ удж. Корсь эмакывъяс.

М
У
С
И
Р
С
Б
О
У
Н
Ё
И
З
Л
И
Й
А
Ы
Р
З
У
Р
М
О
Ш
З
А
Р
Н
И

1. Инды сложнӧй эмакывъяс. Мыйла найӧс шуӧны сложнӧйӧн?
2. Лӧсьӧд сложнӧй эмакывъясӧн сёрникузяяс.

150ʼ удж. Помав сёрнисӧ.

— Ме письмӧсьыд тӧдмалі, мый Коми муын эм уна сикас мупытшса озырлун. А нӧшта мыйӧн озыр тіян муныд?
— Ми олам пармаын. Сідзкӧ, миян му озыр ..., ..., ... .
А юяс озырӧсь ... .

Тӧд вылӧ!
Коми йӧз важысянь кыйсисны. Вӧрпа куысь вурлісны пась, шапка, кепысь да кӧмкот. Дона кусӧ вежлісны кыйсян, кӧрта кӧлуй, мичмӧдчантор да дона дӧра вылӧ.

151ʼ удж. Гиж сёрникузяяссӧ, серпасъяссӧ веж кывъясӧн.

Коми аньяс да нывкаяс вӧрысь чукӧртлісны * да *. Вотӧссӧ сёйлісны йӧлӧн, * косьтылісны, * кынтылісны, а * кӧтӧдлісны ваӧн либӧ пӧжлісны.
* косьтылісны, солавлісны. Сола да кос тшакысь пӧжавлісны *. Медся бур тшакӧн лыддьывлісны * да *.

Гиж колян када кадакывъяссӧ ӧнія кадын, уна лыдын.

Вӧч тадзи: чукӧртлісны — чукӧртӧны, ...

152ʼ удж. Лыддьы кывпесансӧ мичаа.

Ыджыд айӧ вӧрӧ кайӧ,
Ыджыд нопйӧн мыйкӧ вайӧ.
Ыджыд мамӧ разьӧ ноп,
Сэні ыджыд-ыджыд гоб.

Г. Юшков

Лэбигӧн — дзизгӧ, пуксяс — чӧв олӧ. Коді сійӧс виас, сійӧ ассьыс вирсӧ кисьтас.

153ʼ удж. Лыддьы висьтсӧ.

Митя да Настук мамыскӧд мунісны вӧрӧ вотны юмов чӧд. Луныс кымӧра, да номйыс вӧлі зэв уна. Мамыс Настукӧс чышъянӧдіс, а Митяӧс мавтіс антикомаринӧн. Зонка шуис:
— Ог радейт номъясӧс. Найӧ курччасьӧны да дзизгӧны ныр улын.
Мамыс Митялы вочавидзис:
— Митя, а номтӧгыд эськӧ лэбачыд этша вӧлі. Ном — лэбачьяслӧн сёян. Номлысь личинкаяссӧ сёйӧны черияс. Вӧр-ваын ставыс колана.

1. Кутшӧм буртор вайӧны вӧр-валы номъяс?
2. Лыддьӧй висьтсӧ рольяс серти.
3. Вочавидз юалӧмъяс вылӧ.

1) Кытчӧ мунісны Настук да Митя мамыскӧд? 2) Кутшӧм вӧлі луныс? 3) Мый вӧчис мамыс Настукӧс да Митяӧс? 4) Мыйла Митя оз радейт номъясӧс? 5) Мый вочавидзис зонкалы мамыс?

154ʼ удж. Мичаа лыддьы да гиж паметь серти.

МЫЙ ВӦЧНЫ КӦЧЛЫ?

Тӧлын уна удж оз вӧч
Дженьыд бӧжа тэрыб кӧч.
Мый нӧ колӧ вӧчны
Дзикӧдз кынмӧм кӧчлы?

С. Попов

Вочавидз юалӧм вылӧ.

155ʼ удж. Лыддьы висьтсӧ. Лӧсьӧдчы велӧдчан изложение кежлӧ.

ПЫШКАЙЯС.

Кӧкъямыс пышкайпи пукалісны лымъя ув вылын ӧта-мӧд дорас топӧдчӧмӧн.
— Олӧй ӧтсӧгласӧн, челядь, — шуис налы пӧрысь пышкай-бать. — Ӧтсӧгласӧн кӧ кутанныд овны, кокни лоӧ вуджны тӧвся кӧдзыдсӧ.
— Кутам овны ӧтсӧгласӧн! — горӧдісны ӧтвылысь пышкайпиян.
Регыд мысти ӧти пышкайпи аддзис му вылысь нянь шӧрӧм. Сійӧ лэбӧдіс няньсӧ асланыс позйӧ да юксис вокъясыскӧд.
Тадзи ӧтсӧгласӧн найӧ олісны тӧвбыд.

1. Кыдзи тэ гӧгӧрвоан «овны ӧтсӧгласӧн»?
2. Кыдзи ті оланныд классаныд?

156ʼ удж. Кутшӧм кыв лишнӧй? Мыйла?

Пипу, тусяпу, кыдз пу, жов пу.
Ур, ёкыш, йӧра, кӧр.
Чӧд, оз, пожӧм, сэтӧр.
Гоб, вотӧс, ельдӧг, уртшак.

157ʼ удж. Артмӧд сёрникузяяс сетӧм кывъясысь да серпасав.

Пу, вылын, коз, пукалӧ, лэбач. Пукалӧ, дзоридз, вылын, мича, мазі. Кыдз, дорын, пу, быдмӧ, ичӧтик, тшак. Пожӧм, куйлӧ, улын, коль, коз. Тусяпу, ном, весьтын, лэбалӧ. Пу, дзебсясьӧ, сайын, руд, кӧч. Чуманын, дона гоб, тыдалӧ, гӧрд гоб да. Руч, вӧрса, котӧртӧ, туйӧд. Ӧмидз, чӧскыд, ошпи, сёйӧ.

158ʼ удж. Тӧдмав, кутшӧм кывсикасъясӧн лоӧны торйӧдӧм кывъясыс.

Изъяс вывті котӧртӧ ю,
Чӧскыд васӧ сэтысь ю.
Кор тэ татчӧ быдмин, кыдз,
Еджыд кока мича кыдз?
Видзьяс сайын козъя вӧр,
Чуман босьт да ӧдйӧ вӧр.
Керка сайын паськыд видз,
Сэні лунтыр мӧстӧ видз.

159ʼ удж. Лыддьы кывбурсӧ да инды аснима эмакывъяс.

Пуксьӧ кодыр асыв,
Паджгаын да Часын,
Аныбын да Гамын
Кылӧ уджлӧн шыыс.
Визин босьт, кӧть Лӧзым —
Быдлаын зіль йӧзыд.
Ӧтияс Ухтаын,
Мӧдъяс Вӧркутаын,
И Печора вожын
Зільӧ тӧв да гожӧм.
Том на мукӧд карыс,
Но и Сыктывкарӧс
Пӧрысьнад он шу на.

Г. Юшков

1. Висьтав, кыдзи гижсьӧны аснима эмакывъяс.
2. Коми Республикаса кутшӧм карын да сиктын тэ вӧлін?

— Кымын кар Коми Республикаын?
— Коми муын дас кар.
— Тэ тӧдан став кар нимсӧ?
— Дерт жӧ. Кӧсъян кӧ, лыддьӧдла.
— Кӧсъя. Лыддьӧдлы.
— Заводита войвыв каръяссянь.
— Ме тӧда войвыв каръястӧ. Вӧркутаын олӧ менам пӧч, сійӧ висьтавліс тайӧ каръяс йывсьыс.
— Сідзкӧ, висьтав, а ме содта.
— Вӧркута, Инта, Вуктыл, Усинск, Печора, Ухта.
— Сыктывкар, Микунь, Сосногорск, Емва.
— Вот и тӧдмалі Коми муысь став кар нимсӧ.
Мыйла кар нимъяссӧ гижӧма ыджыд шыпассянь?

160ʼ удж. Комиӧд текстсӧ.

Сыктывкар — столица Республики Коми. Город очень красивый. Вдоль улиц растут разные деревья и красивые цветы. Дома в городе большие, многоэтажные.
В столице много школ, есть театры, библиотеки. На берегу реки Сысолы большой красивый парк.

Лӧз рӧм — сійӧ миян енэж,
Турунвижыс — парма-вӧр,
Еджыд рӧмыс казьтӧ меным
Лымъя войвыв — сьӧлӧмшӧр.

В. Тимин серти

Артмӧд сикт кыв шыпасъяс вылӧ кывъяс.
Вӧч тадзи:

кар

керка
ар
рыт

канпас
асыв
роч

161ʼ удж. Лыддьы. Гиж да инды аснима эмакывъяс.

Печора, Эжва, Мозын — Коми муын медся гырысь юяс.
Эжва ю заводитчӧ ичӧтик шорсянь. Сійӧ визувтӧ асыввывсянь рытыввылӧ.
Эжва — Войвыв Двиналӧн вож. Сылӧн ичӧт чойяс — Сыктыв да Емва юяс.
Висьтав, кутшӧм ю визувтӧ тэнад кар либӧ сикт дорті.

162ʼ удж. Кутшӧм кыв лишнӧй? Мыйла?

Микунь, Емва, Инта, Зӧвсьӧрт.
Печора, Сыктыв, Ыб, Эжва.
Визин, Усть-Уса, Вӧркута, Абъячой.

163ʼ удж. Лыддьы мичаа.

Коми кыв ме тӧда,
Ыджыдтор оз шу на. 
Тӧда ме и сійӧ — 
Оз и сӧр на уна.

Тайӧ муса кылӧн
Чой-вок сёрнитӧны,
Тайӧ кылӧн меным
Ай-мам бур сиӧны.

И. Куратов

Иван Алексеевич Куратов

164ʼ удж. Лыддьы да босьт тӧд вылад.

Иван Алексеевич Куратов чужліс Кебраын. Ӧні тайӧ Сыктыв районса Куратов сикт. Ичӧт Ваняӧс мамыс 11 арӧсӧн нуӧдіс велӧдчыны Яренскса духовнӧй училищеӧ. Та бӧрын сійӧ велӧдчис Вӧлӧгдаса духовнӧй семинарияын. Сэсся Иван Алексеевич велӧдіс челядьӧс Усть-Сысольскын.
Сійӧ ёна радейтіс найӧс да кӧсйис, медым коми челядь кужисны гижны да лыддьысьны.

Висьтав, мый тӧдмалін И. А. Куратов йылысь.

— Иван Алексеевич Куратов — медводдза коми кывбур гижысь.
— А мый йылысь сійӧ гижис?
— Иван Куратов гижис коми йӧз, войвывса вӧр-ва йылысь.
— Кыдзи нимӧдӧны коми йӧз медводдза кывбур гижысьӧс?
— Юркарын эм Иван Куратов нима улича, Коми Республикаса опера да балет театр дорын сулалӧ памятник, а чужан сиктас восьтӧма музей.
— А мый тэ тӧдан Василий Ильич Лыткин йылысь?
— Сыктывкарын эм Василий Лыткин нима улича.
— Ме аддзылі улича нимсӧ да окота лои тӧдмавны сы йылысь.
— Вай аски велӧдысьлысь юалам.
Тӧдмалӧй велӧдысьыдкӧд нӧшта инъяс, кодъяс йитчӧмаӧсь Иван Алексеевич Куратов нимкӧд.


165ʼ удж. Лыддьы велӧдысьлысь висьтсӧ.

Василий Ильич Лыткин

Челядь, Василий Ильич Лыткин, коми ногӧн, Илля Вась — ыджыд учёнӧй, кывъяс туялысь. Сійӧ чужлӧма сыктывкарбердса Тентюков грездын. Тайӧ грездыс ӧні — юркарлӧн мича район. Батьыс водз кувсьӧма, да ичӧтдырыс вӧлӧма зэв сьӧкыдӧн. Василий Ильич уна велӧдчӧма да лоӧма тӧдчана учёнӧйӧн.
Илля Вась гижис кывбуръяс, висьтъяс, мойдъяс.
Кутшӧм кывбуръяс Илля Васьлысь лыддинныд небӧгъясысь?

Коді оз ло коми гижысьӧн?
И. Куратов, Ф. Тютчев, А. Мишарина, В. Лыткин.

Коді гижис «Дзизгысь-дзазгысь гут» мойд?
К. Чуковский, А. Пушкин, В. Лыткин, В. Тимин.

МЕ ВИДЗА АЧЫМӦС.

ачым — я сам, я сама
ачыд — ты сам, ты сама
ачыс — он сам, она сама
бурдӧдчан турун — лекарственное растение
видзны — беречь
дой — рана
корӧсь — веник
лапкор — подорожник
лежнӧг — шиповник
петшӧр — крапива
пывсян — баня
пывсьыны — париться
тыр-бура — полноценно

унатор — многое

— Кыдзи тэ чайтан, мый колӧ мортлы, медым сійӧ вӧлі дзоньвидза?
— Ме чайта, унатор колӧ.
— А стӧчджыка кӧ?
— Сёян-юан, сӧстӧм сынӧд да ва, оланін.
— Ме нӧшта содта: спортын зільӧм да тыр-бура сёйӧм-юӧм.
— Регыд гожӧм. Менам пӧч гожӧмнас чукӧртӧ уна сикас бурдӧдчан турун. Ми сійӧн тӧвбыд чай юам.
— Ме ачым бурдӧдчан туруна чайтӧ юа. Сэні эм быдсяма колана витаминыс.
— А кутшӧм бурдӧдчан туруна чай тэ юан?
— Ме юа лежнӧга да сэтӧра чай.
А кутшӧм бурдӧдчан турун тэ тӧдан?

166ʼ удж. Лыддьы текстсӧ.

Походын Саша дойдіс коксӧ. Велӧдысь корис челядьлысь лапкор.
Нина юаліс:
— А мыйла лапкорйыс?
Велӧдысь шуис:
— Лапкор бурдӧдӧ дой.
Велӧдысь пуктіс лапкорсӧ дой вылас да гартіс.
Некымын лун мысти дойыс бурдіс.

Тӧдмалӧй энциклопедияысь, мый нӧшта бурдӧдӧны лапкорйӧн.

167ʼ удж. Комиӧд да гиж сёрникузяяссӧ.

(Я сам) ветла лапкорла.
(Ты сам) ветлан лапкорла.
(Он сам) мунӧ лапкорла.
(Я сам) муна бурдӧдчан турунла.
(Ты сам) мунан бурдӧдчан турунла.
(Он сам) мунӧ бурдӧдчан турунла.

168ʼ удж. Лыддьӧй мичаа рольяс серти.

— Кутшӧм мичаӧсь тайӧ кустъяслӧн дзоридзьясыс! — горӧдіс Зоя.
— А тэ нетшышт ӧтиӧс да дукышт, — шуис Ваня.
— Ой! — горӧдіс Зоя. — Сійӧ чуткасьӧ!
— Абу прӧста нимыс лежнӧг. Висьтав, кутшӧмӧсь тайӧ кывъяс согласнӧй шыясыс.
— Л, ж, н, г — ставыс чорыд, — шуис Зоя.
— Весиг быдмӧг нимлӧн шыясыс висьталӧны, мый сійӧ чуткасьӧ. Лежнӧгйылас эм уна витамин, медуна «С» витамин.
— А мыйысь бурдӧдӧ лежнӧгыс?
— Менӧ мамӧ юктӧдӧ лежнӧг ваӧн температура дырйи.

Вотан он тэ лежнӧгйыв? Кор позьӧ сійӧс вотны?

169ʼ удж. Лыддьы текстсӧ.

Петшӧр — уна вося турун. Корйыс вевттьысьӧма сотысь сіясӧн. Быд петшӧрын эм пӧшти 10 миллион чуткасьысь сі. Дзоридзалӧ лӧддза-номъя тӧлыссянь кӧч тӧлысьӧдз. Дзоридзьясыс ичӧтӧсь.
Петшӧр корйын уна витамин. Бурдӧдчӧны коръяснас да вужнас. Корсӧ чукӧртӧны гожӧмнас, а вужсӧ — сёр арын.
Петшӧр сувтӧдӧ вир, бурдӧдӧ рана, петшӧр ваӧн мыськӧны юрси.

Висьтав мукӧд бурдӧдчан турун йылысь.

Корсь бурдӧдчан турун нимъяс.

Л
Е
Ж
Г
Ӧ
Н
Л
П
А
Е
Р
П
Т
Ӧ
К
Ш
Т
О
Ӧ
Э
Э
Р
Р
С

СО И ВОИС ГАЖА ГОЖӦМ.

гожйӧдчыны — загорать
вотчыны — заниматься сбором (ягод, грибов)

170ʼ удж. Корсь гожся тӧлысь нимъяс.

Номъя
моз
ддза
во
лӧд
шон
ді
дзо
ра
ридз
со
тӧс

171ʼ удж. Лыддьы кывбурсӧ мичаа.

ГОЖӦМ.

Бара воис гажа гожӧм,
Дзоридзьясӧн тырис йӧр.
Ӧшинь улын еджыд розйӧн
Льӧм пу вӧзйӧ чӧскыд кӧр.

К. Уляшева (Помӧсдін сикт)

— Аннуш, вот и помалім нёльӧд класс.
— Меным и нимкодь, и мыйлакӧ жаль.
— Мыйла жаль?
— Нимкодь, мый водзын гожся каникул, кутам
гожйӧдчыны да купайтчыны. Жаль, мый дыр ог
аддзысьӧй ёртъяскӧд да велӧдыськӧд.

Гажа тӧлысь — лӧддза-номъя,
Ӧткодь югыд, лун и вой.
Ставыс сӧвмӧ, ставыс быдмӧ.
Быдӧн радӧсь, вок и чой.

Волӧн джынйыс коли бӧрӧ,
Со нин сора тӧлысь тан.
Том и пӧрысь зіля вӧрӧ —
Страдна кад ӧд, шондібан.

Озыр вотӧсъясӧн моз —
Гожӧмлӧн пом тӧлысь.
Парма-вӧрын, вотчигмоз,
Шӧйтӧ том и пӧрысь.

Г. Попов серти

1. Лыддьы кывбурсӧ.
2. Вӧчӧй небӧг «Гожӧм» тема вылӧ.

172ʼ удж. Лыддьы мичаа пудъясянкывсӧ.

Тыртӧм-быртӧм
Тасьті оз.
Гӧбӧч вылын
Рака поз.
Куим каньысь
Шыр оз пов.
Он кӧ эскы,
Оз и ков.

Г. Юшков

173ʼ удж. Содты колана суффиксъяс да гиж.

Со и локт... гожӧм. Гожся каникул дырйи ме ветл... сиктӧ. Мекӧд мун... мам, бать да чой. Сиктын ми шойчч... , нетшк... град вылысь ёг турун, ветл... вӧрӧ вотч... . Жар лунъясӧ купайтч... да гожйӧдч... ю дорын.
Ме гожӧмнас бура шойчч... да арнас бӧр локт... школаӧ.

174ʼ удж. Лыддьы висьтсӧ.

КОМИ КАНЬ — АЛИСА.

Быд гожӧм ме волывла Ульянаӧ — Коми муын медся мичаинӧ. Сэні, манастырса еджыд крепосьт стенъяс сайын, джуджыд Эжва кыр йылын, сулалӧ тайӧ ичӧтик грездыс.
Тані, ыджыд бать да ыджыд мамлӧн керкаын, ме гожъя быд во. Керка дорсянь бура тыдалӧ джуджыд манастыр. Сылӧн жыннян шы улӧ чечча быд асыв. Грезд дорын нюмъялӧ пӧлӧзнича рӧма ты — енэжыслӧн ыджыд рӧмпӧштан. Водзынджык, пашкыр бадьяс сайын, сӧстӧм ванас лӧсталӧ Эжва.
А керка дорын быдмӧны-дзоридзалӧны и вӧсни кока пелысь, и еджыд кырся кыдз, и чуткасьысь коз. Но медся уна вылын юра джуджыд пожӧмыс. Найӧ шувгӧны то меліа, то стрӧга.
Дерт жӧ, мойдын кодь оланінад став йӧзыс и пемӧсыс мойдын кодьӧсь жӧ. Босьтны кӧть Алиса каньӧс. Тайӧ каньсӧ ме кымынкӧ во сайын вайи Сыктывкарысь. Алиса — дзирдалысь сьӧд шыльыд гӧна, гӧгрӧс виж синма, пантералӧн кодь кокни пельк вӧраса зэв сюсь кань. Сійӧ вель ӧдйӧ велаліс сиктса оланногӧ. Кыйис шыр аслыс чӧсмасьӧм вылӧ, радейтіс повзьӧдлыны посни лэбачьясӧс. Куталіс сійӧ и ёна дӧзмӧдчысь вурдысьясӧс, но сёйны найӧс эз кӧсйы, тэчліс радӧн-радӧн, виччысис ошкӧм аслас уджысь. Кань ногӧн шуышталӧ:
— Ме ша-а-а-нь?!
— Шань, шань, — воча шыасьӧ ыджыд мам.
Тадзи, буракӧ, и велаліс Алиса сёрнитны комиӧн. Сетас ыджыд мам дозъяс шыд коляс, сёй пӧ, кынӧмыд кӧ сюмалӧ. А Алиса сюся видзӧдӧ, оз сёй.
— Мый нӧ, абу чӧскыд? — юалӧ ыджыд мам.
— А-а-абу-у! — дӧзмӧмпырысь шуӧ Алиса.
— Мый нӧ эськӧ тэныд колӧ?
— Я-а-а-й-й! — вочавидзӧ Алиса.
— Яй?! Кытысь яйыс?
— Ва-а-а-й!
— Яйтӧ ачыд кый! — нюмсорӧн шуӧ ыджыд мам.
А ыджыд бать юалӧ:
— Калбас сёян?
— Да-а-а, ва-а-ай!
— Карсаяс ваясны тэныд гӧснеч, — шуӧ ыджыд бать.
— Йӧ-а-а-ав ва-а-а-й! — оз лӧнь Алиса.
Серамсорӧн казьтылам ӧти тешкодьтор. Карса гӧсьтъяс пукалісны пызан сайын, накӧд орччӧн вӧлі и Алиса. Гусьӧникӧн гыж йывнас гусьышталӧ пызан вылысь то калбас чӧлан, то яйтор. Но казялісны наян каньлысь гусясьӧмсӧ. Ыджыд мам чирыштіс Алисаӧс, чорыда шуис:
— Калбас сёйысь! Мун да шыр кут!
Недыр мысти Алиса вомас вайис шырпи да шыбитіс сійӧс пызан вылӧ, дзик ыджыд мамлы ныр улас.
— На-а-а! — радпырысь нявӧстіс Алиса. — Ме абу тэ кодь скуп.
Ставӧн чилӧстӧмӧн звирк чеччыштісны пызан сайысь. А ыджыд мам шуис меліа:
— Вот и шань! Вот и сёй ассьыд чӧскыдтортӧ!
Тадзи и оліс-выліс Алиса кань, гажӧдіс миянӧс.
И ми ӧнӧдз на збыль чайтам, мый Алиса — мойдса пемӧс кодь ыджыд вежӧра кань, быдтор гӧгӧрвоысь, да сійӧн и велаліс сёрнитны комиӧн.

А. Есева

Висьтав шӧр мӧвпсӧ.
— Дона ёрт! Помасис велӧдчан во. Ме тэкӧд велӧдчи сёрнитны комиӧн. Сёрнит коми кыв вылын.
Став бурсӧ!

КЫВКУД

А

аддзыны — увидеть
арлыд — возраст
арся — осенний
ас кывйӧн — своими словами
асъя кыа — утренняя заря

Б

бедь — палка
биару — газ
бӧрйыны — выбирать
брунакывны — издавать гулкий звук
бурдӧдчан турун — лекарственное растение
быдмӧг — растение
быдмыны — расти

В

ва пельса — деревянная кадка для воды
вап — краска
вашмунны — улыбнуться
вежадыр — святки
вежласьны — меняться, спрягаться
вежӧдны — святить, освятить
вежӧдӧм — освящение
вежӧра — умный, смышлёный
вежӧс — комната
векни — узкий
весавны — чистить
веськӧдлыны — управлять
видзны — беречь
видзӧдны — смотреть
видчыны — ругаться
визув — быстрый
визула — быстро
вильыш — озорной, шаловливый
висьтавны — рассказать, рассказывать
вич — отчество
вичко — церковь
водзын — впереди
водзджык — раньше
водздӧра — передник, фартук
вож — приток
Войвыв Двина — Северная Двина
войвылын — на севере
вой тӧв — северный ветер
воны сьӧлӧм вылӧ — понравиться
ворсанін — место для игры
ворсӧм — игра
вотны — собирать (ягоды)
вотчыны — заниматься сбором (ягод, грибов)
вочакыв — ответ
вӧзйыны — предлагать
вӧнь — пояс
вӧравны — охотиться
вӧраланін — место охоты, охотничьи угодья
вӧралысь — охотник
вӧр-ва — природа
вӧнь — пояс
вуграсьны — рыбачить
вугыр шатин — удочка
вына — сильный

Г

гожся керка — летний дом
гӧгӧр, гӧгӧрын — вокруг
горс — дупло
гут — муха
гыр — ступа

Д

дадь бӧр — задняя часть санок
джадж — полка
джодж — пол
джодждӧра — половик
дзебсясьны — прятаться
дзебсясьӧмысь (ворсны) — в прятки (играть)
дозмук — посуда
дӧра — холст, полотно, ткань
дӧрапас — флаг

Е

ем — иголка
енгаг — божья коровка

Ё

ён — выносливый, сильный

Ж

жов пу — калина
жугыль — скучный

З

зарни — золото, золотой

И

идравны — убрать
из шом — каменный угол
исерга — серьги

Й

йӧла турун — одуванчик

К

кабала — бумага
канму — государство
канпас — герб
карнан — коромысло
картуз — фуражка
кельдӧдны — бледнеть
керка весьтын — над домом
кильчӧ — крыльцо
киподтуй — мастерство
киськавны — поливать
китайка — тонкая хлопчато-бумажная ткань, изделия из этой ткани
кобув — укрытие от дождя
кодзувкот — муравей
коланлун — польза, необходимость
кольк — яйцо
корӧсь — веник
коръя пу — лиственное дерево
котраланін — место для бега, спортивный зал
кӧлуй — вещи
кӧлысь — стая
кӧш — ковшкрепыд — крепкий, прочный
Крещенньӧ — Крещение
кумач — ткань красного цвета
кумач морӧса — красногрудый
кутасьӧмысь (ворсны) — в салки, в догонялки (играть)
кывзыны — слушать
кыны — вязать
кып — гимн
кыр — горка
кырсь — кора
кыш — скорлупа, шелуха
кышӧд — обложка

Л

лаз — лузан (накидка из домотканого сукна с кожаным верхом, надеваемая поверх одежды для защиты от дождя)
лапкор — подорожник
лежнӧг — шиповник
лежнӧгйыв — ягоды шиповника
лелькуйтчанкыв — потешка
лист бок — страница
лӧдз — овод, слепень
лунвылын — на юге
лун тӧв — южный ветер
лыска пу — хвойное дерево
лэбавны — летать
ляз — кисель из черники, черёмухи

М

менам — у меня
мичмӧдны — украшать, украсить, красить
мошкоритчыны — усердно работать, копошиться
мӧдӧдчыны — направиться
муракывны-ветлыны — ходить с большим шумом
мусерпас — карта
мусир — нефть
мусмыны — полюбиться, понравиться

Н

небӧг — книга
неылын — недалеко
ниа — лиственница
ной — сукно
ном — комар
нора — жалобно
нӧш — колотушка
ньыв пу — пихта
нюжӧдчыны — протянуться
няйт — грязный

О

ов — фамилия
овлӧ — бывает
озырлун — богатство
олысь — житель
орччӧдны — сравнивать

Ӧ

ӧдйӧ — быстро
ӧзтыны — зажечь
ӧта-мӧдсӧ — друг-друга
ӧти кывъя — говорящие на одном языке
ӧтчыд — один раз, однажды
ӧшинь ув — двор

П

пасьтасьны — одеться
пач — печь
паччӧр — верх русской печи, лежанка
пев — большой палец
пельклун — ловкость
пельнянь — пельмени
пельӧс — угол
перйӧны — добывают
петшӧр — крапива
печик — щелчок
подув пуктысь — основоположник
пож — сито
поз — гнездо
позьӧ — можно
полысь — трусливый
посводз — сени
потшӧс дорын — около изгороди, забора
пӧжавны — печь, испечь
пӧрччысянін — раздевалка
пуан — то, что надо сварить
пувъя пирӧг — брусничный пирог
пудъясьны — считаться
пузьыны — вскипеть, закипеть
пывсьыны — париться
пывсян — баня
пым — горячий
пышйыны — убегать

Р

радейтана небӧг — любимая книга
рас — роща
рам — спокойный, тихий, кроткий
ризйыны — мчаться
рӧдтыны — скакать
рӧмпӧштан — зеркало
Рӧштво — Рождество
ружтыны — стонать

С

саридз — море
сер — узор
серамбана — улыбчивый
серпас — картина
серпасавны — нарисовать
сёй — глина
сёянін — столовая
сёян-юан — пища, еда
сикас — вид
сикӧтш — бусы
сись — свеча
скӧнь — совсем
сола тшак — солёные грибы
солалан — то, что можно засолить
сос — рукав
сур — пиво
судта — этаж
сунис — нитка
сур — пиво
сы моз — как он
сьӧлӧм вылын — на сердце
сьӧм — деньги
сьылан-йӧктанін — актовый зал
Сыктыв — Сысола
сю — рожь
сюрӧмтор — находка

Т

тапикасьны — ходить
тасма — ремень
тотшкысьны — стукнуться
тӧвзьыны — мчаться
тӧвся керка — зимний дом
тӧдмавны — узнать
тӧрыт — вчера
тувсовъя — весенний
туг — кисть
тугъя вӧнь — пояс с кистями
тунасьны — заниматься гаданием
турдӧм — застывший
тусяпу — можжевельник
тшак — гриб
тшап — важный
тыр-бура — полноценно

У

ув — ветка
удж — работа (упражнение)
уджавны — работать
укват — ухват
ульӧн — в сыром виде
унатор — многое

Ч

чери кыйны — рыбачить
черинянь — рыбник
чирк — кузнечик
чошкӧдны пель — насторожить уши
чунькытш — кольцо
чуня кепысь — перчатки
чурскыны — сосать с чмоканьем, с удовольствием

Ш

шенасьны — махать
шмонь — юмор
шойччан лун — день отдыха, выходной день
шойччыны — отдыхать
шӧр герой — главный герой
шылад — музыка
шылькнитчыны — раскинуться

Э

Эжва — Вычегда
эзысь — серебряный

Ы

ыб — поле
Ыджыд лун — Пасха
ыргӧн — медь, медный

Ю

югӧр — луч
юргыны — звучать
юрбитны — молиться
юржугӧдан — кроссворд, ребус
юрсигусь — стрекоза

Э

эзысь — серебряный

Я

яг — бор
яй — мясо
яръюгыд — яркий

ЮРИНДАЛЫСЬ

Тӧдмасям да ёртасям ............. 3
Зарни паськӧмӧн пасьтасис вӧр...................................10
Тайӧ менам керка,
тайӧ менам ӧшинь ув.........18
Миян котырлӧн шойччан лун...................................23
Ворсыштам ..........................32
Велӧдчанінын........................36
Еджыд бобув бӧрся бобув паськӧм вылӧ пуксьӧ .........44
Тӧвся гажлунъяс...................51
Сёян-юан..............................56
Менам лун...........................66
Пасьтасям да кӧмасям ..........77
Ме да менам ёртъяс...............83
Гажа тулыс воис....................88
Тані ставыс меным муса........96
Коми муӧй, сьӧлӧмшӧрӧй ..... 102
Ме видза ачымӧс.................. 115
Со и воис гажа гожӧм .......... 118
Кывкуд............................... 123