Ӧтисянь дасӧдз (2000)

Рочева О. И. Öтисянь дасӧдз. Сыктывкар: Коми книжное издательство, 2000. 24 лб.

Ольга Рочева

ӦТИСЯНЬ ДАСӦДЗ

Серпасаліс Александр Гаранин

Сыктывкар 2000

Коми небӧг лэдзанін

1. Кымын шонді енэжын?

Веськыд бедь кодь лыдпас «ӧти».
Чангыль ныр оз мешайт ньӧти.

О. Рочева

Зэра кадыд сылы бур,
Пыр и мыччас мусьыс юр.
Олӧ лун дай олӧ мӧд,
Быдмӧ вывлань, шог оз тӧд.
Гӧрд шляпаа, вывті тшап —
 Ӧти кока косьтан ... (тшак).
 
Е. Тараканова

2. Кымын син сюзьлӧн?

«Кык»
Юрыс крукля, чукля бӧжыс.
Помся бӧрдӧ олӧм чӧжыс.

О. Рочева

АРТАСЬЫСЬ ВАСЬ

Кыкӧдз артавны
Велӧдчис Вась.
Ӧні артавны
Быдторсӧ дась.
Сета кампет кӧ ӧтиӧс,
Тӧда —
Пыр жӧ юалас:
«Кӧні нӧ мӧдыс»?

П. Бушенев

3. Кымын пельӧс треугольниклӧн?

Артмӧма кык асык джынйысь.
Тадзи шуам «куим» йылысь.

О. Рочева

КРОЛИКЪЯС

Тӧдан ичӧт Толикӧс?
Видзӧ куим кроликӧс.
Вӧчис налы позтор:
Быд лун турун моздор,
Юмов сёркни пыртӧ,
Юан дозсӧ тыртӧ.
Видлӧй, шуӧ, васӧ,
Лапъя пеляясӧй!
Донаяс, ті ютӧг
Сёйны онӧй кутӧй.
Сылӧн кроликъясыс
Петавлӧны-й ортсӧ.
Локтӧны бӧр асьныс,
Тӧдӧны нин гортсӧ.

П. Образцов (Комиӧдіс И. Вавилин)

4. Кымын кӧлеса машиналӧн?

Ёна радлӧ вильыш Коль:
Сыкӧд ёртасьӧ со «нёль».
Лыдпаслӧн кӧть гырддза ёсь,
Бурджык йӧктысьӧс он корсь.

О. Рочева

Йирсьӧ лудын куим мӧс:
Гӧрд да еджыд, сьӧд да лӧз.
Кытысь нёльӧд мӧскыс лои?
Недыр мысти гӧгӧрвои:
Мамыс сайын вӧлӧм кук,
Петкӧдчыліс ӧти здук.

Г. Юшков

5. Кымын чунь чуня кепысьлӧн?

Улын — крукыль, вылын — бӧж.
«Витӧн» шуам олӧм чӧж.
Мича чужӧм, веськыд стать.
Рочӧн сійӧ лоӧ «пять».

О. Рочева

СТӦЧА АРТАСЬЫСЬ

Пӧчӧ шуӧ: — Ноко, зон,
Артасьнытӧ кужан он?
Зонка чургӧдыштіс ки:
— Аддзан, пӧчӧ, чуньӧй — вит.
Гортын витӧн олам-вылам.
Лыддьӧдла кӧть, пӧчӧ!
Кылан?
Айӧ, мамӧ, пӧль да тэ,
Но и...
стӧча артасьысьыс — ме.

(Коми-пермяцкӧй вылысь вуджӧдіс О. Рочева)

6. Кымын блюдъя чашка овлӧ тшай юан сервизын?

Абу ӧкмыс, кӧть и сюра.
Видзӧд: сійӧ увлань юра.
Асьсӧ медся сюсьӧн чайтӧ,
Вӧлі «ӧкмыс», лои «квайтӧн».

А. Лужиков

Тэ да ме, да сійӧ —
Ворсам дзоридз пиын.
Тэ да ме, да сійӧ —
Квайт ки лоас миян.

Н. Перминова

7. Кымын рӧм ӧшкамӧшкалӧн?

«Сизим» пӧлыньтчыштӧм кока,
Нырыс дзоргӧ шуйга бокӧ.
Тадзи мукӧддырйи тури
Келӧ кок пӧв вылас нюрӧ.

А. Лужиков

ГӦСТЬЯС

Ӧти блюдйысь сизим кань
Тяпкӧдісны йӧв.
Тадзи вердіс найӧс Вань,
Мамыс кор эз вӧв.
Мурка бӧрся мур-мур-мур
Локталісны со.
Век нин шедас кынӧм нур,
Пӧттӧдз кӧ оз ло.

В. Лодыгин

8. Кымын кок чераньлӧн?

«Кӧкъямыс»
Гӧгрӧс чужӧм, гӧгрӧс бок.
«Куим» — сылӧн ичӧт вок.

О. Рочева

ШЕФЪЯС

Кыр йылын местаыс
Гажа да кос,
Сэтчӧ выль картаяс
Тшупис совхоз.
Ӧні тась челядьӧс
Аддзан быд здук.
Картаын шефъяслӧн
Кӧкъямыс кук:
Визюк, Купальнича,
Пӧлудь да Ӧмидз,
Калюш да Умнича,
Сьӧдпель да Рӧмидз.
Фермаӧ школьникъяс
Локтӧны кор,
Вайӧны кукъяслы
Чӧсмасянтор.
Щӧткаӧн, пӧсь ваӧн
Мыськӧны век,
Мичаӧн, сӧстӧмӧн
Вӧліны мед
Визюк, Купальнича,
Пӧлудь да Ӧмидз,
Калюш да Умнича,
Сьӧдпель да Рӧмидз.

В. Ширяев

9. Кымын пинь пу куранлӧн?

«Ӧкмыс»

Пӧльтчӧма да — ачыс
Вот-вот вывлань качас.

О. Рочева

ЧЕРИ КЫЙӦМ

Талун чеччим
Водзсьыс-водз,
Чери кыйим
Ме да вок.
Уна чери шедіс,
Видзӧд:
Ыджыд мык
И нӧшта ичӧт,
Сэсся ёкыш,
Сэсся ёді,
Пӧшти килограмма коді,
Сир на содты,
Оз кӧ мын,
Куим кельчи,
Ӧти сын...
Ок, и уна чери кыйим
Миян керкадорса тыысь!
(А уна-ӧ чери ми кыйим, лыддьӧй!)

П. Бушенев

10. Кымын чунь кыкнан киын?

Абу мач ни абу моль.
Тайӧ, челядь, лыдпас «ноль».

О. Рочева

Сюся видзӧд: тайӧ «дас».
«Ӧти» «нолькӧд» тані ас.
«Дасыд» — быттьӧ сюра лёльӧ:
Петас — позйыс кушӧн кольӧ.

О. Рочева

Паровозыд менам ён:
Сійӧ кыскӧ дас вагон.
Чах-чах,
Чу-чу-чу!
Ылӧ-ылӧ менӧ ну!

Т. Волгина серти

Кымын?

Серпасала каньлысь чом:
Куим ӧшинь, кильчӧ пом?
Нӧшта ӧшинь — вылын,
Шонді пырӧм вылӧ.
Лыддьы ставсӧ ӧні,
Кымын ӧшинь кӧні?

И. Вилкова (Комиӧдіс О. Рочева)

Куим пышкай — вылын-вылын,
Куим пышкай — потшӧс йылын.
Кыклы — муса югыд ваыс.
Кымын пышкай лоӧ ставыс?

О. Рочева

Уна менам чача:
Ош да руча-кӧча,
Кык машина, вертолёт,
Куим пыж да вездеход.
Найӧс жуглӧм пыдди,
Кымын ставыс, лыддя.

О. Рочева
(О. Рочевалысь кывбуръяссӧ лӧсьӧдіс А. Лужиков)