Коми кыв рочьяслы (6-ӧд класс, 2013)

Г. И. Ватаманова, Ж. Г. Сизева, Е. Н. Ярошенко

КОМИ КЫВ
6-ӧд класса челядьлы комиӧн сёрнитны
велӧдчан небӧг

Вынсьӧдіс
Коми Республикаса йӧзӧс велӧдан
министерство

Мӧд петас

Сыктывкар
2013

ББК 81.2 Коми
В 21

Велӧдчан небӧгсӧ дасьтӧма
Коми Республикаса
велӧдчӧм сӧвмӧдан институтын

Велӧдчан небӧгсӧ серпасаліс
И.А. Авилова

Ватаманова Г.И., Сизева Ж.Г., Ярошенко Е.Н.
В 21 Коми кыв: 6-ӧд класса челядьлы комиӧн сёрнитны велӧдчан небӧг. Мӧд петас. — Сыктывкар: ООО «Анбур», 2013. — 128 л.б.

ISBN 978-5-91669-099-6
ISBN 978-5-91669-099-6

ББК 81.2 Коми

© Ватаманова Г. И., Сизева Ж. Г., Ярошенко Е. Н., 2010
© ООО «Анбур», 2010
© Ватаманова Г. И., Сизева Ж. Г., Ярошенко Е. Н., 2013
© ООО «Анбур», 2013

ОТСАСЯН ПАСЪЯС

— сёрнитам
— тӧдмав
— кыввор
— синоним
— антоним
— омоним
— велӧд наизусьт
— вӧчам содтӧд удж
— грамматика тема
— выль тема
— босьт тӧд вылад
— шусьӧг
— гортса удж
— вочавидз юалӧм вылӧ
— творческӧй удж

НЫВКАЯС ДА ЗОНКАЯС!

Чолӧмалам тіянӧс выль велӧдчан воӧн!
Таво ті тӧдмаланныд выль кывъяс, велаланныд бурджыка сёрнитны комиӧн, лыддянныд кывбуръяс, мойдъяс, висьтъяс, легендаяс.
Войвыв дзоридз маръямоль йылысь паныдасьлас кык легенда да сьыланкыв. Тайӧ жӧ дзоридзыс лоӧ миян небӧглӧн пасӧн. Грамматика да выль тема пасйӧма маръямоль дзоридзӧн.
Сиам тіянлы бура велӧдчыны, пыдди пуктыны коми кыв!

ГОЖСЯ КАЗЬТЫЛӦМЪЯС

5-ӧд класса материал мӧдпӧвъёвтӧм

1 удж. Лыддьы да гӧгӧрво кывбурсӧ. Корсь кывбурысь серпас дорӧ лӧсялана кывъяс.

Гожӧм.

Коми муын,
Кор гожӧмыс бур,
Шонді-дзоридзыс
Лэптӧма юр.

Кыптӧм енэжас
Кымӧрыс — юсь.
Сэсь оз сӧдзӧдчы
Зэрыслӧн тусь.

Шоныд ывлаыс
Кыпӧдӧ лов.
Дырджык миянкӧд,
Гожӧмӧй, ов!

А. Мишарина

2 удж. Лыддьы да гӧгӧрво текстсӧ. Вочавидз текст помын юалӧм вылӧ.

Гожся лунӧ.

Сашук бура колляліс шойччан лун. Асывбыд сійӧ узис, а сэсся сёйис веськыда вольпасяс. Лунтыр ворсіс ывлаын: котраліс зонкаяскӧд, дурис, туплясис турун вылын. Юасьтӧг ветліс ю дорӧ купайтчыны.
Рытывбыд Сашӧ дӧзмӧдіс ичӧт чойсӧ. Войбыд кывзіс гора музыка да видзӧдіс телевизор.
Сӧмын мыйла сэтшӧма мудзисны бать-мамыс?

Сёрнит ёртыдкӧд гожӧм йылысь.

— Кыдзи тэ коллялін гожӧм?
— Кытчӧ таво ветлін?
— Кутшӧм вӧлі поводдяыс гожӧмнас?
— Кыдзи отсасин бать-мамыдлы?
— Кутшӧм град выв пуктас быдтін гожӧмнас?
— Кутшӧм вотӧс да тшак чукӧртін?
— Мый заптінныд бать-мамыдкӧд тӧв кежлӧ?
— Кутшӧм вӧвлӧмтор казьтывлан?

3 удж. Гиж текстсӧ, содты лӧсялана эмакывъяс.

Водз ...ын ме ...кӧд ветлі ...ла. ...ысь ме аддзи дас кык еджыд ..., а ...лы сюрис дас нёль. Ставныс вӧліны ёнӧсь, мичаӧсь. Сэсся ...ысь сюрисны солалан ...яс: ... да ... . Ми локтім ...ӧ тыр ...ӧн.

Отсӧг вылӧ кывъяс: бать, ар, тшак, яг, гоб, вӧр, чуман, ягсер, ельдӧг, горт.

64 удж. Лыддьы да гӧгӧрво юӧрсӧ. Гиж кажитчана гут-гаг йылысь ас юӧр, серпасав.

Бобув.

Бобув — тайӧ медмича гут-гаг. Сійӧ быттьӧ уна рӧма дзоридз.
Бобувъяс зэв бура лэбалӧны, кодсюрӧяс вермӧны лэбны Европаысь Африкаӧ. Сэні найӧ пуктӧны колькъяс. Выль бобувъяс сійӧ жӧ туйӧд локтӧны бӧр Европаӧ.

Аддзы коми шусьӧгъяслы да кывйӧзъяслы роч пӧв.

Гӧгӧрвоӧд шусьӧгъяссӧ.

Гожӧм заптӧ, тӧв дзимлялӧ.
Гожся луныд йӧлӧн-выйӧн исковтӧ.
Кӧка войяс дженьыдӧсь да югыдӧсь.
И кӧдзыд гожӧм тӧлысь шоныдджык овлӧ.

И холодное лето теплее тёплой зимы.
Лето запасает, зима поедает.
Летний день молокоммаслом катится.
Белые ночи короткие и светлые.

5 удж. Вуджӧд текстсӧ.

Шоныд жӧ гожӧм! Лунтыръясӧн пӧжӧ шонді. Ставыс вежӧдӧ, дзоридзалӧ, сӧвмӧ да кисьмӧ. Ставыс пӧртмасьӧ аслас мичӧн-рӧмӧн, и быдӧнлӧн аслас кад.

И. Торопов серти

Аддзы да гиж гожӧм йылысь 3–4 шусьӧг да кывйӧз. Куж найӧс гӧгӧрвоӧдны.

Ю вомӧн мича мегыр ӧшйӧма.

Кор ме кола — йӧзыс виччысьӧны,
А кор ме локта — ставӧн дзебсясьӧны.

Гожся войын турун пӧвстын
Уна югыд эзысь моль,
Тӧлысь аддзӧ, но оз босьтав,
А вот шондіыд оз коль.

Сытӧг эськӧ эз вӧв олӧм,
Мусӧ, васӧ сійӧ шонтӧ.
Сылӧн нюмысь тэныд долыд,
Тайӧ миян зарни ...

6 удж. Лыддьы да гӧгӧрво текстсӧ. Аддзы эмакывйысь артмӧм кывбердъяс, ӧнія када кадакывъяс.

Радейтана дзоридз.

Гожӧм. Ме муна туруна видз вывті. Гӧгӧр зэв мича, синмӧ шыбитчӧны уна рӧма дзоридзьяс. Аддза тайӧ ловъя серпассӧ, и нимкодясьӧ сьӧлӧмӧй.
А менам медся радейтана дзоридзыс — пӧлӧзнича. Быдмӧ сійӧ муяс вылын да шепта турун пӧвстын. За вылас кыпӧдчӧмаӧсь кузь, оттӧм коръяс. Сыръясыс воронка кодьӧсь, лӧз йылаӧсь. Шӧрас быттьӧ вижов гӧгрӧс моль. А сэтшӧм чӧскыд кӧра!
Миянлы дзоридзьяс вайӧны радлун да мичлун. Мед найӧ дзоридзалӧны му вылас, нимкодьӧдӧны миянӧс.

«Би кинь» журналысь

Серпасав радейтана дзоридзтӧ да лӧсьӧд висьт.

План:
1. Кутшӧм дзоридз тэныд кажитчӧ?
2. Кутшӧм сійӧ, кӧні быдмӧ?
3. Мый вайӧ йӧзлы?

7 удж. Лыддьы, гӧгӧрво кывбурсӧ. Вочавидз юалӧмъяс вылӧ.

Веж видз вывті муна, муна,

Мича дзоридз сэні уна,
Зарни дзоридз вывті уна.
Меным гажа, сьыла-йӧкта,
Мича дзоридз водзӧ ӧкта,
Зарни дзоридз ӧдйӧ ӧкта.
Муса зонлы юркытш кыа,
Гортысь пета — рытъя кыа,
Гортӧ локта — асъя кыа.
Веж видз вывті муна, муна,
Мича дзоридз сэні уна.
Зарни дзоридз вывті уна.

В. Савин

1. Кутшӧм дзоридз йылысь гижӧ В. А. Савин?
2. Мыйӧн ӧткодьӧсь юркытш, анькытш, чунькытш кывъяс?

ГОЖСЯ ШОЙЧЧӦМ

вартчыны — плавать
вежӧдны — зеленеть
ветлыны — сходить, съездить
вотчыны — собирать грибы, ягоды
гожйӧдчыны — загорать
град йӧр — огород
дзоридзавны — цвести
ёг турун — сорняк
ёрны — слепить
заптыны — заготавливать
Из гӧра — Уральские горы
купайтчыны — купаться
лыа — песок, пляж
ляпкавны — мелеть
мыччыны — подать
нетшкыны — рвать
нимкодясьны — радоваться, любоваться
отсасьны — помогать
пӧжны — припекать
пӧт — сытый
пуктыны турун — заготавливать сено
саридз — море
суйӧр — граница
сунавны — нырять
тӧдмавны — узнать
тӧдмасьны — познакомиться, ознакомиться
сайӧдчыны — укрыться

КАДАКЫВЪЯСЫН ТЧ, ДЧ, ЧЧ ТЭЧАСЪЯС. СОЧЕТАНИЕ СОГЛАСНЫХ ТЧ, ДЧ, ЧЧ В ГЛАГОЛАХ

Коми кывйын кыв шӧрын орччӧн вермӧ лоны кык согласнӧй: гора да гортӧм. Мӧд согласнӧйыс аскодялӧ орччӧн сулалысь воддза согласнӧйсӧ.
Т да д оз шусьыны ч водзын.

ПОЗЬӦ ПРӦВЕРИТНЫ:
вотчыны → вота
босьтчыны → босьта
велӧдчыны → велӧда
бергӧдчыны → бергӧда

8 удж. Содты кывъясӧ колана шыпасъяс. Уджалӧй гозйӧн: прӧверитӧй ӧта-мӧдтӧ «Коми орфография кывкуд» отсӧгӧн, кадакывъяссӧ юклӧй чукӧръяс вылӧ.

Бергӧ...чыны, купай...чыны, мӧдӧ...чыны, че...чыны, вар...чыны, пӧр...чыны, во...чыны, чукӧр...чыны, лӧсьӧ...чыны, велӧ...чыны, матыс...чыны, петкӧ...чыны, сайӧ...чыны, кур...чыны, мы...чыны, шой...чыны.

9 удж. Бӧрйы воддза уджысь вит кадакыв да лӧсьӧд сёрникузяяс гожӧмын шойччӧм йылысь.

10 удж. Гиж текстсӧ лӧсялана шыпасъяс содтӧмӧн.

...ишук ...етліс ...ойччыны ...иктӧ. ...ійӧ ...тсасис
...ӧчыслы, ...етліс ...ӧрӧ ...отӧсла, ...упайтчис да ...ыйис
...ери. ...аникулъяс ...олляліс ...эв ...ура.

11 удж. Лыддьы да гӧгӧрво Мишуклысь письмӧсӧ, вочавидз юалӧмъяс вылӧ.

Дона мамук!

Со ме и саридз дорын.
Аддза сійӧс медводдзаысь да чуймала, кутшӧм сійӧ паськыд, помтӧм-дортӧм, а ваыс сола. Поводдяыс бур: пӧжӧ шонді, пӧльтӧ кокньыдик тӧвру, ставыс вежӧдӧ да дзоридзалӧ.
Быд лун ми купайтчам, суналам, гожйӧдчам пӧсь лыа вылын. Тӧрыт ветлім экскурсияӧн Ботаническӧй садйӧ, нимкодясим лунвывса быдмӧгъясӧн. Татшӧмыд войвылын абу. Рытъяснас гажӧдчам дискотека вылын.
Зэв бура ме шойчча. И век жӧ быд лун казьтыла тэнӧ, муса мамук. Регыд паныдасям.
Тэнад Мишук пи.

1. Кытчӧ нӧшта ветліс гожӧмнас Мишук?
2. Мый зонка сэні вӧчис?
3. Кажитчис-ӧ Мишуклы шойччыны саридз дорын?

Вайӧд син водзад, мый тэ шойччан лагерын. Гиж письмӧ.

КЕРАНТОРЪЯ, ЫЛЫСТЧАН ДА ВОАН ВЕЖЛӦГЪЯС.
ТВОРИТЕЛЬНЫЙ, ОТДАЛИТЕЛЬНЫЙ И ПРЕДЕЛЬНЫЙ ПАДЕЖИ

Керанторъя
вежлӧг
Ылыстчан
вежлӧг
Воан
вежлӧг
Кодӧн? Мыйӧн?
Кем? Чем?
Кодсянь? Мыйсянь?
От кого? От чего?
Кодӧдз? Мыйӧдз?
До кого? До чего?
-ӧн —
-сянь от
-ӧдз до

Эмакыв +
-ӧн мамӧн, поездӧн мамой, поездом
-сянь воксянь, сиктсянь от брата, от села

Нимвежтас +
-ӧдз пӧчӧдз, карӧдз до бабушки, до города

Пример вылӧ: Гожӧмнас сиктсянь карӧдз ветлӧ автобус. Саридз дорӧ ми мунім поездӧн. Сыктывкарсянь Москваӧдз позьӧ лэбзьыны самолётӧн.

12 удж. Уськӧд тӧд вылӧ ина вежлӧгъяс. Эма-
кывъяс дорӧ содты лӧсялана суффиксъяс. Гӧгӧрвоӧд
суффиксъяс бӧрйӧмсӧ. Корсь торъялан кывтэчас.
Ветлі сикт..., купайтчим ю..., шойччисны лагер...,
локті кар..., лэбим Москва..., вотчис вӧр..., пуксисны по-
езд..., муна поезд..., пуксим машина..., локтім машина...,
олінныд палатка..., котӧртім туй... .

13 удж. Помав сёрникузяяссӧ, бӧрйы да содты эмакывъяс дорӧ лӧсялана суффиксъяс.
1. Сыктывкар... (-ын, -ӧ, -сянь) Анапа... (-ысь, -ӧдз, -ын) позьӧ лэбзьыны ... .
2. Москва... (-сянь, -лӧн, -ӧн) Санкт-Петербург... (-сянь, -ӧдз, -ысь) ветлӧ ... .
3. Кар... (-ӧн, -сянь, -лӧн) сикт... (-ӧдз, -ӧ, -сянь) ми ветлам ... .
4. Горт... (-ӧ, -сянь, -ын) школа... (-ӧн, -лӧн, -ӧдз) ме муна ... .
5. Ыджыдджык вок... (-сянь, -ӧдз, -ӧн) воис ... .
6. Гожӧмнас ми ветлім Из гӧра... (-сянь, -ӧ, -ӧдз) ... .
7. Ме гожӧмбыд чӧсмаси чӧдй..., озй..., мырпом... (-лӧн, -ӧн, -ла).
8. Ме таво виччыся Кӧдзыд Пӧль... (-ӧдз, -сянь, -лысь) бур козин.

14 удж. Сетӧм кывъяс да кывтэчасъяс отсӧгӧн вочавидз юалӧмъяс вылӧ.

1. Кӧні тэ вӧлін гожся каникул дырйи?
2. Мый вӧчин гожӧмнас?

гожся каникул дырйи
некытчӧ эг ветлы, шойччы гортын
вӧлі карын
гожйӧдчи да купайтчи
батькӧд вӧралі
ветлі паркӧ
весалі град вылысь ёг турун
вуграси ва дорын
отсасян пӧль-пӧчлы
видзи мӧсъясӧс
уджалі, сьӧм нажӧвиті
ветлі вӧрӧ тшак-вотӧсла
отсаси турун пуктыны
шойччи саридз дорын
гӧститі пӧль-пӧч ордын
ветлі музейӧ

15 удж. Артмӧд кывтэчасъяс.

коллялі (кӧні?)
ветлін (мыйӧдз?)
шойччис (кыдзи?)
гуляйтін (кыті?)
отсасим (кодлы?)
тӧдмаси (кодкӧд?)
чеччи (кор?)
сёрнитім (кодкӧд?)
казьтыла (кыдзи?)
видзӧдіс (мый?)
кывзінныд (мый?)
тӧдмалі (мый?)

16 удж. Содты кольӧм кадакывъяс, артмӧд да гиж сёрникузяяс.


Ме
... куим тӧлысь.
... пӧсь лыа вылын.
... Сьӧд (Азов) саридзын (юын).
... пӧль-пӧч ордӧ.
... уна выльтор.
... выль ёртъяскӧд.

Лӧсьӧд гожся шойччӧм йылысь ёрта сёрни.

Отсӧг вылӧ:

— Кӧні тэ коллялін гожся каникул?
— Мый вӧчин каникул дырйи?
— Мый выльторсӧ аддзылін гожӧмнас?
— Кытчӧ тэ ветлін каникул дырйи?
— Мый выльторсӧ тӧдмалін?
— Тӧдмасин-ӧ выль ёртъяскӧд?
— Ветлін-ӧ мукӧд каръясӧ (сиктъясӧ)? Мый сэтысь аддзылін?
— Мыйӧн чӧсмасин гожӧмнас?
— Кыдзи тэ казьтылан тайӧ каникулсӧ?

17 удж. Лыддьы да гӧгӧрво висьтсӧ. Дасьты план серти гожся лоӧмтор йылысь ас висьт.

Медводдза чери.

Медводзӧн садьмис Степан:
— Шондіыс енэж шӧрас нин, а ті узянныд! Сирсыныд миян вылын вак-вакӧн сералӧны.
Ӧтвылысь юим чай. Быдӧнлӧн ӧти гуся мӧвп — шеді-ӧ войнас чери.
Виталей медводзын котӧртіс видлыны подольникъяссӧ. Вочасӧн ставӧн разӧдчим.
Степанлы мича сын пысасьӧма. Радлӧ, дерт.
Веськыда кӧ, быдӧнлы ичӧтика шедӧма. Ме жӧ эг тэрмась: кык подольниктӧ ӧдйӧ видлала.
Степан шмонитӧ:
— Енмыслы Ичӧт Миш кевмӧ. Ыджыд чери корӧ.
Петь юаліс:
— Ачыд лэптан али отсӧг виччысян?
Весиг повзьышті.
— Ачым, дерт.
Ӧти подольникас прамӧй сир шедӧма, а мӧдас — налим. Ёртъяс мекӧд тшӧтш радлісны. Ошкисны и. Ӧні пӧ тэнӧ, Ичӧт Миш, сьӧрысь пыр кутам босьтны.

М. Ладанов серти

План:
1. Кытчӧ ветлін гожӧмнас?
2. Мый аддзылін?
3. Мый выльторсӧ тӧдмалін?

18 удж. Лыддьы да гӧгӧрво текстсӧ.

Гожся салат.

Тасьті пыдӧсӧ пуктавны салат коръяс. Мыськавны град выв пуктасъяс. Та бӧрын вундавны редис нёль пельӧ, ӧгуреч гӧгыльясӧн, посньӧдлыштны оливки. Мичаа пуктыны тасьтіӧ.
Дасьтыны соус: тертука пыр лэдзны сыр да гудравны сливкиӧн, выйӧн да уксусӧн, содтыны специяяс. Пуктыны салатӧ соус.

Вӧзйы ассьыд радейтана гожся сёянлысь рецепт.

Велӧдчы ёртъясыдкӧд ворсны «Пӧла-мачӧн» ворсӧмысь.

«Пӧла-мачӧн» ворсӧм.

Пудъясьӧмӧн бӧрйӧны мачӧ кучкалысьӧс, мукӧдыс — мач куталысьяс. Ворсны колӧ лӧсьӧдны ичӧтик резина мач, палич (метра кузьта кымын бедь) да неыджыд пӧв. Пӧвсӧ сувтӧдӧны. Мач куталысьяс мунӧны боклань, а кучкалысьыс пӧв дорсяньыс качӧдыштӧ мачсӧ вылӧ да кучкӧ паличнас. Мач куталысьяс зільӧны кутны лэбысь мачсӧ. Коді кутас, сійӧ лоӧ кучкалысьӧн. Некодлы кӧ оз удайтчы кутны, быдӧн тэрмасьӧ медводдзаӧн кыпӧдны мачсӧ му вылысь да шыбитны пӧвъяс. Инмас кӧ, сійӧ лоӧ кучкалысьнас, а оз кӧ инмы, кучкалысьыс кольӧ важыс. Мачсӧ куталысьясӧн шыбитігӧн кучкалысьыс ӧвтчӧ бедьнас, дорйӧ ассьыс пӧвсӧ инмӧмысь.

Ю. Рочев

19 удж. Дасьтысь да гиж диктант.

Гожся лунӧ.

Гожся лунӧ Женя да Вова мунісны вотчыны. Пырисны найӧ тӧдса нюрӧ. Чеччалісны вутшкысь вутшкӧ. Друг кыпӧдчис сьӧд кымӧр да чорыда зэрмис. Паськӧмныс дзикӧдз кӧтасис. Но зонъяс ӧктісны уна мырпом. Дозъяс тырӧм бӧрын сёрнитчисны лэччыны бӧр гортӧ. Мӧдӧдчисны нюрысь. Прӧсек бокын пестісны бипур, пӧрччысисны да косьтысисны. Неуна шойччисны да котӧртісны гортлань.

50 кыв

АРСЯ КОДЗУЛА ПАС УЛЫН

веськӧдлысь — управляющий
веськыд — честный, прямой
зыртны — натереть
зык — ссора
лӧсявны — подходить
ӧтдортны — недолюбливать, обижать
оласног — образ жизни
панны — затевать
сорас — салат, месиво, примесь
тырмытӧмтор — недостаток, ошибка
ылӧдлыны — обмануть
яндысьысь — стыдливый, стеснительный

20 удж. Лыддьы да гӧгӧрво текстъяссӧ. Вочавидз юалӧмъяс вылӧ.

Дева.

Веськӧдлысь планетаыс — Меркурий. Дева — сюсь, яндысьысь, бур сьӧлӧма, вежавидзысь, тӧлка да уджач. Абу сёрниа. Велӧдчӧ олӧм чӧжыс. Олӧ дыр. Йӧзыс пыдди пуктӧны. Но тшӧкыда панӧ зык дзик нинӧм абусьыс. Радейтӧ индыны мортлысь тырмытӧмторъяс, но оз ошкы бурторйысь. Дева вермас лоны бур политикӧн, экономистӧн, велӧдысьӧн, библиотекарӧн.

Весы.

Весы — вежӧра, небыд, кокни сяма морт. Оз радейт зыксьӧм, кӧть мукӧддырйиыс ачыс панӧ зыксӧ. Весы — веськыд морт, но оз тырмы повтӧмлун. Вермӧ ылӧдлыны, весиг медматыссаясӧс. Но йӧзыс Весыӧс пыдди пуктӧны мелі кывйысь. Радейтӧ музыка, вӧр-ва, окотапырысь путешествуйтӧ. Весы вермас лоны бур адвокатӧн, журналистӧн, дипломатӧн, вузасьысьӧн, актёрӧн либӧ администраторӧн.

Скорпион.

Веськӧдлысь планетаяс — Марс, Плутон. Кыпыд сьӧлӧма, но чорыд сяма морт. Овлӧ скӧр, та вӧсна сылӧн этша ёртыс. Сылы пыр кажитчӧ, мый сійӧс ӧтдортӧны, критикуйтӧны. Скорпион пыдди пуктӧ асшӧр олӧм. Сыысь артмас бур хирург, юрист, веськӧдлысь.

1. Коді тэнад ёртъясысь чужӧма тайӧ кодзув чукӧр улын?
2. Кыдзи тэ чайтан, мый лӧсялӧ налӧн сямлы?

Аддзы да комиӧд ассьыд гороскоптӧ.

Сёрнит ёртыдкӧд.
— Видза олан, ... !
— Видза олан, ... !
— Кор тэ чужин?
— Ме чужи ... .
— Коді тэ гороскоп серти?
— Гороскоп серти ... .
— Кутшӧм йӧз чужӧны тайӧ кодзула пас улын?
— Тайӧ ... .
— Аттьӧ, аддзысьлытӧдз!
— Аддзысьлытӧдз!

ӦТКОДЯЛАН КЫВБӦРЪЯС.
СРАВНИТЕЛЬНЫЕ ПОСЛЕЛОГИ

серти
дорысь
в сравнении, по сравнению, чем ...

Пример вылӧ:

Йирымын серти поводдяыс кӧч тӧлысьӧ косджык да шоныдджык.
Гожся шондіыс арся дорысь меліджык.

21 удж. Чукӧрт сёрникузяяс.
1. Весы, дорысь, рамджык, Скорпион.
2. Тӧлысь, вӧльгым, кузьджык, серти, йирым.
3. Радейта, ме, ёнджыка, футбол, баскетбол, дорысь.
4. Помын, ар, кузьджыкӧсь, лунъяс, войяс, дорысь.
5. Унджык, мам, бать, вотіс, пув, серти.
6. Вокӧй, смелджык, дорысь, ме.
7. Каникул, гожся, арся, дженьыдджык, серти.
8. Турипув, пув, дорысь, шомаджык.

22 удж. Лыддьы да гӧгӧрво аслад кодзув паслы лӧсялана меню.

Мый вӧзйӧны сёйны кодзувъяс?

А ті тӧданныд, мый гороскоп оз сӧмын инды миянлы оласног, но и вӧлӧга?
Кӧза сюрлы колӧны А, С, Е витаминъяс. Сылы оз лӧсяв госа да ёсь вӧлӧга, та пыдди колӧ тшӧкыдджыка сёйны кӧчан, спаржа, чернослив, шпинат да рысь.
Ва кисьтысьлы быть колӧ сёйны быд пӧлӧс фрукты, а сідзжӧ морков, кӧчан, спаржа, инжир. Нӧшта колӧ сёйны быдсикас шыдӧс.
Черияслы да Звӧннилы ёна лӧсялӧ протеина вӧлӧга: гостӧм яй, чипан кольк, чери, сыр, кольтусь, анькытш. Сідзжӧ налы лӧсялӧ град выв пуктас да изюм, мукӧд сёянын серти наын уна кӧрт.
Ыжлы оз позь вунӧдны свеклӧ, морков, пӧкъя кӧчан, ӧгуреч, яблӧг, финик, банан, салат, лук, грецкӧй кольтусь йылысь.
Ӧшлы колана А да Е витаминъяса вӧлӧга. Сылы колӧ сёйны тыква, редис, свеклӧ.
Левлӧн сёян — миндаль, апельсин, лимон, мандарин, салат, яблӧг, слива, чӧдлач, ӧгуреч, чипан яй, сыр, саридзса вӧлӧга. Сылы лӧсялӧ крахмалтӧм да сакартӧм сёян-юан.
Раклӧн тшӧкыда висьӧ кынӧмыс, та понда сылы колӧ сёйны рысь, цитрусъяс, юмов переч, чери.
Вескилы медъёна лӧсялӧ быдлунъя сёян: быдсикас шыдӧс, кукуруза, морков, яблӧг. Оз ков сёйны лэчыд кӧра сёян.
Ичмоньлы кофе пыдди колӧ юны чай, бӧрйыны белока сёян. Этшаджык сёйны юмовтор да пӧжас. Нӧшта сылы лӧсялӧны зӧр, салат, кабачок, груша да сыр.
Скорпионлы медколана гостӧм яй, саридзса вӧлӧга, кольтусь да быдпӧлӧс град выв пуктас.
Лыйсьысьлы бурджык дугӧдчыны госа вӧлӧгаысь, а сёйны кукань мус, кольк, инжир, чернослив, цитрусъяс, наын уна С да В витамин.

23 удж. Вуджӧд Вескилы лӧсялана сёянлысь рецепт.

Солнечный салат.

Для приготовления этого салата необходимы полбанки кукурузы, 2–3 морковки, 1 большое жёлтое яблоко, 100 грамм сметаны, 1–2 чайные ложки мёда, немного грецких орехов для украшения.
Морковь почистить, помыть и натереть. Яблоко помыть и нарезать небольшими кубиками. Смешать морковь, яблоки, кукурузу с мёдом, выложить на тарелку. Смазать салат сметаной и украсить орехами.

для украшения — мичмӧдӧм вылӧ
нарезать — вундавны
почистить — весавны
смазать — мавтны
смешать — гудравны

Корсь аслад кодзула паслы лӧсялана сёянлысь рецепт.

Сетӧм кыв чукӧрысь аддзы синонимъяс.

Шор, вотӧс, зонка, ичӧт, шань, тэрыба, воны, шуны, дзирдалӧ, детинка, югъялӧ, ёль, ӧдйӧ, тусь, висьтавны, дзоля, бур, локны.

ВЕЛӦДЫСЬ ЛУН

аскылӧм — настроение
буретш — как раз (здесь: именно)
быдтас — воспитанник
вермӧм — достижение, успех
зільӧмӧн — старательно
индыны — указывать
кутны — держать, держаться
кыпыд — приподнятый, радостный
муслун — любовь
нюдз — гибкий (здесь: понимающий)
ӧзтыны — зажечь
ӧнӧдз — до сих пор
петкӧдчыны — выступать
пинявны — ругать
пыдди пуктӧмӧн — с уважением
пыдди пуктана — уважаемый
рам — спокойный
сины — желать
сьӧлӧмкылӧм — чувство
сьӧрын — с собой
сюрны — достаться
сяммыны — суметь
чӧж — в течение
чолӧмавны — поздравлять
чолӧмалӧм — поздравление
чусмыны — потускнеть
ышӧдны — вдохновить

24 удж. Мичаа лыддьы кывбурсӧ. Вочавидз юалӧмъяс вылӧ.

Мӧд мамъяс.
Колӧ лоны стрӧгӧн,
Колӧ лоны рамӧн,
Колӧ асьтӧ сідзи кутны пыр,
Медым тэнӧ быдӧн
Шуисны мӧд мамӧн,
Медым тэнӧ казьтылісны дыр.

Медводдза учитель,
Том кӧть тэ, кӧть пӧрысь,
Быдӧнлы тэ муса,
Быдӧнлы тэ ас.
Тэ йылысь бур мӧвпъяс
Нэм чӧж видзам сьӧрын,
Тэ ӧд медводз индан
Олӧм туйӧ пас.

Овлӧ тэныд сьӧкыд,
Овлӧ тэныд мустӧм.
Пинявлан и быдӧн
Коркӧ бӧрйӧм удж.
Но мый ӧзтін мортын,
Некор нин оз чусмы,
Сы вӧсна мый тэнад
Сьӧлӧмыд зэв нюдз.

Медым тэнӧ быдӧн
Шуисны мӧд мамӧн —
Тайӧ вывті сьӧкыд,
Но и вывті бур!
Колӧ лоны стрӧгӧн,
Колӧ лоны рамӧн —
Мӧд ног тайӧ нимыс
Некодлы оз сюр.

Н. Щукин

Велӧд кывбурысь юкӧн ас бӧрйӧм серти.

1. Мыйла велӧдысьӧс кывбуралысь шуӧма «мӧд мамӧн»?
2. Тэнад эм «мӧд мам»? Кутшӧм сійӧ?

25 удж. Лыддьы да гӧгӧрво газет статьясӧ.

Нэм чӧжыс чужанінас.

Медводдза велӧдысь... Радейтана да пыдди пуктана морт. Сійӧ нэм кежлӧ кольӧ велӧдчысьлӧн паметьӧ. Ӧд буретш сы сайын, кыдзи зонпосни кутасны велӧдчыны водзӧ.
Альбина Ивановна Поповалӧн зільӧмӧн челядь окотапырысь босьтӧны школаын тӧдӧмлун. Авъя, вежӧра ань сяммис ышӧдны зонпосниӧс став бурас.
Нелямын во Альбина Ивановна велӧдіс Помӧсдін сиктса Выльгорт грездса начальнӧй школаын. Сылӧн борд улысь петісны чужан сиктын, Коми муын да весиг Россияын пыдди пуктана да нималана йӧз. Велӧдысь пыр ышӧдіc челядьӧс радейтны чужан му да кыв, дасьтіс серпаса-кывбура коми анбур. Олӧм чӧжыс гижӧ коми кывйӧн сиктса олӧм йылысь кывбуръяс да сьыланкывъяс. Ӧнӧдз на Альбина Ивановна быдтасъясыскӧд петкӧдчӧ сиктса клуб сцена вывсянь.
Енбиа велӧдысь дорын велӧдчигӧн кокниджык корсьны водзӧ олӧмӧ туй.

«Коми му» газетысь

зонпосни = челядь

Дасьтысь ас гижӧд кежлӧ. Лӧсьӧд юалӧмъяс да босьт интервью радейтана велӧдысьлысь.

Отсӧг вылӧ юалӧмъяс:
1. Кутшӧм предмет кажитчис Тіянлы, кор велӧдчинныд школаын?
2. Кутшӧм йӧз воӧны сьӧлӧм выланыд?
3. Мый радейтанныд Ті вӧчны прӧст кадӧ?
4. Кутшӧм Тіян радейтана небӧг, кинофильм?
5. Кутшӧм паськӧм кажитчӧ Тіянлы новлыны?
6. Эм-ӧ Тіян девиз? Кутшӧм?

26 удж. Помав текстсӧ юалӧмъяс отсӧгӧн да велӧдчы гижны чолӧмалӧм.

Радейтана велӧдысь.

Ме велӧдча 6-ӧд классын. Миян уна велӧдысь.
Ставӧн найӧ вежӧраӧсь, тӧлкаӧсь, неуна стрӧгӧсь.
Медъёна меным кажитчӧ ...
1. Кутшӧм предмет сійӧ велӧдӧ?
2. Мый верман висьтавны сы йылысь?
3. Мыйӧн сійӧ тэныд кажитчӧ?
4. Мый сылы сиан Велӧдысь лунӧ?

Дона, муса, радейтана, пыдди пуктана ... !
Чолӧмала(м) Тіянӧс Велӧдысь лунӧн!
Сиа(м) Тіянлы кузь нэм да бур шуд,
дзоньвидзалун, муслун, вермӧмъяс
уджын, бур олӧм, кыпыд аскылӧм,
тӧлка да вежӧра велӧдчысьясӧс!
Пыдди пуктӧмӧн ...

27 удж. Дасьты радейтана велӧдысьлы чолӧмалан открытка.

Чукӧртӧм материал серти дасьтӧй класснад презентация тіян школаса велӧдысьяс йылысь. Вӧдитчӧй PowerPoіnt программаӧн. Козьналӧй велӧдысьясыдлы ассьыныд уджнытӧ.

Сетӧм кывъяс дорӧ аддзы антонимъяс. Лӧсьӧд кык гозйӧн сёрникузяяс.

лун —
выль —
олӧма —
озыр —
сьӧд —
ылын —
водз —
тані —
уна —
улын —
нимкодясьны —
мунны —
сетны —
шойччыны —
петны —

28 удж. Вуджӧд текстсӧ.

Гам сиктса школа.

1904-ӧд воӧ Гамса мӧд ступеня школа помаліс тӧдчана учёнӧй-социолог, философ, этнограф Питирим Александрович Сорокин. Сэні сійӧ велӧдіс Закон Божий, церковно-славянскӧй кыв, арифметика, роч кыв, природоведение, чистописание, пение, столярнӧй да переплётнӧй уджъяс. Школанас веськӧдліс И.С. Покровский — Гам вичкоса священник. Священникӧс чуймӧдіс зонкалӧн сюсьлуныс. Велӧдысьяс отсалісны Питирим Сорокинлы бур кывйӧн, сёян-юанӧн, кӧм-паськӧмӧн да сьӧмӧн. Сюсь зонкалы тырмис сямыс венны ыджыд сьӧкыдлунъяс да бура помавны школа.

А. Некрасов серти

СЁЯН-ЮАН. СЁЯН-ЮАН ЛАВКАЫН. СЁЯНІНЫН

вӧзйӧм — реклама
вӧлӧга — пища
вузӧс — товар
вузавны — продавать
вузасьны — торговать
вузасьысь — продавец
вузасянін — магазин
вундавны — резать
вылльӧв — простокваша
гудравны — мешать
дон — цена
зыртӧм — тёртый
зыртны — натереть
лымвый — мороженое
лавка — небольшой магазин
нӧкъявны — заправить сметаной
ньӧбасьны — покупать
ньӧбны — купить
ньӧбасьысь — покупатель
пӧжӧм — томлёный
пӧжас — выпечка
пӧжны — томить
пражитӧм — жареный
пуӧм — варёный
пызь — мука
сёянін — столовая
сёян-юан — продукты
сёян — пища, блюда
сёян-юан лыддьӧг — меню
содтыны — добавить
солавны — солить
сорас — салат, месиво
сорлавны — смешать
тшынӧдӧм — копчёный
уль — сырой
шайт — рубль
шомйӧв — кефир
шыдӧс — крупа
юмйӧв — йогурт
юмовтор — сладости

29 удж. Серпасъяс отсӧгӧн уськӧд тӧд вылӧ «Сёян-юан» темаысь кывъяс. Юклы да гиж лӧсялана чукӧръясӧ. Вӧдитчы выль кывворӧн.

Сёян: ...
Пӧжас: ...
Юмовторъяс: ...

Ӧта-мӧд костын ворсӧй лавкаысь. Ӧти тіян пиысь — вузасьысь, мӧд — ньӧбасьысь.

— Видза оланныд!
— Бур лун! Мый ті ньӧбанныд?
— Мый тіян эм йӧла сёянысь?
— Быдтор эм: йӧв и нӧк, вылльӧв и юмйӧв.
— Меным, пӧжалуйста, литра джын йӧв, нӧк да рысь. А еджыд няньыс небыд?
— Став няньыс небыд, эм уна сикас пӧжас.
— Сідзкӧ, нӧшта еджыд тупӧсь да куим шаньга.
— Пӧжалуйста! Тіянсянь 104 шайт 50 ур.
— Со сьӧмыс. Аттьӧ!
— Бур вылӧ. Волӧй на!

Дасьты ёртыдкӧд сёрни «Юмовторъяс лавкаын».

30 удж. Лыддьы Е. Козловлысь серамбана кывбурсӧ сьӧлӧмсянь. Серпасав.

Чӧскыд шыр.

Коркӧ ӧтчыд ичӧт шыр
Веськаліс амбарӧ,
Аддзис ыджыд тупӧсь сыр —
О! Шуд пӧ уси бара!

Сёйис, сёйис, нӧшта сёйис,
Весиг ичӧт мач кодь лоис.

Сёйис калбас, сёйис яй,
Ассьыс пай дай мӧдлысь пай,
Сёйис сизим пуӧм кольк —
Татшӧм добра ог пӧ коль!

Со и нянь джадж дорӧ воис,
Сӧмын кайныс дыш нин лоис.

Упкӧ — чӧскыда пӧ сёйи.
Сэсся колӧ мунны бӧр!
Ӧдва розь дорӧдзыс воис,
Чивзіс-тӧрӧдчис — эз тӧр.

Кыськӧ воис Васька кань,
Шыртӧ кутіс да и — ам!

МОГМАН ВЕЖЛӦГ. ДОСТИГАТЕЛЬНЫЙ ПАДЕЖ

Эмакыв да нимвежтас могман вежлӧгын вочавидзӧны кодла? мыйла? юалӧмъяс вылӧ. Рочын лӧсялӧ за кем? за чем? юалӧмъяслы.
Могман вежлӧг
Кодла? Мыйла? За кем? За чем?
-ла за

эмакыв
нимвежтас
+ -ла =

чойла за сестрой
няньла за хлебом
сыла за ним

Пример вылӧ: Батьӧ муніс челядь садйӧ ичӧт чойла. Ме ветлі лавкаӧ няньла да йӧвла. Тэла ми пыралам кино вылӧ мунтӧдз.

31 удж. Артмӧд кывтэчасъяс.

ветлыны

вок...
йӧв...
ва...
лымвый...
журнал...

ЗА

СУЛАЛА, МУНА, КОТӦРТА бӧрся (ӧчередын сулала ань бӧрся)

МОГ -ла (вокла, козинла)
МЕСТА сайын (пызан сайын)
АТТЬӦАЛА ...ысь (аттьӧ козинысь)

32 удж. Серпасъяс серти лӧсьӧд сёрникузяяс 31-ӧд лист бокын сетӧм схема отсӧгӧн.

33 удж. Бӧрйы да гиж сёрникузяяс, кӧні роч за предлог комиӧдам -ла суффиксӧн.

1. Рытнас ме ветла челядь садйӧ (за сестрой).
2. Миян понпи пыр котралӧ (за мамой).
3. Пӧч пырис лавкаӧ (за молоком).
4. Мамӧ аттьӧаліс батьӧс (за цветы).
5. Талун ме лыддя кывбурсӧ (за тобой).
6. Арнас ми ветлім вӧрӧ (за грибами).
7. Зонка пырис лыддьысянінӧ (за книгой).
8. Небӧгъяс куйлӧны (за журналами).
9. Аттьӧ тэныд (за хорошие слова).
10. Матыстчыв сы дорӧ (за помощью).

34 удж. Вуджӧд роч мойд коми кыв вылӧ.

Репка.
(Сказка.)

Посадил дед репку на огороде за домом. И выросла репка большая. Вышел дед за репкой на огород. Тянет-потянет, вытянуть не может. Позвал он бабку, бабка — внучку, внучка — Жучку, Жучка — Мурку, Мурка — мышку.
Мышка взялась за кошку, кошка — за собаку, собака — за внучку, внучка — за бабку, бабка — за дедку, дед — за репку. Тянут-потянут и вытянули репку за один миг. Репка жёлтая, вкусная, сладкая. Дед поблагодарил всех за помощь.

35 удж. Лыддьы да гӧгӧрво кывбурсӧ.

Ми пӧжасям.

Мамӧ талун няньшом вӧчис,
Пуктіс лым кодь еджыд пызь.
Мамӧ вӧчӧ вӧсни сӧчӧн,
А ме тэча нӧкъя рысь.

Ӧдъя пачным регыд ваймас —
Воис нянь пӧжалан кад.
Рыська шаньга бура банъяс,
Чӧскыд няньлы быдӧн рад.

А. Булышева

36 удж. Лыддьы «Алӧй лента» романысь юкӧн. Висьтав, мыйӧн чӧсмӧдлісны гӧсьтъясӧс важӧн Пӧкрӧв лунӧ. Мыйӧн чӧсмӧдланныд ті гӧсьтъясӧс?

Пӧкрӧв лун — вӧралысьяслӧн праздник.

Марпа лӧсьӧдіс сёйны — вольсаліс еджыд пызандӧра, ваяліс пирӧгъяс да шаньгаяс, паськӧдіс пызан шӧрӧ черинянь. Дерт, эськӧ медводз чай юны бурджык, да самӧварыс абу, а йӧзлысь талун он босьт, аслыныс колӧ.
— Пуксьӧй, гӧсьтъяс, сёйыштӧй няньӧн-солӧн.
Марпа век котраліс пачводзсянь пызан дінӧ. Майбыр, сылӧн эм мыйӧн гӧститӧдны, ставсӧ чӧжӧма праздник кежлӧ: разнӧй яй — сьӧла, тар, дозмӧр, кӧч жаритӧма и пӧжалӧма, сэсся налим, кык пӧлӧс чомӧр, кык пӧлӧс ляз — льӧмйысь и чӧдйысь, мырпома да ӧмидза йӧв, йӧла кисель. Гӧсьтъяс сёйисны и шензисны:
— Быдтор жӧ нин лӧсьӧдӧма Марпуш. Да ӧд ставыс сэтшӧм чӧскыд!

В. Юхнин серти

Чомӧр — традиционное кушанье, подаваемое на празднике; готовится из толокна или ячменной муки на масле.
Ляз — кисель, готовится на солоде из толчёных или молотых ягод.

Сёрнит ёртыдкӧд.
— Видза оланныд!
— Бур лун! Мый сёянныд?
— А мый тіян эм?
— Миян эм ...
— Ме кӧсъя ...
— Зэв бур! Со тіян сёян-юан.
— Уна-ӧ месянь?
— Тіянсянь ... шайт ... ур. Нянь да сов!
— Аттьӧ!

37 удж. Лыддьы да гӧгӧрво текстсӧ. Кыдзи шусьӧны татшӧм сикас текстъясыс?

ЁРТЪЯС, НЬӦБӦЙ ЙӦВ!

Тайӧ медся колана вӧлӧга, сэні уна витамин да аминокислота. Йӧв колӧ юны кагаяслы, медым бура быдмыны, челядьлы, медым лоны сюсьӧн да тэрыбӧн, висьысьяслы, медым ӧдйӧ бурдны. Унатор вӧчӧны йӧлысь: вый, рысь, нӧк, шомйӧв, сыр, лымвый, юмйӧв.
Йӧв колӧ юны, медым лоны дзоньвидзаӧн, сюсьӧн, крепыдӧн.

Лӧсьӧд ассьыд вӧзйӧм. Петкӧдчы ёртъяс водзын.

38 удж. Вуджӧд шусьӧгъяссӧ. Аддзы роч кывйысь лӧсялана пӧв.

1. Он кӧ уджав, он и сёй.
2. Гудралін рок, эн жалит и вый.
3. Ӧти уджалӧ, а сизимӧн нянь куд видзӧны.
4. Ыж яйысь юква он пу.
5. Кыйтӧм дозмӧрсьыд шыд он пу.
6. Шыд да рок — медбур вок.

Тӧдмав ребусъяс. Дзеб ребусӧ 2–3 сёян-юан ним.

39 удж. Лыддьы да вуджӧд.

Картупеля тшак.

Корйӧн пуӧм картупель весавны да вундавны торъяс вылӧ. Весавны сідзжӧ лук, мыськыны сійӧс да вундавны. Сэсся сэтчӧ жӧ содтыны вундалӧм сола тшак. Ставсӧ мичаа гудравны да кӧнтусь выявны.

Вотӧса йӧв.

Позьӧ вӧчны пувйысь, чӧдйысь, чӧдлачысь, озйысь, ӧмидзысь. Вотӧссӧ, ӧмидз кындзи, колӧ мыськыны, пуктыны тасьтіӧ. Сэсся кисьтны сэтчӧ кӧдзыд йӧв. Кӧр серти содтыны сакар.

Маа лымвый.

Пуктыны лымвый ичӧт дозъясӧ. Вылыссӧ кисьтавны маӧн. Мичмӧдны кольтусьӧн да зыртӧм шоколадӧн.

Дасьты гортад бӧрйӧм рецепт серти сёян.

ӦТВЫВТАН ДА ТОРЙӦДАН ВЕЖЛӦГЪЯС.
СОЕДИНИТЕЛЬНЫЙ И ЛИШИТЕЛЬНЫЙ ПАДЕЖИ

Ӧтвывтан вежлӧг
Торйӧдан вежлӧг
Кодкӧд? Мыйкӧд?
С кем? С чем?
Кодтӧг? Мыйтӧг?
Без кого? Без чего?
-кӧд с
-тӧг без
эмакыв
нимвежтас
+ -кӧд =
мамкӧд с мамой
ӧшинькӧд орччӧн рядом с окном
мекӧд с сестрой
+ -тӧг =
ёрттӧг без друга
паньтӧг без ложки
тэтӧг без тебя

-кӧд содтам ловъя эмакывъяс дорӧ; ловтӧм эмакывъяс дорӧ содтам сэк, кор эм орччӧн кывбӧр.
Пример вылӧ:

гуляйта понкӧд
сулалӧ шкапкӧд орччӧн
ёртася нывкакӧд
куйлӧ небӧгкӧд орччӧн

40 удж. Бӧрйы лӧсялана вежлӧг суффикс.

Талун ме ордӧ локтасны класса ёртъяс. Асывсянь ми пӧч... пӧжасим. Сэсся мам... дасьтім лымвый. Батьӧ ветліс лавкаӧ сок... да лимон... .
Пуксим пызан сайӧ. Ме веськалі Настук... . Сійӧ радейтӧ чай лимон..., а лымвый кольтусь... .
Кутшӧм лӧсьыд коллявны прӧст кад котыр... да ёртъяс... !

41 удж. Комиӧд колана ногӧн.

1) Мы ходили в магазин с папой. 2) Стол стоит рядом с окном. 3) Бабушка пьёт чай с мёдом. 4) Я ем макароны вилкой. 5) Тётя пьёт чай без сахара. 6) Ложка лежит рядом с тарелкой. 7) Сестра ест суп без хлеба. 8) Брат играет с котёнком, мячиком. 9) Мама мешает суп большой ложкой. 10) Дети делали покупки без взрослых.

Лӧсьӧд асшӧр удж «Менам радейтана сёян-юан».

План:

1. Сёян-юанлӧн ним.
2. Дасьтӧм вылӧ вӧлӧга.
3. Дасьтӧм.
4. Этш петкӧдлан кывъяс. (Нянь да сов! Чай-сакар! Чӧскыда сёйны! Кывтӧ эн(ӧ) ньылышт(ӧй)!)

42 удж. Лыддьы текстсӧ да аддзы нянь йылысь шусьӧгъяс.

Нянь эм нянь. Нинӧмӧн сійӧс он веж. Нинӧмкӧд он ӧткодяв. Олӧм абу шань, кор абу нянь. Няньтӧгыд куш да вильыд.
Йӧз нэмсӧ силісны ӧта-мӧдныслы нянь да сов. Семья кутысьӧс, кӧзяинӧс, шулісны эз прӧста вердысьӧн — няньӧн вердысьӧн. Эм кӧ кӧрӧвай, сэки и коз улын рай, сы вӧсна мый оз пась шонты, а нянь.
Нянь — сійӧ олӧм. Йӧз костын шуӧны: ваыд пӧ матушка, няньыд — батюшка.

Г. Беляев серти

ПАСЬКӦМ. ВУЗАСЯНІНЫН

бӧрйыны — выбрать
векни, векньыд — узкий
видлыны — померять
вижовгӧрд — оранжевый
воссьыны — открываться
гӧрдовлӧз — фиолетовый
исерга — серьги
кузь — длинный
лӧсявны — подходить
мичмӧдчантор — украшение
мичмӧдчыны, вӧччыны — наряжаться
пажын кад — обед
паськыд — широкий
пӧдласьны — закрываться
сикӧтш — бусы
стӧч — впору, как раз
тӧрны — влезать
чунькытш — кольцо

43 удж. Лыддьы да вочавидз юалӧмъяс вылӧ.

Кузь пызан сайын пукалісны нин унаӧн. Мужикъяс праздник лун кузя ситеч либӧ сатин дӧрӧмаӧсь, тугъя вӧняӧсь, сыналӧм тошкаӧсь, выялӧм юрсиаӧсь. Нывбабаяс сикӧтшъяс, исергаяс да мича рӧма лентаяс ӧшлӧмаӧсь. Олӧма нывбабаяс гӧрд, виж бабаюраӧсь. Томджыкъяс мича шӧвк сунисӧн да бисерӧн вышивайтӧм кокошникаӧсь, мукӧдыс сыръя дора мича чышъянаӧсь пельпомъясныс вылын. Ас кыӧм сера чулкиаӧсь, кокньыдик гожся кӧмаӧсь. Мича видз выв бобувъяс кодьӧсь.

Г. Фёдоровлӧн «Востым» романысь

1. Мый важӧн новлісны коми аньяс да мужичӧйяс?
2. Мыйӧн торъяліс аньяслӧн да нывъяслӧн паськӧмыс?

Тӧдмась коми серъясӧн. Комиӧд нимъяссӧ.
Грабли
мужчина
солнце
молодой олень
следы
филин
чайка
чум
оленевод
молодой олень
корова
взрослый олень
лось
утка
пила
ель
баран
компас
рыба
дерево

44 удж. Тӧдмав, мый серпасалӧма да мичмӧд коми серъясӧн.
Вӧдитчы отсӧг вылӧ сетӧм таблицаӧн.
Аддзы небӧгъясысь содтӧд серъяс.

Тӧдмав юржуглан коми серъяс отсӧгӧн.

ЛЫДАКЫВ.
ИМЯ ЧИСЛИТЕЛЬНОЕ

Сложнӧй лыдакывъяс гижсьӧны ӧтлаын.
Пример вылӧ:

тыр дасъяс
сизимдас
кӧкъямысдас
ӧкмысдас

тыр сёяс
кыксё
куимсё
нёльсё
витсё
квайтсё
сизимсё
кӧкъямыссё
ӧкмыссё

Составнӧй лыдакывъяс гижсьӧны торйӧн, артмӧны кык либӧ унджык кывйысь.
Пример вылӧ:

кыксё нелямын ӧти
сюрс сё сизимдас кык
кык сюрс кӧкъямыс

45 удж. Гиж ас йывсьыд, содтав лыдакывъяс.

Меным ... арӧс. Тушалӧн кузьтаыс ... метра ... сантиметра. Сьӧктаӧй ... килограмм. Новла ... размера паськӧм, ... размера кӧмкот.

46 удж. Лыддьы да гӧгӧрво.

Мый тэнад юр вылад?

Психологъяс казялӧмаӧсь, пасьталан кӧ юр вылад кутшӧмкӧ шапка, тшӧкыдджыка видзӧдчан рӧмпӧштанӧ. Юркышӧд унатор вермас висьтавны тэ йылысь.
Ӧти рӧма либӧ прӧстӧй гижӧда шапка новлӧны спортивнӧй йӧз. Тайӧ юркышӧдсӧ новлысьяс тэрыбӧсь, кокни руаӧсь, радейтӧны компанияяс да кыпыд шылад.
Берет новлысьяс кыпыд лолаӧсь. Тайӧ юркышӧдсӧ радейтӧны новлыны енбиа йӧз, найӧ кужӧны аддзыны мичлун, кывны сьӧлӧмӧн.
Колпак новлысь йӧз зэв шаньӧсь, радейтӧны сёйыштны. Мукӧддырйи найӧ вывті меліӧсь да нэрӧсь.
Вылӧ кӧрталӧм пеля гӧна шапка новлӧны вежӧра йӧз, шуам, политикъяс, бизнесменъяс, наукаын уджалысьяс. Найӧ радейтӧны вензьыны, кужӧны веськӧдлыны.
Кепка позьӧ новлыны уна ног: бокӧн, бӧрӧн, веськыда. Тайӧ юркышӧдыс петкӧдлӧ власьт дорӧ сибыдлун, выльтор дорӧ кыскӧм, асьтӧ петкӧдлӧм.
Шляпаяс новлӧны аньяс да нывъяс, кодъяс кужӧны лӧсьыда пасьтасьны. Найӧ зэв мичаӧсь да стильнӧйӧсь, кыскӧны ас дорас йӧзӧс.

1. Позьӧ-ӧ шапка серти донъявны мортӧс?
2. Кутшӧм юркышӧд радейтан новлыны тэ?
3. Кутшӧм тэ морт юркышӧд серти?

Серпасав вӧвлытӧм юркышӧд. Лӧсьӧд юӧртор.

План:
1. Кыдзи шусьӧ юркышӧдыд?
2. Кутшӧм сійӧ?
3. Коді сійӧс новлӧ?
4. Кытчӧ сійӧс пасьтавлӧны?

47 удж. Комиӧд юргижӧдъяс.

Школа №43
Магазин «Одежда и обувь» №387
Квартира №656
Дом №194
Аптека №121
Магазин «Продукты» №230
Квартира №85

Сёрнит ёртыдкӧд лавкаын паськӧм бӧрйӧм йылысь.

— Видза оланныд! Мый ті кӧсъянныд ньӧбны?
— Видза оланныд! Ме кӧсъя ньӧбны пӧчӧлы козин вылӧ мича чышъян.
— Матыстчӧй татчӧ да бӧрйӧй. Кутшӧмджык тіянлы колӧ?
— Ме эськӧ босьті шоныд, но кокни чышъян.
— Кутшӧм рӧм тіянлы кажитчӧ?
— Кажитчӧны гӧрдов рӧмъяс.
— Со видзӧдлӧй тайӧ чышъянъяссӧ: шоныдӧсь да кокниӧсь, югыдгӧрд, пемыдгӧрд, алӧйгӧрд рӧмаӧсь.
— Ме босьта со тайӧ югыдгӧрд чышъянсӧ. Аттьӧ отсӧгысь!
— Бур вылӧ! Мынтӧй кассаӧ 375 шайт.
— Аддзысьлытӧдз!
— Став бурсӧ! Волӧй нӧшта!
Лӧсьӧд ёртыдкӧд сёрни козин бӧрйӧм йылысь.

48 удж. Лыддьы да гӧгӧрвоӧд шусьӧгъяссӧ.

1) Морт серти и паськӧм. 2) Кутшӧм поводдя, сэтшӧм и паськӧм. 3) Удж серти и паськӧм пасьталан. 4) Паськӧм серти он на тӧдмав мортлысь пытшкӧссӧ.

49 удж. Вузасянін нимъяс серти тӧдмав, мый сэні вузалӧны.

50 удж. Вочавидз юалӧмъяс вылӧ.

1. Кутшӧм вузасянінъяс эмӧсь тіян карын (сиктын)?
2. Мый сэтысь позьӧ ньӧбны?

Отсӧг вылӧ кывъяс: сёян-юан, кӧлуй, чача, козин, мичмӧдчантор, тасьті-пань, пызан-улӧс.

СОССЯНА КАДАКЫВЪЯС.
ОТРИЦАТЕЛЬНЫЕ ГЛАГОЛЫ

Соссяна кадакывъяс артмӧны соссяна кывторъяс отсӧгӧн.

Ӧнія да локтан кад. Настоящее и будущее время

ме ог новлы
тэ он новлы
сійӧ оз новлы
ми огӧ новлӧй
ті онӧ новлӧй
найӧ оз новлыны

51 удж. Вежлав кадакывъяссӧ соссяна формаын.

Тӧдны, пасьтавны, ветлыны.
Ӧтка лыд
Морт
I
II
III
Уна лыд
Морт
I
II
III

52 удж. Комиӧд кадакывъяссӧ. Лӧсьӧд 3 сёрникузя.

Не меряешь, не подходит, не покупаем, не спрашиваю, не смотрю, не украшают, не наряжаетесь.

53 удж. Бӧрйы да содты соссяна кывтор.

1. Ме (ог, он, оз) новлы пемыд рӧма паськӧм.
2. Ичӧт-ичӧт, а керкаӧ (ог, он, оз) лэдз. (Нӧдкыв.)
3. Менам ёртъяс (огӧ, онӧ, оз) паныдавны йӧзӧс паськӧм серти.
4. Кутшӧм паськӧм тэ (ог, он, оз) радейт?
5. Ми (огӧ, онӧ, оз) торкалӧй уличвывса кесйӧгъяс (правилӧяс).
6. Ті (огӧ, онӧ, оз) тӧдӧй, кытысь позьӧ ньӧбны козин?

54 удж. Комиӧд кадакывъяссӧ да куимӧс на пиысь вежлав соссяна формалӧн ӧнія кадын. Лӧсьӧд 3 сёрникузя.

Мерять, подходить, купить, спросить, смотреть, украшать, наряжаться.

ПАСЬКӦМӦН ВУЗАСЯНІНЫН.

ДӦРА

кучик
ситеч
шӧвк
шабді
джинсы
вурун

РӦМ

гӧрд
лӧз
руд
мугӧм
сьӧд
еджыд
турунвиж
кольквиж
сера
чута
визя

ПАСЬКӦМ

пась
пальто
дӧрӧм
платтьӧ
шарп
ковта
гач
чышъян
кепысь
чуня кепысь
пеля шапка
водздӧра

РАЗМЕР

36-ӧд
38-ӧд
40-ӧд
42-ӧд
44-ӧд
46-ӧд
48-ӧд
50-ӧд

ВИДЛАЛӦМ

кузь
дженьыд
паськыд
векни,
векньыд
стӧч
дзескыд
лӧсялӧ
оз лӧсяв

КОРӦМЪЯС

петкӧдлӧй
мыччӧй
вӧзйӧй
пасьтавлӧй
видзӧдлӧй
мынтӧй
гартыштӧй
пуктӧй
волӧй

55 удж. Лӧсьӧд висьтасьӧм «Паськӧм лавкаын». Вӧдитчы соссяна кадакывъясӧн. Заводит тадзи:

Шойччан лунӧ ме муна спектакль вылӧ. Меным колӧ выль платтьӧ да мичмӧдчанторъяс. И со ме «Паськӧм» лавкаын...

56 удж. Корсь коми зумыд кывтэчаслы роч пӧв.

Пасьтӧм рака кодь.
Пасьтасьӧма да чер ни пурт оз мӧрччы.
Пась ни кӧм.
Гач зыртны.
Сарапана пошта.

Штаны протирать.
Ни одежды, ни обуви, беден.
Гол как сокол, не богат одеждой.
Оделся красиво и аккуратно.
Сплетница.

Серпасав 1–2 зумыд кывтэчас.

57 удж. Корсь серпасъясысь сорсьӧм.

Лӧсьӧд ёртъясыдкӧд «Вузасянінын» петкӧдчӧм.

58 удж. Комиӧд вузасянінлысь уджалан кад.

РЕЖИМ РАБОТЫ МАГАЗИНА «ИГРУШКИ»
понедельник — пятница с 10.00 до 19.00
перерыв с 13.00 до 14.00
суббота с 10.00 до 18.00 без перерыва
воскресенье выходной

59 удж. Лыддьы да гӧгӧрво текстсӧ.

Классическӧй джинсы материал — кык рӧма. Ортсысяньыс сійӧ лӧз, пытшкӧссяньыс — дзик еджыд. Но ӧні эмӧсь сьӧд, лӧз, гӧрдовлӧз, югыдгӧрд, вижовгӧрд рӧма материалъяс.
Выль гачтӧ ньӧбигӧн медводз, дерт жӧ, видзӧд модель вылас. Джинсылы колӧ лоны дзик туша сертиыд: дзебны тырмытӧмторъяс да нӧшта на мичмӧдны новлысьсӧ.
Ньӧбӧм водзад сюся видзӧд, медым материалыс гачыдлӧн вӧлі ӧткодя краситӧма. Колӧ тӧдны и сійӧс, мый фирменнӧй джинсылӧн вурысас эм гӧрд сунис.

Серпасав да вӧзйы ӧнія том йӧзлы ассьыд паськӧм. Позьӧ уджавны ёртыдкӧд.

ЧУЖАН ЛУН

гажӧдчыны — веселиться
гӧсьт — гость
дасьтыны — приготовить
дасьтысьны — готовиться
именник — именинник
козин — подарок
козьнавны — подарить
корны — пригласить
пасйыны — отметить
пӧжасьны — печь
нимлун — именины
сины — желать
тырны — исполниться
чолӧмавны — поздравить
чӧсмӧдлыны — угощать
чӧсмасьны — угощаться
чужан лун — день рождения
чужны — родиться
шондіа-руа — привлекательный

60 удж. Содты В. Лодыгинлӧн кывбурӧ лӧсялана кывъяс.

Югыд ... вашъялӧ,
... оз сун.
Миян ичӧт Машалӧн
Талун чужан лун.

Мурка ... лӧсьӧдӧ,
Шарик босьтӧ ... .
Пируйтасны лӧсьыда,
... дыр оз кус.

Нимлун сёйны воласны
... сэсь и тась.
Мыйыс колӧ ловныслы,
Ставыс лоӧ дась.

Быдӧн ... сеталас,
Сиас овны дыр.
Розьысь весиг петалас
Чолӧмавны ... .

Отсӧг вылӧ кывъяс: шонді — тӧлысь, шорӧ — кымӧрӧ, пызан — гортса удж, сьӧм — бус, гажыс — биыс, йӧз — ёртъяс, козин — серпас, сыр — шыр.

61 удж. Лыддьы висьтсӧ да гӧгӧрво. Вочавидз юалӧмъяс вылӧ. Лӧсьӧд ассьыд юалӧмъяс.

Козин.

Чужан лунӧ пыр нин ӧта-мӧдлы козинъяс вайлӧ ны. Со и Максимлӧн талун чужан лун. Кор гӧсьтъяс разӧдчисны, Максим босьтчис видлавны козинъяс. Медъёна зонкалы воис сьӧлӧм вылас Витялӧн клюшкаыс. Павлик вайӧма «Опасные повороты» ворсантор. Абу жӧ лёк. А Нина вайӧма козин — небӧг. «Мӧдысь Павликӧс да Витяӧс бара кора, а Нинаӧс ог кор, — думыштіс Максим. — Мед бур козин вайис дай».

Е. Габова серти

1. Мыйла Максимлы вайисны козинъяс?
2. Мый зонкалы медъёна воис сьӧлӧм вылас?

62 удж. Дасьтысь да гиж изложение «Козин» висьт серти.

КАДАКЫВЛӦН ТШӦКТАНА ФОРМА АРТМӦМ.
ОБРАЗОВАНИЕ ПОВЕЛИТЕЛЬНОГО НАКЛОНЕНИЯ ГЛАГОЛА

II морт ӧтка лыд дасьтысьны — дасьтысь ‘готовься’
II морт уна лыд дасьтысьны — дасьтысьӧй ‘готовьтесь’

Соссяна форма:
эн дасьтысь ‘не готовься’
энӧ дасьтысьӧй ‘не готовьтесь’

63 удж. Лыддьы ёртъясыдкӧд рольяс серти. Аддзы тшӧктана формаа кадакывъяс.

Гӧсьтъяс.

Талун Юралӧн чужан лун. Сы дорӧ локтісны гӧсьтъяс. Найӧ вайисны ёртлы козинъяс: Вова — машина модель, Катя — уна рӧма фломастеръяс да альбом, Маша — бур небӧг, Коля — шоколад кампет кӧрӧб.
Ставӧн сетісны козинъяс Юралы.
— Пуксьӧй пызан сайӧ, дона гӧсьтъяс. Чӧсмасьӧй, энӧ яндысьӧй! — корис ыджыд вежӧсӧ Юралӧн мамыс.
Чӧсмасьӧм бӧрын Юра кутіс ворсны ёртъяскӧд. Сэсся воис Вася. Юралы лоис нимкодь. Сійӧ думыштіс: со нӧшта гӧсьт, нӧшта ӧти козин.
Но Вася локтӧма козинтӧг.
— А кӧні нӧ козиныд? — юаліс Юра Васялысь.
— Кутшӧм козин? — чуймис Вася.
— Менам ӧд чужан лун! — дӧзмис Юра.
— Ме эг тӧд, — ньӧжйӧ висьталіс Вася.
— А ӧні тӧдмалін? Сідзкӧ, ветлы козинла!
Тайӧ кыліс Юралӧн мамыс. Сійӧ шуис:
— Некытчӧ эн мун, Вася. Ми тэнӧ виччысим, а эгӧ тэнсьыд козинтӧ.
Юра кыліс мамлысь кывъяссӧ, гӧрдӧдіс да лэдзис юрсӧ. Кыдзи тэ чайтан, мыйла?

64 удж. Сетӧм кадакывъясысь лӧсьӧд тшӧктана формаа кадакывъяс ӧтка да уна лыдын.

Лыддьыны, висьтавны, чолӧмавны, ветлыны, пуксьыны, вочавидзны, чӧсмасьны, сёйны, дасьтыны, ворсны, шуны, петкӧдлыны.

65 удж. Лыддьы да гӧгӧрво. Висьтав аслад праздник пызан йылысь.

Праздник пызан.

Тайӧ менам праздник пызан. Сэні эм черинянь, рыська шаньга, яя да град выв пуктаса сорасъяс, пражитӧм чипан да картупеля рок, пувва да лимонад, юмовторъяс, яблӧг да апельсин. Пызан шӧрын — чӧскыд торт.
Велӧд да сьыв сьыланкывсӧ.

Крокодил Геналӧн сьыланкыв.

Кывъясыс Э. Успенскийлӧн
Сьыланногыс В. Шаинскийлӧн
Комиӧдіс О. Уляшов

1. Медым гӧпъясті мунӧ
Пода ветлысь зэв уна,
Асфальт туй кузя визувтӧ ю.
И оз тӧд ветлысь-мунысь
Тайӧ бушкола луннас,
Мыйла чужӧмӧс югзьӧдӧ нюм.

2. Локтас виччысьтӧг тӧдысь
Кельыдлӧз вертолётӧн,
Донсӧ босьттӧг мен вӧчас кино.
— Чужан лунӧн! — мен шуас,
Сэсся кытчӧкӧ мунас.
Коляс меным сё вит эскимо.

Припев:

А ме ворса-гудӧкася
Ветлысь-мунысьяс водзын.
И зэв жаль, мый чужан луныд
Ӧтчыд во пытшкын.

66 удж. Комиӧд текстсӧ.

Чужан лун пасйӧм.

31 января у меня был день рождения. Я пригласил(а) гостей, приготовил(а) много вкусных блюд. С бабушкой испек(ла) большой, красивый торт. С мамой сделал(а) мясной, овощной и фруктовый салаты.
Вечером собрались гости. Поздравляли меня с днём рождения, подарили подарки. Мы угощались, пели, танцевали, играли. Было очень весело. Жаль, что день рождения только раз в году.

67 удж. Лыддьы кывбурсӧ. Пуктӧй рольяс серти.

Кӧчлӧн праздник.

Талун Кӧчлӧн чужан лун ӧд.
Воас гӧсьт и гӧстя уна.
Кильчӧ вылӧ сувтіс Кӧч —
Гӧсьтъяс воасны вот стӧч.
Ма со кыскӧ Ош — дзонь бӧчка —
Колӧ козинавны Кӧчтӧ!
Ичӧт Ур со, щӧть кодь уска,
Вайӧ телега тыр сус коль.
Шедіс ручлы уна мык —
Нуӧ Кӧчыдлы пуд кык.
Кань со кыскӧ, ружтӧ-кашкӧ
Нӧкйӧн ыджыд-ыджыд кашник.
Кӧза нӧбъялӧма морков,
Воис Кӧч керкаӧ коркӧ.
Козин эз вай Ваткыль миян,
Но оз тӧждысь зонмыд сійӧ;
Эм кӧ Ваткыль, оз босьт шог:
Гудӧкӧн йӧктӧдас кок.
Веж луд вылын чужан лунӧ
Гажа праздник Кӧчлӧн мунӧ,
Гажыс ыджыд, гажыс ён —
Йӧктӧ Ош и Руч, и Пон.

В. Лыткин серти

68 удж. Дасьтӧй проект «Талун менам чужан лун».

1. Бӧрйӧй именникӧс. Лӧсьӧдӧй гажлунся пызан. Дасьтӧй сылы чолӧмалан открытка да козинъяс. Сьылӧй сьыланкывъяс. Пасйӧй чужан лун.

2. Кор гӧсьтъясӧс тадзи:

— Чолӧм, Настук!
— Видза олан!
— Аски менам чужан лун. Волы ме дорӧ гӧститны.
— Аттьӧ. Вола.

3. Паныдав гӧсьтъясӧс да пуксьӧд пызан сайӧ.

— Чолӧм, дона гӧсьтъяс! Пырӧй, пӧрччысьӧй. Пуксьӧй пызан сайӧ. Чӧсмасьӧй. Со картупеля шаньга, пувъя пирӧг, льӧмъя ляз, нӧкъя ельдӧг, пражитӧм чери, яя картупель, яблӧга сок, шоколад кампет.

4. Бур кывъясӧн козьналӧй именниклы козинъяс, сьылӧй сьыланкыв, ворсӧй.
Пример вылӧ ворсӧм : именник нимысь быд шыпас вылӧ корсьӧй мича кывъяс.

М мича, мелі
И ичӧт, идӧра
Ш шань, шондіа-руа
А авъя, асшӧр

5. Сёрнитӧй кодзула пасъяс йылысь.

— Кутшӧм кодзула пас улын тэ чужин?
— Ме чужи ... пас улын. А тэ?
— Кутшӧм йӧз чужӧны тайӧ пас улын?
— Тайӧ пас улын чужӧм йӧз шаньӧсь да веськыдӧсь, но мукӧддырйи дышӧсь.

6. Ыдждӧдлӧй именникӧс.

Тупӧсь нянь.

— Кыдзи Мишук чужан лунӧ
Пӧжалім ми тупӧсь нянь.
Тупӧсь нянь, тупӧсь нянь,
Пӧжалім ми тупӧсь нянь.
Эта судта, эта ляпта,
Эта пасьта, эта векня.
Тупӧсь нянь, тупӧсь нянь,
Бӧрйы, кодӧс радейтан!
— Радейта ме ставнысӧ,
А медъёна ...ӧс!

7. Аттьӧалӧй кӧзяйкаӧс.

— Ыджыд аттьӧ, ставыс вӧлі зэв чӧскыд. Ёна и гажӧдчим. Став бурсӧ тэныд!

8. Колльӧд гӧсьтъясӧс:

— Дона гӧсьтъяс! Аттьӧ волӧмсьыд да козинъяссьыд. Мӧдысь на пыралӧй-волӧй.

69 удж. Визьяс местаӧ бӧрйы да содты колана суффиксъяс да кывбӧръяс.

Даша_1_ чужан лун_2_ Шойччан лунӧ ме ветл_3_ Дашаясӧ. Даша_4_ вӧлі чужан лун. Сійӧ кор_5_ гӧсьтъяс_6_. Нывка мамыс_7_ дасьт_8_ праздниквывса пызан. Гӧсьтъяс йӧкт_9_, сьыл_9_, чӧсмас_9_ уна пӧлӧс сёян-юанӧн, чолӧмал_9_, козьнал_9_ козинъяс. Коми радио_10_ весиг сьыланкыв Даша_4_ сьылісны. Вӧлі зэв гажа. И зэв жаль, мый чужан луныд ӧтчыд во_11_. Сиа Дашалы бур ёртъяс_6_, дзоньвидзалун, радлун_6_, бура велӧдчыны.

1. -лысь, -лӧн, -кӧд
2. серти, сайын, вылын
3. -і, -існы, -ім
4. -ӧс, -лы, -лӧн
5. -им, -ис, -ин
6. -ын, -ӧс, -□
7. -кӧд, -лысь, -ті
8. -існы, -інныд, -іс
9. -ам, -існы(-исны), -ӧны
10. серти, пыр, кузя, вылӧ
11. дорын, пытшкын, сайын, дорӧ

70 удж. 69 удж вылӧ мыджсьӧмӧн лӧсьӧд ас текст.

МЕНАМ РАДЕЙТАНА УДЖ, ВОРСӦМЪЯС

вылӧ донъявны — высоко оценить
киӧн вермасьӧм — армвреслинг
киподтуй — умение
котыртны — организовать
кӧрталӧм — завязанный
кыйӧдны — выслеживать
лыддьысянкыв, пудъясянкыв — считалка
ордйысьны — соревноваться
ордйысьӧм — соревнование
петкӧдчыны — выступать
пудъясьны — кинуть жребий
пырӧдчыны — участвовать
сьӧкыдтор лэпталӧм — поднятие тяжести
сюрны — хватать, достаться
чуймӧдны — удивить
шег — баранья косточка (атрибут коми игры)
шӧрин — центр

ПЕТАН ВЕЖЛӦГ. ИСХОДНЫЙ ПАДЕЖ СО ЗНАЧЕНИЕМ СПОСОБА ДЕЙСТВИЯ

Петан
вежлӧг
Мыйысь?
Во что?
-ысь
в

Коми кывйын петан вежлӧг вермӧ индыны действие вӧчанног вылӧ.

Пример вылӧ: ворсны футболысь, компьютер ворсӧмысь.

ворсӧм + -ысь
хоккейысь
баскетболысь

предмет + -ӧн
мачӧн
аканьӧн

71 удж. Лыддьы да гӧгӧрво текстсӧ. Вочавидз юалӧмъяс вылӧ.

Быд во Коми республикаса олысьяс кыпыда да паськыда пасйӧны юркар лун. Быдлаын позьӧ пырӧдчыны конкурсъясӧ, вочавидзны викторинаяс юалӧм вылӧ, кывзыны да видзӧдны сьылӧм-йӧктӧм, ворсны.
Ставныслы сюрӧ гажӧдчӧмыд. Ичӧтъяслы котыртӧны асфальт вылын серпасасян конкурс. Шӧр арлыда челядьлы вӧзйӧны спортивнӧй ворсӧмъяс: коді ылӧджык чеччыштас, стӧча веськалас мишеньӧ, ӧдйӧджык котӧртас. Томъяс Киров нима паркын ворсӧны волейболысь, футболысь. Мужичӧйяс ордйысьӧны сьӧкыдтор лэпталӧмын, киӧн вермасьӧмын. Аньяс петкӧдлӧны киподтуйсӧ: чӧсмӧдлӧны пӧжасъясӧн, чуймӧдӧны ас киӧн вӧчӧмторъясӧн. Олӧмаяслы котыртлӧны шахматысь ворсӧм.

1. Кор Коми Республикаын пасйӧны юркар лун?
2. Кыдзи войтыр гажӧдчӧ тайӧ лунӧ?
3. Овлӧ-ӧ тіян сикт (кар) лун? Кыдзи ті гажӧдчанныд?

72 удж. Содты лӧсялана вежлӧг суффикс.

1) Ми ёртъяскӧд быд лун ворсам волейбол... .
2) Коми культура шӧринын овлӧны шегй... ордйысьӧмъяс. 3) Детинкаяс радейтӧны ворсны машина..., а нывкаяс акань... . 4) Миян школаын котыртісны футбол... ордйысьӧм. 5) Шойччан лунӧ став котырӧн ворсам лото... . 6) Тӧвнас физкультура урок вылын ми котралам лызь... . 7) Карса стадион вылын рытъяснас том йӧз исласьӧны коньки... . 8) Йӧввыв дырйи комияс важысянь нин ворсӧны кыр босьтӧм... .

— Миша, тіян школаын эм баскетболысь да футболысь секцияяс?
— Эм, дерт. Но ме ёнджыка радейта ворсны волейболысь. Тайӧ секцияӧ и ветла.
— А меным кажитчӧ вӧчасьны ас киӧн. Миян «Мойдвывса сёй» кружокын зэв лӧсьыд. Ми унатор нин кужам вӧчны сёйысь.
— Миян команда неважӧн вермис районса ордйысьӧмын. А ті кӧнкӧ петкӧдчанныд?
— Миянлысь уджъяс быд во вылӧ донъялӧны оз сӧмын районын, но и республикаса «Кужысь кияс» вермасьӧм вылын.
— Меным нимкодь тіян понда. Став бурсӧ!
— Аттьӧ! Тіян вермӧмъясыд водзын на. Аддзысьлытӧдз!

73 удж. Лыддьы да гӧгӧрво пудъясянкывъяс. Велӧд да вӧдитчы ворсігӧн.

Тірс-торс,
Куим стӧкан морс.
Он кӧ вӧдит,
Он и ворс!

Ӧтчыд мамӧ ньӧбис боті.
Кык лун видзи, сійӧ поті,
А мӧдсӧ — ачым соті.

74 удж. Комиӧд ворсӧмсӧ. Вӧдитчы «Роча-комиа кывчукӧрӧн».

Быстрый олень.

Издревле коми прославились как опытные охотники. Много зверя водится в наших лесах: и белка, и медведь, и лось, и олень! Но поймать этого быстроногого красавца не так-то просто! Для игры нужно выбрать Оленя и Охотника. Все становятся в круг. Растягивают по краю красную ленту. Это — поляна. Олень бегает с колокольчиком по поляне. Задача Охотника — с завязанными глазами поймать Оленя.
Для игры нужны повязка, колокольчик, красная ленточка. Несколько человек могут играть роль деревьев, чтобы олень за ними прятался.

Ворс ёртъясыдкӧд «Тэрыб кӧр» ворсӧмысь.

75 удж. Лыддьы ичӧтик висьтсӧ. Мыйӧн сійӧ аслыспӧлӧс?

Вотчисны.

Ваня Валякӧд ворсісны волейболысь.
— Вай ветлам вадйӧ вуграсьны, вӧрӧ вотчыны, — вӧзйис Ваня.
— Ветлам-ветлам, вокӧй, — варова Ваньӧлы вочавидзис Валя.
Ваня вуграсис, Валя вотіс ведраӧ вотӧс. Вотчис вывті визула. Водз воисны вӧрысь. Вотӧссӧ весалісны, вӧчисны варенньӧ.
Лӧсьӧд ичӧтик висьт ӧти шыпас вылӧ. Ордйысь класса ёртъясыдкӧд, кодлӧн висьтыс лоас кузьджык.
Классӧн лӧсьӧдӧй неыджыд серпаса небӧг.

76 удж. Аддзы, кутшӧм визьын коми овъяс тэчӧма стӧч алфавит серти.

1. Гичев, Канев, Кинев, Касев, Томов, Пыстин, Кузьбожев.
2. Гичев, Канев, Кинев, Касев, Кузьбожев, Пыстин, Томов.
3. Гичев, Касев, Канев, Кинев, Кузьбожев, Томов, Пыстин.
4. Гичев, Канев, Касев, Кинев, Кузьбожев, Пыстин, Томов.
Ф.Плесовскийлӧн «Коми овъяс» небӧг отсӧгӧн тӧдмав, кыдзи артмӧмаӧсь коми овъясыс.

77 удж. Гиж куим шыпаса кывъяс чепӧн. Ордйысь ёртъясыдкӧд.

Лым — мыр — рӧм — мач — ч...

78 удж. Содты слог, медым артмис кык кыв.

Пример вылӧ: ми (ча) сі

юр (...) кӧтш
чуж (...) идз
пар (...) зі
кер (...) га
пыс (...) ні
сын (...) йӧ
ма (...) ля
ӧм (...) ас

78-ӧд удж серти лӧсьӧд да вӧзйы ёртъясыдлы кык-куим кыв гоз.

79 удж. Юксьӧй командаяс вылӧ. Бӧрйӧй уна шыпаса коми кыв. Сетӧм кывйысь шыпасъясӧн лӧсьӧдӧй выль кывъяс. Ордйысьӧй.

Пример вылӧ: серпасасянін (серпас, сер, пас, ас, ар, рас, ин ...)

Отсӧг вылӧ кывъяс: кодзувкоткар, лышкыдлун.

Тӧдмась коми ворсӧмъясӧн. Ворс ёртъясыдкӧд.

Варыш.

Ворсӧм водзын бӧрйӧны кык ыджыдджык да ёнджык мортӧс. Ӧтиыс лоӧ варышӧн, а мӧдыс мамӧн. Мукӧд ворсысьыс сувтӧ мам сайӧ. Варыш пондас котравны да кыйӧдны челядьӧс. А мам кисӧ шевкнитӧмӧн видзӧ пышйӧдӧмысь. Вермас кӧ варыш пышйӧдны мамлысь став челядьсӧ, сэк мам нин пышйӧ варышысь. Варыш кутас мамсӧ да сэсся ворсӧны выльысь.

Ёма.

Ёмаысь ворсӧны 8–12 морт. Пудъясянкывйӧн бӧрйӧны Ёмаӧс да Кӧзяйкаӧс. Мукӧд ворсысьыс — ыжъяс. Кӧзяйка сетӧ быд ыжлы ним (шуам, вотӧс, дзоридз, пу, пемӧс нимъяс). Кӧзяйка «йирсьӧдӧ» ыжъясӧс видз вылын да унмовсьӧ. Локтӧ Ёма да гусялӧ ыжъяссӧ. Кӧзяйка садьмӧ да корӧ ыжъясӧс нимъяснас. Ыжъяс да Кӧзяйка костын сулалӧ Ёма, оз лэдз, куталӧ ыжъясӧс. Ворсӧм помын колӧ лыддьыны, кымын ыж воӧдчис Кӧзяйкаӧдз, а кымынӧс кутіс Ёма. Кодлӧн унджык — сійӧ и вермис. Тӧдмась коми ворсӧмъясӧн Ю.Г. Рочевлӧн «Коми челядьлы важъя ворсӧмъяс» небӧгысь.

МИЯН ВЕЛӦДЧАНІН

асмогасянін — туалет
бурдӧдчанін — медпункт
велӧдчан вежӧс — учебный кабинет
велӧдчанін — школа, учебное заведение
веськӧдлысьлӧн вежӧс — кабинет директора, руководителя
коми кыв вежӧс — кабинет коми языка
лыддьысянін, небӧгкуд — библиотека
мыссянін — умывальник
пӧрччысянін — раздевалка
серпасасянін — кабинет изобразительного искусства
сёянін — столовая
спортивнӧй зал — спортивный зал
судта — этаж
сьыланін — кабинет музыки
урок лыддьӧг — расписание уроков

КАДАКЫВЙЫСЬ ЭМАКЫВ АРТМӦМ.
ОБРАЗОВАНИЕ ИМЁН СУЩЕСТВИТЕЛЬНЫХ ОТ ГЛАГОЛОВ

Коми кывйын -ин (-ін) суффикс индӧ места вылӧ.
кадакыв + -ан (-ян) + -ин (-ін) = эмакыв
велӧдчыны + -ан + -ін = велӧдчанін
лыддьысьны + -ян + -ін = лыддьысянін

80 удж. Лыддьы да гӧгӧрво висьтсӧ.

Миян школа.

Ме велӧдча сиктса школаын. Сійӧ кык судтаа, ыджыд ӧшиньяса. Миян велӧдчанінын век сӧстӧм да кыпыд. Медводдза судтаын пӧрччысянін, веськӧдлысьлӧн вежӧс, сёянін да ичӧт класса челядьлӧн велӧдчан вежӧсъяс. Шуйгавылын — ыджыд спортивнӧй зал. Мӧд судтаын коми да роч кыв, математика, химия, биология да менам радейтана информатика вежӧсъяс. Кыкнан судтасӧ мичмӧдӧма серпасъясӧн, ӧшиньяс вылын сулалӧны мича дзоридзьяс. Таво миян школалы тырис 20 во.

81 удж. Лыддьы да вуджӧд.

Менӧ шуӧны Миша Расовӧн. Велӧдча ме Искусствояс гимназияын. Гимназия — искусствояслӧн ді.
Енбиа челядь, локтӧй велӧдчыны гимназияӧ! Ті велаланныд бура сьывны, йӧктыны да ворсны шылада инструментъясӧн!

82 удж. План серти гиж ас висьт. Дасьтысь висьтавны аслад велӧдчанін йылысь.

1. Кӧні тэ велӧдчан?
2. Кутшӧм тэнад школаыд? Кымын судтаа?
3. Мый сэні эм?
4. Кымын во тіян велӧдчанінлы?

83 удж. Нуӧд экскурсия радейтана судтаӧд. Дасьты план серти висьтасьӧм.

1. Велӧдчанінын кутшӧм судта тэныд кажитчӧ?
2. Мый сэні эм?
3. Мыйӧн сійӧ тэныд кажитчӧ?
4. Кутшӧм ин тайӧ судтаын тэнад радейтана?

Лӧсьӧд реклама аслад велӧдчанінлы.

Коми Республикаса Юралысь бердын искусствояс гимназиялӧн канпас да дӧрапас.

84 удж. Быд школалӧн эм аслас символъяс: дӧрапас, канпас да кып. Лӧсьӧд и тэ.

85 удж. Сьыв ёртъясыдкӧд школа йылысь сьыланкыв.

Школа йылысь сьыланкыв.

(А.Островскийлӧн «Солнечный круг» сьыланкыв шылад улӧ)
Кывъяссӧ лӧсьӧдісны Выльгортса шӧр школаын велӧдчысьяс

1
Велӧдчысь ёрт, тэ водзын мог —
Тӧдӧмлун школаын босьтны.
Лоан мед тэ бур мортӧн, дерт,
Нималан ылӧдз мед век.

ПРИПЕВ:
Медым пыр лоас школа
Кыпыд, югыд, зэв колан.
Челядь гӧлӧс пыр кылас,
Челядь серамӧн тырас.

2
Му вылын мед некор оз ло
Война да шогалан лунъяс.
Мед вӧлі мир, эз киссьы вир,
Ёртасян гаж юргис дыр.

Видлы лӧсьӧдны велӧдчӧм либӧ школа йылысь сьыланкыв.

86 удж. Велӧдчы колана ногӧн лыддьыны кывпесанъяс.

Кывпесанъяс.
«Ӧ»

Ӧтчыд Ӧньӧ ӧмидз ӧктіс,
Ӧдва ӧкмис ӧти кӧш.
Ӧвад ӧдӧлитіс-вӧтліс,
Ӧньӧ скӧрмис — корсьӧ нӧш.
Ӧдзӧс бокысь, ӧшинь улысь
Нӧшсӧ корсьӧ, Ӧньӧ скӧр.
Ӧгрӧ тьӧтыс шуӧ: «Ӧвсьы,
Ӧпӧть ӧмӧй колӧ ньӧр?»

«Дж»
Ыджыд мыджӧд
Джыджыд вуджис,
Джуджыд кӧджын
Джыджлӧн поз.
Джыджыд гыджгӧ —
Ыджыд уджыс,
Джыджлы уджавтӧг
Оз позь.

Н. Щукин

Казьтыв 5-ӧд класса небӧгысь кывпесанъяс. Артмас кӧ, лӧсьӧд ачыд.

Лыддьӧй рольяс серти.

Юрӧбтіс звӧнок. Классӧ пырис Ольга Николаевна. Сійӧ пыр и казяліс стенын серпасалӧм морячокӧс. Чужӧмыс велӧдысьлӧн лои стрӧг.
— Коді тайӧс серпасаліс?
Ставныс пукалісны шы ни тӧв. Некод эз чеччы да эз висьтась.
— Ті ӧмӧй онӧ тӧдӧй, мый класс колӧ видзны сӧстӧма? Мый лоӧ, быдӧн кӧ кутас серпасасьны стенӧ?
Бӧръя урок вылас классӧ воис директор Игорь Александрович. Сійӧ чӧла висьталіс миянлы, мыйта сьӧм видзӧ государство быд велӧдчысь вылӧ, кутшӧма колӧ видзны школаса эмбур.
— Сійӧ, коді серпасаліс стенас, дерт, оз кӧсйы вӧчны омӧльтор школалы. Сійӧ кӧ ачыс висьтасяс, то петкӧдлас, мый сійӧ честнӧй морт.
Урокъяс бӧрын Толя Дёжкин матыстчис Игорь Грачёв дінӧ да шуис:
— Эк, тэ! Мыйла стенас рисуйтін? Тэ вӧсна став классыс лои мыжа!
— Ог тӧд, но ме сэсся ог кут, — кӧсйысис Игорь.
Игорь босьтіс ветьӧк да чышкаліс стенысь морячоксӧ, но сы местаӧ колис ыджыд чут.

Н. Носов серти

1. Мый вӧчис Игорь? Буртор али лёктор?
2. Вӧліс-ӧ татшӧмторйыс тэкӧд?
3. Кыдзи ті видзанныд школаса эмбур?

87 удж. Лыддьы да гӧгӧрво висьтсӧ. Вочавидз юалӧмъяс вылӧ.

Аттӧ дивӧ.

Ваня Пипуныров медводдзаысь муніс школаӧ. Том велӧдысьсӧ шуисны Татьяна Николаевнаӧн. Сійӧ неважӧн воис Катыдпомӧ да челядькӧд эз вӧв тӧдса. И медводдза урок дырйи велӧдысь сувтӧдліс быд первоклассникӧс, юавліс ним-овсӧ. Ковмис и Ванялы ассьыс ним-овсӧ висьтавны.
— Пипуныров Иван, — вель ярскӧба висьталіс Ваня.
Ӧртьӧм Коля, парта сайсьыс чеччывтӧг, гораа юӧртіс:
— Татьяна Николаевна, абу сійӧ Иван. Аттӧдивӧӧн шуӧны.
Ваня гӧрдӧдіс пельӧдзыс, весиг синваыс пондіс доршасьны. А Татьяна Николаевна меліа нюммуніс да юаліс:
— Коді нӧ, Ваня, сетіс тэныд татшӧм тешкодь мӧд нимсӧ?
И Ваня висьталіс аслас ыджыдджык вок Мишка йылысь. Кывлӧма сійӧ кыськӧ кывбур, коді заводитчӧ тадзи: «Аттӧ-дивӧ, миян Ивӧ...» И ляскис ичӧтджык вокыслы выль ним — Аттӧ дивӧ.
Татьяна Николаевна кывзіс детинкалысь шог висьтсӧ, сэсся пуксьӧдіс Ваняӧс да шыӧдчис став класс дорӧ:
— Челядь, тіянлы быдӧнлы мам-батьныд бӧрйӧмаӧсь зэв мича нимъяс. Радейтӧй нимтӧ ассьыныд и ёртъясыдлысь. Энӧ вежлалӧй найӧс нерсян кывъяс вылӧ. А то ӧд и збыль коркӧ вермасны чужны Аттӧ-дивӧ Миша либо Ӧртьӧ-брӧтьӧ Маша.
Класс серӧктіс. А ичӧтик Ваня Пипуныровлӧн сьӧлӧм вылас кокняммис.

А. Петрунёв серти

1. Кыдзи Иванлы сюрис Аттӧдивӧ ним?
2. Кажитчӧ-ӧ Иванлы мӧд нимыс?
3. Мыйла нимтысьӧмыд омӧльтор?

88 удж. Лыддьы да гӧгӧрвоӧд шусьӧгъяссӧ.

1. Велӧдчӧм морт — синма, велӧдчытӧм — синтӧм.
2. Быдтор дорӧ колӧ велӧдчыны.
3. Велӧдчытӧгыд мортӧ он во.

Аддзы велӧдчӧм йылысь 2–3 шусьӧг.

89 удж. Лыддьы да гӧгӧрво ичӧт серамбана висьтъяс. Дасьты ёртъясыдкӧд петкӧдчӧм.

* * *

Гожӧмбыд Светук лӧсьӧдчис мунны первой классӧ. И со тайӧ луныс воис. Нывка весиг мудзис сымында выльторсьыс.
Кӧч тӧлысь мӧд лунӧ мамыс садьмӧдӧ нывсӧ:
— Чеччы, Светук, школаӧ колӧ мунны!
— Ме сэні тӧрыт вӧлі нин! — чуймис нывка.

* * *

Математика вежӧсын.
— Висьтав, Коля, коді арталіс тэныд тайӧ задачасӧ, батьыд али мамыд? — юалӧ велӧдысь.
— Ог тӧд. Ме сэки ывлаын ворсі.

* * *

Велӧдысь эз эскы, мый ӧти морт вермас вӧчны та
мында ӧшыбка.
— Мыйла ӧтнам, батьӧкӧд вӧчим, — шуис Ӧньӧ.

КОМИ РЕСПУБЛИКАСА КАНАЛАН ПАСЪЯС

вежӧртны — означать, значить
вежӧртас — значение
вежа — святой
видзысь — хранитель
каналан — государственный
канму — государство, страна, республика
каналан пасъяс — государственные символы
кузьта — длина
лӧсялана — подходящий
паськӧдчыны — расположиться
пасьта — ширина
перымса пемӧсъяслӧн сер — пермский звериный стиль
помтӧм-дортӧм — бескрайний
ыджда — величина

90 удж. Мӧвпышт, кутшӧм шыпасъяс оз тырмыны да артмӧд кывъяс.

ДРПС
ЛМ
НЖ
ПРМ
КНПС
ЙР РЪЯС
КП
ВРШ ПЗ
ЛБЧ
ЗРН НЬ

НИМВЕЖТАСЫСЬ КЫВБЕРД АРТМӦМ.
ОБРАЗОВАНИЕ ИМЁН ПРИЛАГАТЕЛЬНЫХ ОТ МЕСТОИМЕНИЙ

Ӧтвывтӧм кывбердъяс петкӧдлӧны мортлысь да предметлысь качествосӧ ас, аслыс нимвежтасъяс дорӧ нога, сяма, сикас, руа, ныра, пӧлӧс кывъяс содтӧмӧн.

Пример вылӧ: асруа, асныра, аслыспӧлӧс да с.в.

аслыспӧлӧс — своеобразный
аслыссикас — разнородный, специфический, оригинальный
ассяма — своеобразный
аснога — своеобразный, оригинальный
асныра — своенравный, упрямый
асруа — своеобразный, со странностями

91 удж. Содтав сёрникузяясӧ лӧсялана кывбердъяс.

1) Коми Республикаса быд районын ... сёрни. 2) Менам ёртӧй ... . 3) Коми Республикалӧн ... каналан пасъяс. 4) Войвывса йӧзыд ... . 5) Тӧвся поводдяыд
... .

92 удж. Мый серпасалӧма Коми Республикаса канпасӧ? Аддзы колана вочакывъяс.

1
А) кырныш
Б) варыш
В) сюзь

2
А) шонді
Б) коми ань
В) зарни ань

3
А) йӧра юръяс
Б) кӧр юръяс
В) ош юръяс

93 удж. Лыддьы да кут тӧд вылын.

Кып.

Коми Республикаса каналан пасъяс — дӧрапас, канпас да кып.
Миян кып аслыспӧлӧс: юргӧ коми да роч кывъяс вылын. Ӧд Коми Республикаын кыккывъялун. Медводз кып лӧсьӧдан комиссия бӧрйис Нёбдінса Витторлысь «Варыш поз» сьыланкыв. Сэсся дыр уджалісны кывъяс вылын, медым кыпыс вӧлі ӧнія кадся да республикаын быдӧнлы гӧгӧрвоана. 2007-ӧд восянь кыпыс юргӧ тадзи:

Коми Республикаса каналан кып.
Кывъясыс В. Савинлӧн, редакцияыс В. Тиминлӧн, А. Шергиналӧн да А. Суворовлӧн
Шыладыс В. Савинлӧн, обработкаыс М. Герцманлӧн

Ылын-ылын Войвылын
Джуджыд парма сулалӧ.
Парма шӧрын варыш поз
Кыпыд горӧн шыалӧ.

Лэбзьӧй, повтӧм варышъяс,
Вына бордъяс шеныштлӧй,
Веськыд туйӧд нуӧдӧй,
Коми мусӧ югдӧдӧй!

Север, наш родимый край,
Глубоки твои снега,
Холодны твои ветра,
Высока твоя тайга!

Нас несут через века
Соколиные крыла.
Коми край, твоя судьба
Благодатна и светла!

94 удж. Лыддьы да кут тӧд вылын.

Канпас.

Коми Республикаса каналан канпассӧ вӧчӧма пермскӧй зверинӧй стиль серти. Гӧрд геральдическӧй пӧв вылӧ серпасалӧма варышӧс.
Варыш петкӧдлӧ государство да власьт.
Лэбачлӧн морӧсас аньлӧн чужӧмыс петкӧдлӧ «Зарни аньӧс» — олӧм радейтысь шондіа ань енмӧс, мир кутысь мамӧс.
Йӧра — ёнлун, веськыдлун, мичлун петкӧдлысь пас.
Коми войтырлӧн фольклорын зарни да гӧрд рӧмъяс петкӧдлӧны асъя шонді да шаньлун, коми войтырлысь да власьтлысь удж-зільӧм.

95 удж. Содты кывбурӧ рӧм вылӧ индысь кывбердъяс. Вочавидз юалӧмъяс вылӧ.

Куим рӧма дӧрапас.

Степан нима изэрд весьтын
Куим рӧма дӧрапас.
Татчӧ, кодыр кӧть ог веськав
Паськыд эрдыс меным ас.

... рӧм — тайӧ миян енэж
... — парма-вӧр
... рӧмыс казьтӧ меным
Лымъя войвыв — сьӧлӧмшӧр.

В. Тимин

1. Коді ӧні Коми Республикаса Юралысьыс?
2. Кутшӧм кывъяс лоӧны миян республикаын каналанаӧн?
3. Мый серпасалӧма канпасӧ?
4. Мый вежӧртӧны дӧрапас рӧмъяс?
5. Мый тӧдмалін кып йылысь?

96 удж. Вӧзйы да дорйы ас сиктлы (карлы, школалы, класслы, котырлы) лӧсьӧдӧм дӧрапас.

КОМИ РЕСПУБЛИКАСА НИМАЛАНА ЙӦЗ

аддзысьлӧм — встреча
вичмыны — достаться
виччысьтӧмтор — неожиданность
зільны — стараться
кывбур тэчысь — поэт
кывкӧртавны — подвести итог
кындзи — кроме
кыскыштны — дёрнуть
лыддьысянін — библиотека
надзӧникӧн — медленно
небӧг лэдзанін — книжное издательство
нималана, тӧдчана — известный, знаменитый
орны — оторваться
печкыны — прясть
пинявны — ругать
суйӧр сайын — за границей
сюрӧс — основа
теш — юмор
туявны — исследовать
туялысь — исследователь
уджалігмоз — работая
шемӧсмыны — удивиться
эндыны — запустеть

УРЧИТАНЛӦН ӦТКОДЯЛАН ДА МЕДВЫЛЫС ТШУПӦД.
СРАВНИТЕЛЬНАЯ И ПРЕВОСХОДНАЯ СТЕПЕНЬ НАРЕЧИЙ

-джык суффикс отсӧгӧн артмӧ урчитанлӧн ӧткодялан тшупӧд.
Мед- приставка да медся кыв отсӧгӧн артмӧ урчитанлӧн медвылыс тшупӧд.

Пример вылӧ:

Бура — бурджыка;
тшӧкыда — тшӧкыдджыка.
Бура — медбура, медся бура.
Дыр — меддыр, медся дыр.

97 удж. Вуджӧд текстсӧ роч кыв вылӧ. Лӧсьӧд дженьыд висьт.

Евгений Александрович Игушев.

Е. А. Игушев — коми кыв туялысь, филология доктор, велӧдысь. Евгений Александрович чужлӧма Сосногорск бердса Пожня грездын. Велӧдчӧма Ухтаса горно-нефтянӧй (биару-мусир) техникумын, сэсся Коми пединститутын. Армия бӧрын уджалӧма сиктса велӧдысьӧн. Уджалігмоз помалӧма аспирантура.
1973-ӧд восянь Евгений Александрович уджаліс Сыктывкарса канму университетын. Сійӧ гижис коми кывйысь вель уна велӧдчан пособие. Шуам, «Коми диалектология», «Коми кыв да йӧзкостса поэзия», «Введение в финно-угроведение», «Ӧнія коми кыв» да мукӧд. Та кындзи Евгений Александрович гижӧ неыджыд висьт-тешъяс. Вуджӧдӧ финн-угор кывъясысь челядьлы мойдъяс, шусьӧгъяс, нӧдкывъяс.
Евгений Александрович Игушевӧс тӧдӧны да пыдди пуктӧны оз сӧмын Россияын, но и суйӧр сайын: Венгрияын, Финляндияын, Эстонияын. Тайӧ шань да серамбана учёнӧйсӧ, велӧдысьсӧ зэв ёна радейтӧны студентъяс.

98 удж. Содты коланаинӧ отсӧг вылӧ сетӧм кывъяс да вочавидз юалӧм вылӧ.

Водз чеччӧ да этша печкӧ.

Миян сиктын олӧ Дарья тьӧт, дзоляник, косіник, зэв тэрыб кока да сёрниа пӧрысь нывбаба. Дарья тьӧт луннас быдлаӧ волӧ, ставсӧ тӧдӧ, быдтор удитӧ ... висьтавны. Лавкаӧ да поштаӧ витысь ... пыралас. И клубад ... на удитас волыны. Керкаыс Дарья тьӧтлӧн сикт шӧрас, медся важиник да лёкиник. Картупельсӧ ... заводитӧ керны да лымъявтӧдзыс некор оз вермы эштӧдны. Вӧрысь локтысьясӧс пыр паныдалӧ Дарья тьӧт. Тӧдӧ, коді ... чукӧртӧма тшак-вотӧссӧ, коді ... вотчӧ. Тадзи и олӧ Дарья тьӧт, прамӧя оз узьлы, а вӧчны нинӧм оз удит, овмӧсыс эндӧма.

Е. Игушев серти

Отсӧг вылӧ кывъяс: сёрӧнджык, медводз, медся водз, сюсьджыка, унджык, этшаджык.

Кутшӧм Дарья тьӧтыс?

Гӧгӧрвоӧд висьтлысь нимсӧ, аддзы текстысь вочакыв.

99 удж. Корсь лыддьысянінысь удж йылысь шусьӧгъяс. Дзеб ӧти шусьӧг ребусӧ.

100 удж. Лыддьы да гӧгӧрвоӧд финн шусьӧгъяссӧ.

Финн шусьӧгъяс.

Бур морт сетӧ этшасьыс, лёк мортлӧн оз вичмы и унасьыс.
Важсӧ эн лёкӧд водзвыв, кытчӧдз выльсӧ бура он тӧдмав.

Комиӧдіс Е. Игушев

101 удж. Лыддьы да тӧдмав финн нӧдкывъяссӧ.

Кутшӧм серпасъяс лӧсялӧны нӧдкывъяслы.

Финн нӧдкывъяс.

Коктӧг котӧртӧ, бордтӧг лэбӧ, ӧти
луннас дас сиктӧ волӧ.
Вужйыс вылын, юрыс улын.
Ыджыд лэбач надзӧникӧн ӧвтчӧ, бордъяссьыс ва виялӧ.

Комиӧдіс Е. Игушев

102 удж. Лыддьы да гӧгӧрво висьтсӧ. Висьтав Иван Ильич Белых йылысь III морт нимсянь.

Чужлі ме Сыктывдін районса Паль сиктын 1946-ӧд вося кӧч 23-ӧд лунӧ.
Ичӧтдырйи ёна радейтлі кывзыны баблысь мойдъяссӧ. Мукӧд мойдсьыс весиг юрсиыд сувтлывліс. Нӧшта кажитчис вадорын вуграсьны да вӧрын вотчыны. Эг ӧтчыдысь ичӧтнад ылавлы вӧрӧ. Пармаыс нӧшта ёнджыка кутіс кыскыны менӧ ас дінас.
Коми пединститут помалӧм бӧрын пыр уджалі «Югыд туй» (ӧні «Коми му») газет редакцияын. Сӧмын некымын во кежлӧ вуджлі Коми небӧг лэдзанінӧ да «Йӧлӧга» газет редакцияӧ. Республика пасьта ветлігъясӧ йӧзкӧд аддзысьлӧмъясыс да накӧд сёрниясыс и лоисны менам висьтъяслы сюрӧсъясӧн.
Петалісны «Ӧзйы, бипурӧй менам», «Челядьдырся пароходъяс» да «Важыс уськӧдчывлӧ вӧтӧн» небӧгъяс. Сэні зіли петкӧдлыны, кутшӧм ёна радейта ассьым чужанінӧс, ас войтырӧс, ас пармаӧс. Наын и менам олӧмыс.

И. Белых

Лыддьы И. И. Белыхлысь ас бӧрйӧм серти гижӧд. Серпасав да висьтав сы йылысь коми кыв урок вылын.

103 удж. Лыддьы висьтлысь юкӧнъяссӧ, гӧгӧрво да тэч найӧс колана ногӧн.

Выль пась.

А

Меным ньӧбисны выль пась. Зэв мича, кельыдгӧрд. Кор ме муна уличті, нывкаяс кындзи, зонкаяс ме вылӧ видзӧдӧны. Ӧтчыд весиг Вадик Блинов видзӧдліс, дерт, эз ме вылӧ, а менам пась вылӧ. Но век жӧ нимкодь. Со кутшӧм менам пасьӧй. Медся бур!

Б

— Кытчӧдз оз быдмы выль кизь, — шуис мам, коді пукаліс диван вылын да кыис моднӧй шапка. Меным лои тешкодь. Син водзӧ сувтіс серпас: со чужӧ выль кизь. Медводз сійӧ ичӧтик, сэсся ыджыдджык, медбӧрын 5 шайт ыджда.

В

— Кытчӧдз он велав колана ногӧн новлыны паськӧм, — кывкӧрталіс бать.
— Кыдзи ме велала сійӧс новлыны? — шемӧсми ме.
— Мӧвпнад, — шуис мам и серӧктіс.
Мамӧ вурис кизьсӧ, и батьӧ ӧшӧдіс пасьсӧ шкапӧ. Кутшӧм сылы гажтӧм сэні ӧшавнысӧ, некод сы вылӧ оз видзӧд.

Г

Но лоис виччысьтӧмтор. Пасьысь орис кизьыс. Гашкӧ, пӧрччысигӧн кыскышті ёнджыка. Бать казяліс орӧм кизя пасьӧс. Дыркодь пиняліс менӧ, ӧд пасьыс выль на:
— Кутан ветлыны пальтоӧн, кытчӧдз..., кытчӧдз...

Е. Габова серти

1) АБВГ
2) АГВБ
3) АГБВ
4) ГАВБ

1. Мыйла радліс нывка?
2. Кутшӧм сылӧн пасьыс?
3. Мыйысь скӧрмис батьыс?
4. Мыйла пасьыслы шкапас гажтӧм?

Корсь материал Елена Васильевна Габова йылысь. Дасьты неыджыд юӧр.
Юӧрсӧ позьӧ вӧчны презентация ногӧн компьютер отсӧгӧн PowerPoіnt программаын.

ТУВСОВЪЯ ТӦЖДЪЯС

асык — дуга
быдмыны — расти
вирич — керйысь вӧчӧм теплица
вӧрзьыны — тронуться
вын-эбӧс — сила
гӧрны — пахать
енэжтас — горизонт
киськавны — поливать
кӧдзны — посеять
кӧйдыс — семя
ловзьыны — ожить
нетшкыны — рвать
нюжавны — тянуться
пелькӧдны — наводить порядок
поз — гнездо
рӧсада — рассада
садьмӧдны — будить
саридз — море
тувччыны — наступить
чегъявны — ломать
чукӧртны — собирать
шыблавны — разбрасывать

КАДАКЫВ. ЛОКТАН КАД
ГЛАГОЛ. БУДУЩЕЕ ВРЕМЯ

Морт
Ӧтка лыд
I (ме) быдм-а
II (тэ) быдм-ан
III (сійӧ) быдм-ас

Морт
Уна лыд
I (ми) быдм-ам
II (ті) быдм-анныд
III (найӧ) быдм-асны

Пример вылӧ:
Ме аски пукта дзоридзьяс.
Вок лӧсьӧдас дзоридз градъяс.
Регыд петасны медводдза дзоридзьяс.
А ті мый пуктанныд керка водзӧ?

104 удж. Лыддьы да вуджӧд Иван Коданёвлӧн «Нёль вок» мойдысь юкӧн.

Нёль вок.

Олӧны-вылӧны нёль вок. Ёнысь-ёнӧсь, мичаысьмичаӧсь. Некор оз пӧрысьмыны. Зэв шаньӧсь. Пыр старайтчӧны му вылын да вӧр-ваын олысьяслы вӧчны кыдз позьӧ унджык буртор.
Первой воксӧ шуӧны Тулысӧн.
Воас кадыс да кузь туйӧ медводз петас Тулыс. Кыті мунас сійӧ, кутшӧм муясӧ тувччылас сылӧн кокыс, быдлаын шондӧдас, ставыс ловзяс. Садьмӧдас шоръясӧс, йи улын шойччысь юясӧс. Тшӧктас мича паськӧмӧн вӧччыны пуяслы. Шоныд муясысь, саридзьяс бердысь аскӧдыс вайӧдас и быдсикас лэбачӧс. Тулыс вок тэрмӧдлас быдӧнӧс, медым быд удж вӧлі вӧчӧма ас кадӧ да бура.
Кыпыд Тулыс ёна и гажӧдас йӧзӧс да пемӧсъясӧс. Челядьӧс ворсӧдас, вӧрпаяслысь паськӧмсӧ вежас, пӧткаясӧс тшӧктас сьывны-гажӧдчыны, вын-эбӧс сетас юяслы да шоръяслы.
Тулыс уджалас лун и вой. Уна буртор коляс ас йывсьыс му вылӧ. Кор вель ёна мудзас, отсӧг вылӧ чукӧстас ассьыс воксӧ — Гожӧмсӧ.

Содты ассьыд кывъяс.

воис гажа тулыс

105 удж. Лыддьы приметаяс. Содты кадакывъясӧ локтан када суффиксъяс.

1) Кузь йинёньяс ӧш... керка вевт дорышӧ — тулыс нюжал... . 2) Сьӧд рака воис — кызь лун мысти йи вӧрз..., тӧлысь мысти лым сыл... . 3) Тулыснас кӧ лымйыс сыл... ӧдйӧ, а ытваыс исковт... тэрыба — виччысь васӧд гожӧм. 4) Кыдзлӧн кӧ водзджык восс... коръясыс ловпуысь — гожӧмыс ло... зэра. 5) Чикыш во... — гым ва... . 6) Май дас коймӧд лунӧ кӧ войыс шоныд да кодзула — гожӧмыс ло... кос.

106 удж. Мичаа лыддьы кывбурсӧ. Инды локтан када кадакывъяс.

Тулыс.

Бара воас гажа тулыс,
Гӧгӧр ставыс лоас веж!
Бокад тэсӧ эн жӧ сулав,
Аслад муса бать-мам мулань,
Дона пиӧй, зіля кеж!..
Тувсов асылӧ тэ петан
Гӧрны-кӧдзны паськыд йӧр
Сэк, кор шонді кисӧ сетас
Зарниавны му и вӧр.
Сьӧлӧм вылад долыд-долыд!
Сьылӧ тракторъяслӧн гор.
Шуднад збыльысь тырас лолыд,
Вӧчӧмтортӧ аддзан кор.

С. Попов

Гӧгӧрвоӧд омонимъяссӧ, лӧсьӧд наӧн кывтэчасъяс.

ю — ю
сёй — сёй
лыа — лыа
чой — чой
пу — пу
кор — кор
кыв — кыв
оз — оз
сьӧм — сьӧм

«Омонимъяс кывчукӧр» небӧгысь аддзы тӧдса омоним гоз да серпасав.

107 удж. Мичаа лыддьӧй текстсӧ.

Виричын сёрнитӧны капуста да свеклӧ рӧсада.
— Кор нин шондӧдас да миянӧс петкӧдасны шоныд муӧ? — шогсьӧ свеклӧ.
— Воас кад и петкӧдасны. Таысь эн шогсьы. Воысь воӧ миянӧс пыр этшаджык пуктӧны, надейтчӧны дась вылас, — шогсьӧ капуста.
— Да-а. Водзті вӧлі ми кодьтӧ мыйта пуктасны! Ӧні ставыс ёгӧн тырӧма. Регыд кыкӧн и колям.

Мыйла шогсьӧ свеклӧ?

108 удж. Сетӧм кывтэчасъясӧн лӧсьӧд юӧр тувсовъя уджъяс йылысь.

ТУЛЫСЫН

гӧрӧны муяс, градъяс
пелькӧдӧны ӧшинь ув
киськалӧны пуктасъяс
пукталӧны дзоридзьяс
мыськӧны ӧшиньяс
кералӧны пуяс вылысь кос увъяс
идралӧны йӧръяс
шыблалӧны лым
сотӧны колян вося турун
парникӧ пуктӧны ӧгуреч
лӧсьӧдӧны парник
пуктӧны картупель
кӧдзӧны кӧйдыс рӧсада вылӧ
дасьтӧны кӧйдысъяс
небзьӧдӧны му

109 удж. Дасьтысь да гиж «Тувсовъя уджъяс» творческӧй диктант.

Со и воис дыр виччысяна тулыс. Кыз эшкын улысь мыччис ассьыс чужӧмбансӧ му. Чургӧдіс юрсӧ медводдза дзоридз — вижъюр. Тулыс воӧмкӧд и воасны тувсовъя тӧжд-уджъяс. Ковмас гӧрны му, ...

110 удж. Гиж висьтсӧ локтан кадын. Сет висьтыслы ним.

Ми ёрткӧд вӧчим лэбач поз и тувъялім сійӧс ӧшинювса джуджыд коз йылӧ. Медводдза ябыръяс зэв зіля поздысисны сэтчӧ. Лунтыръясӧн найӧ ваялісны гӧнторъяс, кос турун. Недыр мысти лэбачьяс пӧжисны пиянӧс. Уджыс ябыръяслӧн лоис унджык.

1

Витаминыс сыын уна,
Курччан — синва пычкас друг.
Уна вӧлӧгаӧ мунӧ,
Тайӧ, дерт жӧ, град выв ...

2

— Дуньӧ! Дуньӧ! — горзӧм кылӧ,
Роскӧн вӧтлысям бур здук.
Шоныд рытӧ ывла вылын
Тадзи кыям майскӧй ...

3

Ичӧт керка вӧчис дедӧ,
Ме тшӧтш отсаси и бабӧй.
Лэптім зіб вылӧ, сэн медым
Олас-вылас сьылысь ...

4

Зэрӧм бӧрын енэжтасӧдз
Ӧшъяс джынъя мича асык
Сизим рӧма ыджыд кӧшӧн
Васӧ юӧ ...

Н. Щукин

111 удж. Паськӧд сёрникузяяссӧ.

Воис тулыс. Сыліс лым. Ӧшалӧны йинёньяс. Артмӧны гӧпъяс. Бузгӧны шоръяс.
Мыччысьӧны кушинъяс. Польдӧны гаръяс. Дзоридзалӧны вижъюръяс. Воӧны лэбачьяс. Ловзьӧ вӧр-ва.

112 удж. Лыддьы кывбурсӧ да велӧд.

Тулыс.

Тулысӧс кыдзи он радейт,
Сы йылысь кыдзи он сьыв?
Кор весиг дзор тошка дядьлӧн
Дзордзалӧ чужӧм выв?
Кор сынӧдас сьыланкыв сьылӧ,
Муслунӧн ӧвтӧ тӧв,
И меліа кышакылӧ
Бадьясӧн мӧдлапӧв.

А. Размыслов

113 удж. Аддзы А. Саврасовлӧн «Грачи прилетели» серпас дорӧ лӧсялана сёрникузяяс.

Воисны сьӧд ракаяс.

Медводз миян войвылӧ воисны сьӧд ракаяс. Гӧгӧр на лымъя, а найӧ танӧсь нин. Шойччыштасны кузь туй бӧрын и заводитасны позъяс вӧчавны. Позъяссӧ найӧ вӧчӧны паркъясын, расъясын. Водз асывсянь сёр рытӧдз найӧ кравзасны, позъяснысӧ вӧчӧм вылӧ увъяс чегъяласны да ваяласны. Ӧтияс важ познысӧ дзоньталасны, мӧдъяс — выльысь вӧчасны. Лунтыр ракаяс ноксясны-уджаласны. А кор воас рыт, пуксясны асланыс позъяс дорӧ да узьӧны асылӧдз.
Асывнас садьмасны водз да бара уджӧ кутчысясны. Сьӧд ракаяс пӧжсьӧны медводз. Оз на удит пуяс вылын кор потны, а пияныс горзӧны нин — сёйны корӧны.

И. Коданёв

Кутшӧм кадын сетӧма унджык кадакывсӧ? Мыйла?

ТУВСОВЪЯ ГАЖЛУНЪЯС

биа висьӧм — горячка
вежӧдны — освятить
вежа — святой
вомидз — сглаз, порча
дзескыда олысь — малоимущий
ен ув пельӧс — передний (красный) угол
инмӧдчыны — прикасаться
кослунъя — постный
личӧдны — облегчать
лов — душа
ловзьыны — воскреснуть
мездыны — освободить
мездысь — избавитель
мути — бес, чёрт
олӧма — пожилой
проса рок — пшённая каша
сьӧлӧм бурмымӧн — (здесь) вдоволь
Ыджыд видз — Великий пост
эскыны — верить
эскысь — верующий

114 удж. Лыддьы висьтлысь юкӧнъяссӧ, гӧгӧрво да тэч найӧс колана ногӧн.

Берба лун.

А

Коми йӧз лыддьӧны, мый берба отсалӧ босьтны бур урожай, вермӧ сетны йӧзлы да гортса пемӧсъяслы дзоньвидзалун. Берба видзӧ пемӧсъясӧс вомидзысь. Берба вожъясӧн комияс инмӧдчылісны ӧта-мӧдӧ да гортса пемӧсъясӧ, шуалісны нимкыв: «Юр вывсянь кок улӧдз берба дзоньвидзалун мед сетас».

Б

Тайӧ лунсянь Ыджыд лунӧдз бербалӧн быдманінысь эз вӧрӧдны васӧ. Чайтісны, бадьясувса ваас пӧ тайӧ кадӧ уна мути. Эм эскӧм, мый биӧ шыбитӧм берба видзӧ пӧжаръясысь. А тӧвлы паныд шыбитӧм берба лӧньӧдӧ бушков. Шуӧны, Берба лунӧ кӧ шондіа — гожӧмыс лоӧ бур, озыр урожай артмас.

В

Ыджыд лунӧдз вежонӧн водзджык эскысь йӧз пасйӧны Иисус Кристослысь Иерусалимӧ пырӧмсӧ. Сэні Господьӧс кыпыда паныдалісны, чолӧмалісны пальма вожъясӧн, чолӧмалісны мӧда-мӧдсӧ Кристос воӧмӧн. Миянлы тайӧ гажыс ёнджыка тӧдса, кыдзи Берба лун, сы вӧсна мый миян пальмаяс оз быдмыны. Сы пыдди вичкоын вежӧдӧны медводдзаӧн дзоридзалысь берба.

Г

Берба вожнас инмӧдчылісны керкалӧн быд пельӧсӧ. Сэсся пуктылісны ен ув пельӧсӧ. Сэні берба оліс мӧд воӧдз. Лыддьӧны, мый бербаыс вына сӧмын ӧти во. Биа висьӧмысь пӧ мездылӧма бербалӧн 9 гар.


115 удж. Лыддьы текстсӧ, аддзы выль кывъяс да гӧгӧрво. Сет текстлы ним.

...

Сьӧлӧм и лов личӧдысь да гажӧдысь тайӧ праздникыс быдӧнлӧн: олӧмаяслӧн, томъяслӧн, челядьлӧн. Быд керкаын пелькӧдчӧны, рытсяньыс пусьӧны-пӧжасьӧны. Медся дзескыда олысьяслӧн тайӧ лунӧ пызан вылас быдтор лоӧ: и яя шыд, и чӧскыд черинянь, и проса рок, и нӧкъя рысь, и выйӧн мавтӧм пирӧг-шаньга. Быдсяма чӧскыдторсӧ на видзыштӧны Кристос ловзян лун кежлӧ, мед вунӧдлыны сьӧкыдсӧ да сьӧлӧм бурмымӧн радлыны-гажӧдчыны.

Б. Шахов серти

1. Кутшӧм гажлун йылысь висьтавсьӧ текстын?
2. Мыйла тэ тадзи чайтан?

116 удж. Лыддьы да гӧгӧрво рецептсӧ.

Кулич вӧчан рецепт.

Босьтам 1 кг пызь, 100 г вый, 150–200 г сакар, 50–100 г изюм, 400 г йӧв, дрожжи да сов.
Шоныд йӧлӧ пуктыны дрожжи, содтыны 500 г пызь и 2–3 час кежлӧ кольны кыптыны. Кор няньшомыс лоӧ дась, пуктыны мукӧдторсӧ да бура гудравны. Пӧжалӧм бӧрас мичмӧдны кольтусьӧн да уна рӧма сакарӧн.

1. Вуджӧд рецептсӧ да пӧжав кулич.
2. Мичмӧд куличсӧ да пасхасӧ коми серъясӧн.

МОРТ-МОРТА НИМВЕЖТАСЪЯС.
ВЗАИМНО-ЛИЧНЫЕ МЕСТОИМЕНИЯ

Ӧта-мӧд, мӧда-мӧд (друг друга) нимвежтасъяс шусьӧны морт-мортаӧн. Найӧ вежласьӧны вежлӧгъяс серти.

Пример вылӧ:

ӧта-мӧдлы — друг другу
Гажлун дырйи ми козьналім ӧта-мӧдлы мича серпасъяс.

мӧда-мӧдӧс — друг друга
Мӧда-мӧдӧс кыпыда чолӧмалім Ыджыд лунӧн.

117 удж. Гиж морт-морта нимвежтасъяссӧ колана вежлӧгын. Лӧсьӧд 2–3 сёрникузя.

Друг с другом, друг у друга, друг без друга, друг от друга, друг друга, друг другом, друг другу.

ПОДЧИНИТЕЛЬНӦЙ КЫВЙИТӦДЪЯС.
ПОДЧИНИТЕЛЬНЫЕ СОЮЗЫ

Подчинительнӧй кывйитӧдъяс йитӧны сёрникузяяс. На водзын пуктӧны чутік.
та вӧсна, та понда — потому, поэтому

Пример вылӧ:
Ыджыд лун водзын мунӧ Ыджыд видз, та вӧсна колӧ сёйны кослунъя вӧлӧга.
Аски Троича, та понда ми ветлам вичкоӧ.

118 удж. Лыддьы да гиж изложение план серти.

Троичаса кыдз.

Троича пасйӧны Ыджыд лун бӧрын 50-ӧд лунӧ — 7-ӧд вӧскресенньӧӧ. Медъёна тайӧ лунӧ пыдди пуктӧны кыдз пу, та вӧсна сійӧс вежӧдӧны вичкоын. Кыдз — шонділӧн да томлунлӧн пас.
Кыдзсӧ лыддьӧны шуда пуӧн, сійӧ вайӧ бурлун. Та понда коми йӧз чайтӧны, мый сійӧ видзӧ неминучаысь. Сідз жӧ кыдз лыддьыссьӧ бурдӧдчан пуӧн, та вӧсна инмӧдчылісны ӧта-мӧдӧ вичкоын вежӧдӧм вожъясӧн.
Уличаяс, керка вевтъяс, ен ув пельӧсъяс тайӧ лунӧ мичмӧдӧны кыдз пу росъясӧн. Важӧн сикт-грездъясын медся мича кыдзсӧ мичмӧдлісны уна рӧма лентаясӧн. Сы гӧгӧр том йӧз сьылісны-йӧктісны, ворсісны.

«Йӧлӧга» газетысь

План:
1. Кыдз пу — Троичалӧн вежа пас.
2. Троичаса кыдзлӧн вын.
3. Кыдз пу гӧгӧр гаж.

119 удж. Комиӧд кослунъя сёянлысь рецептсӧ.

Крапивный салат.

Для салата возьмите 300 граммов крапивы, 2 варёных яйца, 3 ложки сметаны, петрушку и соль по вкусу. Вымойте, обдайте кипятком и мелко нарежьте молодые листья крапивы. Перемешайте с измельчённой петрушкой, добавьте сметану. Украсьте варёными яйцами.

120 удж. Лыддьы да гӧгӧрво текстсӧ.

Витамина салат.

Колӧ: 300 г гӧрд кӧчан, 200 г помидор, 200 г ӧгуреч, 200 г болгарскӧй переч, 100 г редис, лук, укроп, салат, сов, кӧнтусь вый.
Став град выв пуктассӧ колӧ медводз мичаа мыськавны. Та бӧрын вундавны кӧчан, редис да лук — гӧгыльясӧн, ӧгуреч — бедьясӧн, помидор — кубикъясӧн. Перечысь перъявны кӧйдыссӧ да вундавны бедьясӧн, укроп-салат посньыдика вундавны. Медбӧрын став вундалӧмторсӧ ӧтлаавны, солыштны да содтыны сэтчӧ кӧнтусь вый.

Корсь да гиж кослунъя сёянлысь рецепт, мичаа оформит.

Став класснад дасьтӧй небӧг (буклет, презентация) «Кослунъя вӧлӧга». Позьӧ вӧчны компьютерӧн «Publіsher» либӧ «PowerPoіnt» программаяс отсӧгӧн.

ВӦР-ВАЛӦН БУРДӦДЧАН КОЗИНЪЯС

бурдӧдчыны — лечиться
видзны — охранять, беречь
воййыв турун — иван-чай
дзуртан турун вуж — родиола розовая
душник турун — мята
лапкор — лопух
кӧртдой турун — тысячелистник
калган — лапчатка прямостоящая
ладан турун — валериана
мырпом кляч — чашелистик морошки
нявда — мокрица
пакула, вӧрса чай — чага
петшӧр — крапива
пув кор — лист брусники
тӧзь — лабазник
тӧрича турун — пастушья сумка
уразнӧй турун — зверобой
урбӧж — хвощ полевой
шыдӧса турун — полынь
ыжман, ыжнёнь — жимолость

121 удж. Лыддьы мойдсӧ. Гӧгӧрвоӧд маръямоль кывлысь артмӧмсӧ.

Маръямоль.

Коркӧ важӧн ӧти сиктын олӧмны пӧрысь гозъя. Налӧн вӧлӧма мичаник авъя Марья нима ныв. Радейтӧма сійӧ сиктса ӧти гӧль зонмӧс. Но бать-мамыс Машукӧс мырдӧн кутӧмны сетны верӧс сайӧ озыр семьяӧ. Дыр бӧрдӧма-корӧма Марья бать-мамыслысь, медым эз сетны сійӧс пӧрысь озыр морт сайӧ. Но эз кывны бать-мамыс нылыслысь корӧмсӧ. Крут берег дорын, кӧні бӧрдіс Марья, мыччысис гӧрд рӧма мича дзоридз. Йӧзыс шуисны тайӧ дзоридзсӧ маръямольӧн. «Марья» — ныв ним серти, «моль» — дзоридзыслӧн быд ар артмӧ сьӧд рӧма моль кодь кӧйдыс.

«Легенды о лекарственных растениях» небӧгысь

122 удж. Вуджӧд роч кыв вылӧ.

Пион артмӧма греческӧй paіonіos кывйысь. Вежӧртӧ ‘бурдӧдысь, дзоньвидзалун сетысь’. Пионӧн шулӧмаӧсь бурдӧдысьӧс. Грецияын вӧлӧма Пион нима тӧдчана бурдӧдысь, Асклепий енлӧн велӧдчысь.

Асклепий — Грецияын бурдӧдчӧмлӧн ен.

СТЕПЕНЬ ПЕТКӦДЛЫСЬ УРЧИТАНЪЯС.
НАРЕЧИЯ СТЕПЕНИ

Степень петкӧдлысь урчитанъяс вочавидзӧны ёна-ӧ? юалӧм вылӧ.

вель — довольно, достаточно
вывті — слишком
дзик — совсем
ёна — очень
зэв — очень

Пример вылӧ:
Маръямоль — зэв мича дзоридз.
Катшасинъяс ёна мичмӧдӧны Коми мусӧ.

123 удж. Содты сёрникузяясӧ колана степень петкӧдлысь урчитанъяс.

1) Ичӧт челядь купайтчӧны ... берег дорын. 2) Школаса рыт колис ... кыпыда. 3) Ми ... радлім гожся каникул матысмӧмлы. 4) Кӧч тӧлысьын пувйыд ... нин гӧрд. 5) Уразнӧй турун ... колана быдӧнлы. 6) Велӧдчысьяс ... бура гижисны тӧдӧмлун донъялан удж. 7) Тулыснас школа гӧгӧр челядь пелькӧдчисны ... дыр.

кӧкакань — чемерица обыкновенная
кӧчвӧнь — плаун булавовидный
ладан турун — валериана
калган — лапчатка прямостоящая
лапкор — подорожник

124 удж. Лыддьы да аддзы бурдӧдчан турун нимъяс. Корсь небӧгъясысь, мыйысь найӧ бурдӧдӧны.

* * *
Висьма кӧ, ме дінӧ врачӧс энӧ корӧй,
Бурдӧдчанторла эн котӧртӧй пыр,
Ачымӧс лэччӧдлӧй Кунес ю дорӧ,
Кӧні быд видз лыдтӧм дзоридзӧн тыр!

Лапкорйӧн шонтыштӧй позялӧм морӧс,
Кӧчвӧньӧн кӧртыштӧй калганлысь вуж,
Шонді мед жалиттӧг синъясӧс ёрӧ,
Кӧтӧдлас синваӧс лысва и пуж.

Ог кӧ на бурд, ладан турун сэк пуӧй,
Кӧкакань шырӧй да вотыштӧй оз,
Чай пыдди медбур лекарство моз юа
Ю весьтӧ ӧшӧдчӧм сьӧд сэтӧр роз.

Шудӧй кӧ яндысьтӧг эновтас дзикӧдз,
Сэки на эскӧмӧй аслам оз кус...
Егырысь корсьӧй, ме воа кӧ пикӧ,
Мырпом, кӧть некымын бурдӧдан тусь.

С. Попов

125 удж. Содты колана вотӧс нимъяс.

Нюр вылын вотчигӧн.

Туйыд вутш пӧвстас кӧ пыртас,
Он на, другӧ, кув.
Аддзан сэтысь чӧскыд ...,
Шома ...

Меным муса сэтшӧм вотӧс,
Коді важӧн сыв,
Нюр выв вотӧс висьӧм сотӧ,
Кыдзи шонді кыв.

С. Попов

Корсь да лӧсьӧд юӧр нюрвывса быдмӧглӧн бурдӧдчан вын йылысь.

126 удж. Бӧрйы ӧти серпас. Гиж сы серти неыджыд мӧвпалана висьт.

127 удж. Лыддьы текстсӧ да гӧгӧрво. Лӧсьӧд юалӧмъяс текст серти.

Ӧтчыд гожӧмнас ме ордӧ гӧститны локтіс Ӧньӧ другӧй. Ми мӧдӧдчим Мизин йылӧ ком вугравны. Сиктсянь неылын миянлы паныдасисны челядь чукӧр. Шуйга кианыс быдӧнлӧн вӧлі бидон либӧ туис. Быдӧнлӧн дозъясныс дзик тыр. Веськыд кианыс ки тырыс кабыртӧмаӧсь чӧд розъяс, да мунігмозныс вомнас ӧктӧны тусьяссӧ. Вель ёна вомныс лякӧссьӧма чӧдйӧн. Ӧньӧ юаліс челядьлысь:
— Вотчыны ветлінныд? Вывті бур!
Сэсся ӧти зонкалысь корис ӧти чӧд роз да юаліс:
— Мича ӧд? А дыр-ӧ чайтан тайӧ розъясыс олӧны?
Челядь ёна шӧйӧвошисны.
— Ӧти во, кӧнкӧ.
— Тайӧ розъяссьыс, гашкӧ, тіян пӧль-пӧчьясыд на вотлісны чӧдсӧ. А чӧд кустъясыс олӧны кыксё воысь дырджык. Ӧні думыштӧй, мыйта чӧд на вермисны сетны йӧзыслы тайӧ розъясыс, а найӧс ті нетшкинныд дзик мӧвпавтӧг.

С. Раевский серти

128 удж. 127-ӧд уджын сетӧм висьтысь аддзы да вуджӧд урчитан кывъяса сёрникузяяс. Лӧсьӧд аддзӧм урчитанъясӧн ас сёрникузяяс.

1. Шома, лӧз рӧма кузьмӧс вотӧс.
2. Еджыд синлыса дзоридз.
3. Кольквиж вотӧс, быдмӧ нюрын.
4. Шома вотӧса пу.
5. Содтӧны курччалан сирӧ.
6. Сыысь пуӧны шыд.
7. Тайӧ туруныс сувтӧдӧ вир.
8. Лӧньӧдан турун.
9. Тайӧ вотӧссьыс вӧчӧны ляз.

129 удж. Лыддьы текстъяссӧ. Лӧсьӧд юӧр бурдӧдчан быдмӧг йылысь.

Пелысь пу.

Миян вӧръясын быдмӧ пелысь пу. Сійӧс садитлӧны и керкаяс дорӧ.
Пелысь зэв колана абу сӧмын йӧзлы, но и пемӧсъяслы. Сылӧн розйын пӧшти ветымын гӧгӧр ичӧтик вотӧс. Тайӧ вотӧсъясас эм яблӧг да лимон кислотаяс, вель уна С витамин.
Кынмалӧм пелысьысь пуӧны варенньӧ. Пелысь сувтӧдӧ вир, та понда пинь ан висигӧн бур пожъявны вомтӧ пелыся ваӧн. Пелысьыд вывті бур кӧрым гортса пӧткаяслы, мӧсъяслы, порсьяслы. Косьтӧм коръясын уна дубильнӧй вещество, та вӧсна найӧс пуктӧны соласигӧн град выв пуктас пиӧ.

Ыжнёнь.

Ыжнёньлӧн вотӧсыс бурдӧдчан вына. Сійӧ бурдӧдӧ язва, лишай. Важӧн коми йӧз ыжнёньлысь чукӧртлісны медмича коръяссӧ, косьтывлісны да пузьӧдлісны чай. Тайӧ чайнас бурдӧдлісны горш висьӧм да орӧсь син. А вотӧсыс зэв бур цингаысь. Сыын зэв уна С да В витамин. Ыжнёнь весигтӧ юр висьӧмысь бурдӧдӧ.

Катшасин.

Катшасин позьӧ чукӧртны кӧч тӧлысьӧдз. Бурдӧдчан вынсӧ кутӧ сӧмын аптечнӧй катшасин. Быдмӧ сійӧ луд вылын, корйыс мунӧ морков корлань. Чукӧртӧны сылысь сӧмын юръяссӧ. Косьтӧны, пӧжӧны пӧсь ваын да юӧны. Пӧжӧм катшасин бурдӧдӧ орӧсь син, чирей, сӧп висьӧм, горш висьӧм, орӧсь дойяс, бырӧдӧ юрысь киль.

Вуджӧд текстсӧ.

Бурдӧдчан быдмӧгъяс.

Вӧр-ва кытшалӧ мортӧс, сетӧ сылы сёян-юан, мичмӧдӧ сылысь олӧмсӧ да тӧждысьӧ дзоньвидзалун вӧсна. Вель уна бурдӧдчантор вӧчӧны уна пӧлӧс быдмӧгысь. Сӧмын Россияын тӧдса куимсё сайӧ татшӧм быдмӧг. Озыр наӧн и миян Коми му. Тайӧ быдмӧгъясыс: пелысь, сэтӧр, льӧм, ӧмидз, лежнӧг, чӧд, турипув, петшӧр, пув кор, лапкор, пожӧм да кыдз гаръяс, пакула да уна мукӧд. Чукӧртны бурдӧдчан быдмӧгъяс абу сэтшӧм сьӧкыд, сӧмын колӧ тӧдны, кор да кыдзи чукӧртны.

130 удж. Висьтсӧ юклы сёрникузяяс вылӧ. Гиж.

Лежнӧг.

Ті аддзылінныд лежнӧг гожӧмын кутшӧм мичаа сійӧ дзоридзалӧ асьсӧ дорйӧ ёсь жельяснас лежнӧгйылыс арнас лоӧ небыд сэні эм уна витамин йӧз вотӧны лежнӧгйывсӧ да пуӧны сыысь варенньӧ фармацевтъяс вӧчӧны бурдӧдчантор.

Мыйла лежнӧгсӧ нӧшта шуӧны жельнӧгӧн?

Сёрнит ёртыдкӧд. Вӧдитчы сетӧм юалӧмъясӧн.

1. Тӧдан-ӧ тэ бурдӧдчан быдмӧгъяс?
2. Мыйысь найӧ бурдӧдӧны?

ВЕЛӦДӦМ МАТЕРИАЛ ВЫНСЬӦДӦМ

131 удж. Аддзы пара. Лӧсьӧд 3 паськӧдӧм сёрникузя.

кымрасьӧ 			пуяс
вежсис			турун
нярмис 			ру
вольсасьӧ 			енэж
кӧдзаліс			коръяс
шарӧдчӧны			поводдя
тыртӧммисны		тӧв
чашйӧ 			ва
кушмисны			градъяс

132 удж. Лыддьы да гӧгӧрво висьтсӧ, лӧсьӧд юалӧмъяс.

Арын пуяс.

Арся кӧдзыдъяс воӧм бӧрын пу вылын коръяс лоасны гӧрдоввижӧсь. Медся мичаӧн овлӧ арся пипу. Турунвиж да виж паськӧма пуяс пӧвстын ышнясьӧ сійӧ аслас пемыдгӧрд да югыдгӧрд сарапаннас.
Коді оз радейт арся вӧртӧ? Кымын пӧлӧс паськӧмаӧсь пуясыс! Сёр арын сэсся паськӧмъяссӧ надзӧникӧн заводитӧны пӧрччавны. Сӧмын ловпу ӧтнас кӧдзыд арын гылӧдӧ дзик веж коръяс. Тайӧ пуыс торъялӧ мукӧдысь аслас сьӧмӧснас да быдманногнас. Керыштан кӧ сьӧмӧссӧ, пыр жӧ сійӧ лоӧ сьӧдвиж, петӧ сэтысь дубитчан кислота. Ловпу быдмӧ васӧдінын.

С. Попов серти

133 удж. Корсь лӧсявтӧм кыв. Гӧгӧрвоӧд бӧрйӧмтӧ.

1. Ода-кора, рака, ӧшым, косму.
2. Тӧв, тӧвбыд, тӧла, тӧвся.
3. Кор, корӧсь, коркӧ, коръя.
4. Йӧв, йӧла, йӧлӧга, Йӧввыв.
5. Пась, паськыд, пасьтавны, паськӧм.
6. Йи, йинёнь, йирым, йиа.
7. Выльлун, шойччан лун, талун.

134 удж. Содты асалан либӧ босьтан вежлӧга суффиксъяс.

1) Света... чужан луныс моз тӧлысь кызьӧд лунӧ. 2) Ми гажаа пасйим Света... чужан лунсӧ. 3) Мам лыддис бать... локтан вежон вылӧ гороскоп. 4) Бать... гороскопӧ гижӧма шуда олӧм йылысь. 5) Лыйсьысь... менюын оз вермы лоны госа сёян. 6) Газетысь ме аддзи Лыйсьысь... меню. 7) Пызан вылын куйлӧ пӧч... козин. 8) Пӧч... козинсӧ, шоныд кепысьсӧ, ме кута новлыны тӧвнас.

135 удж. Содты лӧсялана вежлӧг суффиксъяс.

1) Гожӧмнас да тӧвнас ме ветла пӧч дорӧ Ухта... . 2) Печора... олӧны бать... рӧдвужыс. 3) Воркута... позьӧ мунны поезд... либӧ лэбны самолёт... . 4) Мам... вокыс ветлӧ уджавны Усинск... . 5) Ёрт... бать-мамыс локтісны Сыктывкар... Емва... . 6) Шондіа лунъясӧ ме нимкодяся Опера да балет театр водзын ва бус... .

136 удж. Содты лӧсялана кывъяс, медым артмис радейтана велӧдысь йылысь висьт.

Менам радейтана велӧдысь.

Менсьым радейтана велӧдысьӧс шуӧны ... . Сійӧ велӧдӧ ... . Миян школаын ... велӧдӧ нин ... во. ... урок вылын ми тӧдмасям ... . Урок вылын босьтӧм тӧдӧмлунъясыс миянлы зэв ёна ковмасны водзӧ олӧмын. Сы вӧсна ми пыдди пуктам ... да ... урок. Миян радейтана велӧдысь ... тушаа, ... юрсиа, ... синъяса. ... урокъяссӧ нуӧдӧ стрӧга, а збыльвылас сійӧ зэв шань, мелі, нюмсера. Кор урок вылын мыйкӧ оз артмы, ... пыр и воас отсӧг вылӧ. Некор оз вид, кор мыйкӧ он гӧгӧрво. А выль пӧв ставсӧ висьталас. Вот кутшӧм миян радейтана велӧдысь.

137 удж. Сетӧм кывтэчасъяс отсӧгӧн лӧсьӧд школа йылысь текст.

Миян школа.

Вель ыджыд, сулалӧ сикт шӧрын, джуджыд гӧра вылын, веж сад пиын, медыджыд керка, ыджыдысь-ыджыд ӧшиньяса, стенъясын ӧшалӧны, велӧдчан вежӧсъяс, лыддьысян жырйын, нуӧдсьӧны кружокъяс.

138 удж. Лыддьы да вуджӧд. Висьтыслы сет ним. Содтав лӧсялана кывбердъяс.

Быттьӧ дзик на неважӧн воисны войвылӧ ... да ... лэбачьяс — турияс. А со найӧ бӧр нин лэбӧны ... муясӧ.
Видзӧдан турияслысь лэбӧмсӧ, кылан ... местаяскӧд прӧщайтчӧмсӧ, и сьӧлӧмыд вӧрзьылӧ.
Турияс лэбӧны выліті. ... голяяссӧ нюжӧдӧмаӧсь водзӧ. Кымын лун да вежон налы ковмас шенасьны бордъяснас, венласьны ... тӧвъяскӧд, терпитны ... зэр. Кымын кар да сикт вомӧн лэбзясны турияс. Уна сикас вӧръяс, юяс, степъяс аддзыласны ... туй вуджигӧн. Унаысь ковмылас шойччыны, коллявны ... войяссӧ.
Аддзысьлытӧдз, турияс!

И. Коданёв серти

Отсӧг вылӧ кывъяс: шоныд, мича, ыджыд, тӧдса, паськыд, вына, вӧсньыдик, кӧдзыд, вына, кузь, арся, пемыд.

139 удж. Кадакывъясӧ содтав колана суффиксъяс тшӧктан формаын.

Черинянь.

Шоныд ваӧ гудрал... дрожжи. Содт... сов, стӧкан джын сакар. Кисьт... пызь кык кило гӧгӧр, бура гудрал... . Сэсся содт... стӧкан тыр сывдӧм вый и коль... шоныдінӧ 3–4 час кежлӧ, медым кыптас. Артмӧм нянь-шомсӧ юк... кык пельӧ, а сэсся вӧсньӧд... ӧти сантиметр кызта сӧчӧнӧдз. Сӧчӧн шӧрас пуктал... водзвыв дасьтӧм чери, солал..., резышт... сывдӧм выйӧн. Сӧчӧн бокъяссӧ ӧтлаӧд... чери вывтіыс. Черинянь вермас лоны и восьсаӧн. Пӧжал... пачын либӧ духовкаын. Пачысь кыскӧм бӧрас чериняньсӧ мавт... выйӧн.

140 удж. Гиж текстсӧ, комиӧд кадакывъяссӧ.

Ті (не знаете) Кукрыниксы художникъяс йылысь? Найӧс (звали) Михаил Васильевич Куприянов, Порфирий Никитич Крылов да Николай Александрович Соколов. Тайӧ куим художникыс (работали) ӧтлаын 60 во сайӧ. Налӧн сатирическӧй серпасъясыс стӧча да веськыда (изображают) быд лёктор. Та кындзи художникъяс (рисовали) и вӧр-ва, и йӧзӧс.

141 удж. Гиж кадакывъяссӧ кольӧм шыпасъяс содталӧмӧн. Гӧгӧрвоӧд кадакывъяслысь гижанногсӧ.

Прӧщай...чыны, пили...чыны, мичмӧ...чыны, шой...чыны, во...чыны, со...чыны, коль...чыны, бергӧ...-чыны, воӧ...чыны, мӧр...чыны, мы...чысьны, вӧ...чыны, кур...чыны, велӧ...чыны.

Аддзы кадакыв, коді гижсьӧ кык ногӧн. Стӧчмӧд вежӧртасъяссӧ. Лӧсьӧд наӧн сёрникузяяс.

142 удж. Гиж текстсӧ скобкаяс восьтӧмӧн.

Небыд тӧв лунвывсянь (пӧльтны). Шонді яръюгыда (дзирдавны). Лым (ляпкавны, чинны). Шоръяс (визувтны) туйӧд. (Мыччысьны) медводдза коръяс. Гӧгӧр ставыс (ловзьыны). Ми (лолавны) сӧстӧм сынӧдӧн, (нимкодясьны) тувсовъя лунӧн.

143 удж. Сет соссяна вочакыв.

1. Ме ола сиктын (карын).
2. Тэ радейтан дыр узьны.
3. Талун ывлаын зэрӧ.
4. Ми ворсам йӧрын.
5. Ті мунанныд вӧрӧ.
6. Ёртъясыд мунӧны Из гӧраясӧ.
7. Челядь бура тӧдӧны правилӧяс.
8. Велӧдысьяс гӧгӧрвоӧны миянӧс.

144 удж. Лыддьы сёрникузяяссӧ. Вочавидз юалӧмъяс вылӧ. Гиж локтан када кадакывъяс.

Тувсов луныд во чӧж вердас. Сырчик вӧсни кокнас ю вылысь йисӧ чегъялас. Тулысын вежон зэрас, да лунӧн косьмас. Ракаяс кравзӧны — шондӧдас. Шонді выліті ветлӧ — регыд ю воссяс. Тулысын кӧ узян, арын шогӧ усян.

1. Тайӧ шусьӧгъяс, казялӧмторъяс али нӧдкывъяс?
2. Мыйла тэ тадзи чайтан?

145 удж. Вуджӧд текстсӧ роч кыв вылӧ.

Саридз сайысь воис варов тулыс. Кутіс сійӧ вӧтлыны дзор юрсиа тӧлӧс. Лым толаяс заводитісны ляпкавны, топавны. Керка вевтъяс вылысь тёпкӧ-виялӧ эзысь войтва.
Но виччысьтӧг войвывсянь уськӧдчис кӧдзыд тӧв, шеныштіс паськыд борднас. Повзисны войтъяс, топӧдчисны ӧта-мӧд бердас, и артмисны йинёньяс.

146 удж. Лыддьы кывбур юкӧнсӧ да висьтав, мыйӧн лоӧны тӧдчӧдӧм кывъясыс: синонимӧн, антонимӧн, омонимӧн.

Мый кӧть сёрнит,
Мый кӧть висьтав,
Мый кӧть гарав,
Мый кӧть шу,
Сӧмын лёк кывйӧн эн лысьт тэ
Видны ассьыд чужан му.

А. Ванеев

СОДТӦД. ПРИЛОЖЕНИЕ

Ъ да Ь гижӧм.
чорыд согласнӧй бӧрын Ъ е, ё, ю, я водзын
небыд согласнӧй бӧрын Ь -яс водзын
гласнӧй, й бӧрын Ъ Ь -яс водзын

вӧръяс, медъён
низьяс, пасьяс
йӧраяс мойяс

І да Э гижӧм.

І ,Э
Д шонді, дэбыд
З зіль, зэв
Л вӧлі, лэбач

Н кӧні, нэм
С сідз, сэтӧр
Т ті, тэрыб

Лыдакывъяс гижам:

ӧтлаын (сложнӧй лыдакывъяс)

70 — 90
сизимдас
кӧкъямысдас
ӧкмысдас

200 — 900
кыксё
куимсё
нёльсё
витсё
квайтсё

торйӧн (кывтэчаса лыдакывъяс)

11 — 19
дас ӧти
дас кык
дас ӧкмыс

21 — 29
кызь ӧти
кызь кык
кызь ӧкмыс
и сідз водзӧ

Морта нимвежтасъяс
асалан, босьтан, сетан вежлӧгъяс серти вежлалӧм.

Нимтан вежлӧг (Именительный падеж)
ме я
тэ ты
сійӧ он, она, оно
ми мы
ті вы
найӧ они

Асалан вежлӧг (Родительный падеж)
менам у меня, мой, моя, моё, мои
тэнад у тебя, твой, твоя, твоё, твои
сылӧн у него, у неё; его, её
миян у нас, наш, наша, наше, наши
тіян у вас, ваш, ваша, ваше, ваши
налӧн у них

Босьтан вежлӧг (Притяжательный падеж)
менсьым у меня, мою, моего
тэнсьыд у тебя, твою, твоего
сылысь у него, у неё; его, её
миянлысь у нас, наш, нашу, наше
тіянлысь у вас, ваш, вашу, ваше
налысь у них

Сетан вежлӧг (Дательный падеж)
меным мне
тэныд тебе
сылы ему, ей
миянлы нам
тіянлы вам
налы им

Роч предлогъяс да коми вежлӧг суффиксъяс.

Роч предлог
у
с
на
без
за
в
из
к
от
до
по

Коми вежлӧг суффиксъяс
Пример вылӧ

-лӧн (принадлежность)
велӧдчысьлӧн удж

-лысь (беру, читаю...)
босьті батьлысь

-кӧд (одушевлённые имена существительные)
ворса канькӧд

-ӧн (неодушевлённые имена существительные)
сёя паньӧн

-ӧн (еду на чём-либо)
муна автобусӧн

-тӧг
локтіс уджтӧг

-ла (с целью)
муна няньла

-ын (место)
велӧдча школаын

-ӧ (захожу, иду, сходил ...)
муна гортӧ

-ысь (выхожу, сделано, играю в игру...)
пета классысь, вӧчис пуысь, ворсам футболысь

-лань (направляюсь)
муна музейлань

-сянь
воис воксянь

-ӧдз
мунам Кировӧдз

-ті
кывтӧ юті

-ӧд
мунӧ туйӧд

-ысь (по какому-либо предмету)
коми кывйысь тетрадь

КЫВКУД

А

аддзысьлӧм — встреча
анча — норка
артасьны — считать
артмыны — образоваться
ас — свой, собственный
аслад — твой, твой собственный
аслам — мой, мой собственный
аслас — его, её собственный
аскылӧм — настроение
аслыспӧлӧс — своеобразный
аслыссикас — разнородный, специфический, оригинальный
асмогасянін — туалет
аснога — своеобразный
асныра — своенравный, упрямый
асруа — своеобразный, со странностями
ассяма — своеобразный
асык — дуга

Б

бадь — ива
биа висьӧм — горячка
бокын — возле
бӧрйыны — выбрать
бузгыны — журчать
бурдӧдны — лечить
бурдӧдчанін — медпункт
бурдӧдчыны — лечиться
буретш — как раз (здесь: именно)
бус — пыль
быдмыны — расти
быдтас — воспитанник

В

варгыль кока — косолапый
вартчыны — плавать
вевттьыны — укрыть
вежа — святой
вежай — крёстный
вежань — крёстная
вежӧдны — 1) зеленеть; 2) освятить
вежӧртӧ — означает, значит
вежӧртас — значение
вежӧс — комната
векни, векньыд — узкий
велӧдчан вежӧс — учебный кабинет
велӧдчанін — школа, учебное заведение
вермасьӧм — вольная борьба
вермӧм — достижение, успех
весавны — почистить
веськӧдлысь — управляющий
веськӧдлысьлӧн вежӧс — кабинет директора,
руководителя
веськыд — честный, прямой
веськыдвылын — справа
весьтын — над
ветлыны — сходить, съездить
видзны — охранять, беречь
видзӧм — охрана
видзысь — хранитель
видлыны — померять
визувтны — течь
визяорда — бурундук
винёв — гибкий
вирич — теплица
висьӧм — заболевание
вичко — церковь
вичкоса — церковный
вичмыны — достаться
виччысьны — ждать
виччысьтӧмтор — неожиданность
воййыв турун — иван-чай
водзын — впереди
войвыв — север (северный)
войтавны — капать
войтва — капель
вомидз — сглаз
воссьыны — открываться
вотчыны — собирать грибы, ягоды
воча — напротив
вӧзйӧм — реклама
вӧлӧга — пища
вӧр ді — лесной остров
вӧрзьыны — тронуться
вӧркань — рысь
вӧрпа — дикое (лесное) животное, зверь
вӧрпорсь — кабан
вуграсьны — рыбачить, ловить рыбу
вуджӧдчыны — переводить
вузӧс — товар
вузавны — продавать
вузасьны — торговать
вузасьысь — продавец
вузасянін — магазин
вундавны — резать
вурд — выдра
вылӧ донъявны — высоко оценить
вылльӧв — простокваша
вылын — на
вын-эбӧс — сила

Г

гажӧдчыны — веселиться
гар — почка
гожйӧдчыны — загорать
гӧвкъявны — плавать, колыхаться
гӧгӧр — кругом
гӧнтор — пух, волосы
гӧрны — пахать
гӧсьт — гость
гӧтыр — жена
гӧтыра — женатый
град йӧр — огород
гудравны — мешать
гылавны — опадать

Д

дасьтыны — приготовить
дасьтысьны — готовиться
двӧйни — двойняшки, близнецы
джодждӧра — половик
дзескыда олысь — малоимущий
дзольгыны — журчать
дзоридзавны — цвести
дзуртан турун вуж — родиола розовая
дінын — у
дон — цена
донъялан пас — отметка
дорын — у
душник турун — мята

Е

еджыд гоб — белый гриб
ельдӧг — груздь
ен ув пельӧс — передний (красный) угол
енэжтас — горизонт

Ё

ёг — мусор
ёг турун — сорняк
ёль — лесной ручей
ён — сильный
ёрны — слепить
ёсь гыжъя — с острыми когтями
ёсь пиня — с острыми зубами

Ж

жов пу — калина
жургыны — журчать, гудеть
жыр — комната

З

заводитчыны — начинать
заптыны — заготавливать
зарни — золото, золотая
зільӧмӧн — старательно
зільны — стараться
зык — ссора
зыртӧм — тёртый
зыртны — натереть

И

идзас — солома
идравны — убирать
индыны — указывать
инмӧдчыны — прикасаться
исерга — серьги
исласьны — кататься
ичинь — тётя со стороны мамы

Й

Йӧввыв — Масленица
йӧзкостса — народный
йи кылалӧм — ледоход
йирны — грызть

К

калган — лапчатка прямостоящая
каналан — государственный
каналан пасъяс — государственные символы
канму — государство, страна, республика
киӧн вермасьӧм — армвреслинг
киподтуй — умение
киськавны — поливать
козин — подарок
козьнавны — подарить
коллявны — проводить
кольтусь — орех
коми кыв вежӧс — кабинет коми языка
корны — пригласить
кослунъя — постный
костын — между
котыр — семья
котыртны — организовать
кӧдзны — посеять
кӧйдыс — семя
кӧр — 1) вкус; 2) олень
кӧрталӧм — завязанный
кӧртдой турун — тысячелистник
ку — мех
кужны — уметь
кузь — длинный
кузьта — длина
куйлыны — лежать
купайтчыны — купаться
кутны — держать, держаться
кушин — проталина
кушӧсь — голые
кывбур тэчысь — поэт
кывзысьны — слушаться
кывкӧртавны — подвести итог
кыйӧдны — выслеживать
кындзи — кроме
кыны — вязать
кыпыд — приподнятый, радостный
кыр — гора
кырсь — кора
кыскыштны — дёрнуть

Л

лавка — небольшой магазин
ладан турун — валериана
лапкор — лопух
ласича — ласка
личӧдны — облегчать
лов — душа
ловзьыны — воскреснуть
ловзян пас — знак оживления
лӧнь — спокойный
лӧсявны — подходить
лӧсялана — подходящий
лыа — песок, пляж
лыддьысянін — библиотека
лыддьысянкыв — считалка
лымвый — мороженое
лымъя — снежный
лыска — хвойный
льӧм — черёмуха
ляпкавны — мелеть

М

мавтны — смазать
мездыны — освободить, избавить
мездысь — избавитель
мичмӧдӧм вылӧ — для украшения
мичмӧдчантор — украшение
мичмӧдчыны, вӧччыны — наряжаться
мой — бобр
муслун — любовь
мути — бес, чёрт
мырпом — морошка
мырпом кляч — чашелистик морошки
мыссянін — умывальник
мыччыны — подать

Н

надзӧникӧн — медленно
небӧг лэдзанін — книжное издательство
нетшкыны — рвать
ниа — лиственница
низь — соболь
нималана — известный, знаменитый
нимкодясьны — радоваться, любоваться
нимкыв — заговор
нимлун — именины
нинпу — липа
нӧкъявны — заправить сметаной
ньӧбасьны — покупать
ньӧбасьысь — покупатель
ньӧбны — купить
ньыв — пихта
нюдз — гибкий
нюжавны — тянуться
нюр — болото
нявда — мокрица

О

об — тётя со стороны отца
овмӧдчыны — поселиться
овмӧс — хозяйство
овны — жить
озыр — богатый
оланін — жилище, жильё
оланінпас — адрес
оласног — образ жизни
олӧма — пожилой
олысь — житель
ордйысьӧм — соревнование
ордйысьны — соревноваться
оржы — тополь
орны — оторваться
орччӧн — рядом
отсасьны — помогать

Ӧ

ӧзтыны — зажечь
ӧнія — современный
ӧнӧдз — до сих пор
ӧтвылысь — вместе, совместно
ӧтдортны — недолюбливать, обижать
ӧтув оланін — общежитие
ӧшинь дӧра — занавес, штора

П

пажын кад — обед
пакула, вӧрса чай — чага
панны — затевать
паныд — перед
паныдалӧм — встреча
пасйыны — отметить
паськӧдчыны — расположиться
паськыд — широкий
пасьта — ширина
пасьтӧдны — одеть
патера — квартира
пелысь — рябина
пельк — аккуратный
пелькӧдны — наводить порядок
пельӧс — уголок
перымса пемӧсъяслӧн сер — пермский звериный стиль
петкӧдны — выносить
петкӧдчыны — выступать
петшӧр — крапива
печкыны — прясть
пинявны — ругать
пипу — осина
поз — гнездо
помасьны — закончиться
помтӧм-дортӧм — бескрайний
пӧдласьны — закрываться
пӧжӧм — томлёный
пӧжас — выпечка
пӧжасьны — печь
пӧжны — 1) припекать; 2) томить
пӧкъя кӧчан — цветная капуста
пӧрччысянін — раздевалка
пӧрысь — старый
пӧт — сытый
пражитӧм — жареный
проса рок — пшённая каша
пуӧм — варёный
пув кор — лист брусники
пудъясянкыв — считалка
пудъясьны — кинуть жребий
пуктыны турун — заготавливать сено
пурысь — проезд
пывсян — баня
пыдди пуктана — уважаемый
пыдди пуктӧмӧн — с уважением
пыдди пуктыны — почитать, уважать
пызь — мука
пыркӧдны — вытряхивать
пырӧдчыны — участвовать

Р

рам — спокойный
рас — роща
роз — гроздь
рӧсада — рассада

С

садьмӧдны — будить
сайӧдчыны — укрыться
саридз — море
серпасасянін — кабинет изобразительного искусства
сёян — пища, блюда
сёянін — столовая
сёян-юан — продукты
сёян-юан лыддьӧг — меню
сикӧтш — бусы
сины — желать
сісьмыны — гнить
содтыны — добавить
солавны — солить
сорас — салат, месиво, примесь
сорлавны — смешать
сӧстӧм — чистый
спортивнӧй зал — спортивный зал
стӧч — впору, как раз
судта — этаж
суйӧр — граница
суйӧр сайын — за границей
сук — густой
сулавны — нырять
сьӧкыдтор лэпталӧм — поднятие тяжести
сьӧлаоз — поленика
сьӧлӧм бурмымӧн — вдоволь
сьӧлӧм кылӧм — чувство
сьӧрын — с собой
сьыланін — кабинет музыки
сывны — таять
сынӧд — воздух
сырчик — трясогузка
сюрны — достаться
сюрӧс — основа
сяммыны — суметь
сярвидзны — быть рассыпанным

Т

теш — юмор
том — молодой
топӧдны — уплотнить, придавить
тӧв колльӧдӧм — проводы зимы
тӧвру — ветерок
тӧдмавны — узнать
тӧдмасьны — познакомиться, ознакомиться
тӧдчана — известный, знаменитый
тӧждысьны — беспокоиться
тӧзь — лабазник
тӧрича турун — пастушья сумка
тӧрны — влезать
тувччыны — наступить
тувъявны — забивать
тугъяса — с кистями
тулыснас — весной
тупу — дуб
турӧб — метель
турипув — клюква
тусяпу — можжевельник
тшап — важный, высокомерный, гордый
тшӧтшъя — ровесник
туявны — исследовать
туялысь — исследователь
тшынӧдӧм — копчёный
тырмытӧмтор — недостаток, ошибка
тырны — исполниться

У

уджалігмоз — работая
уджач — трудолюбивый
удитны — успеть
улича — улица
уличкост — переулок
улын — под
уль — сырой
уразнӧй турун — зверобой
урбӧж — хвощ полевой
урок лыддьӧг — расписание уроков
усьны — опадать, упасть

Ч

чегъявны — ломать
чолӧмавны — поздравить
чолӧмалӧм — поздравление
чӧж — в течение
чӧсмӧдлыны — угощать
чӧсмасьны — угощаться
чув — выдра
чужан лун — день рождения
чужны — родиться
чуймӧдны — удивить
чукӧртны — собирать
чуман — берестяная корзина
чунькытш — кольцо
чусмыны — потускнеть
чышкыны — вытирать

Ш

шайт — рубль
шег — баранья косточка (атрибут коми игры)
шемӧсмыны — удивиться
шогмыны — пригодиться
шойччан лун — выходной, день отдыха
шойччыны — отдыхать
шомйӧв — кефир
шӧрин — центр
шӧртуй — проспект
шӧрын — в середине
шуйгавылын — слева
шыблавны — разбрасывать
шыдӧс — крупа
шыдӧса турун — полынь

Ы

ыджда — величина
Ыджыд видз — Великий пост
Ыджыд лун — Пасха
ыжман — жимолость
ылӧдлыны — обмануть
ышӧдны — вдохновить

Э

эндыны — запустеть
эскыны — верить
эскысь — верующий
эшкын — одеяло

Ю

юмйӧв — йогурт
юмовтор — сладости

Я

ягсер — волнушка
яндысьысь — стыдливый, стеснительный

ЮРИНДАЛЫСЬ

ГОЖСЯ КАЗЬТЫЛӦМЪЯС
5-ӧд класса материал мӧдпӧвъёвтӧм ...................... 5–9
ГОЖСЯ ШОЙЧЧӦМ......................................... 10–17
Кадакывъясын ТЧ, ДЧ, ЧЧ тэчасъяс ..................... 10
Керанторъя, ылыстчан да воан вежлӧгъяс............. 12
АРСЯ КОДЗУЛА ПАС УЛЫН............................ 18–22
Ӧткодялан кывбӧръяс........................................... 20
ВЕЛӦДЫСЬ ЛУН............................................. 23–27
СЁЯН-ЮАН. СЁЯН-ЮАН ЛАВКАЫН.
СЁЯНІНЫН..................................................... 28–38
Могман вежлӧг..................................................... 31
Ӧтвывтан да торйӧдан вежлӧгъяс.......................... 37
ПАСЬКӦМ. ВУЗАСЯНІНЫН.............................. 39–49
Лыдакыв.............................................................. 41
Соссяна кадакывъяс.............................................. 45
ЧУЖАН ЛУН.................................................. 50–57
Кадакывлӧн тшӧктана форма артмӧм.................... 51
МЕНАМ РАДЕЙТАНА УДЖ. ВОРСӦМЪЯС........ 58–63
Петан вежлӧг....................................................... 58
МИЯН ВЕЛӦДЧАНІН....................................... 64–70
Кадакывйысь эмакыв артмӧм................................ 64
КОМИ РЕСПУБЛИКАСА КАНАЛАН ПАСЪЯС... 71–74
Нимвежтасысь кывберд артмӧм............................. 71
КОМИ РЕСПУБЛИКАСА НИМАЛАНА ЙӦЗ........ 75–80
Урчитанлӧн ӧткодялан да медвылыс тшупӧд.......... 75
ТУВСОВЪЯ ТӦЖДЪЯС..................................... 81–88
Кадакыв. Локтан кад............................................ 81
ТУВСОВЪЯ ГАЖЛУНЪЯС................................ 89–94
Морт-морта нимвежтасъяс.................................... 92
Подчинительнӧй кывйитӧдъяс............................... 92
ВӦР-ВАЛӦН БУРДӦДЧАН КОЗИНЪЯС............ 95–102
Степень петкӧдлысь урчитанъяс............................ 96
ВЕЛӦДӦМ МАТЕРИАЛ ВЫНСЬӦДӦМ........... 103–108
СОДТӦД ............................................................. 109
КЫВКУД .................................................... 112–126