Долыд олан кад (1997)

Долыд олан кад : коми челядькӧд уджалысь воспитательяслы отсӧг вылӧ пособие (Дзолюк). Сыктывкар: Сыктывкарса 2-ӧд номера пед. колледж, 1997.

2-ӧд номера Сыктывкарса педагогическӧй колледж

Дошкольнӧй образованиеын национальнӧй проблемаяс кузя научно-методическӧй лаборатория

ДОЛЫД ОЛАН КАД

Коми челядькӧд уджалысь воспитательяслы отсӧг вылӧ пособие

Сыктывкар 1997 во

Лӧсьӧдысьяс:

Рочева Ольга Ивановна

Остапова Зоя Васильевна

ВОДЗКЫВ

Дона воспитательяс! Тайӧ пособиесӧ дасьтӧма коми детсадъясын удж нуӧдны отсӧг вылӧ. Татысь ті верманныд бӧрйыны кывбуръяс, шусьӧгъяс да нӧдкывъяс, кодъясӧн позяс вӧдитчыны челядьӧс вердігӧн да водтӧдігӧн, пасьтасигӧн да гуляйтӧдігӧн, ворсігӧн да уджалігӧн, мыссигӧн да зарядка вӧчигӧн. Эмӧсь пособиеын ворсӧмъяс да сьыланкывъяс, кывпесанъяс да рифмуйтӧм задачаяс, кодъясӧс позьӧ пыртны челядькӧд быдлунъя уджӧ.
Чайтам, мый уна выльтор ті тӧдмаланныд роча-комиа кывчукӧрысь да видланныд пыртны асланыд сёрниӧ челядькӧд удж нуӧдігӧн.
Сиам тіянлы ыджыд вермӧмъяс!

ФИЗЗАРЯДКА НУӦДІГӦН.

* * *

Физзарядка он кӧ вӧчӧй,
Шуам тіянлы ми стӧча,
Быд кӧдзыдысь кынманныд,
Да и ньӧжйӧ быдманныд...

...Мед кӧть жар, кӧть кӧдзыд,
Физзарядка вӧчам —
И ог висьлӧй ми,
Ёнӧсь кок и ки.

А. Ванеев.

* * *

Ӧти-кык,
Ӧти-кык —
Морӧс лов шытӧ
Эн пык.

Куим-нёль,
Куим-нёль —
Асъя унзільыд
Оз коль.

С. Попов.

ЛЫДДЬӦДЛАНА ФИЗЗАРЯДКА

Чеччам чӧла
Шум ни зык.
Вӧчам тадзи,
Ӧтик-кык,
Ӧтик-кык,
Ӧтик-кык.
Вӧчам тадзи,
Ӧтик-кык.
Коскӧ пуктам
Кыкнан ки,
Недыр чеччалыштам
Ми,
Медым ньӧти
Мудз эз коль:
Куим-нёль,
Куим-нёль.
Ӧні лолыштамӧй
Быдӧн.
Ме ног, челядь,
Вӧчӧй вай.
Вит и квайт,
Вит и квайт.
Ме ног, челядь,
Вӧчӧй вай.
Медым ньӧти
Мудз эз коль:
Вит и квайт,
Вит и квайт.

Кияс нюжӧдамӧй
Тадзи,
Сэсся лажыньтчамӧй
Надзӧн.
Сувтам:
Сизим и кӧкъямыс.
Бара лажыньтчамӧй
Надзӧн,
Сувтам:
Сизим и кӧкъямыс.

Физзарядка вӧчам
Водзӧ,
Киӧн судзӧдчылам
Джоджӧдз
Молодечьяс, ай да
Класс
Помаламӧй:
Ӧкмыс-дас
Молодечьяс, ай да
Класс.
Помаламӧй:
Ӧкмыс-дас.

Н. Щукин.

МЫССИГӦН.

* * *

Югыд ва, сӧстӧм ва,
Мыськы чужӧм вылысь са,
Медым дзирдаліс син,
Медым югъяліс пинь,
Медым нюмъяліс вом,
Ачым вӧлі ён.

В. Савин.

* * *

Кияс, кияс,
Ме тіянӧс мыська,
Майтӧгӧн майтӧгала,
Ваӧн пожъяла,
Киным сӧстӧм миян
Ӧні пуксям сёйны ми.

* * *

Тӧдмаламӧй ставӧн вайӧ:
Збыль-ӧ миян Миша тайӧ?
Чужӧм-рожа бусӧсь, саӧсь,
Быттьӧ некӧн абу ваыс...

Тадзнад кутшӧм лоӧ олӧм?
Пыр жӧ мыссьыны, дерт, колӧ.
Мыссис, мыссис, любӧ — видзӧд,
Лои важсьыс шань да мича...

А. Уваров серти комиӧдіс Н. Щукин.

* * *

Майтӧг босьт да бура мыссьы,
Весав пиньяс, пожъяв вом.
Сӧмын пелька олӧм помысь
Лоан гӧгӧрбок тэ ён.

Ю. Попова.

* * *

Ваӧй, ваӧй, мыськы менсьым чужӧмӧс,
Мед синъясӧй югъялісны,
Мед чужӧмӧй гӧрдӧдіс,
Мед сераліс вомӧй и курччасис пиньӧй.

* * *

Еджыд байдӧг
Сёйис майтӧг.
— Вильыд майтӧг, —
Кайтіс байдӧг.

Кывпесан /Е. Козлова./

* * *

Нӧдкыв:

Ме мича, шыльыд, а синъяс полӧны.
(майтӧг).

* * *

Шусьӧг

Майтӧгыд руд да мыськӧ еджыда

СЁЙИГӦН

* * *

Сёя кӧ ме йӧв,
Ворса шы ни тӧв.
Сёя кӧ ме рок,
Удал лоас кок.
Сёя кӧ ме нянь,
Быдма ён да шань.
Сёя кӧ ме шыд,
Лоа зэв ыджы-ыд!

Ю. Попова.

* * *

Сёй вай, Машук, ассьыд роктӧ,
Дзик нин абу сійӧ пӧсь.
А то локтас попӧ тшыг,
Сёяс тэнсьыд рок и шыд,
Лоас тэысь сюсь да дока,
Тӧдӧмысь, и пелькджык кока,
Панласигад ордъяс тшук,
Сёй вай роктӧ, дона друг.

Н. Куратова серти.

ПАЖЫН.

Няня вайис пызан вылӧ
Яя шыд да чӧскыд нянь,
Киным ветлӧ улӧ-вылӧ,
Тасьті бердӧ гольскӧ пань.

Н. Мингалёва серти.

* * *

Веськыд киӧ босьтам пань,
Мӧдар киас босьтам нянь.
Сёям азыма пӧсь рок,
Юам юмов чӧскыд сок.

А. Лужиков серти.

КОДІ БУРА СЁЙӦ.

Коді бура сёйӧ,
Быдмӧ ён да ойӧс.
Вадорӧ кӧть вӧрӧ
Мунны сійӧ зіль.
Киыс-кокыс вӧрӧ,
Синъяссӧ оз тіль.

Коді лёка сёйӧ,
Оз тӧд, лун-ӧ, вой-ӧ
Узьӧ нисьӧ олӧ,
Нюжӧдӧма чуш.
Гортсьыс петны полӧ,
Нинӧмтор оз куж.

Коді ыджыд паньӧн
Сёйӧ шыдтӧ няньӧн,
Лунтыр тэкӧд ветлас,
Мудзӧмысь оз пов.

Коді сёйӧ-няргӧ,
Сійӧ жеб да варгӧс,
Туйвыв ёртыд вылӧ
Сійӧ оз и ков.

Г. Юшков.

* * *

Пуксьӧй пызан саяс чожа...
Но и жар жӧ таво гожӧм.

* * *

Медым дзоньвидзаӧн лоны,
Колӧ сёйны шыд да рок.
Сэки лоан сюсьӧн, ёнӧн,
Ветлас тэрыба зэв кок.

Е. Гилева.

ШУСЬӦГЪЯС:

Гречневӧй рокыд — мамным миян,
А рудзӧг няньыд — батьным миян.

* * *

Кӧлачсьыд уман, а няньсьыд — некор.

* * *

Рудзӧг няньыд кӧлачыдлы польӧ.

* * *

Совтӧг абу чӧскыд, а няньтӧгыд он пӧт.

* * *

Зэв ыджыд кыв: пасибӧ.

* * *

Керкаын кӧ оз ло нянь,
Олӧм некор оз ло шань.

* * *

Няньтӧгыд и маӧн он ло пӧт.

* * *

Шыд да рок медбур вок.

* * *

Сёяныс сизим кывйӧн сёрнитӧ. (Сэтшӧм чӧскыд).

НӦДКЫВЪЯС:

* * *

Куимысь луннас пасьтасьлӧ, а унджык кадсӧ сулалӧ пасьтӧг. Коді сійӧ ? (Сёян пызан).

* * *

Крыша улас нёль кок,
Крыша вылас шыд да рок. (Пызан).

* * *

Нёль пиня. Быд лун пызан сайын петкӧдчывлӧ, а нинӧм оз сёй. Мый сійӧ? (Вилки).

* * *

Ачым ог сёй, а быдӧнӧс верда. (Пань).

ПАСЬТАСИГӦН

КОДІ КРУКӦДЧӦ?

Ывла вылӧ тэрмасьӧмыс
Ваньлы помасьӧма лёка:
Веськыд кокас — шуйга кӧмыс,
Веськыд кӧмыс — шуйга кокас.

В. Лодыгин.

* * *

1. Ичӧт воклӧн
Кучик кӧмыс,
Кыкнан пӧлыс
Ӧткодь рӧма,
Кыдз нӧ тӧдас
Ичӧт вок,
Кодыс сылӧн
Веськыд кок!

2. Кӧмсӧ кӧмаліс,
Но гугӧн,
Дыр оз казяв,
Кодсӧ дзугас,
Мыйла кыкнан
Кӧмлӧн ныр
Бокӧ видзӧдӧны
Пыр.

С. Попов.

ВОКӦС КӦМАСЬНЫ ВЕЛӦДА.

Тупли пиӧ сюя кокӧс,
Бура кӧвсӧ зэлӧда.
Сэсся ассьым ичӧт вокӧс
Кӧмасьны тшӧтш велӧда.
Некор, шуа, кӧм эн сорав:
Тайӧ — шуйга кокысь,
Тайӧ — веськыд кокысь.
Друг кӧ зэрмас, лоӧ кӧдзыд —
Кӧмалам сэк боті:
Тайӧ — шуйга кокысь,
Тайӧ — веськыд кокысь...
Со ӧд кутшӧм лӧсьыд!

Е. Благинина. Комиӧдіс С. Куликов.

НӦДКЫВЪЯС:

* * *

Ӧти шырлӧн кык бӧж. (Нинкӧм кӧвъяс).

* * *

Пыран ӧти ӧдзӧс пыр,
А петан куим пыр.
Думайтан, мый петін,
Збыль вылас кӧ — пырин. (Дӧрӧм).

ВОДІГӦН

* * *

Ӧввӧ да люлю,
Мича шӧвк туглы
Ыджыда быдмыны,
Мамыслы отсасьны,
Чӧскыд узян ун,
Долыд олан кад.

БАЮ-БАЙ

Сьыланкыв тэд сьыла вай,
Ӧввӧ-ӧввӧ, баю-бай.
Ылын сьӧд вӧр шӧрын,
Оліс ёма-пӧчӧ вӧрын.
Кузь беддьӧн сійӧ пыр ветліс,
Кывзысьтӧм челядьӧс ӧктіс,
Буръяссӧ пӧ ме ог корсь.

Мем колӧны лёкъяс,
Лёкъяс да шванитчысьяс,
И нуа ылӧ-ылӧ вӧрӧ,
Пемыд сьӧд вӧр шӧрӧ.

З. Рогова.

ПӦРА УЗЬНЫ.

Пыр нин, ичӧт пиӧй,
Небыд вольпась пиӧ.
Мудзин: котралін лунтыр, —
Синмыд куньсяс пырысь-пыр.
Гажтӧм вӧт мед тэн эз усь,
Чӧскыд унмӧн бура узь.

П. Воронько серти комиӧдіс С. Куликов.

* * *

Узьӧ жӧ менам кагаӧй,
сьӧд синкыма аканьӧй,
(Лӧз синъяса аканьӧй)
Унмовсь, ичӧт ныв.

3. Шиликова.

ЧЕЛЯДЬКӦД УДЖАЛІГӦН

* * *

Ай да ми, ай да ми!
Уджысь оз пов миян ки.

* * *

Босьтча дай тшӧтш уджала
Быдӧнысь медудала!
 
Ю. Попова серти

* * *

Уджыс уна, кадыс мунӧ.

* * *

Коді кытчӧ кужысь,
Огӧ полӧй уджысь.

Г. Юшков.

* * *

Ичӧт Гелюк,
Уджав, уджав,
Коркӧй тэысь
Мастер чужас.

Э. Ванеев

* * *

Бать кодьыс жӧ, зэв зіль пи,
Быд удж вӧчӧ сылӧн ки.

3. Рогова.

ШУСЬӦГЪЯС:

* * *

Ӧтнад и из он вешты, а ставӧн ӧтув — гӧра путкыльтан.

* * *

Кымын унджык ки, сымын ӧдйӧ удж мунӧ.

* * *

Сёйны кӧ талун, а уджавны кӧ — аски.

* * *

Талунся уджтӧ аски кежлӧ эн коль.

* * *

Быд морт уджын тыдалӧ.

* * *

Ворсӧм ворсӧмӧн, а уджыд уджӧн.

* * *

Кӧн уна сёрни, сэн этшаджык удж.

* * *

Этшаджык больгы да унджык вӧч.

* * *

Ӧтпырйӧ унатор вӧчигӧн ни ӧти удж он помав.

* * *

Кӧні бура уджалӧны, сэні и унатор эм, а дышӧдчигад нинӧм абу.

* * *

Ӧткӧн уджалігад унатор он вермы вӧчны.

* * *

Бур делӧыд кык олӧм олӧ.

* * *

Ӧтчыд оз артмы, мӧдысь оз артмы, а коймӧдысьсӧ артмас.

* * *

Кык син дорысь нёль син бурджыка аддзӧны.

* * *

Ӧти уджалӧ, а куимӧн нянь куд видзӧны.

* * *

Сизимысь мерайт, ӧтчыд вунды.

* * *

Медым велӧдчыны радейтны удж, колӧ куим во, медым велӧдчыны дышӧдчыны — сӧмын куим лун.

* * *

Эн пов первой ӧшыбкасьыд, эн вӧч мӧдсӧ.

* * *

Быд ичӧт делӧ куж вӧчны ыджыд сямӧн.

* * *

Дыш мортлы пыр аски да аскомысь.

* * *

Коді оз уджав, сійӧ оз сёй.

* * *

Сёйӧмсьыд эн пов, а уджсьыд эн лӧгась.

НӦДКЫВЪЯС:

Сё кока, а сувтны оз вермы.
(рос, корӧсь).

Ичӧтик-ичӧтик зонка да пыр лабич увті котралӧ.
(рос).

Кык пом, кык круг, шӧрас тув.
(шыран).

ӦТУВЪЯ ОЛӦМ ЙЫЛЫСЬ

* * *

— Код нӧ горзӧ? Код нӧ равзӧ?
Али рака чукӧр кравзӧ?
Гашкӧ, гӧрдлӧ чань?
Али авзӧ кань?

Абу чань ни абу рака:
Бӧрдӧ Таня нима кага.
Бӧрдӧ да лёк горшӧн лӧвтӧ,
Платтьӧнас синвасӧ кӧвтӧ:
ы-ы-ы-ы-ы!...

Мый тэ лӧвтан, бӧрдысь Пома?
Бӧрдысь Пома, паськыд вома?
Ульсалӧмыд — ставыс бак,
Вылад вермас петны тшак.

В. Лыткин.

* * *

Вельмӧма Юра,
Бара нин дурӧ...
Юра, эн вай дур,
Сідзи абу бур!

Ю. Васютов.

* * *

Мый тэ больган,
Быттьӧ борган.

Ю. Попова.

* * *

Няньӧн-солӧн юксьӧ коді,
Шуда мӧвпъясӧн пыр водӧ.

А. Мишарина.

УР КОДЬ.

Миян пиыс ур кодь пельк.
Кӧть и абу сувтса пель,
Кӧть и абу пушыд бӧж,
Миян пиыс урысь чож!

И. Торопов.

УНА НОГ.

Миян Таня уна ног
Кужӧ шуны воча «ог»
А кор колӧ шуны «да»,
Артмӧ сэтшӧм сьӧкыда!

Г. Юшков.

Визув синма.

Визув синма быдмӧ Юра,
Ставсӧ аддзӧ вывті бура,
Но оз аддзы, синтӧг олӧ,
Мыйкӧ уджавны кӧ колӧ.

Г. Юшков.

ШУСЬӦГЪЯС:

* * *

Вӧв нёль кока и то сконъясьлӧ.

* * *

Мӧдсӧ аддзытӧдзыд медводз ас вылад видзӧдлы.

* * *

Эм сэтшӧм кыв, быттьӧ ма, а эм и зэв курыд турун кодь.

* * *

Сійӧн и кык пель, мед унджык кывны.

* * *

Вӧчин кӧ лёктор — буртӧ эн виччысь.

* * *

Синъяснад видзӧд, а киясыдлы вӧлясӧ эн сет.

* * *

Бурторйыд ачыс асьсӧ ошкӧ.

* * *

Ӧтлаад олігӧн и кык гырнич тармунлӧны.

* * *

«Эськӧыс» да «гашкӧыс» да «пӧыс» — куим чоя-вока.

* * *

Пельтӧм поплы куимысь оз звӧнитлыны.

* * *

Сизимӧн пӧ ӧтиӧс оз виччысьлыны.

* * *

Вомыс сизим ыж куысь вурӧма. (Больгысь морт йылысь).

* * *

Ӧти пӧлӧссӧ дасысь оз шулыны.

* * *

Ӧти вежоннас сизим пекнича.

* * *

Ставыслы аслас кад да места.

* * *

Горш мортлы век этша. Кымын уна эм, сымын уна колӧ.

* * *

Горш морт пыр видзӧдӧ курыштны.

* * *

Жалитны мыйкӧ бур, а шаньӧн лоны бурджык.

* * *

Важ тӧварышыд бурджык кык выль дорысь.

* * *

Лёк сылы, коді буртӧ некодлы оз вӧч.

* * *

Ачыд ов да йӧзыслы эн мешайт.

* * *

Асьтӧ эн ошкы, мед йӧзыс ошкасны.

* * *

Мый вугралан, войнас ӧмӧй понъяскӧд увтін?

ЫВЛА ВЫЛЫН ГУЛЯЙТІГӦН

Качай-самолёт.

Качай пӧвным лэччӧ-кайӧ...
— Ещӧ ӧддзӧдчыштам вайӧ!
Медым качай-самолёт
Вундӧ сынӧдыслысь от.

Морӧс пытшкын абу полӧм,
Тані смелӧн лоны колӧ.
Повзьӧ сынӧдын кӧ морт,
Сыысь артмас мӧй пилот?

В. Ширяев.

ӦШКАМӦШКА.

Ӧшкамӧшка
Енэж вылӧ
Ӧшйис зэрӧм бӧрас.
Дасысь лыддьылі нин,
Сылӧн
Сизим рӧм век сьӧрас.

П. Бушенев.

* * *

Дзирдалӧ шонді,
Нюмъялӧ вӧр,
Меліа шувгӧ
Сикт гӧгӧр вӧр.

М. Лебедев

* * *

Зэрыштіс и дугдіс,
Ывла гӧгӧр югдіс
Шонді гажа ӧзйис,
Ӧшкамӧшка ӧшйис.

О. Макарова.

* * *

Гожся кадӧ мича лунӧ
Кокни сьӧлӧм вылын
Небыд тӧвру, дзоридз уна...
Ывла вылыс сьылӧ...

В. Лыткин.

ШОНДІ.

Шонді — сійӧ гӧгрӧс пач,
Либӧ ыджыд-ыджыд мач.
Гашкӧ, сійӧ кӧвдум-нянь,
Либӧ рыжӧй пася кань?
Гашкӧ, зарни рӧма вый...
Сэсся ачыд думышт — мый...

В. Лодыгин.

ЙӦЛАТУРУН.

Мыйла, йӧла турун,
Уна платтьӧ вуран:
Первой вижӧс новлан,
Сэсся еджыд овлан?
Гӧн кодь кокни, небыд —
Пӧльыштан кӧ — лэбан.

Е. Серова серти.

НӦДКЫВЪЯС:

* * *

Емтӧг, сунистӧг дӧмас дӧмӧма.
(Сера мӧс)

* * *

Ыджыд, югыд, шоныд сійӧ.
Ылын да он босьт на киад.
(Шонді)

* * *

Шондіӧс сайӧдлӧ мышнас,
Пӧльыштас тӧв — пыр и пышъяс.
(Кымӧр)

* * *

Мый оз позь стен дорӧ сувтӧдны?
(Туй)

* * *

Ачыс кӧдзыд, а йӧзсӧ сотӧ.
(Петшӧр)

* * *

Сытӧг, эськӧ, эз вӧв олӧм,
Мусӧ, васӧ сійӧ шонтӧ.
Сылӧн нюмысь тэныд долыд,
Тайӧ миян зарни... (Шонді)

Н. Щукин.

* * *

Кор ме кола — йӧзыс виччысьӧны,
А кор ме локта — ставӧн дзебсьӧны.
(Зэр)

* * *

Сулалӧ гӧрд дӧрӧма Еремей,
Коді матыстчас, сійӧ и копыртчас.
(Оз).

* * *

Ю вомӧн ӧшйис карнан.
(Ӧшкамӧшка).

* * *

Гораа вачкылӧ, ёся горзӧ, а мый висьталӧ — некод оз гӧгӧрво.
(Гым).

* * *

Гожся войын турун пӧвстын
Уна югыд эзысь моль
Тӧлысь аддзӧ, но оз босьтав,
А вот шондіыд оз коль.
(Лысва).

А. Ванеев.

* * *

Нёль вок туй кузя мунӧны, ставныслӧн тошкыс бӧрас.
(Вӧвлӧн кокъяс да си чукӧр гыж улас).

* * *

Квайт кок, а гӧнитӧны ньӧжйӧджык нёльысь.
(Верзьӧма морт).

* * *

Уна рӧма мегыр ю вомӧн воськовтіс.
(Ӧшкамӧшка).

* * *

Видзьяс вылын лун и вой
Сулалӧны уна чой.
Синкым налӧн — еджыд,
Синъяс вижӧсь сэтшӧм.
(Катшасинъяс).

* * *

Уна ки, а кокыс ӧти.
(Пу).

* * *

Ӧти кока дозмӧр.
(Тшак).

* * *

Сьӧд воронко рӧдтӧ, а кык вожйыс век кольӧ.
(Ю да берегъяс).

* * *

Ӧта-мӧд выланыс найӧ
Видзӧдӧны сё во сайӧ,
Но оз ӧтласьны кык вок —
Некод мӧд дінас оз лок.
(Юлӧн берегъяс).

* * *

Кык вок водзас гӧнитӧны, кык борсяньыс вӧтӧдӧны, а вӧтӧдны оз вермыны.
(Телегалӧн кӧлесаяс).

* * *

Кык чой: гожӧмнас турунвижӧсь, ар кежлас ӧтикыс гӧрдӧдӧ, а мӧдыс сьӧдӧдӧ.
(Гӧрд да сьӧд сэтӧр).

* * *

Ме кык гӧгыля, кык сюра,
Сӧв ме вылӧ — ӧдйӧ тюра.
(Велосипед).

* * *

Куим вок: ӧти водзын,
А кыкӧн бӧрын гӧнитӧны,
Да ӧтисӧ вӧтӧдны оз вермыны.
(3 кӧлесаа велосипед).

* * *

Керка вылын кузь воропа кӧш.
(Катша).

* * *

Ачыс вӧсни, ачыс кузь, а турун вылӧ пуксяс да он аддзы.
(Зэр).

* * *

Кымын унджык сылысь босьтан,
Сымын сёйӧ ыджыдджык лоӧ.
(Гу).

* * *

Абу паськыд пасьтанас,
Но зато кузь кузьтанас.
Кӧні гуяс, кӧні ва,
Сэті пуысь вӧчӧма.
(Туй).

* * *

Гӧрд гӧгыль енэжын гӧглясьӧ.
(Шонді).

* * *

Ӧти чышъян улын нёль чой бӧрдӧны.
(Мӧс нёнь).

* * *

Сьӧд, но абу рака,
Сюра, но абу ӧш,
Квайт лапа, да ставыс гыжтӧм.
(Жук, гаг).

* * *

Зэрӧм бӧрын енэжтасӧдз
Ӧшйӧ джынъя мича асык.
Сизим рӧма ыджыд кӧшӧн
Васӧ юӧ...
(Ӧшкамӧшка).

* * *

Гожӧмын пасяӧсь,
Тӧлын пасьтӧмӧсь.
(Пуяс).

* * *

Кокыс абу, а мунӧ,
Синмыс абу, а бӧрдӧ.
(Кымӧр).

ШУСЬӦГЪЯС ДА ПРИМЕТАЯС.

* * *

Кымӧра асыв мича лун вайӧ.

* * *

Ӧшкамӧшка рытнас — бур поводдя водзын, ӧшкамӧшка асывнас — зэрас.

* * *

Рытнас зэв ёна чеччалӧны чиркъяс — бурлун водзын.

* * *

Асъя зэрыд — гӧсьт.

* * *

Шонді лэччигӧн кӧ нин усис лысва — аски бур поводдя.

КОР ТАЙӦ ОВЛӦ?

* * *

Сиктыс садьмис. Йӧзыс жуӧ —
Дыр оз узьны гожся кадӧ!
Мӧс видзысь со вӧтлӧ, нуӧ
Лудланьӧ колхознӧй стада. (Асылын).

М. Лебедев.

* * *

Чиркъяс садьмалісны борйын,
Кыдз пу вож нин ворсӧ корйӧн.
Садьмис Света, ичӧт ныв.
Нюмдіс сылы ывла выв. (Асылын).

А. Мишарин.

* * *

Шонді качӧ вылӧ,
Енэж лӧзысь-лӧз
Лунтыр видзьяс вылын
Турун пуктӧ йӧз. (Лунын).

А. Ванеев.

* * *

Ми кыркӧтш дорӧ мунам,
Веж турун ёрӧ син.
Том войтыр куртӧ-чӧвтӧ,
Зіль уджӧн видзьяс тыр. (Лунын).

* * *

Чӧскыд кӧрӧн гӧгӧр ӧвтӧ,
Быттьӧ кольмӧ весиг юр.
Мамӧ куртӧ, батьӧ чӧвтӧ,
А ми воккӧд новлам юр. (Лунын)

ГОЖСЯ ЛУНӦ.

Шонді ёна пӧжӧ...
Нюкыртчӧма кор.
Ытшкӧм турун косьмӧ,
Дзикӧдз ямӧ шор.

Гож сайясӧ челядь
Сайласьӧны пыр
Черияс моз гӧптын
Сялькӧдчӧны дыр...

В. Чисталёв.

* * *

Шонді пӧся вашъялӧ
Енэж шӧрын дыр.
Лэбач сьылӧм шыясӧн
Чужан муӧй тыр. ( лунын).

3. Шиликова.

* * *

Ловзьӧ-дзирдалӧ шонді енэжын,
Ломтысьӧ быттьӧкӧ би. (Лунын).

В. Лыткин.

* * *

Шондіыс дзирдалӧ, пӧжӧ,
Енэжыс пасьтала лӧз.
Идралӧ мичаӧн, вежӧн
Турунсӧ уджалысь йӧз.

Видз вылын куртӧны талун
Зэв уна баба да ныв.
Кыпыда удж мунӧ налӧн,
Лэбалӧ збой сьыланкыв. (Лунын).

М. Лебедев.

СЮРУК.

Мамӧ Сюрукнымӧс лысьтӧ,
А ми вильшасьны ог лысьтӧй,
Мед оз повзьы — олам чӧв.
Сюрук талун лудйысь, кыськӧ
Вайис уна-уна йӧв!... (Рытын).

Е. Козлов.

* * *

Дзебсис мудзӧм шонді
Эжва кыркӧтш сайӧ:
Ті пӧ, челядь котыр,
Гортаныд жӧ кайӧ. (Рытын)

В. Ширяев.

* * *

Шонді дзебис дон чужӧм,
Пырис шойччыны расӧ.
Рытыввылын со чужис
Алӧй кыалӧн асык. (Рытын).

Л. Палкин.

* * *

Видзьяс вылысь ори
Чирклӧн сьыланкыв.
Паськыд юяс дорысь
Челядь шы оз кыв. (Рытын).

С. Подоров.

СТАВӦН УЗЬӦНЫ.

Узьӧ ошпи, узьӧ слӧн.
Локтӧ унмыс курӧглӧн.
Узьӧ-вӧтасьӧ, зэв шань,
Ӧшинь вылын миян кань.
Сӧмын пармаын оз узь
Ӧтнас сувтса синма сюзь. (Войын).

Комиӧдіс А. Барто серти С. Куликов.

* * *

Ывла вылын пемыд,
Асылӧдз оз мун.
Сэтӧн, пемыд пиас,
Ветлӧдлӧ Кузь Ун! (Войын).

Г. Юшков.

* * *

Гӧгӧр лӧнис. Кыа рытыввылын —
Паськыд-паськыд донӧдӧм кӧрт лист.
Пукалӧны потшӧс вылын
Челядь чукӧр мудзӧсь ворсӧм мысьт. (Рытын).

П. Шахов.

* * *

Пуксьӧ шонді! Бӧрӧ коли лун.
Лэбач чукӧр узьны вӧрӧ лэбзис,
Кычипилӧн кутіс локны ун —
Чомйӧ сійӧ тэрмасьӧмӧн дзебсис.
Ӧти здукӧн лои гӧгӧр чӧв,
Бобув чукӧр кыськӧ лэбзис вывлань.
Лунся горыс быттьӧ эз и вӧв —
Сэтшӧм лӧньӧн лои гожся ывла. (Рытын).

А. Мальцева.

ЛОКТЫСЬ АСЫВ.

Шонді унзіль синсӧ кунис.
Рытыввылын — шӧвк гӧрд сунис.
Шонді шойччӧг вылӧ пырис —
Ворсӧм кусіс, сьылӧм бырис.
Важӧн кывтіс
Гажа лун.
Муяс вывті
Ветлӧ ун. (Войын).

В. Крюков.

* * *

Унмовсьӧ ывла выв, ланьтӧ:
Эштіс пӧ, тырмас пӧ, шань пӧ...
Му вылас ланьтӧма тӧв,
Шыасьлас сӧмын вой тӧв... (Войын).

В. Лыткин.

* * *

Зарни шонді пуксис,
Войтыр узьны водіс:
Кывтӧ эзысь тӧлысь.
Петук горзӧм кылӧ.

Войтыр уджъяс бӧрас
Узьӧ шоныд гортас... (Войын).

К. Герд серти комиӧдіс В. Лыткин.

РИФМУЙТӦМ ЗАДАЧАЯС

КЫК ПИ.

Миян мамлӧн кык пи:
Ыджыд воккӧд тайӧ ми.
Воклы дас кык регыд лоӧ,
А ме ичӧт куим воӧн.
(— Кымын арӧс меным?)

Г. Юшков.

ЙӦРЫН.

Мӧс да кукань, ыж да мегӧ.
Мегӧ сайын чошӧ легӧ.
Потшӧс вывсянь лыддьӧ кысӧ,
Кымынӧнӧсь йирсьӧнысӧ.

Г. Юшков.

* * *

Куим пышкай миян весьтын.
Куим — потшӧс вылын, эстӧн.
Кыкӧн пуксисны шор дорӧ.
Кымын пышкай ставыс лоӧ?

Комиӧдіс О. Рочева.

* * *

Уна менам чача,
Ош да руча-кӧча,
Кык машина,
Вертолёт,
Куим пыж да вездеход.
Ставыс кымын, лыддьӧй?
Ставсӧ пуктӧй пыдди.

О. Рочева.

КЫМЫН ВОК

Кымын чунь,
Кымын чунь,
Ӧтик киын тэнад
Сымын ар,
Сымын ар
Талун тыри тэныд.

Кымын кок,
Кымын кок,
Сера петушоклӧн —
Сымын вок,
Сымын вок
Тэнӧ шуӧ вокӧн.
— Кымын арӧс тыри зонкалы?
— Кымын вок сылӧн?

В. Власов.

ЧЕРИ КЫЙӦМ.

Талун чеччим
Водзсьыс водз,
Чери кыйим
Ме да вок.
Уна чери шедіс,
Видзӧд:
Ыджыд мык
И нӧшта ичӧт.
Сэсся ёкыш,
Сэсся ёді,
Пӧшти килограмма коді,
Сир на содты,
Оз кӧ мын,
Куим кельчи,
Ӧти сын...
Ок, и уна чери кыйим
Миян керкадорса тыысь!

П. Бушенев.

(— Лыддьӧй, кымын чери ми кыйим воккӧд?)

* * *

Меным ньӧти,
Тэныд ӧти,
Воклы кык
Со шедіс мык.
Ноко, висьтав,
Кымын чери
Мамӧ юква вылӧ
Керис?

З. Жижева.

* * *

Боря, Вася, Коля,
Лена, Маша, Оля.
Вотісны оз.
Тыртісны доз.
Кымынӧн вотісны оз?
Коді лыддьыны медчож?

3. Жижева.

* * *

Бара воис тувсов кад,
Ӧшинь улӧ пуктім сад.
Льӧмсӧ — кыкӧс, ӧти кыдз пу,
Куим пелысь, ӧти пипу.
Кымын быдмас тані пу,
Бура артышт, сэсся шу.

3. Жижева.

* * *

Батьӧ вӧчис вугыр шайт.
Кыйи кельчи быдса квайт.
Нӧшта шедіс мык
Меным мича — кык.
Шедіс на и сир —
Позьӧ вӧчны пир.
Кымын чери шедіс меным,
Артыштнысӧ тшӧкта тэныд.

3. Жижева.

* * *

Градйыс ёгӧн лои тыр
Ковмис весасьны лунтыр.
Уджалӧны со: Андрей,
Валя, Катя да Сергей,
Нина, Витя, Зоя, Нюра,
Кымын челядь? Артав бура.

О. Рочева.

* * *

Кролик Галялӧн дзик тыр,
Юкталӧ да вердӧ пыр.
Кымын кролик сылӧн?
Еджыд, сера, сьӧд да руд,
Со и тырӧма нин куд.

3. Жижева серти.

* * *

Кымын Олялӧн тан чачӧ?
Частӧ ворсӧ сійӧ мачӧн.
Эм кык акань, сера кань
Нӧшта качай сяма чань.
Дурпоп эм и петушок,
Зарни сорса гребешок.
Став чачаыс мича, бур.
Ставсӧ лыддин? Вот и бур!

3. Жижева серти

* * *

Кӧчиль кӧвдум пӧжалӧма,
Уна гӧсьтӧс коралӧма.
Локтіс Ёжик, воис Мой,
Лэбзис Пышкай, Бобув збой.
Кымын татчӧ гӧсьтыс воис,
Пызан сайын кӧвдум сёйис?

3. Жижева.

* * *

Кыкӧн воккӧд зэрӧм бӧрын
Час-мӧд тшак вотім-ӧ вӧрын.
Выя ельдӧг сюри нёль,
А кор вуджим визув ёль —
Нӧшта на со сюри квайт.
Кымын ставыс — висьтав вай!

3. Жижева серти.

* * *

Кымын-ӧ?

Петя пыртіс ӧти пес,
Кыкӧс пыртіс Дима!
Ӧти пес да кык пес —
Лоис нӧ кымын-ӧ?
(Ӧти дінӧ содтам кыкӧс, лоис куим).

* * *

Чикыш-математик
Уна зэв оз доль.
Куим..., нӧшта ӧтик.
Кымын лоӧ? (нёль).

П. Образцов.

* * *

Татшӧм артав тэ задача.
Куим утка. Ӧти гача.
Кымын тані утка
Пасьталасны юбка?

О. Рочева.

* * *

Вит руд каньпи,
Мурка-мам.
Кымын ставыс?
Артыштам!

Комиӧдіс О. Рочева.

* * *

Серпасала ме каньлысь чом:
Куим ӧшинь, кильчӧ пом.
Нӧшта ӧшинь — вылын,
Шонді пырӧм вылӧ.
Лыддьы ставсӧ ӧні,
Кымын ӧшинь тані?

Комиӧдіс О. Рочева.

* * *

Ӧтчыд ветлі вотны тшак.
Вотчи... мудзмӧн лои!!!
Сюри меным нёль уртшак,
Кыксӧ урлы коли.
Кымынӧс гортӧ вайи?

О. Рочева.

КЫВПЕСАНЪЯС:

* * *

Лэбӧ катша, лэбӧ рака,
Таво ар пӧ лоӧ тшака.
Тыр пӧ тшакӧн рас да яг.
Коді ветлас вотны тшак?

Г. Юшков.

* * *

Сюра мегӧ
бӧжыс легӧ.
Ӧти сюрыс
Регыд чегӧ
Люкасьӧмысла.

Г. Юшков.

* * *

Кык поп, кык вок.

Ю. Попова.

* * *

Кык кок, кык борд.

Ю. Попова.

* * *

Куим каньысь
Шыр оз пов
Он кӧ эскы,
Оз и ков.

Г. Юшков.

* * *

Ыджыд айӧ вӧрӧ кайӧ
Ыджыд нопйӧн мыйкӧ вайӧ.
Ыджыд мамӧ разьӧ ноп,
А сэн ыджыд еджыд гоб.

Г. Юшков.

* * *

Потшӧс вылын катша.
Потшӧс улын Катшӧ.
Йирӧ Катшӧ лы,
Оз сет катшалы.

Г. Юшков.

* * *

Бона помӧ
Мунӧ пон.
Бона помас
Багыр пом.

Г. Юшков.

* * *

Эжва кӧджын
Джуджыд буджӧд.
Буджӧдланьыс
Пыжа вуджӧ.

Г. Юшков.

* * *

Дзиръя дорын
Дзӧля чибӧ,
Сэтшӧм мича,
Но оз сибӧд.

Г. Юшков.

ПУДЪЯСЬӦМЪЯС:

* * *

Тірс-торс
Куим стӧкан морс
Он кӧ вӧдит,
Он и ворс!

* * *

Ӧтчыд мамӧ ньӧбис боті.
Кык лун видзи — сійӧ поті,
А мӧдсӧ пачын соті.

* * *

Ӧтик-мӧтик,
Кык куим.
Ме — тулан,
Тэ — кӧин.
Тури, тури,
Истӧг кок,
Кытчӧ кора,
Сэтчӧ лок!

* * *

Ӧтик, кык и куим,
Вӧрын олӧ кӧин,
Лэчыд пиня, гӧна
И, кӧнешнӧ,
Тшыг кынӧма.

* * *

Ӧтчыд-мӧдысь, ӧтчыд-мӧдысь,
Гуляйтны руд кӧчиль мӧдіс.
Петіс вӧралысь друг,
Лыйис кӧчильлы — бух.
Сӧмын рудыд эз сюр,
Пышйис кӧчильыд — тюр.

* * *

Пемыд вӧрӧ муна ме,
Кӧчиль паныдасяс мем.
Вая сійӧс гортӧ,
Пондам кыкӧн ворсны!

* * *

Пыра-пета,
Босьта-сета,
Тэныд нёльӧс,
Витӧд кольӧ.
Коді ичӧт —
Нёдздӧм ситеч,
Керка мыджӧд.
Ситеч косьтіс,
Ружье босьтіс,
Сэсся кодкӧ.
Бруткис-броткис —
Лыйис.
Коді ыджыд —

В. Лыткин.

* * *

Ӧтик-мӧтик,
Кык-мык,
Куим-муим,
Нёль-моль,
Вит-кит,
Квайт-майт,
Ӧкмыс-мӧкмыс,
Дас-пас,
Пес-чипас.

* * *

Ӧти,
Кык,
Куим,
Нёль,
Коз пу йылӧ ӧшйис коль,
Уна жӧ нин польтчис
Ыргӧн колокольчик —
Вывті ёна радлӧ ур,
Тӧвбыд тырмас сылы нур.

С. Попов серти.

КОДЛЫ ВИЧМИС КОЛЬ.

Ӧтик, кык, куим, нёль,
Коз пу йылысь усис коль,
Сійӧс нуис визув ёль,
Урлы немтор эз и коль.

И. Торопов.

* * *

Ӧтика, кыка,
Куима, нёля,
Вита, квайта,
Сизима, кӧкъямыса,
Ӧкмыса, даса,

* * *

Чипки, липки,
Круга пуля,
Нижна, верхна,
Краля кӧрӧб.

* * *

Ӧтик-мӧтик,
Кык-мык,
Куим-муим,
Нёль-моль,
Вит-мит,
Квайт-майт,
Сизим-мизим,
Кӧкъямыс-мӧкъямыс,
Ӧкмыс-мӧкмыс,
Дас-мас,
Кино вылӧ пыран пас,
Такӧ-вакӧ,
Кисель, квас,
Кино вылысь петан час!

* * *

— Кымын арӧс тэд тырӧ?
— Вит.
— 1, 2, 3, 4, 5.

РИФМАЯСЫСЬ ВОРСӦМ

* * *

Ӧти!
Бӧрти!
Кык!
Зык!
Куим!
Нуим!
Нёль!
Зёль!
Вит!
Кит!
Квайт-няйт!
Сизим-йизим!
Кӧкъямыс — кӧні сямыс?
Ӧкмыс — сьӧмыс!!!
Дас — бас!

Воспитатель челядькӧд тшӧтш рифма серти корсялӧ лӧсялана кывъяс.

КОМИА-РОЧА КЫВЧУКӦР.

Сӧвмӧдны — развивать
Ышӧдны — побуждать
Стӧчмӧдны — угочнить
Вынсьӧдны — закрепить
Мыджсьыны — опираться
Могмӧдны — нацелить
Мог — цель
Тӧдӧмлунъяс — знания
Ас гӧгӧрса — окружающие
Коланлун — необходимость
Колана ногӧн — так, как нужно
«С» шы вылын удж — работа над звуком «с»
Удж нуӧдӧм — процесс работы
Асшӧр удж — самостоятельная работа
Сёрни сӧвмӧдӧм — развитие речи
Шыяс шуалӧм — произношение звуков
Мӧвпавны (вежӧртны) — думать
Висьт лӧсьӧдны — составить рассказ
Сёрнитчыны — договориться
Юавны — спросить
Вочавидзны — ответить
Донъявны — оценить
Вылӧ донъявны — высоко оценить
Омӧля — слабо
Дивъя — удивительно
Дивӧ кодь — чудесный
Кывлӧн вежӧртас — значение слова
Юӧртны — сообщить
Содтыны — добавить, дополнить
Сетӧм удж — задание
Быдсяма пӧлӧс — разное
Козин — подарок
Йӧлатурун — одуванчик
Пӧлӧзнича — василёк
Катшасин — ромашка
Понтільгун — колокольчик
Дзоридз — цветок
За — стебель
Пышкай — воробей
Пыста, джиан — синица
Чавкан — галка
Вӧрчикыш, джыдж — стриж
Сырчик — трясогузка
Чикыш — ласточка
Каля — чайка

РӦМЪЯС.

еджыд — белый
лым еджыд — белоснежный
дзирдалан еджыд — блестяще белый
еджгов — беловатый
сьӧд — чёрный
смоль сьӧд — чёрный
шом кодь сьӧд — чёрный как уголь
са сьӧд — чёрный как сажа
сім сьӧд — чёрный
лӧз — синий
пемыдлӧз(сім лӧз) — тёмносиний
яръюгыд лӧз — яркосиний
кельыдлӧз — бледно-синий
сьӧлаоз рӧма — голубой
еджговлӧз — голубой
енэжлӧз — голубой, небесного цвета
гӧрд — красный
дон гӧрд — цвет красного каления
би кодь гӧрд — огненно красный
ӧмидзва рӧма — нежно малинового цвета
яргӧрд (пемыдгӧрд) — пурпурный
кыа кодь гӧрд — красный как заря
чим гӧрд — концентрированный	красный
югыдгӧрд — ярко-красный
кельыдгӧрд — бледно-красный
алӧйгӧрд — розовый
мугӧмгӧрд — бордовый
турунвиж — зеленый
веж — зеленый
лудвиж — травянисто-зелёный
козпу рой рӧма — цвет древесного мха
виж — жёлтый
шонді рӧма — солнечного цвета
син ёран виж — яркожёлтый
кельыдвиж — бледно-жёлтый
югыдвиж — яркожёлтый
вижгӧрд — оранжевый
ыргӧн — медный
зарни — золотой
кыа югӧр рӧма, зарни би — золотистого цвета
руд, чусмыд — серый
дзор, еджговруд — седой

МАТЕМАТИЧЕСКӦЙ РОЧА-КОМИ КЫВЧУКӦР.

количество — лыд
число — числӧ
счет — лыд, арт, тшӧт, арталӧм, тшӧтайтӧм, лыддьӧм.
цифра — лыдпас
подсчет — лыддьӧдлӧм
отсчет — торйӧдлӧмӧн лыддьӧм
количественный счет — лыд петкӧдлысь тшӧт
порядковый счет — места петкӧдлысь, места индысь тшӧт, сьӧрсьӧн-бӧрсьӧн лыддьӧм, дорвыв тшӧт
числительное — лыдакыв
количественное числительное — лыдакыв
порядковое числительное — дорвыв лыдакыв
прямой счет — лыдпасъяс колана пӧрадокӧн, веськыда лыддьӧм
обратный счет — лыдпасъяс бӧрӧн лыддьӧм
сколько? — уна-ӧ? кымын?
какой по счету? — лыд сертиыс кутшӧм?
который по счету? — лыд сертиыс кымынӧд?
единица — ӧти
по-одному, по-пять — ӧтиӧн, витӧн
равенство — ӧткодьлун
равное количество — ӧтмында, лыд сертиыс ӧткодь
неравное количество — абу ӧтмында, лыд сертиыс абу ӧткодь, лыд сертиыс торъялӧм
неравенство — торъялӧм
уравнивать неравные группы — ӧткодявны лыд серти торъялана
чукӧръяс
состав числа из единиц — числолӧн ӧтиясысь артмӧм
число два состоит из двух единиц: из единицы и единицы — кык артмӧма кык ӧтиысь: ӧтиысь и ӧтиысь
равнение — ӧтвесьтӧ / ӧти визьӧ / сувтӧм, ӧтвесьтаасьӧм
отношение — йитӧд
знак «плюс» + — содтан пас
знак «минус» − — чинтан пас
знак «равно» = — лоан пас
деньги — сьӧм
монета — кӧрт сьӧм, ыргӧн, эзысь сьӧм
рубль — шайт
копейка — ур
ценник — донпас
сравнивать — ӧткодявны, ӧтлааститны
приём наложения — ӧта-мӧд вылӧ пукталӧмӧн
прием приложения — орччӧн пукталӧмӧн
величина — ыджда
сравнять — ӧткодявны, рӧвняйтны
признак — торъялӧм, тӧдчӧдӧм
образец — видлӧг, пример
глазомер — синмӧн ылӧсалӧм
на глаз — ылӧсас
условный знак — вӧйпӧм пас, сёрнитчӧм пас
мера — муртӧс, мера, мерка
мера длины — кузьта мурталан мерка
круг — гӧгыль, круг
окружность — кытш
треугольник — куим пельӧса фигура
четырехугольник — нёль пельӧса фигура
многоугольник — уна пельӧса фигура
контур — мыгӧр, визьӧб
ориентировка в пространстве — места тӧдӧм
ориентировка во времени — кад тӧдӧм
календарь — лунпас
понедельник — выльлун, понедельник
вторник — мӧдлун, воторник
среда — шӧрлун, середа
четверг — нёльӧдлун, четверг
пятница — витӧдлун, пекнича
суббота — помлун, субӧта
воскресенье — вежалун, вӧскресенье
правило — индӧд
лето — гожӧм
зима — тӧв
весна — тулыс
осень — ар
январь — тӧв шӧр (кӧдзыд тӧлысь)
февраль — урасьӧм (чорыд тӧлысь)
март — рака тӧлысь
апрель — кос му тӧлысь (кос тӧлысь)
май — ода-кора тӧлысь
июнь — лӧддза-номъя тӧлысь
июль — сора (нинпу тӧлысь)
август — моз тӧлысь
сентябрь — кӧч тӧлысь (коргыласдыр)
октябрь — йирым, кор усян тӧлысь
ноябрь — вӧльгым, лым усян тӧлысь
декабрь — ӧшым (пашляк) тӧлысь

ЮРИНДАЛЫСЬ

Водзкыв ....
Физзарядка нуӧдігӧн .... 3
Мыссигӧн .... 4
Сёйигӧн .... 6
Пасьтасигӧн .... 8
Челядькӧд уджалігӧн .... 11
Ӧтувъя олӧм йылысь .... 13
Ывла вылын гуляйтігӧн .... 15
Кор тайӧ овлӧ? .... 20
Рифмуйтӧм задачаяс .... 24
Кывпесанъяс .... 28
Пудъясьӧмъяс .... 29
Роча-комиа кывчукӧр .... 33
Юриндалысь .... 39